Nunavut Tungavik Timeoyomi (NTI) Ikhivaotalik Aluki Kotierk okaktok uplomi ona Jose Amaujaq Kusugak Ilihaqtonut Ikayutaoyonik 2017-mi tokhikveoyomi taya akmaktok.
NTI-kot aetokneaktut malguknik Inoenaknik ilihaktuknik atuni 5-taositalamik ilihaotikhaenut ikayutikhanik ilihageagani ilitagiyaohimayoni ilihakpalikvikni okonani Inoet okaohenik ilihaotiniklo. Ilihaktut aheni ilihaotini ilaolaktut takupkaekpata ilaoniginik okonani ilihaktamiknit pivaligotinilo atokpaligotinilo Inoet ihomakhutaenik.
“Itkaomayaga hoektok Jose Kusugap akhugota pinahoginiganiklo ilipkamaenageagani Inoet ihomakhutaet ovuna ilihaknikut monagiyaganilo okaohiptiknut ihomakhutivut. Pipkaeyut umiga ilihaktonut ikayutinik okeotoagagat, NTI-kot ikayoktut Inoenaknik ilihateageagani ihageagiyaenik pikageagani Inoenaktut okaohikmik ihomakhutit aolaenageagani atoktaoloaknigani homilika Nunavumi,” okaktok Kotierk.
Ilaoyut ilihakpalikvet havakveoyut ilakaktut Nunavumi Okeoktaktomi Ilihakpalikvik ayogoekvikhalunet havakveoyut hivogani Kanatami. NTI-konit ihomaleoktit ihivgeokhineakut tukhiktutinik tikoakhilotiklo ilihaktonik ihomagilogit ilihaktaet, titigakhimayok onipkak, naonaeyaevikhalo okakatigilogit.
NTI-kot ihoakhaehimayut ilihaktonut ikayutikhanik havakatigivlogit Kusugatkot ilagohet piyagani hoekhimayup Jose Kusugaop inuyohet akhukhaeyotaohimageagani Inoenaknik. Ilageagotit hivonikhiyotit tukheotilo makpigat kahaktut NTI-kot kungealeogaeni kagitaoyami. Omikvikha tukheotit ilihaktonut ikayutikhanik ovani July 9-gokat 2017-mi.
