Pivalialigiyit Havakviit

Iniqhimaittuq Tugaalingnik Munaqhitjutighat Takupkaqtitauyughat NWMB-kunnut

Nunavut Tunngavikkut Timingat Angayuqqaannguangat James Eetoolook uplumi Inungnik naalagiaquhimayuq Iqalungni katimayunik taapkuninnga Nunavunmi Anngutighanik Munaqtit Katimayiit ihivriuqhinahuaqhutik iniqhimaittunik atauttikkuuqtut iqalughiuqnikkut munaqhiniqmut atuqtaghait tuugaalingnut tuniyauhimayuq Havakvianit Iqalliliqiyit Taryuliqiyillu.

 

Taamna iniqhimaittuq atuqtaghaq parnaiyaqtauhimayuq DFO-kunnit havaqatigiplugit NTI-kut, Aviktuqhimayumi Anngutighaliqiyit Katimayiit Nunallaanilu Anngutighaliqiyit kititaaqhimayunik aviktuiyumaplutik tuugaanut ihumagiplugit Inuit niqighaqhiuqnikkut pilaarutait anguniaqtittiyumaplutik niuviqtittiyumaplutiklu tuugaalingnik.  Taamna parnaiyaqtauhimayuq atuqtaghaat kititaaqhimayunit auyami anguniaqtittinahuat, malrungnik anguniaqtittivangniat nunallaanit, nutaaniklu naunaiqhitiniqmut atuqtaghait anguniaqtit.

 

DFO-kut iniqhinahuaqpaktut atuqtaghanik angiqtauyughaq NWMB-kunnit katimatjutigiplugit Inuit March-ngutillugu.  NWMB-kut ihivriuqhinahuaqtut hapkuninnga tuhaqvigiyumaplugit Inuit.  Taamna angiqtauhimagumi, DFO-kut ministangat kititaaqhimayunik niqighaqhiuqtittinahuaq imaalu nutaat hapkua takupkaqtitauniaqtut CITES-kunnut (Katimayiralaat Nunaqyuami Niuviqtittiniqmut Amiqnaqtunit Anngutighanit) katimagumik March, 2013-mi, iniqhimariiqlugit aippaagu anguniaqtaghat.

 

Kanatamiut kivgaqtiit talvani CITES-kut katimayunit takupkaqtittinahuat atuqtaghait nunaqyuamiutanut taimaa tuugaalgit munaqtauvaktut Kanatami imaalu ilitturipkailutik taimaa  nunaqyuami niuviqtittiniq ihuinaarutaulaittuq anngutighanut.

 

Malruk kivgaqtit tamangnit Aviktuqhimayumi Anngutighaliqiyit atauhiqlu Iniqniq katimaquyauniaqtut tamangnit aviktuqhimayunit Nunavunmi.  Naalaktittinahuat Iqalungni  July 24-26-milu.