ᐃᓅᔪᓐᓃᕐᓂᖓᓂᒃ ᐊᑏᒪ ᕼᐊᑦᓚᕆ
ᓴᒃᑯᑕᐅᑲᐅᑎᒋᔭᕆᐊᓕᒃ
ᓄᓇᕗᑦ ᑐᙵᕕᒃ ᑎᒥᖓ ᐅᒡᒍᐊᖅᑐᑎᑦ ᒪᒥᐊᑉᐳᑦ ᐃᓚᒥᓄᑦ, ᐱᖃᓐᓇᕆᔭᕐᒥᓄᑦ, ᐊᒻᒪᓗ ᓄᓇᖅᑲᑎᒥᓄᑦ ᐃᓅᔪᓐᓃᕋᑖᖅᑲᐅᔪᑉ ᐊᑏᒪ ᕼᐊᑦᓚᕆᑉ, ᐃᑉᐱᒋᔭᐅᑦᓯᐊᖅᑐᖅ ᓯᕗᓕᖅᑎ ᕿᑎᕐᒥᐅᓂ ᐊᒻᒪᓗ ᐊᑯᓂᐊᓗᒃ ᐃᓚᒋᔭᐅᓯᒪᓕᖅᑐᓂᖅ ᓄᓇᕗᑦ ᑐᙵᕕᒃ ᑎᒥᖓᑕ ᑲᑎᒪᔨᖏᖕᓄᑦ.
ᐊᑏᒪ ᐃᖅᑲᐅᒪᒋᔭᐅᓂᐊᖅᑐᖅ ᐊᖑᑕᐅᓪᓗᓂ ᓱᓕᔪᒃᑯᑦ ᐱᓕᕆᑦᑎᐊᖅᑐᒻᒪᕆᐅᖃᑦᑕᓚᐅᕐᓂᖓᓄᑦ ᓈᒻᒪᓈᙱᒃᑲᓗᐊᖅᑎᓪᓗᒍ ᐃᒻᒥᓄᑦ ᐊᒻᒪᓗ ᐅᖃᐅᓯᖃᕈᓐᓇᖅᐸᓚᐅᖅᑐᓂ ᐱᔾᔪᑎᖃᑦᑎᐊᖅᓱᓂ. ᐅᖃᐅᓯᖏᑦ ᐱᒻᒪᕆᐅᓪᓗᑎᑦ ᐅᖃᖅᐸᓚᐅᖅᑕᖏᑦ ᐱᕐᔪᐊᖑᕙᓚᐅᖅᑐᑦ ᐊᒻᒪᓗ ᑐᑭᖃᐅᑦᓯᐊᖅᑐᑎᑦ, ᐅᖃᐅᓯᖃᖃᑦᑕᓚᐅᕐᓂᖓᓄᑦ ᓇᒻᒥᓂᖅ ᓱᓕᔫᔾᔪᑎᒋᓪᓗᓂᒋᑦ. ᓴᙱᔪᒃᑯᑦ ᐊᔭᐅᕆᕙᓚᐅᖅᑐᖅ ᓴᙵᑦᑎᑦᑎᕆᓪᓗᓂ ᐃᓄᒃᑐᑦ ᐊᒻᒪᓗ ᐊᑐᖅᑕᐅᔫᒥᖃᑦᑕᖁᓪᓗᓂᐅᒃ, ᐱᓗᐊᖅᑐᒥᒃ ᓇᑦᓯᓕᖕᒥᐅᑎᑐᑦ, ᐊᒻᒪᓗ ᐃᓅᓯᓕᒫᖓᓂᒃ ᓴᐳᓐᓂᐊᖅᑎᐅᕙᑦᓱᓂ ᐃᓕᓐᓂᐊᕐᓂᕐᒥᒃ, ᐆᒪᔪᓕᕆᓂᕐᒥᒃ, ᐊᕙᑎᓕᕆᓂᕐᒥᒃ, ᐊᒻᒪᓗ ᐃᓄᐃᑦ ᐃᓅᓯᖓᓂᒃ.
ᐊᑏᒪ ᐃᓄᐃᑦ ᐃᓅᓯᓕᕆᔨᖏᓐᓄᑦ ᐊᒻᒪᓗ ᐃᓕᖅᑯᓯᓕᕆᓂᖏᖕᓄᑦ ᐱᕙᓪᓕᐊᑎᑦᑎᔩᑦ ᐅᖃᐅᔾᔨᒋᐊᖅᑏᑦ ᑲᑎᒪᔨᕋᓛᖏᓐᓂ ᐃᒃᓯᕙᖃᑕᐅᕙᓚᐅᖅᑐᖅ ᐊᒻᒪᓗ ᐱᖁᑎᕐᔪᐊᓕᕆᓂᕐᒧᑦ ᐃᒡᓗᓕᕆᓂᕐᒧᓪᓗ ᐅᖃᐅᔾᔨᒋᐊᖅᑏᑦ ᑲᑎᒪᔨᐊᓛᖏᖕᓄᑦ. ᑕᖃᔪᐃᑦᑑᓪᓗᓂ ᐃᖅᑲᓇᐃᔮᖃᖅᐸᓚᐅᖅᑐᖅ ᕿᑎᕐᒥᐅᑦ ᐊᕕᑦᑐᖅᓯᒪᓂᖓᓄᑦ, ᐊᒻᒪᓗ ᑕᒪᐃᓐᓄᑦ ᐃᓄᐃᑦ ᓄᓇᓕᓕᒫᕐᒥ ᐱᔪᒪᔭᖏᖕᓂᒃ ᐊᔭᐅᕆᕙᑦᑐᓂ. ᐃᓅᔪᓐᓃᕐᓂᖓ ᐃᑉᐱᓐᓇᕐᓂᐊᒻᒪᕆᑦᑐᖅ ᓄᓇᑦᑎᓐᓂᓕᒫᖅ.
