(ᐊᒃᑑᕝᕙ 30, 2025 – ᐋᑐᕚ, ᐋᓐᑎᐅᕆᔪ) ᓄᓇᕗᑦ ᑐᙵᕕᒃ ᑎᒥᖓ ᐊᒻᒪᓗ ᐃᓄᐃᑦ ᓯᕗᓕᖅᑎᖏᑦ ᐋᑐᕚᒦᑦᑐᑦ ᑕᒫᓂ ᐱᓇᓱᐊᕈᓯᕐᒥ, ᑲᓇᑕᑉ ᒐᕙᒪᖓᓂᒃ ᐃᓄᖕᓄᑦ−ᓯᕗᒃᑲᖅᑖᖑᔪᓂᑦ ᐱᖁᑎᕐᔪᐊᓂ ᑲᒪᒋᔭᐅᖁᔭᐅᓪᓗᑎᑦ ᓯᕗᓪᓕᐅᑎᑕᐅᖁᔭᐅᓪᓗᑎᑦ ᑲᓇᑕᒥ ᒐᕙᒪᒃᑯᓐᓄᑦ, ᐱᕐᔪᐊᖑᒻᒪᑕ ᑕᒪᒃᑮᓐᓄᒃ ᓄᓇᕗᑉ ᓯᕗᓂᒃᓴᖓᓄᑦ ᐊᒻᒪᓗ ᑲᓇᑕᒥ ᐅᑭᐅᖅᑕᖅᑐᖅ ᓇᒻᒥᓂᖁᑎᒋᔭᐅᓂᕋᕐᓂᖓᓄᑦ ᐊᒻᒪᓗ ᐅᓗᕆᐊᓇᖅᑐᒨᖅᑕᐃᓕᒪᑎᑦᑎᒍᑕᐅᔪᓐᓇᖅᑐᑎᑦ.
ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᑉ ᑐᖏᓕᐊ ᐹᓪ ᐃᕐᖓᐅᑦ, ᐅᑭᐅᖅᑕᖅᑐᒥ ᐱᓕᕆᐊᕐᓂᒃ ᐱᓕᕆᖃᑎᒋᔭᐅᔪᓄᑦ ᐅᐸᒍᑎᔭᐅᓚᐅᖅᑐᖅ, ᓯᕗᓕᖅᑎᐅᓪᓗᓂ ᐅᖃᖃᑎᒌᓐᓂᐅᔪᓂᒃ ᒐᕙᒪᑐᖃᒃᑯᑦ ᓯᕗᓕᖅᑎᖏᓐᓂᒃ ᐃᓚᐅᖃᑕᐅᓪᓗᑎᓪᓗ ᑲᓇᑕᒥ ᑲᑎᒪᓪᓗᑎᑦ ᐅᖃᓪᓚᒃᑎᐅᓪᓗᑎᑦ ᐱᐅᓴᓐ ᑲᑎᒪᕕᖓᓂ. ᑐᓴᖅᑕᐅᖁᔭᖏᑦ ᓱᖅᑯᐃᕐᓇᑦᑎᐊᖅᑐᑯᓘᓚᐅᖅᑐᑦ: ᑲᓇᑕᑉ ᐅᑭᐅᖅᑕᖅᑐᖓ ᓴᙱᓂᖓ ᓴᙱᔫᓲᖑᕗᖅ ᐃᓄᐃᑦ ᓴᐳᒻᒥᐅᓯᖅᓯᒪᒍᑎᑦ, ᓅᒍᓐᓇᖃᑦᑕᕈᑎᑦ ᐊᒻᒪᓗ ᓇᒻᒥᓂᖅ ᑕᑎᒋᖃᑦᑕᕈᑎᑦ.
“ᐱᕕᖃᕋᑦᑕ ᑲᓇᑕᓕᐅᕐᓗᑕ ᑲᑐᑎᓗᑎᒍᑦ ᐱᓕᕆᐊᑦ, ᓄᓇᕗᒻᒥ,” ᐅᖃᖅᑐᓂ ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᑉ ᑐᖏᓕᐊ ᐃᕐᖓᐅᑦ. “ᑐᓚᒃᑕᕐᕖᑦ, ᐃᒥᑦᑎᐊᕙᑦ, ᐃᑭᐊᖅᑭᔾᔪᑏᑦ ᑲᓱᖅᑎᕈᑎᖏᑦ, ᐊᖅᑯᑏᑦ; ᐊᑐᖅᑕᐅᓪᓚᕆᒃᑯᑎᑦ ᑭᓯᐊᓂ ᒪᑭᒪᑎᑦᑎᔪᓐᓇᖅᑐᑦ ᐃᓄᐃᑦ ᓄᓇᓕᖏᓐᓂ ᐊᒻᒪᓗ ᑐᙵᕕᒋᔭᐅᕗᑦ ᐅᑭᐅᖅᑕᖅᑐᖅ ᓇᒻᒥᓂᖁᑎᒋᔭᐅᓪᓚᑦᑖᖁᓪᓗᒍ.”
ᓄᓇᕗᑦ ᒐᕙᒪᖏᑦ ᐱᖃᑎᒋᔭᐅᓪᓗᑎᑦ, ᓄᓇᕗᑦ ᑐᙵᕕᒃ ᑎᒥᖓ ᓇᓗᓇᐃᔭᐃᓯᒪᕗᑦ ᑎᓴᒪᐅᔪᓂᒃ ᐃᓄᓐᓄᑦ−ᓯᕗᒃᑲᖅᑖᕈᑎᒋᔭᐅᔪᓂᒃ, ᐅᐸᓗᖓᐃᖅᓯᒪᑦᑎᐊᖅᑐᑦ ᓴᓇᔭᐅᒋᐊᓯᓗᑎᑦ ᐱᓕᕆᐊᑦ ᑕᒪᒃᑭᑦ ᐃᑲᔫᑎᖃᕋᔭᖅᑐᑎᑦ ᓄᓇᓕᐅᔪᑦ ᖃᓄᐃᑦᑕᐃᓕᓗᑎᑦ ᐊᒻᒪᓗ ᑲᓇᑕᑉ ᖃᓄᖅᑑᖅᓯᒪᓂᖓ ᐅᑭᐅᖅᑕᖅᑐᒦᒍᒪᓂᖏᓐᓄᑦ.
• ᕿᑭᖅᑕᕐᔪᐊᕐᒥ ᐃᑎᔪᒥᒃ ᑐᓚᒃᑕᕐᕕᒃ − ᐊᕐᕌᒍᑕᒫᑦ ᐅᓯᑲᖅᑕᕈᑎᖏᓐᓂᒃ ᐅᒥᐊᕐᔪᐊᒃᑯᑦ ᐊᑭᑭᓐᓂᖅᓴᐅᓕᖅᑎᑦᑎᒐᔭᖅᑐᖅ, ᓄᓇᕗᒻᒥ ᐃᖃᓗᓕᕆᓂᖅᑕᖃᑦᑎᐊᕐᓂᖅᓴᐅᓕᕐᓗᓂ, ᑲᓛᖡᑦ ᓄᓈᓐᓂ ᐅᓪᓗᒥᐅᔪᖅ ᓂᐅᕋᐃᔭᖅᑕᐅᓲᖑᒻᒪᑕ, ᓄᓇᑦᑎᓐᓂ ᐱᕈᖅᐸᓪᓕᐊᑎᑦᑎᓗᓂ, ᐊᒻᒪᓗ ᐱᕐᔪᐊᕌᓗᒻᒥᒃ ᐅᖅᓴᕐᕕᒃᑕᖃᕐᕕᐅᓕᕐᓗᓂ ᑲᓇᑕᒥ ᓯᑯᓯᐅᖅᑎᓄᑦ ᑕᓪᓗᕈᑎᑉ ᓱᓪᓗᓕᖓᓂ.
• ᐃᖃᓗᐃᑦ ᓄᒃᑭᒃᓴᐅᑏᑦ ᑰᒻᒧᑦ ᐆᒻᒪᖅᑯᑎᓕᐅᕐᓗᓂ ᐱᓕᕆᐊᖅ − ᐃᓇᖐᒐᔭᖅᑐᖅ ᐅᖅᓱᐊᓗᒃᓴᒥᒃ ᐊᑐᖃᑦᑕᕐᓂᕗᑦ ᓴᓗᒪᔪᒥᖔᖅ ᑰᒻᒧᑦ ᐆᒻᒪᖅᑯᑎᓕᐅᖃᑦᑕᓕᕐᓗᑕ, ᐆᒻᒪᖅᑯᑎᓕᕆᓂᕐᒧᑦ ᐊᑭᖏᓐᓂᒃ ᐊᑭᑐᓗᐊᕈᓐᓃᖅᑎᑦᑎᓗᓂ, ᐊᒻᒪᓗ ᐋᖅᑮᓗᓂ ᑕᑎᒋᔭᒃᓴᓂᒃ ᐊᑐᖅᑕᐅᖔᕋᔭᖅᑐᓂᒃ ᐅᖓᓯᑦᑐᒧᑦ ᐃᓕᓐᓂᐊᕐᓂᕐᒥᒃ, ᖃᕋᓴᐅᔭᖅᑎᒍᑦ ᐋᓐᓂᐊᖅᑕᐃᓕᒪᔾᔪᑎᓕᕆᔨᑕᖃᓕᕐᓗᓂ, ᐊᒻᒪᓗ ᑐᐊᕕᕐᓇᖅᑐᓕᕆᓂᕐᒧᑦ ᐊᒻᒪᓗ ᑲᓇᑕᒥ ᓴᐳᒻᒥᐅᓯᖅᓯᓂᕐᒧᑦ ᐱᖁᑎᕐᔪᐊᖅᑕᖃᓕᕐᓗᓂ ᓄᓇᕗᑉ ᓄᓇᓕᐸᐅᔭᖓᓂ.
• ᑭᕙᓪᓕᕐᒥ ᐃᒪᒃᑯᑦ ᐃᑭᐊᖅᑭᔾᔪᑎᓄᑦ ᑲᓱᕈᑎᖏᑦ − ᓄᓇᕗᒻᒥ ᓯᕗᓪᓕᐅᔪᖅ ᐱᓪᓚᑦᑖᕐᒥᒃ ᑲᓱᖅᑕᐅᓯᒪᓕᕐᓗᓂ ᑲᓇᑕᑉ ᓂᒋᐊᓄᑦ, ᓄᑖᕈᖅᑎᒐᒃᓴᒥᒃ ᐆᒻᒪᖅᑯᑎᓕᐅᕈᑕᐅᓯᓐᓈᖅᑐᒥᒃ ᒫᓂᑑᕙᒥ ᓄᓇᒃᑯᑦ ᐃᑭᐊᖅᑭᔾᔪᑏᑦ ᐃᓯᐊᕿᙱᓂᖅᓴᐅᑎᑦᑎᒐᔭᖅᑐᖅ ᐱᐅᙱᑦᑐᓂᒃ ᐊᓂᕐᓂᒧᑦ, ᐃᑲᔪᖅᑐᖅᑕᐅᓗᓂ ᖃᕋᓴᐅᔭᒃᑯᑦ ᐋᓐᓂᐊᖅᑕᐃᓕᒪᔾᔪᑎᓕᕆᔾᔪᑎᓂᒃ ᐊᒻᒪᓗ ᐃᓕᓐᓂᐊᕐᓂᕐᒥᒃ, ᐊᒻᒪᓗ ᓄᑖᕐᒥᒃ ᐱᕙᓪᓕᐊᔪᓕᕆᔾᔪᓯᖅᑕᖃᓕᕐᓗᓂ.
• ᖁᕐᓗᖅᑐᐊᕐᔪᒻᒥ ᑐᓚᒃᑕᕐᕕᒃ ᐊᒻᒪᓗ ᐊᖅᑯᑎᖓ − ᐊᕐᕌᒍᓕᒫᖅ ᐃᒪᕐᒨᕈᓐᓇᖅᑎᑦᑎᓂᖃᕋᔭᖅᑐᖅ ᑎᓂᑦᑕᖃᑦᑕᕋᓗᐊᕈᓂ ᐅᓕᑦᑕᖃᑦᑕᕋᓗᐊᕈᓂᓗ, ᒪᑐᐃᖓᓗᓂ ᐊᒥᓱᓂᒃ ᐊᑐᓲᕐᓂᒃ ᐱᕐᔪᐊᕌᓗᓐᓂᒃ ᓄᓇᒦᙶᖅᑐᓕᕆᒋᐊᓯᒍᓐᓇᕐᓗᑎᑦ ᐱᒻᒪᕆᐅᓪᓗᑎᑦ ᑕᒪᒃᑯᐊ ᑲᓇᑕᒥ ᓴᓗᒪᔪᒥᒃ ᐆᒻᒪᖅᑯᑎᓕᐅᖅᐸᓪᓕᐊᓕᕐᓂᖏᓐᓂᒃ, ᐊᒻᒪᓗ ᐅᖅᓴᕐᕕᒃᑲᓐᓂᐅᓕᕐᒥᓗᓂ ᑕᒫᓂ ᑕᓪᓗᕈᑎᐅᑉ ᓱᓪᓗᓕᖓᓄᑦ ᐊᖅᑯᑎᒥ.
ᐊᑐᓂ ᐱᓕᕆᐊᑦ ᓴᙵᑦᑎᕆᔪᑦ ᐅᑭᐅᖅᑕᖅᑐᑉ ᓄᓇᓕᖏᓐᓂ, ᐃᓄᓐᓄᑦ ᐃᖅᑲᓇᐃᔮᒃᓴᖃᕐᕕᐅᔪᓐᓇᓕᕋᔭᖅᑐᑦ, ᐊᒻᒪᓗ ᑲᓇᑕᑉ ᐅᑭᐅᖅᑕᖅᑐᖓᓂ ᓄᒃᑎᖅᑐᖃᕐᓂᖅᓴᐅᒍᓐᓇᖅᓯᓗᓂ ᐊᒻᒪᓗ ᐅᑭᐅᖅᑕᖅᑐᒦᓐᓂᖅᓴᐅᒍᑎᒋᔭᐅᓕᕐᓗᑎᑦ ᓇᒻᒥᓂᖁᑎᒋᔭᐅᓂᕋᕐᓂᖓᓄᑦ ᓴᙵᑦᑎᕆᓂᖃᕋᔭᖅᑐᑎᑦ.
ᓄᓇᕗᑦ ᑐᙵᕕᒃ ᑎᒥᖓᑕ ᐱᖁᑎᕐᔪᐊᓕᕆᓂᕐᒧᑦ ᐊᒻᒪᓗ ᐃᒡᓕᕆᓂᕐᒧᑦ ᐅᖃᐅᔾᔨᒋᐊᖅᑏᑦ ᑲᑎᒪᔨᕋᓛᖏᑦ ᑐᑭᑖᖅᑎᑦᑏᓐᓇᐅᔭᖅᑐᑦ ᐃᓄᐃᑦ ᓯᕗᓪᓕᐅᑎᖁᔭᕐᒥᓂᒃ ᐱᓕᕆᐊᓪᓚᑦᑖᕈᖅᑎᑕᐅᓗᑎᑦ, ᐊᔾᔨᒌᙱᑦᑐᒡᒍᑎᓂᒃ ᓲᕐᓗᒃ ᓄᑖᕈᖅᑎᒐᒃᓴᑦ ᐆᒻᒪᖅᑯᑎᓕᕆᓂᕐᒧᑦ ᐊᖅᑯᑎᖏᓐᓂᒃ ᐅᐃᒍᖃᐅᕐᕕᑖᖅᑎᑕᐅᓗᑎᑦ ᐊᒻᒪᓗ ᐱᓕᒻᒪᒃᓴᕐᕕᐅᔪᓐᓇᕐᓗᑎᑦ, ᓄᑖᕐᒧᓪᓗ ᐃᒡᓗᕗᑦ ᑯᐊᐳᕇᓴᓐ−ᒧᑦ. ᑕᒪᒃᑯᐊ ᐋᖅᑭᒃᓱᖅᓯᒪᓂᐅᔪᑦ ᑕᑯᒃᓴᐅᑎᑦᑎᕗᑦ ᐱᖁᑎᕐᔪᐊᑦ ᐋᖅᑭᒃᓱᖅᑕᐅᔭᕋᐃᒻᒪᑕ ᑲᒪᒋᔭᐅᓗᑎᑦ ᐃᓄᓐᓄᑦ, ᐊᑐᖅᑕᐅᒐᔭᕐᓗᑎᑦ ᐃᓄᓐᓄᑦ, ᓄᓇᕗᒻᒦᒃᑲᔭᖅᑐᑦ ᐃᑲᔫᑎᐅᔪᑦ, ᐊᑭᑭᓐᓂᖅᓴᐅᓗᑎᑦ ᑕᒪᐃᓐᓂᓕᒫᖅ ᐊᑐᖅᑕᐅᓲᕐᓂᒃ ᐋᖅᑭᒃᓯᒪᔪᓂᑦ, ᐊᒻᒪᓗ ᐊᑯᓂᐅᓂᖅᓴᒨᖓᒍᓐᓇᕋᔭᖅᑐᑎᑦ ᐊᑐᖅᑕᐅᑎᓪᓗᒋᑦ ᐊᔪᕐᓇᕈᓐᓃᕋᔭᖅᑐᑎᓪᓗ ᐱᓕᕆᐊᑦ ᐱᔭᕇᖅᑕᐅᓗᑎᑦ.
ᑲᓇᑕᒥ ᒐᕙᒪᒃᑯᑦ ᖃᓄᐃᓕᐅᖁᔭᐅᓂᖏᑦ
ᓄᓇᕗᑦ ᑐᙵᕕᒃ ᑎᒥᖓ ᐊᔭᐅᕆᕗᑦ ᑲᓇᑕᑉ ᒐᕙᒪᖓᓂᒃ ᐱᓕᕆᖃᑎᖃᖃᑦᑕᕆᐊᖁᓪᓗᒋᑦ ᐊᒻᒪᓗ ᑎᓴᒪᓂᒃ ᐱᓕᕆᐊᕐᓂᒃ ᑮᓇᐅᔭᓂᒃ ᐊᑐᖁᔭᐅᓪᓗᑎᑦ ᓴᓇᔭᐅᕙᓪᓕᐊᕐᓂᐊᕐᒪᑕ ᑲᓇᑕᒥᐅᑕᕐᓄᑦ ᑕᑯᔭᐅᔪᒪᒐᔭᖅᑐᓂᒃ, ᑕᐃᒃᑯᑎᒎᓇᖅ ᑲᓇᑕᓕᐅᕐᓂᕐᒧᑦ ᐸᕐᓇᐅᑎᑎᒍᑦ, ᓱᖅᑯᐃᕐᓇᖅᑐᒻᒪᕆᐊᓗᓐᓂᒃ ᐊᑐᓕᖁᔨᓗᑎᑦ ᒐᕙᒪᑐᖃᒃᑯᑦ ᐱᖁᑎᕐᔪᐊᓄᑦ ᑮᓇᐅᔭᖃᖅᑎᑦᑎᓗᑎᑦ ᐅᑯᓄᖓ:
• ᑐᑦᑕᕐᕕᒃ ᐃᓄᐃᑦ ᓇᒻᒥᓂᖁᑎᖏᖕᓄᑦ ᐊᒻᒪᓗ ᐊᑯᓂᐅᔪᒧᑦ ᑮᓇᐅᔭᑦ ᐃᓯᖅᐸᓪᓕᐊᕝᕕᐅᒐᔭᖅᑐᒥᒃ ᐃᑲᔪᖅᑐᖅᑕᐅᖁᓪᓗᒍ ᓄᓇᓕᓐᓂ ᐃᒡᓗᓕᕆᓂᖅ, ᐱᒻᒪᒃᓴᐃᑎᑦᑎᓂᖅ ᐊᒻᒪᓗ ᐱᔨᑦᑎᕋᕈᑎᓂᒃ;
• ᐋᖅᑮᔪᖃᕐᓗᓂ ᐊᑭᓕᖅᓱᖅᑕᐅᔪᓂᒃ ᓴᓇᔨᐅᒋᐅᖅᓴᓂᕐᒧᑦ ᐃᖅᑲᓇᐃᔭᖅᑐᑦ ᐃᓕᓐᓂᐊᓯᓐᓈᑦ, ᐊᕕᑦᑐᖅᓯᒪᓂᖓ 23 ᐃᖅᑲᓇᐃᔭᖅᑎᑖᕆᔭᐅᓇᓱᐊᖅᑐᑦ ᑐᕌᖓᓂᖃᐅᕐᒪᑕ ᑕᒪᐃᓐᓂ ᐱᖁᑎᕐᔪᐊᓅᖓᔪᓂᒃ;
• ᑮᓇᐅᔭᖃᖅᑎᑕᐅᓗᓂ ᑕᒪᐃᓐᓂ ᐊᑐᖅᑕᐅᓂᓕᒫᖏᑕ ᐊᐅᓚᑦᑎᒍᑎᖏᑦ ᐊᒻᒪᓗ ᐋᖅᑭᐅᒪᐃᓐᓇᕈᑎᖏᑦ ᖃᐅᔨᒪᓇᑦᑎᐊᖁᓪᓗᒋᑦ ᑕᑎᒋᔭᐅᔪᓐᓇᕐᓂᐊᕐᒪᑕ ᐊᕐᕌᒍᓄᑦ ᐊᒥᓱᓄᑦ
“ᐊᑭᖓ ᐅᑕᖅᑭᓗᓂ ᐊᑭᑐᓂᖅᓴᐅᒐᔭᕐᒪᑦ ᒫᓐᓇ ᐱᕙᓪᓕᐊᓂᖃᕐᓂᑦᑎᓐᓄᑦ ᐊᑭᑭᓐᓂᖅᓴᐅᒐᔭᖅᑐᓂ,” ᐅᖃᖅᑐᓂ ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᑉ ᑐᖏᓕᐊ ᐃᕐᖓᐅᑦ. “ᑮᓇᐅᔭᓂᒃ ᒫᓐᓇ ᐊᑐᖅᐸᓪᓕᐊᓕᖅᑎᓪᓗᒋᑦ, ᑲᓇᑕᒥ ᒐᕙᒪᒃᑯᑦ ᐊᑦᑕᕐᓇᙱᓐᓂᖅᓴᓂᒃ ᓄᓇᓕᖅᑖᖅᑎᑦᑎᒐᔭᖅᑐᑦ, ᓴᙱᓂᖅᓴᐅᓗᑎᑦ ᐃᓚᒌᑦᑐᑦ ᐊᒻᒪᓗ ᒪᑭᓴᕋᐃᒍᓐᓇᕐᓂᖅᓴᐅᓕᕐᓗᓂ ᐅᑭᐅᖅᑕᖅᑐᖅ ᐊᒥᓱᒻᒪᕆᐊᓗᓐᓄᑦ ᐊᕐᕌᒎᓂᐊᖅᑐᓄᑦ.”
-30-
ᐱᕙᓪᓕᐊᔪᓕᕆᔨᒃᑯᑦ ᖃᐅᔨᒋᐊᕈᓐᓇᖅᑐᑦ:
ᐃᕙᓗᐊᕐᔪᒃ ᒥᐅᕆᑦ
ᑐᑭᒧᐊᑦᑎᑦᑎᔨ ᑐᓴᐅᒪᑎᑦᑎᓂᕐᒧᑦ
ᓄᓇᕗᑦ ᑐᙵᕕᒃ ᑎᒥᖓ
