Nunavut Tunngavikkut Timingat Angayuqqaap Tuklia James Eetoolook ahiillu Nunavunmi anngutighaliqiyinik kivgaqtit aullaarahuat Inukjuamut Nunavingmi ippaghigu, Feb. 12-mit 14-mut, katimayaqturlutik taapkualu Nunavunmi Imarmiutanik Aviktuqhimayumi Anngutighaliqiyit katimapkaigumik tuhaqtittilutik ihumaliurutigilugu nanuqtaghanik kititauyariiqhimayunik talvani Hudson Bay-mi nanuutainik Nunaviup hinaani.
Nunavunmiut nanurnik munaqhinahuaqpaktut kitittiyariirahuaqpaghugit ukiunik 40-nguliqtut, taapkuattauq Nunavingmiut atulihaarahuaqtait hapkua. Eetoolook uqaqtuq taimaa Nunavunmiut kivgaqtiit katimaqataunahuat katimayunut naalaklutik unipkaaqlugillu ilihimaliqtait qauhimaliqtainiklu munaqhiniqmik Nunavunmi. Hivuraanit Hudson Bay-mi nanuit nanuqhiuqvigivagait anguniaqtit Sanikiluaqmiut Nunavingmiutallu.
Avatiliqiyit Kanatami pitquhimaliqtut taimaa kitittiyariiqhimayunik nannuktaghat Nunavingmi amigaiqpalliayughat anguniaqtit Nunavingmi nannukpalliangmata ukiunit atuhaaqtunit. Inuit Nunavunmi Nunavingmilu angirutitaaqhimayut nanuqtaghainik 2011-mi, kihimi Nunavingmi Imarmiutanik Aviktuqhimayumi Anngutighaliqiyit Katimayiit aularaaqtughanik munaqhiniqmik nanurnik havauhighaqarumayut ilaupkaqlugit Inuit, Itqiliillu kavamaillu.
“Nunavunmi anngutighaliqiyit kivgaqtiit quviahuttiaqtut ilauyaami hapkununnga. Parnaiyaihimayugut aulapkaihimaplutalu munaqhitjutinik ihuaqtunik Inungnut niqighaqhiuqtunut, naahurittiaqhutalu unipkaariyaami qauhimaliqtaqqut ahinut aviktuqhimayunut, taimaa aullaraaqpangniat nanuit” uqaqhimayuq Eetoolook.
