Nunavut Tunngavik Nanminilgit Angayuqanga Cathy Towtongie ilauyuq tahapkununga Inuit Ukiuqtaqtumiuqatigikni Katimayit uplumi aliahutaunianik tuhagakhaq tamna Nunavutmi Katimayiuyuq Maligaliuqtiqyuani, tamna Upinaqtuq Leona Aglukkaq tikkuaqtaunia ikhivautalikmun tapkununga Ukiuqtaqtumi Katimayit. Hivuliqti Minihitauyuq Stephen Harper unniqta tamna tikkuaqtauniq pulaqniqmingni Ikaluktutiakmun ippakhaq.

“Una tuhaguminaqtuq tuhagakhaq. Minihitauyuq Aglukkaq tauqniaq piyaqaqpiaqtumik havaqmik pipkagahuaqninik angiqatigikniq tahapkunani ukiuqtaqtumiuqatauyut nunaqyuat, pivaliqtitniniklu Kanataup havangi tapkunani Ukiuqtaqtuq Katimayit,” uqaqtuq Towtongie.

Minihitauyuq Aglukkaq havanga pigiaqniaq May, 2013-mi, pikpat Kanata atuliqnia ikhivautaliuniq tapkunani hilaqyuaqmi katimanit malguknut-ukiuknut pivikha. Tapkuat katimayit ikayuqtigiktut pityutauyunut piyaqaqpiaqtunut tahamani Ukiuqtaqtumi, tapkuatlu ilauyut Kanata, Denmark, Finland, Iceland, Norway, tapkuatlu Russian Federation, Sweden tamnalu United States.

“Quyagiyaga Minihitauyuq Aglukkaq pinahauqpiaqpakni havaqatigini nunatagauyut kavamait, Kanatamiuni Nunaqaqaqtut ilaunginaqnit ahiilu Ukiuqtaqtumi nunaqyuat pivaliatitninut tapkuat Ukiuqtaqtumi Katimayit havagutai. Una pipkaqniaqta Kanata pilaqninik hivuliqni tahapkuat hilaqyuaqmi katimatikhat atuqniani pivikha tamna angiyumik ahianguqpaliani pivaliatitnilu. Una pipkaqniaqta Minihitauyuq Aglukkaq tahapkuatlu Inuit pilaqninik ihuaqhihimani nanminiq ihumaliugutivut Kanatami ilihimaniqnut pitaqnit kangiqhimaniptingnit inuliqutinut, ilitquhit kiinauyaliqutitlu piqpiaqnit inuuhiqmi ahiini ukiuqtaqtumiuqatauyut nunaqyuangini,” uqaqtuq Towtongie.