Kilamik Tohagaghak
(March 31, 2026 – Iqaluit, Nunavut) Nunavut Tunngavik Timingat (NTI-kut) Angayokangat Paul Irngaut tohaktitiyok una Joe Adla Kunuk, ikkayoktigivlugit ukkua Ayaya Makpigalioktit tatvaliu Tohaktitilikiyiit, titkoaktaohimaliktok Atanioloaktok Niguaktolikiyonik (CRO) tatvani kayuni tatkikhiotini ukkua NTI-kut Niguaktitiffakniaktitlugit Angayokaghamik, niguaktitiniaktot Pingatiotmi May 27, 2026-mi.
Tahamna niguaghaghanguktitinik tatvani niguakniaktitlugit tatva angmakniaktok Pingatiutmi April 15-min akungani Aipputimi, April 21, 2026-mut. Uktokataoyumaguvit niguagaghanguktitaolutit uvalunin niguakataoyomaguvit, Inuit Kanatamiutaoyut, 16-nik ukkiukagiakaktot angayoghiotkiyatlunin tatvanganin May 27, 2026-mi, tatvalu attiliokataoyagiakaktot tatvani Nunavut Angikutatni, tahapkua niguagaghanguktitaoniaktot aolakutikpata ubluani, tahapkua niguaktaonyomayut titikanik tunniyaoniaktot tahapkunanga Atanioloaktok Niguaktolikiyonik CRO, Nunaliitni Tohaktitilikiyiit, tatvalu NTI-kut kagiyaoyakut titigakviatnin.
Tahapkua munagiyagiakaktait ukkua tamaita niguagaghanguktitaoyot tatva innikpiakhimayunik niguaghaghanguktitaoyot titigait tujuktaolutik, tahapkualu ihuinaakhimayaghaita titikanik palihimatkunit piyagiakaktot, tatva tamaita tujuktaolutik tahapkua titikat tatvunga Atanioloaktok Niguaktolikiyonik CRO-mut kangiktinago una kigligiya tujukvighaita. Niguagaghanguktitaoyut titigait tujuktaohimayot kangikat una kigligha angiktaolaitut, tatvalu una Inuk pikataolaitok tatvani May 2026-mi Niguaktitiffakniaktitlugit. Tahapkua niguagaghanguktitaoyot nutkaktiktungnaktait pikataoyomahoigomik nigoagaghanguktitaohimatitlutik kiglighat una Tallimiut April 24, 2026-mi.
Niguakataoniaktot tatvani NTI-kut Niguaktitiniaktitlugit Angayokaghamik niguagungnaktot atoklutik nallianik tahapkuninga talimanik niguakutighanik. Tatvauvut illaliutihimayut niguagiikniaktot tatvani May 20, 2026-mi, uppautikataktunik niguaktitinik, kinamik kivgaktikaklutik niguagungnaktot, titigakakvikuuklutik niguakutait tujuktaoyungnaktot, uvalunin niguagiaktoklutik niguaknakhikpat ubluani, May 27, 2026.
-30-
Pivalialikinikut Tohakvighak
Brodie Larocque
Ataniokaffuktok Tohaktitilikiyiitkuni
Nunavut Tunngavik Timingat
