ᐋᖅᑭᑦᓯᒪᔭᕇᖅᑐᖅ. ᑕᓪᓕᒪᑦ ᐃᓚᒌᑦ, 60-ᐅᓪᓗᑎᒃ ᐃᓄᖏᑦ, ᒪᓕᓚᐅᖅᑐᑦ ᐅᑐᖅᑲᐅᓂᖅᓴᓂᒃ ᐊᖑᑎᓂᒃ, ᑯᑉᓗᒍᖅ ᐊᒻᒪᓗ ᐅᓕᑲᑦᑕᖅ, ᐊᖏᔪᖅᑳᕆᒐᒥᒋᒃ ᓄᓇᒥᓐᓂ, ᐅᖅᓱᖅᑑᓕᐊᖅᐸᓪᓕᐊᒐᓱᐊᓕᖅᑐᑦ ᐃᓅᓯᕐᒥᓂᒃ ᕿᒪᐃᓗᑎᒃ. ᑕᑯᓐᓇᖅᑕᒥᒍᑦ, ᐊᓐᓇᒋᐊᑐᐃᓐᓇᓯᓚᐅᖅᑐᑦ ᐃᓅᓯᕐᒥᓐᓂ. ᐊᐅᓪᓚᖏᓐᓂᕐᒥᓂ (ᐊᓯᐅᓐᖏᓂᕐᒥᓂ, ᐃᓄᐃᑦ ᑕᑯᓐᓇᖅᑕᖓᒍᑦ ᐅᖃᐅᓯᐅᓯᒪᔪᖅ ᑕᐃᑦᓱᒪᓂ) ᓂᐅᕕᖅᑐᒃᑯᑦ HBC ᐊᖏᔪᖅᑳᖓ ᕿᒪᐃᓚᐅᖅᑐᖅ ᐃᑦᓯᕕᖕᒥᒃ ᐊᑐᖃᑦᑕᓲᖏᓐᓂᒃ ᐃᓗᓕᓕᒃ ᐊᑐᓂᑦ ᐃᓚᒌᓄᑦ ᐱᔭᒃᓴᓂᒃ. “ᐊᒥᓲᓗᐊᓐᖏᑦᑐᑦ ᖃᑦᑖᕐᔪᐃᑦ ᐃᖕᒧᑦ, ᖃᑦᓯᐅᓂᕐᒪᖔᑕ ᐃᖅᑲᐅᒪᓐᖏᑦᑐᐃᓐᓇᖅᑐᖓ, ᐊᒻᒪᓗ ᑕᐃᑦᓱᒪᓂ ᓄᑕᕋᖃᓚᐅᕋᑦᑕ,” ᓯᕗᓪᓕᖅᐹᖅ ᐃᓱᒪᒋᔮ ᐋᓂ ᒪᒡᒐᒃᓇᒃ. “ᑭᓱᑕᖃᓗᐊᓚᐅᓐᖏᑦᑐᖅ,” ᖃᓪᓕᐅᑎᒋᐊᖅᑐᓂ ᐅᐃᖓ ᐅᖃᖅᑐᖅ, ᑖᓐ, ᐃᖅᑲᐅᒪᔭᒥᓂᒃ ᑕᐃᑦᓱᒪᓂ 40-ᒐᓚᓐᓃᑦᑐᑦ ᐅᑭᐅᑦ ᓈᓕᖅᑎᓪᓗᒋᑦ. “ᐸᓚᐅᒑᖅ, ᑏᒐᓛᑦ, ᓱᑲᖅ. 10 ᒐᓚᓐ ᕿᐊᓐᖒᔫᖅᓯᐅᑎ ᐅᖅᓱᐊᓗᒃ. ᒑᓴᓖᒐᓛᓪᓗ (ᖁᓪᓕᖅᓯᐅᑦ) ᓱᐴᔫᒧᑦ ᐅᖅᓱᒃᓴᖅ. ᓴᒃᑯᐃᑦ, ᐃᖃᓗᑦᓯᐅᑎᓂᒃ ᓄᓗᐊᑕᖃᓐᖏᑦᑐᖅ, ᐊᖑᓇᓲᑎᒃᓴᓂ ᐱᑕᖃᓐᖏᑦᑐᖅ.”
ᐊᓱᐃᓛᕌᓗᒃ, ᐊᒻᒪᓗ ᐅᔾᔨᕐᓇᓚᐅᕋᓂ, ᑖᒃᑯᐊ ᐃᓄᐃᑦ ᐃᓚᒌᑦ ᓇᖕᒥᓂᖅ ᐊᓐᓇᓯᒪᓇᓱᐊᕆᐊᖃᓕᖅᑐᑦ-ᓯᕗᓕᕆᓚᐅᖅᑕᒥᑐᑦ ᐊᓐᓇᓯᒪᔭᕆᐊᖃᓯᑲᓪᓚᑦᑐᑦ – ᓇᖕᒥᓂᖅ ᐱᖁᑎᒥᒍᑦ ᓴᓇᕐᕈᑎᒥᒍᑦ, ᓇᖕᒥᓂᖅ ᐊᓐᓇᓯᒪᓗᑎᒃ ᓄᓇᐃᓐᓇᕐᒥ.
