ᐅᒥᖕᒪᒃᑑᖅ

ᐊᒥᓱᒐᓚᐃᑦ ᑕᐃᒃᑯᐊ ᑕᓪᓕᒪᓂᒃ-ᑕᖅᑭᓂᒃ ᐃᖏᕐᕋᔭᕆᐊᖃᓚᐅᖅᑐᑦ ᐃᓅᒍᓐᓃᖅᓯᒪᓕᖅᑐᑦ. ᑕᐃᒃᑯᐊ ᐊᓐᓇᓯᒪᔪᑦ ᐅᓂᒃᑳᖃᑦᑕᖅᑐᑦ ᐅᖅᓱᖅᑑᒥ, ᐃᓘᓐᓇᒐᓛᒍᑦ, ᑭᖑᒧᑦ ᕿᕕᐊᖃᑦᑕᖅᑐᑦ ᐃᓅᓯᕆᓚᐅᖅᑕᒥᓂᒃ ᐃᖅᑲᐅᒪᓪᓗᑎᒃ ᐊᑦᓱᕈᕐᓇᑐᒃᑰᕆᐊᖃᓚᐅᕐᓂᕐᒥᓂᒃ ᐃᓅᓯᕐᒥᓂ ᐊᑐᖅᑕᒥᒍᑦ ᖃᐅᔨᒃᑲᓐᓂᕈᑎᒋᓚᐅᖅᑕᒥᓂᒃ. ᑕᐃᑦᓱᒪᓂ, ᐅᖃᓚᐅᖅᑐᖅ ᐋᓂ ᒪᒡᒐᒃᓇᒃ, “ᐃᓱᒪᒋᓗᐊᓚᐅᓐᖏᑕᕗᑦ.” ᐃᓅᓚᐅᕋᒥ ᓂᕿᖃᖅᓱᑎᒃ ᐃᓄᒃᓯᐅᑎᓂᒃ, ᐊᒻᒪᓗ ᐊᑦᓱᕈᕐᓇᖅᑐᒃᑰᓕᕋᐃᒐᒥᒃ ᐃᖏᕐᕋᓪᓗᑎᒃ ᑐᐊᕕᖃᑦᑕᓚᐅᓐᖏᓐᓇᒥᒃ. ᐃᑉᐱᓐᓂᐊᓂᒃᑯᑦ ᓲᕐᓗ ᐊᑦᓱᕈᕐᓇᓂᖅᐸᐅᓚᐅᖅᑐᖅ, ᓄᓇᒋᓐᖏᑕᒥᓅᕐᓂᕐᒥᓄᑦ ᓱᖏᐅᓯᒪᓐᖏᑕᒥᓄᑦ, ᕿᒪᐃᔪᑦ ᐃᓚᒥᓂᒃ ᐱᖃᓐᓇᕆᔭᒥᓂᓪᓗ, ᐱᔭᖅᑯᖅᑐᓴᕐᓇᓂᖅᐹᖑᓚᐅᖅᑐᖅ ᐃᓅᓯᕐᒥ ᐊᑐᕆᐊᖓ. “ᐃᓱᒪᒋᓚᐅᓪᓚᖃᑦᑕᓲᕋ ᐃᓅᓯᑦᑎᓐᓂ ᐊᑐᓚᐅᖅᑕᕗᑦ,” ᐋᓂ ᐅᖃᕆᐊᒃᑲᓂᖅᑐᖅ, ᖁᕝᕕᓕᐅᖅᓱᑎᒃ ᐃᔨᑯᓗᖏᒃ ᓇᒡᓕᒍᓱᒃᑑᒃ. “ᐱᔭᕆᐊᑐᔪᕐᔪᐊᒻᒪᕆᐊᓗᒃᑰᕆᐊᖃᓚᐅᖅᑐᒍᑦ ᐅᒥᖕᒪᒃᑑᒦᓐᖔᓱᑕ, ᐃᖅᑲᕋᐃᒐᒃᑯ.” ᑕᐃᒪᐃᒐᓗᐊᖅᑎᓪᓗᒍ, ᓇᑯᖅᓴᕈᓐᓇᓕᖅᑐᑦ ᐅᓂᒃᑳᖅᓯᒪᓕᕋᒥᒃ ᐃᓅᓯᕐᒥᓂ ᐊᑐᓚᐅᖅᑕᒥᓂᒃ ᐊᓐᓇᓚᐅᕐᓂᕐᒥᓂᒃ ᓂᐱᓕᐅᖅᓯᒪᓕᕋᒥᒃ ᒪᑭᒪᒋᐊᒃᑲᓐᓂᕈᑎᒃᓴᓂᒃ.

© ᑕᐃᕕᑦ F. ᐱᐊᓕ
www.davidpelly.com