ᐅᖃᓪᓚᖕᓂᖏᑦ ᐆᒪ ᐅᐱᓇᖅᑑᑉ ᔮᓐ ᑕᓐᑲᓐ, ᒫᓐᓚ ᒐᕙᒪᒋᔭᐅᔪᓂᑦ ᑲᓇᑕᒥ, ᒪᓕᒐᓕᐅᖅᑎᕐᔪᐊᖅ, ᒥᓂᔅᑕ ᐃᓄᓕᕆᔨᑐᖃᒃᑯᓐᓄᑦ ᐊᒻᒪᓗ ᐅᑭᐅᖅᑕᖅᑐᓕᕆᓂᕐᒧᑦ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᓐᓂ ᐅᖃᓪᓚᖃᑎᖃᖅᐸᒃᑐᖅ ᐅᑯᓂᖓ ᐊᓪᓚᖓᔪᓂᑦ ᐊᒻᒪᓗ ᐃᓕᑕᕆᔭᐅᓯᒪᖏᑦᑐᓄᑦ ᐊᓪᓚᓄᑦ ᑕᐃᑲᓂ ᒪᒥᐊᓐᓂᐅᓚᐅᖅᑐᒥ ᐃᓄᖏᓐᓄᑦ ᖁᑦᑎᒃᑐᒥᐅᑕᑦ ᓅᑕᐅᓚᐅᖅᓯᒪᓂᖏᓐᓄᑦ
ᐊᐅᒡᒍᓯ 18, 2010
ᐃᓄᒃᔪᐊᖅ, ᓄᓇᕕᒃ ᐃᓄᑐᖃᖁᑎᖏᑦ, ᐃᓄᐃᑦ ᓯᕗᓕᖅᑎᑦ, ᐊᕐᓇᐃᑦ ᐊᒻᒪᓗ ᐊᖑᑏᑦ, ᐊᒻᒪᓗ ᐱᓗᐊᖅᑐᒥᑦ ᐃᓕᑦᓯ ᓇᖕᒥᓂᖅ ᐊᒃᑐᖅᑕᐅᓯᒪᔪᑦ ᓅᑕᐅᓂᕐᒧᑦ; ᖁᔭᓐᓇᒦᒃ ᑕᒡᕙᓃᒃᑲᑦᓯ.
ᓯᕗᓪᓕᖅᐹᒥ ᑎᑭᑦᑕᕆᐅᖅᐳᖓ ᐅᑭᐅᖅᑕᖅᑐᒧᑦ ᒥᓂᔅᑕᐅᓂᕐᒧᑦ ᐃᓄᓕᕆᔨᑐᖃᒃᑯᓐᓄᑦ ᐊᒻᒪᓗ ᐅᑭᐅᖅᑕᖅᑐᓕᕆᔨᐅᓂᕐᒧᑦ, ᐊᒻᒪᓗ ᐅᐱᒍᓱᒻᒪᕆᒃᑐᖓ ᑕ’ᕙᓃᑦᑕᕆᐊᒃᓴᖅ ᑕᒪᓐᓇ ᐱᓪᓗᒍ ᐃᖅᑲᐅᒪᔾᔪᑕᐅᓛᖅᑐᑦ ᐱᕕᒃᔪᐊᕐᓂᕐᒧᑦ.
ᐃᖅᑲᐅᒪᔪᒃᓴᐅᕗᓯ ᓯᕗᓕᕆᓚᐅᖅᑕᕋ, ᒥᓂᔅᑕ ᓯᑐᕌ, ᐊᒻᒪ ᓯᕗᓪᓕᖅᐹᒥ ᑎᑭᓚᐅᖅᓯᒪᖕᒪᑦ ᒥᓂᔅᑕᐅᓪᓗᓂ ᓄᓇᕕᖕᒧᑦ ᐅᐸᒍᑎᑎᓪᓗᒍ ᐅᑯᓄᖓ ᑲᑎᒪᔨᑦ ᑲᑎᒪᕕᒃᔪᐊᕐᓂᐊᓐᓄᑦ ᑰᒡᔪᐊᒥ ᐅᑭᐅᑦ ᐱᖓᓱᑲᓴᐅᓕᖅᑐᑦ.
ᖃᐅᔨᒪᔭᕋ ᖃᓄᖅ ᐃᓕᖓᖕᒪᖔᑦ ᐅᑭᐅᖅᑕᖅᑐᖅ ᐊᒻᒪᓗ ᐱᔪᒪᓪᓚᕆᒃᖢᖓ ᐳᓛᕆᐊᕐᓂᕐᒥᑦ ᐅᑭᐅᖅᑕᖅᑐᒧᑦ ᐊᑯᓚᐃᑦᑐᓂᑦ, ᐊᒻᒪᓗ ᐱᓕᕆᖃᑎᒋᑦᑎᐊᕐᓗᒋᑦ ᖃᓂᑦᑐᒥᑦ ᐃᓄᐃᑦ ᓄᓇᓕᖁᑎᖏᑦ ᐊᓗᒻᒪᓗ ᑎᒥᐅᔪᑦ ᐃᓕᖓᑎᓪᓗᖓ ᐱᔭᒃᓴᒃᑲᓂᑦ.
ᐅᑭᐅᑦ 50-ᑎᑦ ᖄᖏᖅᓯᒪᓕᖅᑐᑦ ᑕᐃᒪᖓᓂᑦ ᓅᑕᐅᓚᐅᖅᓯᒪᓂᖏᑦ ᐃᓄᐃᑦ ᑕᒡᕙᖓᑦ ᓄᓇᓕᖕᒥᑦ ᖁᑦᑎᒃᑐᒧᑦ. ᐅᕙᓃᔾᔪᑎᔭᕋ ᑭᒡᒐᖅᑐᖅᓗᒍ ᑲᓇᑕᐅᑉ ᐊᖓᔪᖅᑳᕐᔪᐊᖓᑦ, ᑲᓇᑕᐅᑉ ᒐᕙᒪᖓᑦ, ᐊᒻᒪᓗ ᑕᒪᐃᑕ ᑲᓇᑕᒥᐅᑕᑦ ᑐᓂᓯᓗᖓ ᒪᒥᐊᓐᓂᕐᒥᑦ ᑕᒪᑦᓱᒧᖓ ᐱᕕᒃᔪᐊᕐᓂᕐᐅᔪᒧᑦ.
ᐅᓪᓗᒥ ᐱᕕᒃᔪᐊᕐᓂᖅ ᐱᒻᒪᕆᐅᔪᖅ ᓅᒋᐊᕐᓂᕐᒧᑦ ᒪᒥᓴᕐᓂᕐᒧᑦ ᐊᒻᒪᓗ ᐋᖅᑭᖃᑎᒌᒃᓂᕐᒧᑦ ᑲᑎᓪᓗᑎᒃ. ᐊᑏ ᐊᖏᖅᓯᐅᒃ ᒪᒥᐊᓐᓂᕆᓂᐊᖅᑕᕋ ᑭᒡᒐᖅᑐᖅᖢᒋᑦ ᑕᒪᐃᑕ ᑲᓇᑕᒥᐅᑕᑦ. ᓂᕆᐅᒃᑐᖓ ᐋᖅᑭᒃᓂᖃᕐᓂᐊᕐᒪᑦ ᐃᓕᖓᔪᓂᑦ ᓴᖏᒃᑎᓪᓗᒋᑦ ᐊᒃᑐᐊᖃᑎᖃᕐᓂᖅ ᑲᓇᑕᐅᑉ ᒐᕙᒪᒃᑯᖏᓐᓂᑦ.
ᑭᒡᒐᖅᑐᖅᓗᒋᑦ ᑲᓇᑕᐅᑉ ᒐᕙᒪᒃᑯᖏᑦ ᐊᒻᒪᓗ ᑕᒪᐃᑕ ᑲᓇᑕᒥᐅᑕᑦ, ᐅᕙᒍᑦ ᑐᓂᓯᔪᒪᕗᒍᑦ ᐃᓗᐃᑦᑐᒥᑦ ᐊᒻᒪᓗ ᓱᓕᔪᒥᑦ ᒪᒥᐊᓐᓂᕐᒥᑦ ᐃᓄᖕᓄᑦ ᐅᑯᐊ ᓅᑕᐅᓚᐅᖅᓯᒪᔪᑦ ᖃᑕᖑᑎᒌᑦ ᐃᓄᒡᔪᐊᒥᑦ ᐊᒻᒪᓗ ᒥᑦᑎᒪᑕᓕᖕᒥᑦ ᑕᒃᐸᐅᖓ ᐊᐅᔪᐃᑐᒧᑦ ᐊᒻᒪᓗ ᖃᐅᓱᐃᑦᑐᑦᒧ ᐅᑭᐅᑦ 1950-ᑎᑦ ᐊᑐᖅᑎᓪᓗᒋᑦ.
ᓇᖕᒥᓂᖅ ᐅᖃᐅᒪᕗᖓ ᐃᑎᓂᖅᐹᓂᑦ ᕿᒃᓵᕐᓂᕐᒥᑦ ᒪᑯᓄᖓ ᐊᒃᓱᒻᒪᕆᐊᓗᒃ ᐊᒃᓱᕈᕐᓇᓚᐅᖅᑐᓂᑦ ᐊᒻᒪᓗ ᐊᔪᖅᓴᕐᓇᓚᐅᖅᑐᓂᑦ ᐱᔾᔪᑎᐅᓪᓗᓂ ᓅᑕᐅᓂᖅ. ᖃᑕᖑᑎᒌᑦ ᐊᕕᒃᑐᖅᑕᐅᓚᐅᖅᓯᒪᔪᑦ ᓄᓇᓕᖏᓐᓂᑦ ᐊᖏᕐᕋᖏᓐᓂᑦ ᐊᒻᒪᓗ ᐊᓯᖏᑦ ᖃᑕᖑᑎᖏᓐᓂᑦ ᐅᖓᓯᓂᖃᖅᖢᑎᒃ ᑕᐅᓴᓐᑎᓂᑦ ᑭᓗᒦᑕᓂᑦ. ᐊᑐᐃᓐᓇᕈᕐᕕᐅᓚᐅᖅᓯᒪᖏᑦᑐᑦ ᓈᒪᔪᓂᑦ ᐃᒡᓗᕐᔪᐊᒃᓴᓂᑦ ᐊᒻᒪᓗ ᓱᓇᒃᑯᑖᒃᓴᖏᓐᓂᑦ. ᑐᓴᖅᑎᑕᐅᓯᒪᑦᑎᐊᓚᐅᖏᑦᑐᑦ ᑐᑭᓯᒍᑎᒃᓴᓂᑦ ᖃᓄᖅ ᐅᖓᓯᒃᑎᒋᔪᒧᖓᐅᓂᐊᕐᒪᖔᑕ ᐊᒻᒪᓗ ᖃᓄᑎᒋ ᐊᔾᔨᒋᖏᒻᒪᖔᒍ ᐃᓄᒡᔪᐊᑉ ᓄᑖᖅ ᐊᖏᕐᕋᕆᓂᐊᓕᖅᑕᖓᑦ, ᐊᒻᒪᓗᖃᐅᔨᒪᓚᐅᖏᑦᑐᑦ ᐊᕕᒃᑐᖅᑕᐅᓂᐊᕐᓂᖏᓐᓂᑦ ᒪᕐᕉᓕᕐᓗᒋᒃ ᓄᓇᓖᒃ ᑎᑭᑉᐸᑕ ᖁᕐᑎᒃᑐᒧᑦ. ᓱᓕ, ᒐᕙᒪᒃᑯᑦ ᑐᖓᐅᑦᑎᓚᐅᖅᑐᑦ ᐱᑦᑎᐊᖏᓐᓂᕐᒧᑦ ᐱᓇᓱᐊᕆᐊᖅ ᐊᖏᕈᓯᐊᖏᓐᓂᑦ ᐅᑎᖅᑎᑦᑎᓂᕐᒥᑦ ᑭᓇᑐᐃᓐᓇᒥᑦ ᑕᒃᐹᓃᑦᑐᒪᖏᑉᐸᑕ ᖁᑦᑎᒃᑐᒥ ᐅᑎᕐᓗᑎᒃ ᓄᓇᑐᖃᖏᑦᓐᓄᑦ.
ᑲᓇᑕᐅᑉ ᒐᕙᒪᒃᑯᖏᑦ ᐃᑎᔪᐊᓗᖕᒥᑦ ᐅᒡᒍᐊᖅᑐᑦ ᑕᒻᒪᕈᑎᓂᑦ ᐊᒻᒪᓗ ᓱᕋᐃᓂᕐᒥᑦ ᐊᖏᕈᓯᐊᖏᓐᓂᑦ ᒪᑯᓄᖓ ᑖᖅᑐᐊᓗᖕᓂᑦ ᐃᓕᖓᓚᐅᖅᑐᓂᑦ ᐃᓅᓯᓄᑦ ᑕᐃᓱᒪᓂ ᐃᓕᖓᓂᐅᓚᐅᖅᑐᓂᑦ ᐊᒻᒪᓗ ᒪᒥᐊᑦᑐᑦ ᐅᑯᓄᖓ ᖁᑦᑎᒃᑐᒧᑦ ᓅᑦᑎᓂᐅᓚᐅᖅᑐᓂᑦ ᐊᑐᖅᑕᐅᓚᐅᖅᓯᒪᓂᖏᓐᓄᑦ. ᐃᒪᓐᓇᐃᑦᑐᒪᔪᒍᑦ ᐃᓕᑕᖅᓯᓗᑕ ᐅᑯᓂᖓ ᓅᑕᐅᓯᒪᔪᓂᑦ ᐃᒪᓐᓇ ᕿᓄᐃᓵᕐᓂᕆᓚᐅᖅᑕᖏᓐᓄᑦ ᐊᒻᒪᓗ ᓴᐱᓕᕈᓐᓇᓚᐅᖏᓐᓂᖏᓐᓄᑦ. ᐃᒪᓐᓇᐃᓚᐅᕋᓗᐊᖅᑎᓪᓗᒋᑦ ᐊᔪᖅᓴᓚᐅᕐᓂᖏᓐᓂᑦ ᐊᒻᒪᓗ ᐊᒃᓱᕈᖅᑐᒻᒪᕆᐅᓪᓗᑎᒃᓗ, ᓅᑕᐅᓯᒪᔪᑦ ᐊᒻᒪᓗ ᑭᖑᕚᖏᑦ ᑲᔪᓯᓂᖃᑦᑎᐊᓚᐅᖅᑐᑦ ᓴᓇᓪᓗᑎᒃ ᐆᒻᒪᕆᒃᑐᒥᑦ ᓄᓇᓕᖕᓂᑦ ᐊᐅᔪᐃᑦᑐᒥᑦ ᐊᒻᒪᓗ ᖃᐅᓱᐃᑦᑐᒥᑦ. ᑲᓇᑕᐅᑉ ᒐᕙᒪᒃᑯᖏᑦ ᐃᓕᑕᖅᓯᕗᑦ ᑖᒃᑯᐊ ᓄᓇᓖᑦ ᑐᓂᓯᓯᒪᖕᒪᑕ ᓴᖏᔪᒥᑦ ᑲᓇᑕᒥ ᑕᑯᒃᓴᐅᑎᑦᑎᓂᖏᓐᓂᑦ ᖁᑦᑎᒃᑐᒥ.
ᓅᑕᐅᓯᒪᔪᑦ ᐃᓄᐃᑦ ᖃᑕᖑᑎᒌᑦ ᖁᑦᑎᒃᑐᒧᑦ ᐱᓂᕐᓗᖕᓂᕐᒥᑦ ᐃᓕᖓᑎᑦᑎᔪᖅ ᑲᓇᑕᐅᑉ ᐃᓕᖓᓂᐊᓄᑦ ᑕᐃᓱᒪᓂᓂᑕᑎᒍᑦ ᐅᕙᒍᑦ ᑕᒪᑦᑕ ᐳᐃᒍᕆᐊᖃᖏᑕᕗᑦ, ᑭᓯᐊᓂ ᐃᓕᑕᖅᓯᔭᕆᔭᕆᐊᖃᖅᑕᕗᑦ ᐃᖅᑲᐅᒪᓂᒃᑯᑦ, ᐃᓕᑦᑎᕕᒋᓗᒋᑦ ᐊᒻᒪᓗ ᐃᓕᓴᕐᓗᒋᑦ ᕿᑐᕐᖓᕗᑦ. ᐃᓕᑕᖅᓯᓗᑕ ᐅᕙᒍᑦ ᐊᑕᐅᑦᑎᒃᑯᑦ ᐊᒥᖄᖅᑕᕗᑦ ᐃᓕᖓᓂᑐᖃᕗᑦ ᐱᕕᒋᔪᓐᓇᕋᑦᑎᒍ ᓇᖕᒥᓂᖅ ᓯᕗᒧᑦ ᑲᔪᓯᓗᑕ ᑲᑐᔾᔨᓂᒃᑯᑦ ᐃᓚᒌᒃᓂᒃᑯ ᐊᒻᒪᓗ ᐊᓂᕐᓂᖃᕐᓗᑕ ᐋᖅᑭᖃᑎᒌᒃᓂᕐᒥᑦ. ᑲᓇᑕᐅᑉ ᒐᕙᒪᒃᑯᖏᑦ ᐊᒻᒪᓗ ᐃᓄᐃᑦ ᐱᐊᓂᒃᓯᓯᒪᔪᑦ ᐊᒥᓱᓂᑦ ᐱᐅᔪᐊᓗᖕᓂᑦ ᑲᑐᔾᔨᓪᓗᑎᒃ, ᐊᒻᒪᓗ ᑕᒪᐃᑕ ᑲᓇᑕᒥᐅᑕᑦ ᐃᑲᔪᖅᓯᔭᐅᓯᒪᔪᑦ ᒪᑯᓇᖓ ᑐᓂᓯᓂᐅᔪᓂᑦ ᐃᓄᖕᓂᑦ ᐱᖅᑯᓯᑦᑎᓐᓄᑦ ᐊᒻᒪᓗ ᐃᓕᖓᓂᑐᖃᑦᑎᓄᑦ. ᑲᔪᓯᔭᕆᐊᖃᖅᑐᒍᑦ ᓴᖏᒃᑎᒋᐊᕐᓗᒋᑦ ᐊᒃᑐᐊᓂᕗᑦ ᐊᒻᒪᓗ ᐃᑎᓂᖅᓴᐅᓕᕐᓗᑎᒃ ᑐᑭᓯᐅᒪᖃᑦᑕᐅᑎᓂᕗᑦ ᐊᒻᒪᓗ ᐅᐱᒍᓱᖃᑎᒌᒃᓂᕗᑦ. ᑲᑎᓪᓗᑕ ᓴᓇᔭᕆᐊᖃᖅᑐᒍᑦ ᓴᖏᓂᖅᓴᓂᑦ, ᖃᓄᐃᖏᑦᑎᐊᕐᓂᕐᒥᑦ ᐊᒻᒪᓗ ᓱᓕ ᐆᒻᒪᕆᒃᑐᒥᑦ ᐃᓄᐃᑦ ᓄᓇᖓᓐᓂᑦ ᐊᒻᒪᓗ, ᑕᐃᒪᐃᑉᐸᑦ, ᓴᓇᓗᑕ ᐋᖅᑭᒃᓯᓂᒃᑯᑦ ᓴᖏᓂᖅᓴᒥᑦ, ᖃᓄᐃᖏᑦᑎᐊᖅᑐᒥᑦ ᐊᒻᒪᓗ ᓱᓕ ᐆᒻᒪᕆᒃᑐᒥᑦ ᑲᓇᑕᒥᑦ.
ᑲᓇᑕᐅᑉ ᒐᕙᒪᒃᑯᖏᑦ ᓂᕆᐅᒃᑐᑦ ᐅᓇ ᒪᒥᐊᓐᓂᖅ ᐃᑲᔫᑕᐅᓂᐊᕐᓂᖓᓂᑦ ᒪᒥᑦᑎᓂᕐᒥᑦ ᐃᑭᓂᑦ ᓴᖅᑭᑎᑕᐅᓯᒪᔪᑦ ᐱᓂᑰᔪᓂᑦ ᐱᒋᐊᓚᐅᖅᓯᒪᔪᑦ ᐅᑭᐅᑦ 60-ᑎᑲᓴᐃᑦ ᓈᓯᒪᓕᖅᑎᓪᓗᒋᑦ ᐊᒻᒪᓗ ᒪᒃᐱᕐᓗᒋᑦ ᒪᒃᐱᒐᐃᑦ ᑕᒪᑦᓱᒧᖓ ᕿᒃᓵᕈᑎᐅᓯᒪᔪᓂᑦ ᓴᖅᑭᓯᒪᓚᐅᖅᑐᑦ ᑲᓇᑕᐅᑉ ᐃᓕᖓᓂᖏᓐᓂ. ᐃᒻᒪᖄ ᓴᖏᑦᑎᔾᔪᑕᐅᓂᐊᖅᑐᑦ ᑐᖓᕕᐊ ᐃᒪᓐᓇ ᐅᑯᐊ ᑲᓇᑕᐅᑉ ᒐᕙᒪᒃᑯᖏᑦ ᐊᒻᒪᓗ ᐃᓄᐃᑦ ᓴᓇᓗᒋᑦ ᐊᑕᐅᑦᑎᒃᑯᑦ ᐊᒻᒪᓗ ᐱᓯᒪᑦᑎᐊᕐᓗᒍ ᐅᑭᐅᖅᑕᖅᑐᖅ ᓴᖏᔫᓗᒍ ᐊᒻᒪᓗ ᕿᓚᕈᔾᔮᖅᓯᒪᓗᒍ.
