ᓘᑎ ᐱᔾᔭᒥᓂ ᐃᓅᓕᖅᑐᒥᓂᖅ ᓅᕙᐃᕝᕙ 14, 1953, ᑲᖏᖅᑐᒑᐱᒻᒥ. ᐊᑖᑕᖓ ᐃᓚᒋᔭᐅᓯᒪᔪᖅ ᐸᓖᓯᒃᑯᓐᓄᑦ ᓄᑦᑎᑎᑦᓯᔪᒥᓂᐅᑦᓱᑎᒃ ᐱᔾᔭᒥᓂᒃᑯᓐᓂᒃ ᐃᓚᒌᓂᒃ ᐊᐅᓱᐃᑦᑐᕐᒧᑦ ᓱᕈᓯᐅᑎᓪᓗᒍ. ᓘᑎ ᑕᐃᒪᓐᖓᓂᑦ ᑕᐃᑲᓂ ᓄᓇᖃᖅᑐᖅ ᓄᓕᐊᕇᒃ, ᑕᓪᓕᒪᑦ ᕿᑐᕐᖓᖏᑦ ᐊᒻᒪᓗ ᐱᖓᓱᑦ ᐃᕐᖑᑕᖏᑦ.
ᐊᕐᕌᒍᖃᖅᓱᓂ 15-ᓂᒃ, ᓘᑎ ᓴᓇᓐᖑᐊᖃᑦᑕᓯᔪᒥᓂᖅ. ᖃᓄᐃᑦᑐᑐᐃᓐᓇᕐᓂᖅ ᐅᔭᖅᑲᓂᒃ ᐆᑦᑐᖃᑦᑕᕐᓯᒪᔪᖅ, ᓴᕕᕋᔭᓐᓂᒃ, ᑑᒑᕐᓂᒃ, ᑐᑦᑐᓂᒃ, ᓇᔾᔪᓐᓂᒃ, ᐅᒥᒻᒪᐃᑦ ᓇᔾᔪᑎᖏᓐᓂᒃ ᐊᒻᒪᓗ ᐊᓪᓚᓐᖑᐊᑦ ᑑᒑᖏᓐᓂᒃ. ᐃᓕᒍᒪᓂᕐᒥᓂᒃ ᒪᓕᑦᓱᓂ ᓴᕕᕋᔭᓕᕆᓂᕐᒥᒃ ᐃᓕᓐᓂᐊᖅᓯᒪᔪᖅ ᐊᕐᕌᒎᓐᓂᒃ ᒪᕐᕉᓐᓂᒃ ᓴᕕᕋᔭᓕᕆᓂᕐᒥᒃ ᓄᓇᕗᒻᒥ ᓯᓚᑦᑐᓴᕐᕕᒻᒥ.
ᓘᑎ ᑮᓇᐅᔭᖃᖅᑎᑕᐅᖃᑦᑕᖅᓯᒪᔪᖅ ᓴᓇᑎᑕᐅᑦᓱᓂ ᓇᒻᒥᓂᖅ ᓄᐊᑦᓯᔨᓄᑦ ᓄᓇᕐᔪᐊᓕᒫᒥ. ᓴᓇᐅᒐᐃᑦ ᑕᑯᑦᓴᐅᔪᑦ Prince of Wales ᑕᑯᔭᒐᖃᕐᕕᖓᓂ ᔭᓗᓇᐃᒥ, ᓄᓇᑦᓯᐊᕐᒥ ᐊᒻᒪᓗ ᓄᓇᕐᔪᐊᕐᒥ ᒍᕇᔅ, ᒪᒃᓯᑯ, ᐊᒻᒪᓗ ᒥᐊᓕᒐᐃᑦ ᓄᓇᖓᓐᓂ. ᒫᑦᓯ 2003-ᖑᑎᓪᓗᒍ, ᓴᓇᐅᒐᐃᓐᓇᖏᑦ ᑕᑯᑦᓴᐅᑎᑕᐅᔪᒻᒥᔪᑦ ᐃᓄᓕᕆᔨᑐᖃᒃᑯᑦ ᐊᓪᓚᕝᕕᖓᓐᓂ ᕼᐊᓪ ᑯᐸᐃᒥ. ᐃᓗᒻᒥᐅᑦ ᐃᓕᑕᖅᓯᓂᐊᖅᑐᑦ ᓴᓇᐅᒐᖓᓂᒃ ᑕᓖᓪᓚᔫᓐᖑᐊᒥᒃ ᒪᓕᒐᓕᐅᕐᕕᒻᒥ.
ᓘᑎᐅᑉ ᓵᓚᖃᐅᓯᐊᕆᖃᑦᑕᖅᓯᒪᔭᖏᑦ ᓴᓇᐅᒐᕐᓂᕐᒧᑦ ᐱᖓᓱᑦ ᓄᓇᕗᑦ ᓯᓚᑦᑐᓴᕐᕕᒻᒥ ᐱᔭᕇᖅᑐᓄᑦ ᐃᓕᑕᕆᔭᐅᔾᔪᑕᐅᔪᑦ ᐊᒻᒪᓗ ᓵᓚᖃᓚᐅᖅᓯᒪᒻᒥᑦᓱᓂ ᑲᓇᓐᓇᖓᓂ ᐅᑭᐅᖅᑕᖅᑑᑉ ᓴᓇᓕᐅᑎᔪᓂ 1994-ᒥ ᓴᕕᕋᔭᒻᒧᑦ ᖁᔾᔪᓐᖑᐊᒧᑦ. ᓘᑎ ᓯᕗᓪᓕᖅᐸᐅᑦᓱᓂ ᓵᓚᖃᓚᐅᖅᓯᒪᒻᒥᔪᖅ ᐊᕐᕌᒍᕐᒪᑦ ᐊᒻᒪᓗ ᓯᕗᓪᓕᖅᐸᐅᑦᓱᓂ ᐅᑭᐅᖅᑕᖅᑐᒥ ᓴᓇᓕᐅᑎᔪᓂ 1996-ᒥ.
ᑯᐃᓐ ᓄᓇᖓᓂ ᑕᕐᕆᔭᓕᐅᖅᑏᑦ ᐊᔾᔨᓕᐅᕆᓯᒪᔪᑦ ᓘᑎᒥᒃ ᓴᓇᓐᖑᐊᑎᓪᓗᒍ 8.5-ᒥᒃ ᑕᑭᓂᓕᒻᒥᒃ ᑑᒑᕐᒥᒃ ᓴᓇᓐᖑᐊᕐᕕᒋᓯᒪᑦᓱᓂ 42-ᓂᒃ ᐃᒻᒥᒃᑯᑦ. ᓴᓇᐅᒐᖏᑦ ᑕᑯᑦᓴᐅᑎᑕᐅᓯᒪᒻᒥᔪᑦ ᐅᖄᓚᐅᑎᓯᐅᑎᓂ.
ᐅᓪᓗᒥᓕ ᓘᑎ ᓴᓇᒐᔪᑦᓯᓯᒪᓂᖅᓴᐅᓕᕐᒥᔪᖅ ᖃᒧᑎᓂᒃ fiberglass-ᓂᒃ, ᓯᕗᓪᓕᖅᐹᑦ ᑕᐃᒪᐃᑦᑐᑦ ᖃᒧᑏᑦ – ᑎᑎᖅᑐᒐᓕᐅᕐᓂᕐᓗ.
