ᓯᕗᓂᐊᒍᑦ ᐱᓕᕆᐊᕆᔭᐅᖃᑦᑕᕐᓯᒪᔪᑦ

ᖁᑦᓯᑦᑐᒧᑦ ᓄᑦᑎᖅᑕᐅᓯᒪᔪᓄᑦ ᓇᑉᐸᐃᓂᑦᓴᒧᑦ ᐊᐅᓚᓂᐅᔪᖅ

ᐊᐅᔭᖏᓐᓂ ᐊᑐᖅᑎᓪᓗᒋᑦ 1950-ᑎᑦ, ᐊᒥᓱᐃᑦ ᐃᓄᐃᑦ ᖃᑕᖑᑎᒌᑦ ᓅᑕᐅᓚᐅᖅᓯᒪᔪᑦ ᖁᑦᑎᒃᑐᒧᑦ ᐅᑯᓄᖓ ᑲᓇᑕᐅᑉ ᒐᕙᒪᒃᑯᖏᓐᓄᑦ. ᖃᑕᖑᑎᒌᑦ ᒥᑦᑎᒪᑕᓕᖕᒥᑦ ᐊᒻᒪᓗ ᐃᓄᒡᔪᐊᒥᑦ, ᖃᐅᔨᒪᔭᐅᓚᐅᖅᑐᖅ ᑕᐃᑦᓱᒪᓂ ᖃᓪᓗᓈᑎᑐᑦ ᐳᐊᑦ Hᐊᕆᓴᓐ ᑕᐃᑦᓱᒪᓂ, ᑕᕆᐅᖓᓂ ᑕᓯᐅᔭᕐᔪᐊᑉ ᓯᒡᔭᖓᓂ ᑯᐸᐃᑦ, ᓅᑕᐅᓚᐅᖅᓯᒪᔪᑦ ᐊᒻᒪᓗ ᐋᖅᑭᒃᓯᓪᓗᑎᒃ ᓄᓇᓕᖕᓂᑦ ᖃᐅᓱᐃᑦᑐᒥᑦ ᐊᒻᒪᓗ ᐊᐅᔪᐃᑦᑐᒥᑦ.

ᑲᓇᑕᐅᑉ ᒐᕙᒪᒃᑯᖏᑦ ᐊᖏᕈᓯᐅᖅᑐᑦ ᓄᑖᓂᑦ ᓄᓇᑖᓛᕐᓂᖏᓐᓂᑦ ᐊᒥᓲᓚᐅᖅᑐᑦ: ᐆᒪᔪᐃᑦ, ᐱᔾᔪᑎᒃᓴᐃᑦ, ᐊᒻᒪᓗ ᓄᑖᓂᑦ ᐱᖁᑎᓂᑦ, ᑕᒪᐃᑕ ᐅᑕᖅᑭᓪᓗᑎᒃ ᖃᑕᖑᑎᒌᓂᑦ ᑎᑭᑉᐸᑕ. ᖃᑕᖑᑎᒌᑦ ᐊᖏᕈᓯᐅᖅᑕᐅᓚᐅᖅᓯᒪᖕᒥᔪᑦ ᖁᕕᐊᓱᖏᑉᐸᑕ, ᐅᑎᕈᓐᓇᕐᓂᖏᓐᓂᑦ ᐊᖏᕐᕋᒧᑦ ᐅᑭᐅᑉ ᒪᕐᕉᒃ ᓈᒃᐸᑎᒃ.

ᐅᑭᐅᖅ ᓯᕗᓪᓕᖅ ᖁᑦᑎᒃᑐᒥ ᐊᒃᓱᕈᒻᒪᕆᓚᐅᖅᑐᑦ ᖃᑕᖑᑎᒌᑦ. ᐅᖃᓚᐅᕋᓗᐊᖅᑎᓪᓗᒋᑦ ᒐᕙᒪᒃᑯᑦ ᐊᖏᕈᓯᐅᕈᑎᓂᑦ, ᐱᔾᔪᑎᒃᓴᑦ ᐱᑕᖃᓚᐅᖏᑦᑐᑦ, ᐊᒻᒪᓗ ᐃᓄᐃᑦ ᑳᓚᐅᖅᑐᑦ, ᖃᑕᖑᑎᒌᑦ ᐱᔪᓐᓇᖅᑎᑕᐅᓚᐅᖏᑦᑐᑦ ᐅᑎᕈᓐᓇᕐᓂᕐᒥᑦ ᐊᖏᕋᑐᖃᖏᓐᓄᑦ.

ᐃᓕᑕᕆᓕᖅᖢᒍ ᑕᒪᓐᓇ ᐊᒃᓱᕈᐊᓛᕐᓂᖅ ᐊᒻᒪᓗ ᐱᔪᒪᓂᖅ ᐃᖅᑲᐅᒪᔾᔪᑎᒋᓗᒍ, ᓄᓇᕗᑦ ᑐᙵᕕᒃ ᑎᒥᖓᑦ ᑎᓕᓯᓚᐅᖅᑐᑦ ᒪᕐᕉᖕᓂᑦ ᐃᖅᑲᐅᒪᔾᔪᑎᒃᓵᖕᓂᑦ ᐊᐃᐳᕆ, 2008. ᒪᕐᕉᒃ ᐊᒻᒪᓗ ᐅᑭᐅᑉ ᖁᑉᐸᖓᓂᑦ ᑭᖑᓂᐊᒍᑦ, ᐊᑯᓂ ᐸᕐᓇᐃᕙᓪᓕᐊᓯᒪᑎᓪᓗᒋᑦ, ᐃᖅᑲᐅᒪᔾᔪᑎᒃᓵᒃ ᐅᓖᖅᑕᐅᓚᐅᖅᑑᒃ ᓯᑎᐱᕆ 8 ᐊᒻᒪᓗ 10, 2010.

ᓄᓇᕗᑦ ᑐᙵᕕᒃ ᑎᒥᖓᑦ ᑎᓕᓯᓚᐅᖅᑐᖅ ᒪᕐᕉᖕᓂᒃ ᓄᓇᕗᓯ ᓯᕗᓕᖅᑎᒻᒪᕆᐅᔫᖕᓂᑦ ᓴᓇᙳᐊᖅᑎᓂᑦ ᓴᖅᑭᑎᑦᑎᓂᐊᕐᓗᑎᒃ ᐃᖅᑲᐅᒪᔾᔪᑎᒃᓵᖕᓂᑦ, ᓯᒥᐅᓂ ᐊᒪᕈᐊᓕᒃ ᖃᐅᓱᐃᑦᑐᒥᐅᑕᖅ, ᐊᓗᒻᒪᓗ ᓘᑎ ᐱᔭᒥᓂᖅ ᐊᐅᔪᐃᑦᑐᒥᐅᑕᖅ ᓴᓇᓚᐅᖅᑐᖅ ᐅᔭᕋᑦᑎᐊᕙᖕᒥᑦ ᓴᓇᖑᐊᕐᓂᐊᖅᖢᒍ ᐊᕐᓇᖑᐊᒥᑦ ᐊᒻᒪᓗ ᓱᕈᓯᕐᒥᑦ ᐊᐅᔪᐃᑦᑐᒥ. ᐃᖅᑲᐅᒪᔾᔪᑎᒃᓵᒃ ᑕᑯᒃᓴᐅᑎᑦᑎᔫᒃ ᖃᓄᖅ ᖃᑕᖑᑎᒌᑦ ᐊᕕᒃᑕᐅᓚᐅᕐᓂᖏᓐᓂᑦ ᓅᑕᐅᓕᖅᑎᓪᓗᒋᑦ. ᐊᑐᓂᑦ ᓴᓇᖑᐊᑏᒃ ᐃᓕᓴᐃᓚᐅᖅᑑᒃ ᒪᒃᑯᒃᑐᓂᑦ ᓴᓇᖑᐊᖅᑎᓂᑦ ᑕᒪᓐᓇ ᐱᓕᕆᐊᖑᑎᓪᓗᒍ.

ᐃᖅᑲᐅᒪᔾᔪᑎᒃᓵᒃ ᑐᕌᖅᑎᑕᐅᓚᐅᖅᑑᒃ ᖃᑕᖑᑎᒌᓄᑦ ᑕᐃᒃᑯᐊ ᓅᑕᐅᓚᐅᖅᑐᑦ, ᖁᕕᐊᓲᑎᒋᓪᓗᒋᑦ ᕿᓄᐃᓵᕐᓂᕆᓚᐅᖅᑕᖏᓐᓄᑦ ᐊᒻᒪᓗ ᐱᒻᒪᕆᐅᑎᑦᑎᓂᕐᒥᑦ ᖃᑕᖑᑎᒌᑦ ᐊᒻᒪᓗ ᓄᓇᓕᒃ ᐱᐊᓂᒍᑎᓂᖏᓐᓂᑦ ᐊᒥᓱᓂ ᐊᒃᓱᕈᐊᓛᕐᓇᖅᑑᓚᐅᖅᑐᓂᑦ ᖃᑕᖑᑎᒌᓄᑦ ᓵᑕᐅᓯᒪᔾᔪᑎᒋᓚᐅᖅᑕᖏᓐᓄᑦ ᖁᑦᑎᒃᑐᒧᑦ ᓅᑕᐅᓯᒪᔪᑦ ᐊᑐᖅᑎᓪᓗᒋᑦ ᐅᑭᐅᑦ 1950-ᓂᑦ.

ᐅᓖᖅᓯᓂᖅ ᓴᖅᑭᑎᑦᑎᓂᕐᒧᑦ ᐃᖅᑲᐅᒪᔾᔪᑎᒃᓴᓂᑦ ᐱᒻᒪᕆᐅᓚᐅᖅᑐᖅ ᓯᕗᒻᒧᒋᐊᕈᑎᓄᑦ ᐃᑲᔪᐃᓪᓗᓂ ᐃᓄᖕᓂᑦ ᐊᑐᓕᕐᓂᕐᒧᑦ ᐅᒃᑯᐊᖅᓯᓂᕐᒥᑦ ᐊᒻᒪᓗ ᒪᒥᓴᐃᓂᕐᒧᑦ ᑕᒪᒃᑯᐊ ᐱᐅᖏᑦᑐᐊᓘᓚᐅᖅᑐᑦ ᐊᖅᑯᓵᖅᑕᐅᓚᐅᖅᑐᓂᑦ. ᑕᖅᑭᒃᓯᐅᑎᑦ ᓯᕗᓂᐊᒍ ᓄᓇᕗᑦ ᑐᙵᕕᒃ ᑎᒥᖓᑦ ᐅᓖᖅᓯᓚᐅᖅᑐᑦ ᓴᖅᑭᑎᑦᑎᓂᒃᑯᑦ, ᐃᓄᓕᕆᔨᑐᖃᒃᑯᑦ ᒥᓂᔅᑕᖓ ᔮᓐ ᑕᖕᑲᓐ ᑐᓂᓯᓚᐅᖅᑐᖅ ᐱᒻᒪᕆᐅᔪᒥᑦ ᒪᒥᐊᔾᔪᑎᒥᑦ ᑭᒡᒐᖅᑐᖅᓗᒋᑦ ᑲᓇᑕᐅᑉ ᒐᕙᒪᒃᑯᖏᑦ ᐃᒪᓐᓇ ᐊᔭᐅᖅᑐᐃᓚᐅᖅᓯᒪᓂᖏᓐᓂᑦ ᐃᓄᖕᓂᑦ ᓄᒃᑎᖅᓯᓂᕐᒧᑦ. ᐊᖓᔪᖅᑳᒻᒪᕆᐊ ᑲᓇᑕᐅᑉ ᓯᑏᕙᓐ Hᐋᐸ ᑐᓂᓯᓚᐅᕐᒥᔪᖅ ᓇᖕᒥᓂᖅ ᒪᒥᐊᔾᔪᑎᒥᓂᒃ ᑕᐃᑯᓄᖓ ᐊᓐᓇᒃᓯᒪᔪᓂᑦ ᓯᕗᓪᓕᐅᓚᐅᖅᑐᓂᑦ ᓄᒃᑎᖅᑕᐅᓯᒪᔪᓂᑦ ᐳᓛᖅᑎᓪᓗᒍ ᖃᐅᓱᐃᑦᑐᒧᑦᖅ.

ᐊᒥᓱᐃᑦ ᐊᖓᔪᖃᐅᑎᑦ ᐃᓚᓕᐅᑎᓚᐅᖅᑐᑦ ᓄᓇᕗᑦ ᑐᙵᕕᒃ ᑎᒥᖓᓐᓂᑦ ᐊᒻᒪᓗ ᖃᐅᓱᐃᑐᒥᑦ ᐊᒻᒪᓗ ᐊᐅᔪᐃᑦᑐᒥᑦ ᓄᓇᓕᑦ ᐃᓚᖏᓐᓂᑦ ᑕᒪᓐᓇ ᐱᓪᓗᒍ ᐱᕕᒃᔪᐊᕐᓂᖅ ᓴᖅᑭᑎᓪᓗᒍ, ᐃᓚᒋᔭᐅᓪᓗᓂ ᒥᓂᔅᑕ ᑕᓐᑲᓐ ᑖᓐᓇ ᑐᓂᓯᓚᐅᖅᑐᖅ ᒪᒥᐊᓐᓂᕐᒥᑦ ᐊᑐᓂᑦ ᓄᓇᓕᖕᓄᑦ ᑭᒡᒐᖅᑐᖅᖢᒋᑦ ᑲᓇᑕᐅᑉ ᒐᕙᒪᒃᑯᖏᑦ ᑕᐃᒃᑯᓄᖓ ᓅᑕᐅᓚᐅᖅᓯᒪᔪᓄᑦ ᖃᑕᖑᑎᒌᑦ ᐊᖅᑯᓵᓚᐅᖅᓯᒪᔭᖏᓐᓄᑦ. ᒪᒥᓴᐃᓂᖅ ᐊᖕᒪᓗᖅᓯᓕᖅᓯᒪᔪᓂᑦ ᐱᓕᕆᐊᖑᓚᐅᖅᑐᑦ ᑕᒪᐃᓐᓄᑦ ᓄᓇᓖᖕᓄᑦ ᑭᖑᓂᐊᒍᑦ ᐅᓖᖅᓯᓂᕐᒥᑦ ᓴᖅᑭᑎᑦᑎᓂᒃᑯᑦ.

ᐃᑮᑦ ᐋᓐᓂᐊᑦ ᐃᑎᕗᑦ ᐊᒻᒪᓗ ᐅᑭᐅᒐᓵᓗᖕᓂᑦ ᓄᑕᐅᖏᑦᑐᑦ, ᑭᓯᐊᓂ ᐅᓖᖅᓯᓂᑦ ᐃᖅᑲᐅᒪᔾᔪᑎᒃᓴᓂᑦ, ᐊᒻᒪᓗ ᒪᒥᐊᔾᔪᑎᑦ ᐅᑯᓇᖓ ᑲᓇᑕᐅᑉ ᒐᕙᒪᒃᑯᖏᓐᓂᑦ, ᐱᕕᖃᕈᑕᐅᓂᐊᖅᑐᑦ ᐃᓄᖕᓄᑦ ᐱᔪᓐᓇᖅᑎᑕᐅᓂᕐᒥᑦ ᐃᖃᐅᒪᓗᑎᒃ, ᑭᒃᓵᓚᐅᕐᓗᑎᒃ ᒪᒥᓪᓗᑎᒃᓗ.