ᖁᑦᓯᑦᑐᒧᑦ ᓄᑦᑎᖅᑕᐅᓯᒪᔪᓄᑦ ᓇᑉᐸᐃᓂᑦᓴᒧᑦ ᐊᐅᓚᓂᐅᔪᖅ

ᓰᒥᐅᓂ ᐊᒪᕈᐊᓕᐅᔪᖓ, ᐊᑖᑕᑦᓯᐊᕋ ᐊᒪᕈᐊᓕᐅᓚᐅᕐᒪᑦ, ᐊᑖᑕᒐᓗ ᐊᑖᑕᒥᓂᒃ ᓴᐅᓂᖃᖅᓱᓂ ᐊᑎᖃᖅᓱᓂ. 1933 ᒪᐃ 1-ᒥ ᐃᓅᓕᖅᓯᒪᔪᖓ ᐃᓄᔾᔪᐊᒥ ᑯᐸᐃ ᑕᕐᕋᖓᓂ. 25-ᒪᐃᓕᒥ ᐃᓄᔾᔪᐊᖅ ᑕᕐᕋᖓᓂ ᐅᐱᕐᖏᕕᐊᕈᕐᒥ ᐊᑐᖃᖅᑐᖅ ᓄᓇ.

14-ᓂᒃ ᐅᑭᐅᖃᓕᖅᓱᖓ ᓴᓇᓐᖑᐊᕆᐅᓚᐅᖅᓯᒪᔪᖓ ᖃᓪᓗᓈᖅ ᐊᒥᐊᓕᒃᑲᒥᐅᑕᖅ ᓴᓇᓐᖑᐊᑎᑦᓯᓯᓚᐅᖅᓯᒪᒻᒪᑕ ᖁᓪᓕᑦᓴᔭᓂᒃ ᑑᒑᕐᓂᓪᓗ ᓂᐅᕕᖅᑎᑯᓐᓃᑦᓱᓂ ᐃᓄᑦᑎᑐᑦ ᐊᑎᖃᖅᑐᖅ ᓴᐅᒥ. ᑭᓯᐊᓂ 1950 ᓴᓇᐅᒐᖅᑐᐃᓐᓇᐅᓕᓚᐅᖅᓯᒪᔪᑦ ᑕᒪᓐᓇ ᓂᐅᕕᕈᑕᐅᔪᓐᓇᓕᓚᐅᖅᓯᒪᒻᒪᑦ.

ᑕᒪᒃᑯᐊ ᒥᖅᑯᓖᑦ ᓂᐅᕕᐅᑎᑦᓴᑐᐊᑦ ᑎᕆᒐᓐᓂᐊᑦ ᐊᑭᑭᓪᓕᔪᐊᐱᐅᓕᓚᐅᖅᓯᒪᒻᒪᑕ ᐊᕐᕌᒍᓂ ᐊᔾᔨᒌᑉᐸᓚᐅᓐᖏᒻᒪᑕ ᐊᑭᖏᑦ ᐃᓛᓐᓂ $20-ᕌᕈᓐᓇᖅᓱᑎᒃ ᐃᓛᓐᓂ $18-ᕌᖅᓱᓂ ᐃᓛᓐᓂ $7-ᕌᖅᓱᓂ ᐃᓛᓐᓂ $3.50-ᕌᖅᓱᓂ. ᖃᑯᖅᑕᐅᖏᑦᑐᑦ ᑲᔪᑦ 50-ᓴᕌᖅᓱᓂ.

1953-ᖑᑎᓪᓗᒍ ᖃᐅᓱᐃᑦᑐᒧᑦ ᓅᑕᐅᓚᐅᖅᓯᒪᔪᒍᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ. ᐅᖃᖅᓱᑎᒃ ᐆᒪᔪᓕᐊᓘᒻᒪᒡᒎᖅ ᐊᕐᕌᒎᓐᓂᒃ ᒪᕐᕉᓐᓂᓘᓐᓃᑦ ᑖᕙᓃᓪᓗᑕ ᐅᑎᕈᒪᓕᕈᑦᑕ ᐅᑎᓛᕋᑦᑕ. ᐃᓅᕕᑦᓴᐅᓂᖅᓴᐅᒻᒪᖔᖅ ᐃᓄᔾᔪᐊᖅ ᐆᒪᔪᖃᓐᖏᐸᓪᓕᐊᑐᐃᓐᓇᕐᒪᑦ. ᓱᓇᓕᒫᓂᒡᒎᖅ ᐊᑐᕆᐊᓕᑦᑎᓐᓂᒃ ᐊᔪᖅᓴᖅᑎᑕᐅᓂᐊᓐᖏᓇᑦᑕ ᓈᓚᐅᑎᒃᑯᓐᓂᒃ ᐅᖄᖏᓐᓇᕐᓂᐊᕋᑦᑕ ᐃᓄᔾᔪᐊᕐᒧᑦ.

ᐃᖏᕐᕋᓕᕋᑦᑕ ᐅᒥᐊᕈᐊᒃᑯᑦ ᐃᓪᓗᖃᖅᑎᑕᐅᓛᕋᑦᑕᒎᖅ ᑖᕗᖓᕈᑦᑕ. ᑕᒪᐅᓐᖓᕋᑦᑕ ᐃᓪᓗᖃᖅᑎᑕᐅᓚᐅᓐᖏᑦᑐᒍᑦ ᐊᒻᒪᓗ ᐆᒪᔪᖅᓯᐅᕈᑎᖃᕋᑕ ᐅᒥᐊᖃᓐᖏᓇᑦᑕ ᐅᒥᐊᕗᓪᓘᓐᓃᑦ ᕿᒪᓚᐅᕋᑦᑎᒍ.

ᑕᒡᒐ ᑕᐃᒪᓐᖓᑦ ᓴᓇᐅᒐᖅᑐᖓ ᖁᓪᓕᑦᓴᔭᓂᒃ ᓴᐅᓂᕐᓂᒃ ᑑᒑᕐᓂᒃ ᓇᔾᔪᓂᒃ. ᐅᔭᕋᓪᓚᕆᓐᓂᒃ ᓴᓇᕙᓕᕐᒥᒻᒪᑕ ᐆᑦᑐᖃᑦᑕᖅᓯᒪᓕᖅᑐᖓ ᐊᖏᔫᓐᖏᑦᑐᓂᒃ. ᑕᒪᓐᓇ ᐱᕙᓪᓕᐊᓕᕐᒥᒻᒪᑕ ᐊᑦᓱᕈᕐᓇᕋᓗᐊᖅᑦᑎᓪᓗᒍ ᐱᔭᐅᔪᓐᓇᖅᓯᕙᓪᓕᐊᒻᒪᑦ.