1. ᑐᕌᒐᖓ
ᓄᓇᕗᑦ ᑐᓐᖓᕕᒃ ᐃᑲᔫᑎᒃᓴᓕᕆᔨᒃᑯᑦ (ᐃᑲᔫᑎᒃᓴᓕᕆᔨᒃᑯᑦ) ᐃᓕᓴᖅᓯᔪᑦ ᐱᒻᒪᕆᐅᓂᖓᓂᒃ ᓴᐳᒻᒥᔭᖑᓂᖓᓂ, ᓴᖅᑭᔮᕐᑎᑦᑎᓂᕐᒥᒃ ᐊᒻᒪ ᐊᑑᑎᖃᓕᖅᑎᑕᐅᒃᑲᓐᓂᕆᐊᖃᓐᓂᖏᓐᓂᒃ ᐃᓄᒃᑐᑦ ᑎᑎᕋᖅᓯᒪᔪᓂᒃ ᐊᒻᒪ ᑲᔪᖏᓴᐃᒃᑲᓐᓂᕈᑎᖃᕈᒪᕗᑦ ᐊᒻᒪ ᑎᓕᐅᕆᔪᒪᓪᓗᑎᒃ ᐊᒥᓲᓂᕐᓴᐅᓕᒃᑲᓐᓂᖁᓪᓗᒋᑦ ᐃᓄᐃᑦ ᑎᑎᕋᕈᓐᓇᕐᑐᑦ ᐅᓂᒃᑳᖅᓯᒪᔪᓂᒃ ᐊᒻᒪ ᐊᒥᓱᕈᖅᑎᑕᐅᓗᑎᒃ ᐅᖃᓕᒫᒐᓕᐊᕆᓯᒪᔪᑦ ᐃᓄᒃᑐᑦ.
2. ᐱᔾᔪᑎᖓ
ᐱᔾᔪᑎᒋᔭᖓ ᐃᓄᒃᑑᖅᑕ ᐱᑕᖃᖅᑎᑦᑎᓗᑎ:
a) ᑮᓇᐅᔭᓂᑦ ᐱᔾᔪᓯᐊᓂᑦ $80.000 ($80,000.00) ᐱᔪᓐᓇᖅᑎᑕᐅᔪᒧᑦ ᐃᓄᒻᒧᑦ ᓂᕈᐊᖅᑕᐅᔪᖅ ᐱᑎᑕᐅᓗᓂ ᐃᓄᒃᑯᑦ ᑎᑎᕋᓂᕐᒧᑦ ᐱᔾᔪᓯᐊᒥᑦ ᑐᓂᔭᖏᓐᓄᑦ ᑎᑎᕋᖅᓯᒪᔭᖏᓐᓂ ᐃᓄᒃᑐᑦ (“ᐱᑎᑕᐅᔪᖅ”):
b) ᐱᕕᔅᓴᐅᔪᓐᓇᕐᓂᖓ ᑮᓇᐅᔭᖃᖅᑎᑕᐅᔪᓄᑦ ᑎᑎᕋᓂᕐᒧᑦ ᓯᓚᑦᑐᓴᕐᕕᒦᑦᑐᓄᑦ ᐅᕝᕙᓘᓐᓃᑦ ᓯᓚᑦᑐᓴᕐᕕᒃᔪᐊᒥ ᐱᑎᑕᐅᔪᒧᑦ;
c) ᐱᕕᔅᓴᖃᕈᓐᓇᕐᓂᖓ ᐱᑎᑕᐅᔪᖅ ᐃᖅᑲᓇᐃᔭᖃᑎᖃᕐᓗᓂ ᐊᓯᖏᓐᓂ ᐃᓄᓐᓂᑦ ᓲᕐᓗ ᑎᑎᕋᖅᑎᓂᑦ, ᐅᖃᐅᓯᓕᕆᔨᓂᑦ, ᐃᑲᔪᖃᑦᑕᖅᑐᓂᑦ, ᐊᒻᒪ ᐋᖅᑭᒋᐊᖅᑎᕆᔨᓂᑦ ᐊᓯᖏᓪᓗ. ᑭᖑᓪᓕᖅᐹᒥ ᐋᖅᑭᓪᓗᒋᑦ ᑎᑎᕋᖅᓯᒪᔪᑦ ᐃᖅᑲᓴᐃᔮᖏᑦ; ᐊᒻᒪ
d) ᑮᓇᐅᔭᐃᑦ ᐱᔾᔪᓯᐊᔅᓴᐃᑦ ᑎᓴᒪᓄᑦ (4) ᑐᖏᓕᖏᑦ ᓵᓚᒃᓴᖅᑐᑦ (“ᐃᓚᒍᑕᒃᑲᓐᓂᖏᑦ ᐱᔾᔪᓯᐊᑦ”), ᐊᒻᒪ ᑐᓂᔭᖏᑦ ᑲᑎᖅᓱᖅᑕᐅᔪᓐᓇᖅᑐᑦ ᐊᒻᒪ ᓴᖅᑭᖅᑎᑕᐅᓗᑎ ᐅᖃᖅᓯᒪᔭᖏᑦ, ᐊᑕᖏᕐᓗᑎ ᐅᕝᕙᓘᓐᓃᑦ ᐃᒪᐃᓐᓇᖏᑦ ᐃᓱᒪᖅᓲᑕᐅᓪᓗᑎ ᐃᑲᔫᓯᐊᖅᑐᓕᕆᔨᒃᑯᓐᓄᑦ, ᑲᔪᖏᖅᓴᐃᓗᑎ ᑎᑎᕋᖅᑐᑦ ᑎᑎᕋᖅᓯᒪᔪᓂᑦ ᐃᓄᓐᓄᑦ ᐃᓄᒃᑑᖅᑐᓂᑦ. ᐊᖏᓂᖏᑦ ᐃᓚᒍᑕᖏᓐᓄᑦ ᐱᔾᔪᓯᐊᓄᑦ ᑐᖏᓕᖏᑦ ᓵᓚᒃᓴᖅᑐᑦ ᐃᒪᐅᓕᖓᓂᐊᖅᑐᑦ:
$10,000 ($10,000.00) – ᑐᖏᓕᖓ
$5,000 ($5,000.00) – ᐱᖓᔪᖓᑦ
$3,000 ($3,000.00) – ᑎᓴᒪᖓᑦ
$2,000 ($2,000.00) – ᑕᓪᓕᒪᖓᑦ
e) ᓵᓚᒃᓴᖅᑐᓕᒫᑦ ᐃᓚᒋᔭᐅᖁᔭᐅᒍᓐᓇᓂᐊᕐᒥᔪᑦ ᑎᑎᕋᓂᕐᒧᑦ ᑲᑎᒪᓂᕐᒧᑦ ᐃᓱᒪᖅᓲᑕᐅᓪᓗᓂ ᐃᑲᔫᓯᐊᖅᑐᓕᕆᔨᒃᑯᓐᓄᑦ.
3. ᐱᓇᓱᐊᕈᓐᓇᖅᑎᑕᐅᔪᑦ
ᑭᓇᑐᐃᓐᓇᖅ ᐃᓄᒃ ᐊᑎᖃᖃᑕᐅᔪᖅ ᐊᑖᓂ ᓄᓇᕗᒻᒧᑦ ᐊᖏᕈᒻᒥᑦ ᐅᖓᑖᓂ ᐊᕐᕌᒍᓖᑦ 18, ᐱᓇᓱᐊᕈᓐᓇᖅᑎᑕᐅᔪᑦ ᑐᓂᓯᓗᑎ ᐃᓄᒃᑑᖅᑐᓂᑦ ᐃᓱᒪᒋᔭᐅᓂᕐᒧᑦ.
ᐅᑯᐊ ᐃᓄᐃᑦ ᐱᖃᓯᐅᔾᔭᐅᖏᑦᑐᑦ ᐱᓇᓱᐊᓂᕐᒧᑦ: ᐃᑲᔫᓯᐊᖅᑐᓕᕆᔨᒃᑯᑦ ᑲᑎᒪᔨᖏᑦ ᐊᒻᒪ ᐃᖅᑲᓇᐃᔭᖅᑎᖏᑦ; ᓄᓇᕗᑦ ᑐᓐᖓᕕᒃ ᑎᒥᖓᑦ (NTI) ᑲᑎᒪᔨᖏᑦ ᐊᒻᒪ ᐃᖅᑲᓇᐃᔭᖅᑎᖏᑦ; ᐊᒻᒪ ᐃᓄᒃᑐᑦ ᑎᑎᕋᓂᕐᒧᑦ ᐊᑭᑦᑐᕋᐅᑎᔪᓄᑦ ᓂᕈᐊᓂᕐᒧᑦ ᑲᑎᒪᔨᕋᓛᑦ (“ᑲᑎᒪᔨᕋᓛᑦ”) ᐊᒻᒪ ᐅᕐᓂᓗᓐᓂᕐᒧᑦ ᑲᑎᒪᔨᕋᓛᖑᖃᑕᐅᔪᑦ.
4. ᖃᓄᐃᑦᑐᒡᒍᑕᐅᔪᓐᓇᕐᓂᖏᑦ
ᓇᓗᓇᐃᔭᖅᓯᒪᓂᒋᐊᓐᖓᖅᑕᖏᑦ ᑐᓂᔭᐅᔪᑦ
ᐃᓱᒪᒋᔭᐅᓂᐊᕐᓗᓂ ᐃᓄᒃᑑᖅᑕ ᐃᓄᒃ ᑐᓂᓯᔭᕆᐊᓕᒃ ᐃᓄᑦᑑᖅᑐᓂᑦ ᓇᓗᓇᐃᔭᐃᔪᑦ ᐱᔾᔪᑎᖓᓂ ᐊᑕᖏᖅᑐᓂ ᑎᑎᕋᖅᓯᒪᔪᑦ ᐃᓄᒃᑐᑦ ᖃᑦᑏᓐᓇᐅᓛᕆᔪᓐᓇᖅᑕᖏᑦ 8 ᒪᕐᕈᐊᑎᖅᓯᒪᔪᑦ ᐅᖓᓯᒌᓐᓂᖏᑦ ᒪᑉᐱᒐᐃᑦ ᐊᒻᒪ ᐊᒥᓲᓛᕆᔪᓐᓇᖅᑕᖏᑦ 12 ᒪᕐᕈᐊᑎᖅᓯᒪᔪᑦ ᐅᖓᓯᒌᓐᓂᖏᑦ ᒪᑉᐱᒐᐃᑦ.
ᑭᖑᓪᓕᖅᐹᒥ ᑐᓂᔭᐅᔪᑦ
ᑐᔅᓯᕋᐅᑎᓕᐅᖅᑐᖅ ᐃᖅᑲᓇᐃᔮᖓ ᓂᕈᐊᖅᑕᐅᓐᓂᕈᓂ ᑲᑎᒪᔨᕋᓛᓄᑦ, ᐱᑎᑕᐅᔪᖅ ᐱᔭᕇᖅᓯᔭᕆᐊᓕᒃ ᓇᓗᓇᐃᔭᖅᓯᒪᒋᐊᓐᖓᖅᑕᖏᓐᓂ ᐊᑕᖐᔪᓂᑦ ᑎᑎᕋᖅᑕᓂᑦ ᐱᔪᒥᓇᕋᔭᖅᑐᑦ 200 ᒪᑉᐱᒐᐃᑦ ᐊᒥᓲᓂᖅᓴᓂᓪᓘᓐᓃᑦ ᐊᑕᐅᓯᒡᒍᑎᓂ ᐅᖓᓯᒌᓐᓂᖃᖅᑐᑦ, ᐊᒻᒪ ᑐᖔᓃᖏᓪᓗᑎ 150 ᒪᑉᐱᒐᐃᑦ ᖃᑦᑏᓐᓇᐅᓛᕆᓗᒋᑦ, ᑭᓯᐊᓂ ᐊᐅᓚᑦᑎᔨᒻᒪᕆᒃ ᐊᖏᖅᓯᒍᓂ ᐊᓯᐊᒍᑦ ᓈᒻᒪᒋᔭᐅᔪᓂᑦ ᖃᓄᐃᓕᖓᓂᖓᓄᑦ. ᐃᓄᒃᑐᑦ ᑎᑎᕋᖅᑕᐅᔪᑦ ᓴᓇᔭᐅᒋᐊᓐᖓᖅᓯᒪᓂᐊᖅᑐᑦ ᐊᓯᐊᓃᖔᖏᓪᓗᑎ ᑎᑎᕋᖅᓯᒪᔪᑦ ᑎᑎᕋᖅᑐᒧᑦ ᓴᖅᑭᖅᑎᑕᐅᓚᐅᖅᓯᒪᖏᑦᑐᓂᑦ. ᐃᓄᒃᑐᑦ ᑎᑎᕋᖅᑕᐅᔪᑦ ᐃᓗᓕᖃᕆᐊᖃᖏᑦᑐᑦ ᐃᓗᓕᖏᓐᓂ ᐊᓯᖏᓐᓄᑦ ᐃᖅᑲᓇᐃᔮᖑᓯᒪᔪᓂᑦ ᑎᑎᕋᖅᑎᓄᑦ.
ᐊᐅᓚᑦᑎᔨᒻᒪᕆᒃ ᓄᓇᕗᑦ ᑐᓐᖓᕕᒃ ᑎᒥᖓᓐᓂ, ᑭᒡᒐᑐᖅᑐᒋᑦ ᐃᑲᔫᓯᐊᖅᑐᓕᕆᔨᒃᑯᑦ, ᐋᖅᑭᔅᓯᒍᓐᓇᖅᑐᖅ ᐃᓱᒪᒋᔭᐅᔪᓂᑦ ᓯᕗᓂᐊᒍᑦ ᑐᓂᔭᐅᔪᓂᑦ ᒪᑐᐃᕐᓂᖓᓄᑦ, ᐱᖃᓯᐅᑎᓪᓗᑎ ᐃᓱᒪᒋᔭᐅᔪᑦ ᐱᓪᓚᕆᐅᖏᑦᑐᑦ, ᐱᓪᓚᕆᐅᔪᑦ ᐅᕝᕙᓘᓐᓃᑦ ᐊᓯᖏᓐᓂ ᐃᓱᒪᒋᔭᐅᔪᓂᑦ ᓈᒻᒪᑎᓪᓗᒋᑦ.
5. ᐱᑕᖃᕆᐊᖃᖅᑎᑕᐅᔪᑦ
ᑐᓂᔭᐅᔪᑦ ᐃᓄᒃᑐᑦ ᑎᑎᕋᖅᑕᐅᓯᒪᔪᑦ ᐱᖃᓯᐅᔾᔨᔭᕆᐊᓖᑦ ᑐᔅᓯᕋᐅᑎᓕᐅᕈᒻᒥ ᑕᑕᑎᕆᐊᓕᒻᒥᑦ ᐃᓗᓕᖃᖅᑐᓂ ᐊᑎᖓ ᑐᔅᓯᕋᐅᑎᓕᐅᖅᑐᖅ, ᐊᑎᖃᖃᑕᐅᓂᕐᒧᑦ ᓈᓴᐅᑎᖏᑦ ᐊᑖᓂ ᓄᓇᕗᒻᒧᑦ ᐊᖏᕈᑦ, ᑐᕌᕈᑎᖓ, ᖃᐅᔨᒋᐊᕐᕕᐅᔪᓐᓇᕐᓂᖓᓄ ᑐᑭᓯᒋᐊᕈᑎᖏᑦ ᐱᖃᓯᐅᑎᓪᓗᑎ ᐅᖄᓚᐅᑎᖓ ᓈᓴᐅᑎᖏᑦ ᐊᒻᒪ ᖃᕋᓴᐅᔭᒃᑯᑦ ᑐᕌᕈᑎᖏᑦ ᐊᒻᒪ ᐅᓪᓗᖓ ᑐᓂᔭᐅᓂᖓᓄᑦ. ᑎᑎᕋᖅᑐᖅ ᐊᑎᖓ ᑕᑯᔅᓴᐅᔭᕆᐊᖃᖏᑦᑐᖅ ᓇᒥᑐᐃᓐᓇᖅ ᐃᓄᒃᑑᖅᑐᓂ ᓇᓪᓕᐊᓐᓂᑐᐃᓐᓇᖅ ᑎᑎᕋᖅᑕᓪᓗᐊᑕᐅᔪᓂᑦ ᐃᓗᓕᖏᓐᓂ, ᐊᑎᖓ ᑎᑎᕋᖅᑕᐅᔪᖅ, ᐅᕝᕙᓘᓐᓃᑦ ᖃᕋᓴᐅᔭᒃᑯᑦ ᑎᑎᕋᖅᓯᒪᔪᑦ ᐊᑎᖓ ᓇᓗᓇᐃᖅᑕᐅᓂᐊᕐᓗᓂ ᐱᓕᕆᔭᐅᓂᐊᕐᓗᓂ ᑲᑎᒪᔨᕋᓛᓄᑦ.
6. ᑐᓂᓯᕕᔅᓴᐅᓂᖓ ᖃᖓᒃᑰᓂᖓ
ᑐᓂᓯᕕᔅᓴᐅᓂᖓ ᖃᖓᒃᑰᓂᖓ ᐃᓄᒃᑑᖅᑕ ᒪᑐᐃᖓᓂᐊᖅᑐᖅ ᐱᖓᓱᓄᑦ ᑕᖅᑭᓄᑦ. ᒪᑐᕕᔅᓴᖓ ᐅᖓᕐᕙᕆᐊᖅᑕᐅᔪᓐᓇᖅᑐᖅ ᐅᖓᕐᕙᕆᐊᕆᐊᖃᕈᓂ.
7. ᕿᒥᕐᕈᔭᐅᓂᖏᑦ ᑐᓂᔭᐅᔪᑦ
ᑐᓂᔭᐅᔪᑦ ᕿᒥᕐᕈᔭᐅᓯᒪᓂᐊᖅᑐᑦ ᐃᑲᔫᓯᐊᖅᑐᓕᕆᔨᒃᑯᓐᓄᑦ ᐃᖅᑲᓇᐃᔭᖅᑎᖏᓐᓄᑦ ᑖᒃᑯᐊ ᑐᓂᔭᐅᔪᑦ ᑎᑭᑦᑎᒐᓗᐊᕐᒪᖔᑕ ᐱᑕᖃᕆᐊᖃᖅᑎᑕᐅᔪᓂᑦ ᖃᑦᑏᓐᓇᐅᓛᕆᔪᓐᓇᖅᑕᖏᓐᓂ ᐊᒻᒪ ᐊᒥᓲᓛᕆᔪᓐᓇᖅᑕᖏᓐᓂ ᒪᑉᐱᒐᐃᑦ.
ᑐᔅᓯᕋᐅᑎᓕᐅᕈᑦ ᑕᑕᑎᕆᐊᓕᒃ ᕿᒥᕈᔭᐅᓂᐊᕐᒥᔪᑦ ᖃᐅᔨᓴᕐᓗᑎ ᐱᑕᖃᕆᐊᖃᖅᑐᓕᒫᓂᑦ ᑐᑭᓯᒋᐊᕈᕈᑎᓂᑦ ᐱᖃᓯᐅᔾᔭᐅᓯᒪᒐᓗᐊᕐᒪᖔᑕ.
ᐃᑲᔫᓯᐊᖅᑐᓕᕆᔨᒃᑯᑦ ᐃᖅᑲᓇᐃᔭᖅᑎᖏᑦ ᖃᐅᔨᒋᐊᒃᑲᓐᓂᕈᓐᓇᖅᑐᑦ ᐱᔭᕇᖅᓯᒪᑦᑎᐊᕐᓂᖏᓐᓄᑦ ᑐᓂᔭᐅᔪᑦ ᐊᒻᒪ ᑐᔅᓯᕋᐅᑎᓕᐅᕈᑏᑦ ᑕᑕᑎᕆᐊᓖᑦ.
ᑐᓂᔭᑐᐊᖑᔪᑦ ᑎᑭᑦᑎᔪᑦ ᒥᑭᓛᖏᓐᓂ ᐱᑕᖃᕆᐊᖃᖅᑎᑕᐅᔪᓂᑦ ᑐᓂᔭᐅᓂᐊᖅᑐᑦ ᑲᑎᒪᔨᕋᓛᓄᑦ
ᕿᒥᕐᕈᔭᐅᓗᑎ ᐊᒻᒪ ᓂᕈᐊᓂᕐᒧᑦ. ᓇᓗᓴᐃᔭᖅᓯᒪᓂᕆᒋᐊᓐᖓᖅᑕᖏᑦ ᑐᓂᔭᐅᔪᑦ ᑎᑭᑦᑎᖏᑦᑐᑦ ᐱᑕᖃᕆᐊᖃᖅᑎᑕᐅᔪᓂᑦ ᑎᑎᕋᖅᑕᐅᓯᒪᔪᓂᑦ ᐋᖅᑭᔅᓯᒪᓂᖃᖅᑐᑦ 8 ᒪᕐᕈᐊᑎᖅᑐᑎ ᐅᖓᓯᒌᓐᓂᖃᖅᑐᑦ ᒪᑉᐱᒐᐃᑦ ᐊᒻᒪ ᐊᒥᓲᓛᕆᔪᓐᓇᖅᑕᖏᑦ 12 ᒪᕐᕈᐊᑎᖅᑐᑎ ᐅᖓᓯᒌᓐᓂᖃᖅᑐᑦ ᒪᑉᐱᒐᐃᑦ ᐅᑎᖅᑎᑕᐅᓂᐊᖅᑐᑦ ᑐᔅᓯᕋᐅᑎᓕᐅᖅᑐᒧᑦ.
8. ᕿᒥᕐᕈᔭᐅᓂᖏᑦ ᑐᓂᔭᐅᔪᑦ
ᑐᓂᔭᐅᔪᑦ ᕿᒥᕐᕈᔭᐅᓂᐊᖅᑐᑦ ᑲᑎᒪᔨᕋᓛᓄᑦ ᑎᒃᑯᐊᖅᑕᐅᓯᒪᔪᑦ ᐃᑲᔫᓯᐊᖅᑐᓕᕆᕆᔨᒃᑯᑦ ᐊᖏᔪᖅᑳᖓᓐᓄᑦ, ᐅᑯᐊᖑᓪᓗᑎ ᖃᐅᔨᒪᓂᖃᖅᑐᑦ ᐃᓄᒃᑐᑦ ᑎᑎᕋᖅᑏᑦ, ᐅᓂᒃᑳᓕᐅᖅᑏᑦ, ᐅᖃᐅᓯᓕᕆᔩᑦ, ᑎᑎᕋᑦᑎᐊᖅᓯᒪᔪᓂ ᑎᑎᕋᕐᓂᖅ, ᐊᒻᒪ ᓴᖅᑭᑎᑦᑎᓂᕐᒧᑦ. ᑲᑎᒪᔨᕋᓛᑦ ᐱᖃᓯᐅᔾᔨᔭᕆᐊᓖᑦ ᐊᕕᑦᑐᖅᓯᒪᔪᒧ ᑭᒡᒐᖅᑐᐃᓂᕐᒧᑦ ᓄᓴᕗᒻᒥ, ᐊᒻᒪ ᐱᖃᓯᐅᔾᔨᔪᓐᓇᖅᑐᑦ ᑎᒃᑯᐊᖅᑕᐅᓂᖏᑦ ᑭᖑᕐᕕᖅᑎᐃᔪᓂᑦ ᕿᒥᕐᕈᓗᑎ ᐃᓄᐃᓐᓇᖅᑐᓐ ᑎᑎᕋᖅᑕᐅᔪᓂᑦ. ᐱᓕᕆᐊᒧᑦ ᐊᐅᓚᑦᑎᔨ ᐊᑐᕈᓐᓇᖅᑕᖓ ᒪᑐᐃᖓᔪᒥ ᓂᕈᐊᕋᔅᓴᖑᖅᑎᑦᑎᓂᕐᒥᑦ ᐱᕙᓪᓕᐊᓂᖏᓐᓄᑦ ᐃᑲᔪᕐᓗᑎ ᐃᓚᒋᔭᐅᔪᓐᓇᖅᑐᓂᑦ ᑎᒃᑯᐊᖅᓯᖁᔨᓗᑎ ᑲᑎᒪᔨᕋᓛᓄᑦ.
ᕿᒥᕐᕈᓂᖏᑦ ᑲᑎᒪᔨᕋᓛᑦ ᓈᒻᒪᒋᐊᓕᒃ, ᐊᑕᖏᖏᑦᑐᓂ ᐊᒻᒪ ᐃᓚᒋᓕᐅᔾᔨᔪᓂᑦ ᖃᓄᐃᑦᑐᑐᐃᓐᓇᕐᓂᑦ ᖃᓄᐃᓕᖓᓂᖏᓐᓄᑦ ᐃᓄᒃᑐᑦ ᑎᑎᕋᖅᑕᐅᔪᑦ. ᕿᒥᕐᕈᓂᐅᔪᑦ ᐃᑉᐱᒍᓱᒋᐊᖃᕐᒥᔪᑦ ᐅᖃᐅᓯᕐᓂ ᐊᔾᔨᒌᖏᓐᓂᖏᓐᓄᑦ ᐊᒻᒪ ᐱᔭᐅᖔᕈᒪᔪᓂᑦ ᐅᖃᐅᓯᕐᓂᑦ ᐊᔾᔨᒌᖏᑦᑐᓂ ᑐᔅᓯᕋᐅᑎᓕᐅᖅᑐᒧᑦ.
ᕿᒥᕐᕈᓂᐅᔪᑦ ᐱᖃᓯᐅᔾᔨᔪᓐᓇᖅᑐᑦ ᓈᒻᒪᒃᑲᓗᐊᕐᒪᖔᑕ ᐊᕕᑦᑐᖅᓯᒪᔪᓂᑦ ᑭᒡᒐᖅᑐᐃᓂᕐᒧᑦ ᐊᑕᖏᖅᑐᓄᑦ ᐃᓄᒃᑐᑦ ᑎᑎᕋᖅᑕᐅᔪᓂᑦ. ᑕᐃᒪᐃᒍᓐᓇᑎᓪᓗᒍ, ᐊᑕᐅᓯᐅᔭᕆᐊᓖᑦ ᓵᓚᒃᓴᖅᑐᑦ ᐊᑐᓂ ᐊᕕᑦᑐᖅᓯᒪᔪᓂᑦ ᓄᓇᕗᒻᒥ.
ᑲᑎᒪᔨᕋᓛᑦ ᕿᒥᕐᕈᓂᐊᖅᑐᑦ ᑭᖑᓪᓕᖅᐹᒥ ᑎᑎᕋᖅᑕᐅᒋᐊᓐᖓᖅᓯᒪᔪᓂᑦ ᐊᑕᖐᓯᒪᔪᓂᑦ ᑎᑎᕋᖅᑕᓂᑦ ᒪᓕᓐᓂᖃᑦᑎᐊᕋᓗᐊᕐᒪᖔᑕ ᒥᑭᓛᕆᔪᓐᓇᖅᑕᖏᓐᓂ ᐱᑕᖃᕆᐊᖃᖅᑎᑕᐅᔪᓂᑦ, ᐅᕝᕙᓘᓐᓃᑦ ᐊᑐᓕᖁᔨᓗᑎ ᐋᖅᑭᒋᒋᐊᖅᑕᐅᑲᓐᓂᕐᓂᖏᓐᓄᑦ ᐊᑕᖐᔪᓂ ᑎᑎᕋᖅᓯᒪᔪᓂᑦ, ᐅᕝᕙᓘᓐᓃᑦ ᐋᒡᒑᕐᓗᒍ ᑎᑎᕋᖅᑕᐅᒋᐊᓐᖓᖅᓯᒪᔪᑦᑎᑭᑦᑎᖏᒃᑯᑎ ᒥᑭᓛᕆᔪᓐᓇᖅᑕᖏᓐᓂ ᐱᑕᖃᕆᐊᖃᖅᑎᑕᐅᔪᓂᑦ ᐊᑕᖐᔪᓂᑦ ᑎᑎᕋᖅᓯᒪᔪᓂᑦᕝ.
ᓈᒻᒪᓴᖏᑦᑐᖃᕈᓂ ᐊᓯᐊᓄᑦ ᑎᑎᕋᖅᑕᐅᓯᒪᔪᓃᖔᖅᑐᓂ, ᐅᕝᕙᓘᓐᓃᑦ ᕿᒥᕐᕈᓂᕐᒧᑦ ᐃᖅᑲᓇᐃᔭᖅᑏᑦ, ᐅᕝᕙᓘᓐᓃᑦ ᐃᓚᒋᔭᐅᔪᑦ ᑲᑎᒪᔨᕋᓛᓂᑦ ᐸᓯᔅᓯᒍᑎ ᑐᓂᔭᐅᔪᖅ ᐊᓯᐊᓄᑦ ᑎᑎᕋᖅᑕᐅᓯᒪᔪᓃᖔᖅᑐᑎ, ᐃᑲᔫᓯᐊᖅᑐᓕᕆᔨᒃᑯᑦ ᓈᒻᒪᑦᑐᒥ ᖃᐅᔨᓴᕐᓂᖃᓂᐊᖅᑐᑦ ᐊᒻᒪ ᐱᓴᓱᐊᖅᑎᑦᑎᒍᒍᓐᓃᕐᓗᑎ ᑐᓂᔭᐅᔪᒥ ᐊᓯᐊᓄ ᑎᑎᕋᖅᑕᐅᓯᒪᔪᓃᖔᖅᑐᓂ ᖃᐅᔨᔭᐅᒍᑎ.
9. ᐅᕐᓂᓗᓐᓂᕐᒧᑦ ᐱᕙᓪᓕᐊᓂᖓ
ᓵᓚᒃᓴᖏᑦᑐᖅ ᑐᔅᓯᕋᐅᑎᐅᓕᐅᖅᑐᖅ ᐅᕐᓂᓪᓗᒍᓐᓇᖅᑐᖅ ᐃᓱᒪᓕᐅᖅᑕᐅᔪᒥ ᐅᕐᓂᓗᓐᓂᕐᒧᑦ ᑲᑎᒪᔨᕋᓛᓄᑦ ᐅᑯᖓᖑᓪᓗᑎ ᐱᖓᓱᑦ (3) ᐃᓄᐃᑦ ᑎᒃᑯᐊᖅᑕᐅᓯᒪᔪᑦ ᐃᑲᔫᓯᐊᖅᑐᓕᕆᔨᒃᑯᑦ ᐊᖏᔪᖅᑳᖓᓐᓄᑦ. ᐃᓱᒪᓕᐅᖅᑕᖓ ᐅᕐᓂᓗᓐᓂᕐᒧᑦ ᑲᑎᒪᔨᕋᓛᑦ ᑭᖑᓪᓕᖅᐹᖑᔪᖅ.
ᐅᕐᓂᓗᓐᓂᕐᒧᑦ ᑐᔅᓯᕋᐅᑎᓕᐅᕈᑎ ᐱᔾᔪᑎᖏᓐᓂ ᐱᑕᖃᖅᑎᑦᑎᔭᕆᐊᓖᑦ ᐅᕐᓂᓗᓐᓂᕐᒧᑦ ᐃᓱᒪᒋᔭᐅᓂᐊᕐᓗᓂ.
10. ᐃᓄᒃᑐᑦ ᑎᑎᕋᓂᕐᒧᑦ ᐱᔾᔪᓯᐊᓄᑦ ᐊᑭᓕᐅᑏᑦ
ᐃᓄᒃᑑᖅᑕ ᐱᔾᔪᓯᐊᓄᑦ ᑮᓇᐅᔭᐃᑦ ᑐᓂᔭᐅᓂᐊᖅᑐᑦ ᐃᓛᒃᑰᖓᔪᓂᑦ, ᑭᖑᓪᓕᖅᐹᖓ ᐊᑭᓕᐅᑎᖓ ᐱᑎᑕᐅᔪᒨᕐᓗᓂ ᐱᔾᔪᓯᐊᒥᑦ ᑭᖑᓂᐊᒍᑦ ᐱᔭᕇᖅᓯᒪᓕᖅᑎᓪᓗᒋᑦ ᑎᑎᕋᖅᑕᐅᓯᒪᔪᑦ ᓈᒻᒪᒋᔭᖏᓐᓄᑦ ᑲᑎᒪᔨᕋᓛᓄᑦ.
11. ᐅᖃᖅᓯᒪᓂᖏᑦ ᐊᒻᒪ ᖃᓄᐃᓐᓂᕆᒋᐊᓕᖏᑦ
ᑲᔪᓯᓂᖃᑦᑎᐊᖅᑐᖅ ᐱᑎᑕᐅᔪᖅ ᐊᖏᕆᐊᖃᖅᑐᖅ ᐅᖃᖅᓯᒪᓂᖏᓐᓄᑦ ᐊᒻᒪ ᖃᓄᐃᓐᓂᕆᒋᐊᓕᖏᓐᓄᑦ ᐱᑕᖃᕆᐊᖃᖅᑐᒋᔭᐅᔪᓂᑦ ᓄᓇᕗᑦ ᑐᓐᖓᕕᒃ ᑎᒥᖓᑦ ᐊᐅᓚᑦᑎᔨᒻᒪᕆᖓᓄ, ᓯᕗᓂᐊᒍᑦ ᐱᔭᐅᑎᓪᓗᒋᑦ ᓄᒃᑑᖅᑕ
ᐱᔾᔪᓯᐊᑦ, ᐱᖃᓯᐅᑎᓪᓗᑎ ᐅᑎᖅᑎᑕᐅᓂᖏᑦ ᐊᑭᓕᐅᑏᑦ ᐱᔾᔪᓯᐊᓄ ᑮᓇᐅᔭᐃᑦ ᐱᑎᑕᐅᔪᖅ ᐱᔭᕇᖅᓯᒍᓐᓇᖏᒃᑯᓂ ᑎᑎᕋᖅᓯᒪᔪᓂᑦ, ᑎᑎᕋᖅᑕᐅᔪᑦ ᐱᐅᖏᒃᑯᓂ, ᐃᓗᓕᖃᖅᑐᓂ ᐊᓯᐊᓄᑦ ᑎᑎᕋᖅᑕᐅᓯᒪᔪᓂᑦ, ᐅᕝᕙᓘᓐᓃᑦᑭᖑᓪᓕᖅᐹᒥ ᑎᑎᕋᖅᑕᐅᔪᑦ ᑎᑭᑦᑎᖏᒃᑯᑎ ᒥᑭᓛᕆᔪᓐᓇᖅᑕᖏᓐᓂ ᐱᑕᖃᕆᐊᖃᖅᑎᑕᐅᔪᓂᑦ.
ᐱᑎᑕᐅᔪᖅ ᐊᖏᕆᐊᖃᖅᑐᖅ ᓴᖅᑭᑎᑦᑎᓗᓂ ᑭᖑᓪᓕᖅᐹᒥ ᑎᑎᕋᖅᓯᒪᔪᓂᑦ ᑎᑭᑦᑎᔪᓂᑦ ᑕᑭᓂᖓᓄ ᐱᑕᖃᕆᐊᖃᖅᑎᑕᐅᔪᓂᑦ.
ᐱᑎᑕᐅᔪᖅ ᐱᐱᓯᒪᑦᑎᓂᐊᖅᑐᖅ ᐃᔾᔪᐊᖅᑕᐅᔪᓐᓇᖏᓐᓂᖏᓐᓄᑦ ᐊᒻᒪ ᐱᔪᓐᓇᐅᑎᖃᕐᓗᓂ ᓴᖅᑭᖅᑎᑕᐅᓂᖏᓐᓄᑦ ᐊᒻᒪ ᓴᖅᑭᖅᑎᑕᐅᒃᑲᓂᕐᓂᖏᓐᓄᑦ ᐃᓄᒃᑐᑦ ᑎᑎᕋᖅᑕᐅᔪᑦ.
ᐱᑎᑕᐅᔪᖅ ᐱᑕᖃᕆᐊᖃᖅᑎᑕᐅᔪᓐᓇᖅᑐᖅ ᓚᐃᓴᓐᓯᖃᓂᕐᒧᑦ ᐊᖏᕈᑎᒥᑦ ᐃᑲᔫᓯᐊᖅᑐᓕᕆᔨᒃᑯᓐᓄᑦ ᐅᕝᕙᓘᓐᓃᑦ ᓄᓇᕗᑦ ᑐᓐᖓᕕᒃ ᑎᒥᖓᓐᓄᑦ ᓴᖅᑭᔮᖅᑎᑕᐅᓗᑎ ᐅᕝᕙᓘᓐᓃᑦ ᓴᖅᑭᖅᑎᑕᐅᓗᑎ ᐃᓄᒃᑐᑦ ᑎᑎᕋᓂᕐᒧᑦ ᐱᔾᔪᓯᐊᖅ, ᐊᑕᖏᕐᓗᒍ ᐅᕝᕙᓘᓐᓃᑦ ᐃᓚᐃᓐᓇᖏᑦ, ᐃᑲᔫᓯᐊᖅᑐᓕᕆᔨᒃᑯᑦ ᐃᓱᒪᖅᓲᑎᖓᓂ, ᐱᖃᓯᐅᔾᔨᔪᓐᓇᖅᑐᑦ ᐱᔪᓐᒻᓴᐅᑎᖃᓂᕐᒥᑦ ᑐᑭᓯᓇᖅᓯᑎᑕᐅᓗᑎ, ᐋᖅᑭᒋᐊᖅᑕᐅᓗᑎ, ᓇᐃᓪᓕᑎᖅᑕᐅᓗᑎ ᐅᕝᕙᓘᓐᓃᑦ ᓇᐃᑦᑐᓂᑦ ᐲᖅᓯᕕᐅᓗᑎ ᑎᑎᕋᖅᑕᐅᓯᒪᔪᑦ ᐱᔾᔪᑎᒋᓪᓗᒋᑦ ᓴᖅᑭᖅᑎᑕᐅᓂᖏᓐᓄᑦ (ᑎᑎᕋᖅᑐᖅ ᖃᐅᔨᑎᑕᐅᓂᐊᖅᑐᖅ ᐊᖏᔪᓂᑦ ᐋᖅᑭᒋᐊᖃᕈᑎ), ᐱᔪᓐᓇᐅᑎᖃᕐᓗᑎ ᓂᐱᓕᐅᕐᓗᑎ/ᑕᕐᕆᔭᓕᐅᕐᓗᑎ ᖃᓄᑐᐃᓐᓇᖅ ᑕᑯᔅᓴᐅᓂᖃᖅᑐᓂᑦ ᐅᕝᕙᓘᓐᓃᑦ ᓴᓇᔭᐅᓚᐅᖅᓯᒪᖏᑦᑐᓂᑦ, ᑐᓂᐅᖅᑲᖅᑕᐅᓗᑎ ᐊᒻᒪ ᑕᑯᔅᓴᐅᑎᑕᐅᓗᑎ ᐅᖃᓕᒫᖅᑕᐅᔪᑦ ᑎᑎᕋᖅᑕᐅᓯᒪᔪᑦ ᐅᕝᕙᓘᓐᓃᑦ ᓇᐃᑦᑐᓂᑦ ᐲᖅᑕᐅᔪᑦ ᐅᖃᐅᓯᕆᒋᐊᓐᖓᖅᓯᒪᔭᖏᓐᓂ ᐅᕝᕙᓘᓐᓃᑦ ᑐᑭᓯᓇᖅᓯᑎᑕᐅᔪᓂᑦ, ᖃᕋᓴᐅᔭᒃᑯᑦ ᑐᑭᓯᒋᐊᕐᕕᒃᑯᑦ/ᓴᓇᓯᒪᔪᓂᑦ ᐊᐅᓚᑕᐅᔪᑦ ᐅᕝᕙᓘᓐᓃᑦ ᐱᔪᓐᓇᖅᑎᑕᐅᔪᑦ ᐃᑲᔫᓯᐊᖅᑐᓕᕆᔨᒃᑯᓐᓄᑦ.
12. ᐊᕐᕌᒍᑕᒫᑦ ᐊᑐᖅᑐᔅᓴᐃᑦ
ᐃᓄᒃᑑᖅᑕ ᐱᓕᕆᐊᖅ ᑐᓐᖓᓂᖃᖅᑐᑦ ᐊᕐᕌᒍᑕᒫᑦ ᐊᑐᖅᑐᔅᓴᓄ ᐊᖏᖅᑕᐅᓯᒪᔪᑦ ᐃᑲᔫᓯᐊᖅᑐᓕᕆᔨᒃᑯᑦ ᑲᑎᒪᔨᖏᓐᓄᑦ.
ᐊᕐᕌᒍᑕᒫᑦ ᐊᑐᖅᑐᔅᓴᐃᑦ ᐱᖃᓯᐅᔾᔨᔪᓐᓇᖅᑐᑦ ᐊᐅᓚᑕᐅᓂᖓᓄ ᐊᑭᖏᓐᓂ.
ᐊᐅᓚᑕᐅᓂᖓᓄ ᐊᑭᖏᑦ ᐱᖃᓯᐅᔾᔨᔪᓐᓇᖅᑐᑦ ᑐᓴᐅᒪᔾᔪᑎᓕᕆᓂᕐᒧᑦ, ᓴᖅᑭᑎᑦᑎᓂᕐᒧᑦ ᐊᑭᖏᑦ, ᑎᑎᕋᖅᑕᐅᑎᑕᐅᓂᖏᓐᓄᑦ ᐊᑐᐊᒐᐃᑦ, ᐅᖃᓕᒫᒐᕋᓛᑦ, ᐅᖃᓕᒫᒐᐃᑦ, ᑲᑎᒪᔾᔪᓯᐊᑦ ᑲᑎᒪᔨᕋᓛᓄᑦ, ᐊᑭᖏᑦ ᑎᑎᕋᖅᑐᓄᑦ, ᐅᖃᐅᓯᓕᕆᔨᓄᑦ, ᐃᑲᔪᖃᑦᑕᖅᑐᓄᑦ ᐅᕝᕙᓘᓐᓃᑦ ᐋᖅᑭᒋᒋᐊᖅᑎᑦᑎᔨᓄᑦ ᐊᒻᒪ ᓴᖅᑭᖅᑎᑕᐅᒃᑲᓂᕐᓂᖏᓐᓄᑦ ᓂᕈᐊᖅᑕᐅᓯᒪᔪᑦ ᐃᓄᒃᑐᑦ ᑎᑎᕋᖅᑕᐅᓯᒪᔪᑦ ᐊᑖᓂ ᓚᐃᓴᓐᓯᖃᖅᑎᑦᑎᓂᕐᒧᑦ ᐊᖏᕈᑎᒥᑦ.
13. ᓴᖅᑭᖃᑦᑕᕐᓂᖏᑦ
ᐃᓄᒃᑑᖅᑕ ᐊᐅᓚᓂᖃᖃᑦᑕᓂᐊᖅᑐᑦ ᒪᕐᕉᓐᓂ ᐊᕐᕌᒍᓂᑕᒫᑦ. ᒪᑐᐃᕐᓂᖏᑦ ᐊᒻᒪ ᒪᑐᓂᖏᑦ ᐊᑭᑦᑐᕋᐅᑎᔪᓄᑦ ᓇᓗᓇᐃᖅᑕᐅᓂᐊᖅᑐᑦ ᐊᐅᓚᑦᑎᔨᒻᒪᕆᖓᓄ ᓄᓇᕗᑦ ᑐᓐᖓᕕᒃ ᑎᒥᖓᑦ, ᑭᒡᒐᑐᖅᑐᒋᑦ ᐃᑲᔫᓯᐊᖅᑐᓕᕆᔨᒃᑯᑦ
