(ᔪᓚᐃ 2, 2019 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᓐᖓᕕᒃᑯ ᑎᒥᖓᑕ (ᑐᓐᖓᕕᒃ) ᑲᑎᒪᔨᖏᑦ ᐊᒻᒪᓗ ᐊᖓᔪᖅᑳᖓ ᐊᓗᑭ ᑰᑦᑎᖅ, ᓇᓪᓕᒍᓱᓐᓂᕐᒥᓂᒃ ᓂᓪᓕᐅᔾᔨᓚᐅᕐᐳᑦ ᐃᓅᒍᓐᓃᕐᓂᕆᓚᐅᖅᑕᖓᓄᑦ ᓘᑎ ᐸᓪᓗᖅ, ᒥᑦᑎᒪᑕᓕᒻᒥᐅᑕᖅ, ᓄᓇᕗᒻᒥ.

 

ᐸᓪᓗᖅ ᒪᓕᒐᓕᐅᖅᑎᐅᒋᐊᓐᖓᓚᐅᖅᑐᖅ ᓄᓇᑦᓯᐊᒥ ᖁᑦᑎᑦᑐᖅ ᓂᕈᐊᖅᑕᐅᓯᒪᕕᖓᓂ 1975-ᒥ. ᐊᑯᓂᐊᓗᒃ ᓂᕈᐊᖅᑕᐅᒪᖃᑦᑕᕐᓯᒪᔪᖅ, ᓯᑕᒪᐃᕐᓱᖅᑐᓂ ᓂᕈᐊᖅᑕᐅᓕᖅᑭᖃᑦᑕᕐᓯᒪᓪᓗᓂ. ᐃᓐᓇᐅᓂᕐᒧᑦ ᓄᖅᑲᐅᑎᓚᐅᖅᑕᖓ ᒪᓕᒐᓕᐅᕐᕕᒃ 1995-ᒥ ᑭᒡᒐᖅᑐᐃᓚᐅᖅᑐᓂ 20-ᓂᒃ ᑭᖑᓕᕇᓂᒃ ᐊᕐᕌᒍᓂᒃ. ᐃᑲᔫᑎᒋᓚᐅᖅᑕᖏᑕ ᐃᓚᖏᑦ ᓄᓇᕗᒻᒥ ᐃᓄᐃᑦ ᑲᑎᒪᔨᖏᓐᓂ ᑲᑎᒪᔨᐅᖃᑕᐅᓪᓗᓂ ᐊᐃᕙᔾᔪᑕᐅᑎᓪᓗᒋᑦ ᓄᓇᕗᑦ ᐊᖏᕈᑎᖏᑦ ᐊᒻᒪᓗ ᐊᐅᓚᑦᓯᖃᑦᑕᓂᕐᒥᒍᑦ, ᐃᑲᔪᖃᑦᑕᕐᓯᒪᔪᖅ ᑲᑎᒪᔨᐅᓪᓗᓂ ᐅᓄᖅᑐᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ.

 

ᐸᓪᓗᖅ ᐃᓅᒍᓐᓃᓚᐅᖅᑐᖅ ᔪᓚᐃ 1, 2019 ᐃᖃᓗᓐᓂ ᐃᓚᖏᑦ ᓇᔫᑎᑎᓪᓗᒋᑦ. ᓘᑎᐅᑉ ᐃᖅᑲᖅᑕᐅᖃᑦᑕᓂᐊᕐᓂᖓ ᐃᑲᔪᖃᑦᑕᕐᓯᒪᓂᖏᓪᓗ ᓄᓇᕗᒻᒥᒃ ᖁᔭᒋᔭᒻᒪᕆᐅᕗᑦ, ᐳᐃᒍᖅᑕᐅᔾᔮᖏᓪᓚᑦ ᐊᒻᒪᓗ ᑭᖑᓂᖃᓈᖅᑕᐅᓂᐊᖅᑐᖅ.

 

-30-

ᑐᑭᓯᒋᐊᒃᑲᓂᕐᕕᒃᓴᖅ:

 

ᐆ ᐊᖅᐱᒃ

ᑐᑭᒧᐊᒃᑎᑦᑎᔨ ᑐᓴᒪᐅᔾᔪᑎᓕᕆᓂᕐᒧᑦ

ᓄᓇᕗᑦ ᑐᓐᖓᕕᒃ ᑎᒥᖓ

ᐅᖄᓚᐅᑖ: 867-975-4941

 

Download (PDF, 56KB)

ᐅᖃᐅᓯᒃᓴᑦ – ᐃᓅᒐᑦᑕ ᐃᓄᒃᑑᖅᑕ ᑲᑎᒪᕐᔪᐊᕐᓂᖅ

ᓄᓇᕗᑦ ᑐᓐᖓᕕᒃ ᑎᒥᖓᓐᓄᑦ ᐊᖓᔪᖅᑳᖅ,
ᐊᓗᑭ ᑰᑦᑎᖅ ᑎᓴᒻᒥᖅ, ᒫᑦᓯ 28, 2019 ᑕᐅᑐᓐᖑᐊᖅᑕᖅ

“ᐃᓐᓇᑐᖃᕗᑦ ᐃᒃᐱᒍᓱᒃᐸᓪᓕᐊᓕᓚᐅᖅᓯᒪᖕᒪᑕ ᐃᓱᒫᓗᖕᓂᕐᒥᒃ: ᑲᑉᐱᐊᓇᓚᐅᖅᓯᒪᔪᖅ…ᐊᐱᖅᑯᑎᒐ ᐃᓐᓇᕐᓄᑦ ᐅᓇᐅᓚᐅᖅᓯᒪᔪᖅ:  “ᐊᑑᑎᖃᕋᔭᖅᐹ ᐃᓄᐃᑦ ᐃᓕᖅᑯᓯᖓᓂᒃ ᐆᒻᒪᖅᑎᑦᓯᒃᑲᓐᓂᕈᑦᑕ? ᐅᕝᕙᓘᓐᓃᑦ ᐃᒃᓯᓐᓇᑐᐃᓐᓇᕐᓗᒍ ᐃᓄᐃᑦ ᐃᓕᖅᑯᓯᖓᑦ ᐃᓕᓐᓂᐊᖔᕐᓗᑕ ᖃᓪᓗᓈᑦ ᐱᐅᓯᖏᓐᓂᒃ? ᐃᒪᓐᓇ ᑭᐅᓚᐅᖅᓯᒪᔪᖓ: ᐃᓄᐃᑦ ᐃᓕᖅᑯᓯᖓᓂᒃ ᐊᓯᐅᔨᔭᕆᐊᖃᖏᓐᓇᑦᑕ. ᐃᓄᐃᑦ ᐅᖃᐅᓯᖓᑦ ᐊᓯᐅᔨᔭᐅᔭᕆᐊᖃᖏᑦᑐᖅ.” – ᑕᒑᖅ ᑰᓕ

ᐅᖃᐅᓯᖅ ᐊᑐᖅᑕᐅᓪᓗᓂ ᓅᑉᐸᓪᓕᐊᔾᔪᑕᐅᓚᐅᖅᑐᖅ ᐃᓄᖕᓄᑦ ᐃᖅᑲᓇᐃᔭᖅᑎᓪᓗᒋᑦ ᓄᓇᑖᕈᑎᓄᑦ ᐊᖏᖃᑎᒌᒐᓱᐊᕐᓂᕐᒧᑦ ᓴᖅᑭᑦᑎᔾᔪᑕᐅᓚᕆᓪᓗᓂᓗ ᓄᓇᕗᒥᒃ.

ᒪᒃᑯᒃᑐᑦ ᐃᓄᐃᑦ ᐊᒃᓱᐊᓗᒃ ᑲᑉᐱᐊᓱᒐᑎᒃ ᑕᐅᑐᓐᖑᐊᖅᑕᖃᑕᓚᐅᖅᑐᑦ. ᑕᒪᓐᓇ ᐃᓱᒪᒋᑲᐃᓐᓇᕐᓚᕗᑦ. ᑕᐃᔅ)ᒪᓂ ᐃᓄᐃᑦ ᓄᓇᓕᖕᓄᑦ ᓅᕋᑖᕐᓂᑰᑎᓪᓗᒋᑦ, ᓱᒃᑲᔪᐊᓗᖕᒥᒃ ᐃᓅᓯᖓᑦ ᐊᓯᔾᔨᓚᐅᖅᓯᒪᖕᒪᑦ. ᕿᓚᒥᑯᓗᒃ, ᐃᓄᐃᑦ ᐃᓕᓚᐅᖅᑐᑦ ᓄᑖᒥᒃ ᐅᖃᐅᓯᕐᒥᒃ, ᓄᑖᓂᒃ ᒪᓕᒐᕐᓂᒃ ᐊᒻᒪ ᐊᑐᖅᑕᐅᓪᓗᑎᒃ ᐊᔭᐅᖅᑐᐃᔾᔪᑕᐅᓪᓗᑎᒃ ᓄᓇᑖᕈᑎᓄᑦ.

ᐅᓄᖅᑐᓄᑦ ᐊᕐᕌᒍᓄᑦ ᐊᐅᓪᓚᑲᑕᖃᑦᑕᓚᐅᖅᑐᑦ ᐃᓚᒥᖕᓂᒃ ᕿᒪᐃᓯᒪᓪᓗᑎᒃ, ᐊᔭᐅᖅᑐᐃᓪᓗᑎᒃ ᐃᑲᔪᕈᑎᒃᓴᖏᓐᓂᒃ ᐃᓄᐃᑦ. ᐃᓄᐃᑦ ᐃᓚᒋᔭᐅᓚᐅᖅᓯᒪᖕᒪᑕ ᓄᓇᑦᑎᐊᕐᒧᑦ ᑕᐃᔅᓱᒪᓂ ᑐᓴᖃᑦᑕᓚᐅᖅᓯᒪᔪᒍᑦ ᖃᓄᖅ ᓄᓇᕗᑦ ᐅᕙᑦᑎᓐᓄᑦ ᑐᑭᖃᕋᔭᕐᒪᖔᑦ.

ᐄᑉᐳ 1990-ᖑᑎᓪᓗᒍ, 15-ᓂᒃ ᐅᑭᐅᖃᓚᐅᖅᓯᒪᔪᖓ  ᑕᐃᔅᓱᒪᓂ ᐃᒡᓗᓕᖕᒥ ᑲᓇᑕᐅᑉ ᒐᕙᒪᒃᑯᖏᑕ ᒥᓂᔅᑕᖓ ᑎᑭᓚᐅᖅᓯᒪᔪᖅ ᐱᖃᑎᖃᕐᖢᓂ ᑐᓐᖓᕕᒃ ᑲᑐᔾᔨᖃᑎᒌᖏᑕ ᐊᖓᔪᖅᑳᖓᓐᓂᒃ ᐊᑎᓕᐅᖅᑕᐅᔭᖅᑐᕐᖢᓂ ᓯᕗᓪᓕᖅᓯᐅᑎ ᐊᖏᖃᑎᒌᒍᑎ ᓄᓇᕗᒧᑦ.  ᖁᕕᐊᒋᔭᐅᓪᓚᕆᓚᐅᖅᑐᖅ ᐊᓕᐊᓇᐃᒍᓱᑦᑎᐊᕐᖢᑎᒃ! ᑕᐃᔅᓱᒪᓂ, ᑐᓐᖓᕕᒃ ᑲᑐᔾᔨᖃᑎᒌᖏᑕ ᐊᖓᔪᖅᑳᖓ ᐸᐅᓪ ᖁᐊᓴᖅ ᐅᖃᓪᓚᓚᐅᖅᓯᒪᔪᖅ ᐃᒪᓐᓇ, “ᓇᓗᓇᐃᖅᐸᕗᑦ ᐱᔪᓐᓇᐅᑎᕗᑦ ᐊᑐᕈᓐᓇᕐᓂᐅᔪᖅ ᐅᖃᐅᓯᕐᒥᒃ ᐃᓄᒃᑎᑐᑦ ᓇᐅᒃᑯᓕᒫᖅ ᐊᑐᖅᑕᐅᖁᓪᓗᒍ ᐃᓅᓯᖓᓐᓂ ᓄᓇᕗᑦ. ᐱᖃᓯᐅᑎᓪᓗᒍ ᖃᓪᓗᓈᑦᑐᑦ ᐊᒻᒪᓗ ᐅᐃᕖᑎᑐᑦ ᐅᖃᐅᓯᖓᑦ, ᐃᓄᒃᑐᑦ ᐃᓕᓴᕆᔭᐅᔭᕆᐊᖃᖅᑐᖅ ᑲᓇᑕᐅᑉ ᒐᕙᒪᒃᑯᖏᓐᓂᑦ ᐃᓕᓴᕆᔭᐅᓯᒪᓗᓂ ᐅᖃᐅᓯᐅᓂᐊᕐᒪᑦ ᓄᓇᕗᒥ.  ᐊᔭᐅᖅᑐᐃᕗᒍᑦᑕᐅᖅ, ᕿᑐᕐᖓᕗᑦ ᑲᓇᑕᐅᑉ ᑐᓐᖓᕕᒡᔪᐊᖏᑎᒍᑦ ᐱᔪᓐᓇᐅᑎᖃᖁᓪᓗᒋᑦ ᐃᓕᓐᓂᐊᖅᑎᑕᐅᔪᓐᓇᖁᓪᓗᒋᑦ ᐃᓄᒃᑎᑐᑦ ᐅᖃᐅᓯᕐᒥᒃ ᐊᑐᕐᓗᑎᒃ.’  ᐅᒃᐱᒍᓱᒃᐳᒍᑦ, ᐃᓅᓪᓗᑕ, ᓱᓕ ᑖᒃᑯᓂᖓ ᐱᔪᓐᓇᐅᑎᖃᕋᑦᑕ ᐊᑐᕈᓐᓇᕐᓂᕐᒥᒃ ᐃᓄᒃᑐᑦ ᓇᐅᒃᑯᓕᒫᖅ ᐃᓅᓯᕆᔭᖏᓐᓂ ᓄᓇᕗᑦ ᐃᓗᐊᓂ, ᐱᓗᐊᖅᑐᒥᒃ ᐊᒃᑐᐊᓂᖃᖅᑎᓪᓗᒍ ᓄᓇᕗᒥ ᐃᓕᓐᓂᐊᕐᓂᓕᕆᓂᐅᑉ ᐊᐅᓚᓂᖓᑕ ᐃᓗᐊᓂ.

ᐃᖅᑲᓇᐃᔭᕐᓂᖓᑦ ᐅᔾᔨᖅᓱᑦᑎᐊᕐᖢᑎᒃ ᑲᔪᓯᓂᖃᖅᓯᒪᑦᑎᐊᖅᑐᖅ ᐊᒻᒪ ᓴᖅᑭᑦᑎᓯᒪᓪᓗᓂ ᑭᖑᓪᓕᖅᐹᖅᓯᐅᑎᒥᒃ ᐊᖏᖃᑎᒌᒍᑎᒥᒃ ᐊᑎᓕᐅᖅᑕᐅᓚᐅᖅᓯᒪᔪᖅ ᒪᐃ 25, 1993-ᖑᑎᓪᓗᒍ – 25 ᐊᕐᕌᒍᑦ ᐊᓂᒍᖅᓯᒪᓕᖅᑐᑦ.

ᑭᖑᕐᖓᒍᑦ ᖃᓄᐃᓕᐅᕈᓘᔭᖃᑦᑕᓚᐅᖅᑐᑦ ᐱᓕᕆᔭᐅᓪᓗᓂ ᓯᕗᕐᖓᒍᑦ ᓄᓇᕗᑦ ᐱᓐᖑᖅᑎᑕᐅᓚᐅᖏᓐᓂᖓᓂ ᐄᑉᐳ 1, 1999-ᒥ.

ᐃᓄᐃᑦ ᑕᐅᑐᓐᖑᐊᓚᐅᖅᑐ ᐱᐅᓂᖅᓴᒃᑯᑦ ᐱᔨᑦᓯᖅᑕᐅᓂᐊᓕᕐᓂᖏᓐᓂᒃ ᐊᒻᒪᓗ ᐱᓕᕆᔾᔪᑎᖃᓕᕐᓗᑎᒃ, ᐅᖃᐅᓯᑦᑎᓐᓂᒃ ᐊᑐᕐᓗᑎᒃ ᐊᒻᒪᓗ ᐱᖃᓯᐅᔾᔨᓯᒪᓗᑎᒃ ᐃᓄᐃᑦ ᐃᓕᖅᑯᓯᖏᓐᓂᒃ ᑐᑭᓯᐊᓂᕐᒧᑦ ᑭᓇᐅᓂᖏᓐᓂᒃ. ᖃᐅᔨᒪᔪᐃᓐᓇᐅᒐᑦᑕ, ᓄᓇᕗᑦ ᓴᖅᑭᑕᐅᓚᐅᖅᓯᒪᖕᒪᑦ ᐃᓚᖓᓂ ᑎᑎᕋᖅᓯᒪᓂᖓ 4 ᐊᑐᖅᑕᐅᓪᓗᓂ ᓄᓇᕗᒥ ᐊᖏᕈᑎᓂ. ᑖᓐᓇ ᐊᖏᕈᑎᐅᔪᖅ ᐊᔩᖃᑎᒌᒍᑎᒋᔭᐅᓚᐅᖅᑐᖅ ᐃᓄᖕᓄᑦ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᓐᓄᑦ.

ᑕᐃᔅᓱᒪᓂ, ᐃᓄᐃᑦ ᓂᕆᐅᓚᐅᖅᓯᒪᔪᑦ ᓄᓇᕗᑦ ᑭᓇᒃᑯᓕᒫᓄᑦ ᒐᕙᒪᖃᖁᓪᓗᒍ, ᐃᓄᐃᓐᓇᕐᓄᑦ ᑐᕌᖓᔪᓂᒃ ᒐᕙᒪᖃᓐᖏᖔᐃᕐᓗᑎᒃ.  ᐅᓄᖅᑐᓂᒃ ᐊᑦᑕᓇᔾᔭᐃᖅᓯᒪᔾᔪᑎᖃᖅᑐᖅ ᓯᕗᒧᐊᑦᑎᐊᖁᓪᓗᒍ ᒐᕙᒪᒃᑯᑦ ᐱᖃᓯᐅᔾᔨᓯᒪᓗᓂ ᐃᓄᒋᐊᖕᓂᖅᓴᐅᔪᓂᒃ ᐃᓄᒋᔭᖏᑦ, ᐱᓗᐊᖅᑐᒥᒃ ᐃᓚᖓᓂ ᑎᑎᕋᖅᓯᒪᓂᖓ 23 ᓴᖅᑭᑦᑎᔾᔪᑕᐅᔪᖅ ᑭᒡᒐᖅᑐᐃᓂᖃᕐᓗᑎᒃ ᐃᖅᑲᓇᐃᔭᖅᑎᖃᕆᐊᖃᕐᓂᖏᓐᓂᒃ ᐊᒻᒪᓗ ᐃᓚᖓᓂ ᑎᑎᕋᖅᓯᒪᓂᖓ 32-ᒥ ᐃᒪᐅᑎᑕᐅᓂᖏᑦ ᐃᓄᐃᑦ ᐃᓅᓯᓕᕆᓂᕐᒧᑦ ᐊᒻᒪ ᐃᓕᖅᑯᓯᓕᕆᓂᕐᒧᑦ ᐊᑐᐊᒐᕐᓄᑦ. ᐃᓄᐃᑦ ᐅᒃᐱᕈᓱᓚᐅᕐᒪᑕ  ᐃᓗᓕᕆᔭᖓ ᐱᔾᔪᑎᒋᔭᖓᓗ ᑎᑎᕋᖅᓯᒪᓂᖓᑕ 42 ᓄᓇᕗᒧᑦ ᐊᖏᖃᑎᒌᒍᑎᓂ ᐊᑐᖅᑕᐅᔭᕆᐊᖃᖅᑐᖅ ᓴᖅᑭᑕᐅᓗᓂ. ᐃᓄᐃᑦ ᐱᔾᔪᑎᖃᑦᑎᐊᖅᑐᑦ ᑕᐃᒪᓐᓇ ᐅᒃᐱᕈᓱᒋᐊᒃᓴᖅ. ᓄᓇᕗᒥ ᐊᖏᖃᑎᒌᒍᑎᑦ ᐱᖁᔭᕐᔪᐊᕆᔭᐅᖕᒪᑕ ᑲᓇᑕᐅᑉ ᐱᖁᔭᓕᐅᕐᕕᒡᔪᐊᖓᓂ.  ᑖᒃᑯᐊᓗ ᐱᖁᔭᕐᔪᐊᖏᓪᓗᑎᒃ.

ᓄᓇᕗᒥ ᐱᓕᕆᐊᖑᓚᐅᖅᓯᒪᔪᒧᑦ, ᐅᓂᒃᑳᓕᐊᖓ ᑖᒪᔅ ᐴᔾᔪᑉ 2006-ᖑᑎᓪᓗᒍ, ᓇᓗᓇᐃᖅᓯᓚᐅᖅᓯᒪᔪᖅ ᖃᓄᖅ ᑐᕌᒐᒃᓴᖃᕐᒪᖔᑦ ᐃᓚᖓᓂ ᑎᑎᕋᖅᓯᒪᓂᖓ 23 ᓄᓇᕗᒥ ᐊᖏᖃᑎᒌᒍᑎᓂ ᐃᓱᒪᒋᔭᐅᔭᕆᐊᑐᖏᒻᒪᑦ ᐃᓄᑑᑎᑕᐅᓗᓂ ᐊᒻᒪᓗ ᐱᓕᕆᔭᐅᔭᕆᐊᖃᖅᑐᖅ ᐃᓱᒪᒋᖃᓯᐅᑎᓗᒋᑦ ᐱᔾᔪᑎᐅᔪᑦ ᐊᒃᑐᐃᓯᒪᓂᐊᖅᑐᑦ ᓯᕗᓂᒃᓴᖓᓂᒃ ᓄᓇᕗᑦ, ᐱᓗᐊᖅᑐᒥᒃ ᐃᖅᑲᓇᐃᔭᖅᑎᑦᓯᓂᕐᒧᑦ ᐊᒻᒪᓗ ᐃᓕᓐᓂᐊᕐᓂᓕᕆᓂᕐᒧᑦ ᐊᒃᑐᐊᓂᖃᖅᑐᑦ. ᓄᓇᕐᔪᐊᖅ ᑕᑯᓐᓇᓚᐅᖅᓯᒪᔪᖅ ᑲᒪᓇᒻᒪᕆᒃᑐᒥᒃ ᓯᕗᒧᐊᒃᑎᑦᓯᓯᒪᓂᖏᓐᓂᒃ ᐃᓄᐃᑦ! ᐅᓇᑕᓚᐅᕋᑎᒃ ᐊᓯᔾᔨᖅᓯᓚᐅᖅᓯᒪᔪᑦ ᑲᓇᑕᐅᑉ ᓄᓇᓐᖑᐊᖁᑎᖓᓂᒃ.

ᐊᕙᑎᓄᑦ ᐊᕐᕌᒍᓄᑦ ᓄᓇᕗᖃᓕᖅᑎᓪᓗᒍ

 ᓇᒡᒐᔾᔭᐅᒥ ᓇᓪᓕᐅᓐᓂᖅᓯᐅᕐᓂᐊᕐᒪᑦ ᐊᕐᕌᒍᖃᓕᕐᓗᓂ ᐊᕙᑎᓂᒃ (20-ᓂᒃ) ᑕᐃᒪᓐᖓᑦ ᓴᖅᑭᑕᐅᓚᐅᖅᓯᒪᖕᒪᑦ ᓄᓇᕗᑦ ᓄᓇᖁᑎᖓᑦ. ᐅᐊᑲᓪᓚᖔ! ᐊᒃᓱᐊᓗᒃ ᖁᕕᐊᓇᖅᑐᖅ. ᐃᓄᐃᑦ ᐃᓅᓯᕆᔭᖓᑦ ᐱᐅᓂᖅᓴᐅᓕᕐᓂᐊᕐᒪᑦ ᐃᓄᖕᓄᑦ. ᑕᐃᒪᓐᓇᐃᖅᑯᔨᑦᑎᐊᓚᐅᖅᓯᒪᔪᖅ ᑕᒻᒪᖏᑦᑎᐊᕐᖢᑕ ᐊᖅᑯᑎᑦᑎᓐᓃᕐᖢᑕ. ᓄᓇᕗᑦ ᒐᕙᒪᒃᑯᖏᑦ ᐃᔨᒋᓂᖅᓴᐅᓚᐅᖅᓯᒪᔪᑦ ᓯᐊᒻᒪᒃᑎᕆᓂᕐᒥᒃ ᓄᓇᓕᖕᓄᑦ ᐃᖅᑲᓇᐃᔮᒃᓴᓂᒃ ᐊᒻᒪ ᑕᒪᓐᓇ ᖃᐅᔨᒪᔭᕗᑦ ᐅᓪᓗᒥᒧᑦ, ᐅᓄᕐᓂᖅᓴᐅᔪᑦ ᓯᐊᒻᒪᒃᑎᕆᕕᐅᓯᒪᔪᓂ ᓄᓇᓕᖕᓂ ᐃᖅᑲᓇᔮᑦ ᑎᒍᒥᐊᖅᑕᐅᖕᒪᑕ ᐃᓄᖕᓄᑦ.

ᕿᖓᐅᒻᒥ ᐱᓕᕆᐊᒃᓴᓄᑦ ᑐᕌᒐᒃᓴᖅ ᐃᒪᓐᓇ ᐅᖃᖅᓯᒪᓚᐅᖅᓯᒪᔪᖅ,

‘ᐊᕐᕌᒍᐊᓂ 2020, ᓄᓇᕗᑦ ᐃᒪᐃᓕᖓᓛᖅᑐᖅ:

ᐃᓄᒃᑐᑦ ᐅᖃᐅᓯᖅ, ᐃᓘᓐᓇᖏᓐᓂ ᓇᐅᒃᑯᓕᒫᖅ, ᐊᑐᖅᑕᐅᓗᓂ ᐃᖅᑲᓇᐃᔭᕐᕕᖓᓐᓂ ᓄᓇᕗᑦ ᒐᕙᒪᒃᑯᖏᑕ.’

ᐅᕙᓐᓄᓪᓕ, ᒪᒃᑯᒃᑎᓪᓗᖓ ᑕᐃᔅᓱᒪᓂ ᒪᓕᒃᓴᖅᓴᕋᐃᑎᓪᓗᖓ ᐃᖅᑲᓇᐃᔭᓕᓚᐅᖅᓯᒪᔪᖓ ᓄᓇᕗᑦ ᒐᕙᒪᒃᑯᖏᓐᓂᑦ ᐊᕐᕌᒍᑦ ᐅᓄᖅᑐᑦ ᖃᓪᓗᓈᑦ ᓄᓇᖓᓐᓂ ᐃᓕᓐᓂᐊᓚᐅᖅᑎᓪᓗᖓ ᓯᓚᑦᑐᓴᕐᕕᒡᔪᐊᖕᓂ ᒪᕐᕉᖕᓂ ᐃᓕᓴᕆᔭᐅᔾᔪᑎᑖᕐᖢᖓ, ᐃᖅᑲᐅᒪᔪᖓ ᐃᓱᒪᓪᓗᖓ ᐃᒪᓐᓇ, ‘ᐅᐊᑲᓪᓚᖔ’! ᑕᐃᒪᓐᓇ ᑕᕝᕙᖃᐃ ᑕᐅᑐᓐᖑᐊᓚᐅᖅᐸᑦ ᓄᓇᕗᒥ ᓴᖅᑭᑦᑎᓂᕐᒥᒃ’ ᐅᓂᒃᑳᓚᐅᑲᒍᒪᓪᓗᖓ ᐃᒪᖓᓐᓂᒃ ᐊᑐᓚᐅᖅᓯᒪᔪᒥᒃ. ᖃᐅᔨᒪᓚᐅᕋᒃᑯ ᒥᓂᔅᑕᐅᓪᓗᓂ ᐊᒻᒪᓗ ᐃᓄᑐᐃᓐᓇᐅᓪᓗᓂ ᐊᒃᓱᐊᓗᒃ ᐅᐱᒍᓱᒃᑐᖓ, ᐅᕙᑦᑎᓐᓂᖃᑕᐅᔪᓐᓇᕐᒪᑦ – ᓗᐃ ᑕᐹᕐᔪᒃ.

ᐊᑕᐅᑦᑎᒃᑯᓪᓗ ᑐᑭᒧᐊᒃᑎᑦᓯᔨᐅᓚᐅᖅᓯᒪᒐᒪ ᐊᑐᐊᒐᓕᕆᓂᕐᒧᑦ ᐊᒻᒪ ᐸᕐᓇᐃᓂᕐᒧᑦ. ᐅᓪᓗᒃᑯᑦ, ᑲᑎᒪᖃᑕᐅᑎᓪᓗᖓ ᒥᓂᔅᑕᒧᑦ. ᓂᓪᓕᓚᐅᖅᓯᒪᖏᑦᑐᖓ, ᐊᐱᕆᔭᐅᒐᓗᐊᕈᒪ ᓂᓪᓕᕋᔭᖅᑐᕕᓂᐅᖏᑦᑐᖓ ᑯᒃᓴᓱᓗᐊᒧᑦ. ᑕᐃᑲᓂ ᐃᒃᓯᕙᑎᓪᓗᖓ, ᓈᓚᓚᐅᖅᓯᒪᔪᖓ ᑎᑎᕋᖅᐸᓪᓕᐊᓪᓗᖓᓗ, ᐊᒃᓱᐊᓗᒃ ᐅᐱᒍᓱᑲᓪᓚᓕᓚᐅᖅᓯᒪᔪᖓ. ᐱᓪᓗᒍ ᓄᓇᕗᑦ ᒐᕙᒪᒃᑯᖏᓐᓂ ᒥᓂᔅᑕ ᐃᓄᒃᑎᑐᐃᓐᓇᖅ ᐅᖃᓪᓚᓚᐅᖅᓯᒪᖕᒪᑦ.  ᒥᓂᔅᑕ, ᑐᖏᓕᖓᓗ ᒥᓂᔅᑕᐅᑉ ᐊᒻᒪᓗ ᐃᑲᔪᖅᑎᖓ ᒥᓂᔅᑕᐅᑉ ᑐᖏᓕᖓᑕ, ᐱᖓᓱᓪᓗ ᑕᐃᑲᓃᖃᑕᐅᔪᑦ ᐅᐱᓐᓇᒻᒪᕆᓚᐅᖅᑐᑦ, ᐃᓘᓐᓇᖏᑦ ᐃᓄᒃᑐᑦ ᐅᖃᓪᓚᒍᓐᓇᖅᑐᐃᓐᓇᐅᓪᓗᑎᒃ. ᑕᑯᓐᓇᕐᖢᒍ ᑕᒪᓐᓇ ᐃᓚᒋᔭᐅᓪᓗᖓᓗ ᖁᕕᐊᓱᑦᑎᐊᓕᓚᐅᖅᓯᒪᔪᖓ ᓲᕐᓗ ᓄᕗᔭᓂ ᖃᖓᑕᓪᓗᖓ ᐅᐱᓗᐊᒧᑦ.  ᑕᒪᓐᓇ ᐱᓪᓗᒍ ᐃᓄᐃᑦ ᐅᓄᖅᑐᑦ ᐃᓚᒥᖕᓂᒃ ᕿᒪᐃᓯᒪᖃᑦᑕᖅᓯᒪᓂᑰᕗᑦ ᐊᒻᒪᓗ ᐊᒃᓱᕈᕈᑎᖃᖅᓯᒪᓪᓗᑎᒃ ᓄᓇᕗᑦ ᓴᖅᑭᑕᐅᖁᓪᓗᒍ. ᐊᑯᓂᐊᓗᒃ ᐊᓂᒍᓚᐅᖅᑎᓪᓗᒍ ᑕᐃᑲᓂ ᐊᑐᖅᑕᐅᓚᐅᖅᓯᒪᔪᖅ, ᐅᓪᓗᒥᒧᑦ ᑎᑭᓪᓗᒍ, ᖁᖓᖃᑦᑕᖅᐳᖓ ᖁᕕᐊᒋᓪᓗᒍ ᖃᓄᖅ ᐃᓚᒋᔭᐅᓚᐅᖅᓯᒪᖕᒪᖔᕐᒪ ᐊᑐᓕᖅᑎᑕᐅᓕᖅᑎᓪᓗᒍ ᐃᓚᖓ ᑕᐅᑐᓐᖑᐊᖅᑕᐅᓂᑯ ᓄᓇᕗᒧᑦ.

ᓄᓇᕗᑦ ᒐᕙᒪᒃᑯᖏᑦ ᐃᖅᑲᓇᐃᔭᖅᓯᒪᔪᑦ ᐊᒃᓱᕈᕐᖢᑎᒃ ᐱᓕᕆᖃᑎᒋᔭᐅᓪᓗᑎᒃ ᐃᓄᐃᑦ ᑎᒥᖁᑎᒋᔭᖏᑦ ᓴᖅᑭᑕᐅᖁᓪᓗᒍ ᐊᒻᒪ ᐊᓂᒍᖅᑎᑕᐅᖁᓪᓗᒍ ᐃᓕᓴᕆᔭᐅᓯᒪᔪᑦ ᐅᖃᐅᓯᑦ ᐱᖁᔭᕐᔪᐊᖓᑦ  ᔫᓂ 2008-ᖑᑎᓪᓗᒍ ᐊᒻᒪᓗ ᐃᓄᐃᑦ ᐅᖃᐅᓯᖏᑦ ᓴᐳᒻᒥᐅᓯᖅᑕᐅᓯᒪᓂᖏᓐᓄᑦ ᐱᖁᔭᕐᔪᐊᖅ 2008-ᒥ. ᑖᒃᑯᐊ ᐃᓕᓴᖅᓯᔾᔪᑕᐅᓚᐅᖅᑐᑦ ᐊᒻᒪ ᓇᓗᓇᐃᖅᓯᔾᔪᑕᐅᓪᓗᑎᒃ ᐅᖃᐅᓯᕐᒧᑦ ᐱᔪᓐᓇᐅᑎᖏᓐᓂᒃ ᐊᒻᒪ ᐃᓄᖕᓂᒃ ᓂᕆᐅᖕᓂᖅᑖᖅᑎᑦᓯᓪᓗᓂ.

ᐊᕐᕌᒍᑦ ᐊᕙᑎᑦ ᐊᓂᒍᖅᑎᓪᓗᒋᑦ, ᐅᓄᑲᓪᓚᒃᑐᑦ ᐱᒋᐊᖅᑎᑕᐅᓯᒪᔪᑦ ᐊᐅᓚᔾᔭᒃᑕᐅᓂᑯᑦ ᐃᓚᒋᔭᐅᓪᓗᑎᒃ ᑕᐅᑐᓐᖑᐊᖅᑕᐅᔪᓄᑦ ᓄᓇᕗᒧᑦ.  ᒐᕙᒪᒃᑯᑦ ᐊᓯᔾᔨᖅᖢᑎᒃ, ᓯᕗᓪᓕᐅᑎᔭᐅᔪᑦ ᐊᓯᔾᔨᕐᖢᑎᒃ. ᑐᖏᓕᕆᔭᐅᓚᐅᖅᓯᒪᔪᖓ ᒥᓂᔅᑕᒧᑦ ᐊᕐᕌᒍᑦ 7 ᐅᖓᑖᓄᐊᕐᔪᒃ ᐊᒻᒪ ᐱᒋᐊᓚᐅᖅᓯᒪᔪᖓ ᐃᖅᑲᓇᐃᔮᓐᓂ ᒪᓕᒐᖃᖅᑎᓪᓗᒋᑦ ᐃᓄᒃᑎᑐᑦ ᐅᖃᓪᓚᒍᓐᓇᖏᑦᑐᑦ ᒥᓂᔅᑕᐃᑦ ᑐᖏᓕᖏᑦ ᐃᓕᓐᓂᐊᖅᑎᑕᐅᖃᑦᑕᖁᓪᓗᒋᑦ ᐃᓄᒃᑐᑦ ᐅᖃᐅᓯᕐᒥᒃ ᑕᑯᒃᓴᐅᑎᑦᓯᖁᓪᓗᒋᑦ ᐱᒻᒪᕆᐅᓂᖓᓂᒃ ᐃᓄᒃᑐᑦ ᐅᖃᐅᓯᖅ ᐊᒻᒪᓗ ᓯᕗᒧᐊᒃᑎᑦᓯᖁᓪᓗᒋᑦ ᐃᖅᑲᓇᐃᔭᕐᕕᖕᒥ ᐊᑐᖅᑕᐅᓂᒃᓴᖓᓄᑦ ᐃᓱᓕᓚᐅᖏᓐᓂᖓᓂ ᐊᕐᕌᒍᑦ 7 ᐃᓗᐊᓂ ᐃᖅᑲᓇᐃᔭᖅᑎᓪᓗᖓ, ᑖᓐᓇ ᑐᖏᓕᕆᔭᐅᑎᓪᓗᖓ ᒥᓂᔅᑕᒧᑦ ᐃᖅᑲᓇᐃᔭᖅᑎᓪᓗᖓ ᓂᕆᐅᖕᓂᐅᔪᖅ ᓴᓂᕐᕙᒃᑕᐅᓚᐅᖅᓯᒪᔪᖅ.

ᐊᑐᓂᓗ ᒐᕙᒪᐅᔪᑦ ᐱᓕᕆᐊᒃᓴᖏᓐᓄᑦ ᑐᕌᒐᒃᓴᖏᑦ (ᕿᖓᐅᒻᒥ ᑐᕌᒐᒃᓴᓕᐊᑦ, ᐱᓇᓱᐊᖅᑕᕗᑦ, ᑕᒪᑉᑕ, ᓯᕗᒧᑦ ᐊᑉᓗᖅᑕ, ᑐᕌᖅᑕᕗᑦ) ᐃᓘᓐᓇᖏᑦ ᓇᓗᓇᐃᖅᓯᓯᒪᔪᑦ ᐃᖅᑲᓇᐃᔭᕐᓂᐊᕐᓂᖏᓐᓂᒃ ᐃᓄᒃᑐᑦ ᐅᖃᐅᓯᖅ ᐊᑐᖅᑕᐅᖁᓪᓗᒍ ᒐᕙᒪᒃᑯᑦ ᐃᖅᑲᓇᐃᔭᕐᕕᖏᑕ ᐃᓗᐊᓂ.

ᑕᒪᓐᓇ ᐱᒻᒪᕆᐅᖕᒪᑦ. ᒐᕙᒪᒃᑯᑦ ᓴᖅᑭᔮᕐᒪᑕ ᐱᔨᑦᓯᖁᓪᓗᒋᑦ ᐃᓄᖁᑎᖏᓐᓂᒃ. ᓄᓇᕗᒥᓕ, ᐃᓄᖁᑎᖏᑦ ᐃᓄᒋᐊᖕᓂᖅᓴᐅᑎᓪᓗᒋᑦ ᐃᓄᐃᑦ ᐊᒻᒪ ᐅᓄᕐᓂᖅᓴᐅᔪᑦ ᐃᓄᒃᑐᑦ ᐅᖃᓪᓚᖃᑦᑕᕐᖢᑎᒃ. ᑕᐃᒪᐃᒻᒪᑦ ᑐᑭᖃᑦᑎᐊᖅᐳᖅ ᓄᓇᕗᑦ ᒐᕙᒪᒃᑯᖏᑦ ᐊᒃᓱᕈᑦᑎᐊᕐᓗᑎᒃ ᐃᖅᑲᓇᐃᔭᕆᐊᖃᓕᖅᑐᑦ ᑎᑭᐅᑎᔪᓐᓇᖁᓪᓗᒋᑦ ᐃᓄᒃᑐᑦ ᐅᖃᐅᓯᖅ ᐊᑐᖅᑕᐅᓂᖓ ᐃᖅᑲᓇᐃᔭᕐᕕᖕᒥ ᐱᔾᔪᑎᒋᓪᓗᒍ ᐃᓄᐃᑦ ᐊᑐᖅᑐᑦ ᒐᕙᒪᒃᑯᑦ ᐱᓕᕆᐊᓐᖑᖅᑎᓯᒪᔭᖏᓐᓂᒃ ᐊᒻᒪᓗ ᐱᔨᑦᓯᕈᑎᖏᓐᓂᒃ ᐃᓄᒃᑐᑦ ᐅᖃᐅᓯᕐᒥᒃ ᐊᑐᕐᕕᐅᖁᓪᓗᒋᑦ.  ᑕᒪᓐᓇ ᐱᐅᓇᓱᖕᓂᑐᐃᓐᓇᕐᒧᑦ ᑐᕌᖓᖏᒻᒪᑦ ᐃᓕᖅᑯᓯᐅᑉ ᐃᓚᒋᒻᒪᒍ. ᐅᓄᖅᑐᐃᖅᓱᓗᐊᕐᖢᓂ ᐊᒃᑐᐊᓂᖃᕈᓐᓇᕐᒪᑦ ᐃᓅᓯᕐᒧᑦ ᐊᒻᒪᓗ ᑐᖁᒧᑦ.

ᐊᒃᑑᕙ 2015-ᖑᑎᓪᓗᒍ, ᑎᑎᕋᕐᕕᖓᑦ ᐅᖃᐅᓯᓕᕆᓂᕐᒧᑦ ᑲᒥᓴᓇᐅᑉ ᓄᓇᕗᒥ ᓴᖅᑭᑦᑎᓚᐅᖅᓯᒪᔪᖅ ᑎᑎᖅᑲᓂᒃ ‘ᐊᐅᓚᓂᖓᓂᒃ ᖃᐅᔨᓴᐃᓂᕐᒧᑦ ᐅᓂᒃᑳᓂᒃ ᕿᑭᖅᑕᓂ ᐋᓐᓂᐊᕕᖓᑦ ᒪᓕᒃᓯᒪᒐᓗᐊᕐᒪᖔᑕ ᐃᓕᓴᕆᔭᐅᓯᒪᔪᑦ ᐅᖃᐅᓯᑦ ᐱᖁᔭᕐᔪᐊᖏᓐᓂᒃ.’ ᑖᓐᓇ ᐅᓂᒃᑳᖅ ᓇᓗᓇᐃᖅᓯᑦᑎᐊᓚᐅᖅᓯᒪᔪᖅ ᐱᔨᑦᓯᖅᑕᐅᑎᓪᓗᒋᑦ ᐅᖃᐅᓯᕐᖓᐅᑎᖓᓐᓂᒃ ᐱᑦᓯᐊᕐᓂᑐᐃᓐᓇᐅᖏᓐᓂᖓᓂᒃ ᑭᓯᐊᓂᓕ ᑭᓐᖒᒪᔭᐅᓪᓚᕆᒃᑐᒥᒃ ᐊᑐᕆᐊᖃᓪᓚᕆᒃᑐᒥᒃ ᐱᔨᑦᓯᕈᑎᖃᕐᓂᖏᓐᓂᒃ.

ᐃᓚᖏᑦ ᖃᐅᔨᔭᐅᔪᑦ ᐊᐅᓚᓂᖓᓂᒃ ᖃᐅᔨᓴᐃᑎᓪᓗᒋᑦ ᐅᑯᐊᖑᓚᐅᖅᑐᑦ:

• ᐅᖃᐅᓯᖃᑎᒌᖏᓐᓂᒃᑯᑦ ᓇᓚᒎᖏᑦᑐᒃᑯᑦ ᐊᒃᑐᐃᓂᖃᓕᕐᒪᑦ ᐱᔨᑦᓯᑦᓯᐊᕆᐊᖃᖅᑎᓪᓗᒋᑦ, ᐊᑦᑕᕐᓇᖏᑦᑐᒦᑦᑕᕆᐊᖃᖅᑎᓪᓗᒋᑦ ᐃᓅᓕᓴᖅᑕᐅᔪᑦ ᐊᒻᒪᓗ ᐃᓅᓕᓴᖅᑕᐅᓂᕐᒧᑦ ᐸᖅᑭᔭᐅᓂᕐᒧᓪᓗ ᐱᔨᑦᓯᖅᑕᐅᑎᓪᓗᒋᑦ
• ᐃᓅᓕᓴᐃᔨᐅᔪᑦ ᐃᓅᓕᓴᖅᑕᒥᖕᓂᒃ ᑐᑭᓯᐊᖃᑦᑕᖏᓐᓂᖏᓐᓄᑦ ᐊᑲᐅᓐᖏᓕᐅᕈᑎᐅᓕᕐᒪᑦ ᑕᒻᒪᕐᖢᑎᒃ ᓘᒃᑖᖅᓯᖃᑦᑕᓕᕐᓂᖏᓐᓄᑦ ᐊᒻᒪᓗ ᖃᐅᔨᓴᐃᖃᑦᑕᓕᕐᓂᖏᓐᓄᑦ
• ᐃᓅᓕᓴᖅᑕᐅᔪᑦ ᑲᓐᖑᓇᖅᑐᒃᑰᕈᑕᐅᔭᕆᐊᖃᕐᓂᖏᓐᓄᑦ ᐱᔪᓐᓇᐅᑎᖏᑦ ᐊᒻᒪᓗ ᑐᓴᐅᒪᑦᑎᐊᕐᓗᑎᒃ ᐃᓱᒪᓕᐅᕈᓐᓇᕐᓂᖏᑦ ᓴᐳᒻᒥᐅᓯᖅᑕᐅᓯᒪᓐᖏᓗᐊᕐᒪᑕ.

ᑐᓴᖅᓯᒪᔪᒍᑦ ᐃᓚᒌᓂᑦ ᐃᓄᖕᓄᑦ ᐅᖃᖅᓯᒪᔪᓂᒃ ᐃᓄᒃᑐᑦ ᐅᖃᐅᓯᕐᒥᒃ ᐊᑐᕐᓗᑎᒃ ᐱᔨᑦᓯᖅᑕᐅᖏᓐᓂᖏᓐᓂᒃ  ᐊᒻᒪ ᑕᒪᓐᓇ ᐱᔾᔪᑎᒋᓪᓗᒍ ᐃᓚᒋᔭᖓ ᐃᓅᔪᓐᓃᖅᓯᒪᔪᖅ ᐋᓐᓂᐊᕕᖕᒥ ᑲᒪᒋᔭᐅᑎᓪᓗᒍ. ᐃᓄᒃᑐᑦ ᐅᖃᐅᓯᕐᒥᒃ ᐊᑐᕐᓗᑎᒃ ᐱᔨᑦᓯᕈᓐᓇᑦᓯᐊᖏᓐᓂᕋᖅᑕᐅᓪᓗᑎᒃ ᓇᓗᓇᐃᖅᑕᐅᓯᒪᕗᑦ ᑐᖁᖓᔪᓕᕆᔨᐅᑉ ᐅᓂᒃᑳᓕᐊᖓᑕ ᐃᓗᐊᓂ.

ᒫᓐᓇᖄᑖᖑᓚᐅᖅᑐᖅ, ᐱᓇᓱᐊᕈᓯᕆᔭᑦᑎᓐᓂ, ᐱᕙᓪᓕᐊᔪᑎᒍᑦ, ᑐᓴᓚᐅᕋᒪ ᐃᓄᒃᑐᑦ ᐅᖃᓪᓚᒍᓐᓇᖅᑐᒥᒃ ᐸᓖᓯᑖᕈᒪᔪᓂᒃ. ᑕᒪᓐᓇ ᐊᒃᓱᐊᓗᒃ ᐅᕙᓐᓄᑦ ᐃᓱᒫᓗᖕᓇᖅᑐᖅ. ᐃᓱᒫᓗᒍᑎᒋᔭᕋ ᐃᓄᐃᑦ ᐱᔨᑦᓯᖅᑕᐅᓂᕆᔭᖏᑦ ᐃᓚᐃᓐᓈᖓᒍᑦ ᐱᔨᑦᓯᖅᑕᐅᓂᖃᕐᒪᑕ ᐊᓯᖏᓐᓂᓕ ᑲᓇᑕᒥᐅᑕᐅᔪᑦ ᐃᓗᐃᑦᑑᓂᖅᓴᒃᑯᑦ ᐱᔨᑦᓯᖅᑕᐅᓂᖃᖅᑎᓪᓗᒋᑦ.

ᐅᖃᐅᓯᓕᕆᓂᖅ ᖃᓄᐃᓕᖓᖕᒪᖔᑦ

 ᖃᐅᔨᒪᔪᐃᓐᓇᐅᒐᑦᑕ, ᒫᓐᓇᐅᔪᖅ ᑲᓇᑕᐅᑉ ᒐᕙᒪᒃᑯᖏᑦ ᐅᖃᐃᓐᓇᓕᕐᒪᑕ ᐊᒃᓱᐊᓗᒃ ᐱᒻᒪᕆᐅᓂᖓᓂᒃ ᐱᓕᕆᖃᑎᖃᑦᓯᐊᕐᓂᕐᒥᒃ ᓄᓇᖃᖅᑳᖅᓯᒪᔪᑦ ᐃᓄᖁᑎᖏᓐᓂᒃ.

ᒪᐃ 2016-ᖑᑎᓪᓗᒍ, ᑲᓇᑕᐅᑉ ᒐᕙᒪᒃᑯᖏᑦ ᐃᓕᓴᖅᓯᓪᓗᑎᒃ ᐊᖏᖅᓯᓚᐅᖅᑐᑦ ᓄᓇᕐᔪᐊᕐᒥ ᑲᑐᔾᔨᖃᑎᒌᖑᔪᑦ ᐊᖏᖃᑎᒌᒍᑎᖏᓐᓂᒃ ᐱᔪᓐᓇᐅᑎᖏᓐᓂᒃ ᓄᓇᖃᖅᑳᖅᓯᒪᔪᑦ (UNDRIP) ᑕᐃᒪᓐᓇ ᑕᐃᔭᐅᔪᑦ, ᐱᖃᓯᐅᔾᔨᓯᒪᓚᐅᕐᒪᑕ ᒪᓕᒐᕐᓂᒃ ᓴᐳᒻᒥᒡᓯᕈᑕᐅᔪᓂᒃ ᑐᓴᖅᓴᐅᑎᑦᓯᓂᕐᒧᑦ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓂᒃ.

ᑎᓯᐱᕆ 6 2016-ᖑᑎᓪᓗᒍ, ᑲᓇᑕᑉ ᐊᖓᔪᖅᑳᒻᒪᕆᖓ ᐊᑐᓕᖅᑎᑦᑎᓚᐅᖅᑐᖅ ᓇᓗᓇᐃᖅᓯᔾᔪᑎᓂᒃ ᐊᒻᒪ ᐊᖏᓚᐅᖅᑐᖅ ᐊᑐᓕᖅᑎᑦᓯᓂᕐᒧᑦ ᐱᓕᕆᖃᑎᒌᒡᓗᑎᒃ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓄᑦ ᐱᖁᔭᕐᔪᐊᓕᐅᓂᕐᒧᑦ ᑐᕌᒐᒃᓴᖃᕐᓗᑎᒃ ᐅᖃᐅᓯᖓᑦ ᐊᓯᐅᔨᔭᐅᖁᓇᒍ, ᓴᐳᒻᒥᔭᐅᖁᓪᓗᒍ ᐊᒻᒪᓗ ᐆᒻᒪᖅᑎᑕᐅᒃᑲᓐᓂᖁᓪᓗᒍ ᐃᓄᒃᑐᑦ ᐅᖃᐅᓯᖓᑦ.

ᓂᕆᐅᑦᑎᐊᖅᑐᒍᑦ ᐊᒻᒪᓗ ᐊᑐᐃᓐᓇᐅᔪᒍᑦ ᐊᒻᒪᓗ ᐃᓚᐅᔪᒪᑦᑎᐊᖅᑐᒍᑦ ᓴᓇᖃᑕᐅᓗᑕ. ᑐᓴᖅᓯᒪᔪᒃᓴᐅᒐᔅᓯ ᐱᕙᓪᓕᐊᔪᑎᒍᑦ, ᑐᒃᓯᕋᐅᑎ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓄᑦ ᐱᖁᔭᕐᔪᐊᒃᓴᕐᒥᒃ C-91 ᑕᐃᔭᐅᔪᖅ ᓴᖅᑭᑕᐅᓚᐅᖅᓯᒪᖕᒪᑦ ᕖᕝᕗᐊᕆᐅᑉ ᐱᒋᐊᕐᓂᖓᓂ. ᒪᒥᐊᓇᖅᑑᒐᓗᐊᖅ, ᒫᓐᓇᐅᔪᖅ ᐱᖁᔭᒃᓴᓕᐊᖑᔪᒪᔪᖅ ᐃᓚᒋᐊᖅᓯᓯᒪᖏᒻᒪᑦ ᓴᓐᖓᒃᑎᑦᑎᒋᐊᖅᓯᒪᓇᓂᓗ ᐃᓄᒃᑐᑦ ᐅᖃᐅᓯᕐᒧᑦ ᐱᔪᓐᓇᐅᑎᐅᔪᓂᒃ ᓄᓇᕗᒥ. ᑭᓯᐊᓂᓕ, ᐃᖅᑲᓇᐃᔭᐃᓐᓇᕐᓂᐊᖅᐳᒍᑦ ᐊᒃᓱᕈᕐᓗᑕ ᓂᕆᐅᖕᓂᖃᕐᓗᑕ ᐱᖃᓯᐅᔾᔭᐅᓕᕐᓂᐊᕐᓂᖏᓐᓂᒃ ᐅᑯᐊ:

• ᐃᓕᓴᕆᔭᐅᓗᓂ ᐃᓄᒃᑐᑦ ᐅᖃᐅᓯᕐᖓᐅᑎᒋᔭᖑᓂᐊᓂᒃ ᑲᓇᑕᒥ, ᐃᓄᐃᑦ ᓄᓇᖓᓐᓂ ᐅᖃᐅᓯᕐᖓᐅᑎᐅᓂᖓᓂᒃ, ᐊᒻᒪᓗ ᓯᕗᓪᓕᖅᐹᖑᓪᓗᓂ ᐅᖃᐅᓯᕆᔭᐅᓂᖓᓂᒃ ᐅᓄᕐᓂᖅᓴᐅᔪᓄᑦ ᐃᓄᐃᑦ ᓄᓇᖓᓐᓂ ᓄᓇᖃᖅᑐᓂ.
• ᐊᖏᕐᓗᑎᒃ ᐱᔨᑦᓯᕈᑎᖃᖁᓪᓗᒋᑦ ᐊᑐᖅᑕᐅᔭᕆᐊᖃᓪᓚᕆᒃᑐᓂ ᐱᓕᕆᐊᓐᖑᖅᑎᑕᐅᓯᒪᔪᑎᒍᑦ ᐊᒻᒪᓗ ᐱᔨᑦᓯᕈᑎᖏᑎᒍᑦ ᐃᓄᐃᑦ ᐅᖃᐅᓯᖏᓐᓂᒃ ᐊᑐᕐᓗᑎᒃ ᐱᔨᑦᓯᖁᓪᓗᒋᑦ ᐃᓄᐃᑦ ᓄᓇᖓᓐᓂ, ᐊᒻᒪ
• ᐱᓕᕆᔾᔪᑎᒃᓴᖅᑖᕐᓗᑎᒃ ᐃᓄᒃᑐᑦ ᐅᖃᐅᓯᖅ ᓄᖑᑉᐸᓪᓕᐊᖏᓪᓗᓂ, ᐊᑑᑎᖃᑦᓯᐊᖅᑐᒃᑯᑦ ᐱᓕᕈᓐᓇᖁᓪᓗᒍ, ᐊᒻᒪ ᐊᑐᖅᑕᐅᖃᓯᐅᔾᔭᐅᔪᓐᓇᕐᓗᓂ ᐊᔾᔨᒋᔭᐅᓗᓂ ᑲᓇᑕᒥᐅᖃᑎᑦᑐᑦ ᐱᔨᑦᓯᕈᑎᒋᔭᐅᔪᑎᑐᑦ ᐃᓄᒃᑐᑦ ᐅᖃᐅᓯᖅ ᐊᑐᖅᑕᐅᓗᓂ.

ᓂᕈᐊᓕᖅᑎᓪᓗᒋᑦ ᓄᓇᕗᒥ ᑕᓪᓕᒪᒋᓕᖅᑕᖓᓂ ᒪᓕᒐᓕᐅᖅᑎᑦ ᑲᑎᒪᔨᒃᓴᖏᓐᓂᒃ, ᓂᕆᐅᖕᓂᖃᓚᐅᖅᑐᑦ ᐃᓄᐃᑦ. ᐱᓗᐊᖅᑐᒥᒃ ᑕᑯᓂᐊᖅᑐᒋᓪᓗᑎᒃ ᑕᐅᑐᓐᖑᐊᖅᑕᐅᔪᓂᒃ ᑐᕌᖅᑕᕗᑦ ᐅᖃᐅᓯᖅᑕᖏᓐᓂᒃ, ‘ᐃᓄᒃᑐᑦ ᐅᖃᐅᓯᖅ ᐆᒪᓗᓂ ᐊᑐᖅᑕᐅᓕᕐᓗᓂ ᐃᖅᑲᓇᐃᔭᕐᕕᑦᑎᓐᓂ ᖃᐅᑕᒫᓪᓗ ᐃᓅᓯᑦᑎᓐᓂ.’ ᑕᒪᓐᓇ ᑐᓐᖓᓱᒃᑎᓚᐅᖅᑕᕗᑦ ᓯᕗᓪᓕᐅᑎᔭᐅᓯᒪᔪᖅ ᐊᑖᒍᑦ ᐃᓅᓂᕗᑦ ᑎᑎᕋᖅᓯᒪᔪᑉ. ‘ᓴᓐᖓᒃᑎᒋᐊᕐᓗᒋᑦ ᑐᓐᖓᕕᖏᑦ ᐊᑐᖅᑕᐅᔪᓐᓇᑦᑎᐊᕐᓗᑎᒃ ᐊᐅᓚᓂᖃᕈᓐᓇᑦᑎᐊᕐᓗᓂ, ᒪᕐᕉᖕᓂᒃ ᐅᖃᐅᓰᖕᓂᒃ ᐊᑐᕈᓐᓇᕐᓗᑎᒃ ᐃᓅᓯᕆᔭᑦᑎᓐᓂ ᐃᓄᒃᑐᑦ ᐊᒻᒪᓗ ᖃᓪᓗᓈᑎᑐᑦ ᐅᐃᕖᑎᑐᓪᓘᓐᓃᑦ’.

ᐊᐃᑖᖑᒐᓗᐊᖅ, ᑖᒃᑯᓄᖓ ᐃᒃᐱᖕᓂᐊᓂᕆᔭᐅᓚᐅᖅᓯᒪᔪᑦ ᓂᕆᐅᖕᓂᐅᔪᑦ ᑲᒥᑉᐸᓪᓕᐊᔪᔮᑐᐃᓐᓇᓕᕐᒪᑕ.

ᑭᓱᓪᓕ ᐱᔾᔪᑎᒋᔭᐅᑐᐃᓐᓇᕆᐊᖃᖅᐸᑦ ᐱᔨᑦᓯᕈᑕᐅᓂᐊᕐᓗᑎᒃ ᐊᑐᕐᓗᑎᒃ ᐃᓄᒃᑐᑦ ᐅᖃᐅᓯᕐᒥᒃ ᐃᖅᑲᓇᐃᔭᕐᕕᖁᑎᖏᓐᓂ ᒐᕙᒪᒃᑯᑦ ᐱᔨᑦᓯᕐᕕᖏᓐᓂ, ᐅᓄᖅᑐᐃᖅᓱᕐᓗᑎᒃ ᐊᑐᖅᑕᐅᖁᔨᖃᑦᑕᖅᓯᒪᔪᑦ ᒐᕙᒪᐅᔪᑦ ᐱᓕᕆᐊᒃᓴᕆᓂᐊᕐᓗᒋᑦ ᑐᕌᒐᒃᓴᕆᔭᖏᓐᓂ? ᑕᐃᔅᓱᒪᓂ ᑲᓇᑕᐅᑉ ᒐᕙᒪᒃᑯᖏᑦ ᐊᒻᒪᓗ ᓄᓇᑦᑎᐊᑉ ᒐᕙᒪᒃᑯᖏᑦ ᑲᑎᒪᑎᓪᓗᒋᑦ ᓴᖅᑭᑕᐅᓂᐊᓕᖅᑎᓪᓗᒍ ᓄᓇᕗᑦ, ᓴᓇᒪᓂᒃᓴᖓ ᖃᓄᖅ ᓄᓇᕗᑦ ᒐᕙᒪᖃᕋᔭᕐᒪᖔᑦ ᐊᒻᒪᓗ ᐃᓄᖕᓄᑦ ᐱᔨᑦᓯᕈᑎᒋᓂᐊᖅᑕᖏᑦ ᖃᓄᐃᓕᖓᒐᔭᕐᒪᖔᑕ ᑲᑎᒪᔾᔪᑕᐅᓚᐅᖅᓯᒪᔪᑦ, ᓴᓇᔭᐅᖁᓪᓗᒋᑦ ᖃᓄᖅ ᑮᓇᐅᔭᖃᖅᑎᑦᓯᒐᔭᕐᒪᖔᑕ ᓄᓇᕗᑦ ᒐᕙᒪᒃᑯᖏᓐᓂᒃ ᐊᒻᒪᓗ ᐱᓕᕆᕕᖏᓐᓂᒃ ᐱᔨᑦᓯᕐᕕᐅᔪᓂᒃ, ᐃᓱᒪᓕᐅᓚᐅᖅᓯᒪᔪᑦ ᑮᓇᐅᔭᖃᖅᑎᑦᓯᔪᒪᓇᑎᒃ ᐃᓄᒃᑐᑦ ᐅᖃᐅᓯᕐᒥᒃ ᐊᑐᕐᓂᐊᖅᑎᓪᓗᒋᑦ ᒐᕙᒪᒃᑕ ᐃᓗᐊᓂ. ᑕᒪᓐᓇ ᑕᐃᒪᓐᓇ ᐃᓱᒪᓕᐅᕈᑎᒋᔭᐅᓚᐅᖅᑐᖅ; ᐋᒥᑕᐅᓂᑰᖏᑦᑐᖅ  ᐅᕝᕙᓘᓐᓃᑦ ᐅᔾᔨᕆᔭᐅᖏᑦᑐᕕᓂᐅᖏᑦᑐᖅ.

ᔮᓐᓄᐊᕆ 1998-ᖑᑎᓪᓗᒍ ᑎᑎᕋᐅᓯᐊᑦ ᓄᓇᑦᑎᐊᑉ ᒐᕙᒪᒃᑯᖏᑕ ᐱᓕᕆᕕᖓᓐᓂᑦ ᑮᓇᐅᔭᓕᕆᔨᒃᑯᓐᓂᑦ ᑲᓇᑕᐅᑉ ᒐᕙᒪᒃᑯᖏᑕ ᐱᓕᕆᕕᖓᓐᓄᑦ ᑮᓇᐅᔭᓕᕆᔨᒃᑯᖏᓐᓄᑦ, ᑭᐅᓚᐅᖅᑐᑦ ᐊᐱᖅᑯᒻᒧᑦ, ‘ᐊᓯᖏᓐᓂᒃ ᐱᑕᖃᖅᐹ ᐃᓱᒪᓕᐅᕈᑎᒋᔭᐅᔭᕆᐊᖃᖅᑐᑦ ᖃᔅᓯᓂᒃ ᑮᓇᐅᔭᖃᖅᑎᑕᐅᔭᕆᐊᖃᕐᒪᖔᑕ ᒪᑐᐃᖓᑎᑕᐅᔭᕆᐊᖃᖅᑐᓂᒃ – ᐅᓪᓗᕐᒥ ᑭᖑᕐᖓᒍᑦ ᐋᖅᑭᒡᑕᐅᔪᒫᖅᑐᓄᒃ?’ ᑎᑎᕋᖅᓯᓚᐅᖅᑐᑦ ᐃᒪᓐᓇ, ‘ᐄ. ᐅᓄᖅᑐᑦ ᑎᑎᕋᖅᑕᐅᓚᐅᖅᑐᑦ ᖃᐅᔨᒪᓂᐊᖅᐳᒍᑦ ᐊᑭᖃᕐᓂᖏᓐᓂᒃ ᐱᓕᕆᔭᕆᐊᒃᓴᖅ, ᑭᓯᐊᓂᓕ ᖃᔅᓯᑖᓚᓂᒃ ᐊᑭᖃᕋᔭᕐᒪᖔᑕ ᖃᐅᔨᒪᓇᖏᑦᑐᑦ. ᒪᓕᒐᖃᖅᑎᑦᓯᓂᖅ ᐃᓄᒃᑐᑦ ᐅᖃᐅᓯᕐᒥᒃ ᐊᑐᕐᓗᑎᒃ ᐃᖅᑲᓇᐃᔭᕐᕕᖕᓂ ᓄᓇᕗᒥ ᑖᓐᓇ ᐆᒃᑑᑎᑦᓯᐊᕙᐅᕗᖅ.’

ᐃᓱᒪᕙᓪᓕᐊᑐᐃᓐᓇᓕᕋᒪ ᓄᓇᕗᑦ ᒐᕙᒪᒃᑯᖏᑕ ᐱᓕᕆᕕᖁᑎᖏᑦ ᑮᓇᐅᔭᑭᒃᓴᖅᑎᑕᐅᓐᓂᕐᒪᑕ ᓯᕗᒧᐊᑦᑎᐊᕈᑎᒃᓴᖏᓐᓂᒃ ᐃᓄᒃᑐᑦ ᐅᖃᐅᓯᖅ ᐊᑐᕐᓗᒍ ᐃᖅᑲᓇᐃᔭᕐᕕᖕᒥ ᐱᓕᕆᔾᔪᑎᒃᓴᑦᑎᓐᓂᒃ ᓄᓇᕗᑦ ᐃᓗᐊᓂ.  ᐃᓱᒪᒋᔭᕋᓕ, ᐱᔪᒪᓪᓚᕆᒋᐊᖃᓕᕋᑦᑕ, ᐊᑕᐅᓯᐅᖃᑎᒌᒡᓗᑕ, ᐊᔾᔨᒋᔭᐅᔪᒥᒃ ᐱᔭᕆᐊᖃᕐᓂᑦᑎᓐᓂᒃ ᐱᓕᕆᔾᔪᑎᒃᓴᓂᒃ ᐊᑐᐃᓐᓇᕈᖅᑕᐅᓂᐊᖅᑐᓂᒃ ᐃᓄᒃᑐᑦ ᐅᖃᐅᓯᕐᒥᒃ ᐊᑐᖅᑎᐅᔪᑦ ᑲᓇᑕᒥᐅᑕᐅᔪᑦ ᓄᓇᕗᒥ ᐊᔾᔨᒋᔭᐅᔪᒃᑯᑦ ᑲᓇᑕᒥᐅᖃᑎᖏᑎᑐᑦ ᐱᔨᑦᓯᖅᑕᐅᓕᕈᓐᓇᕐᓂᐊᕐᒪᑕ.

ᐃᓄᐃᓴᒃᑲᓗᐊᖅᑐᒍᑦ ᑕᑯᓐᓇᑐᐃᓐᓇᕈᓐᓇᖏᑦᑐᒍᑦ ᒐᕙᒪᒃᑯᑦ ᐱᖁᔭᕐᓂᒃ ᓴᖅᑭᑦᑎᖃᑦᑕᖅᑎᓪᓗᒋᑦ ᐃᓄᐃᓴᒡᓕᒋᐊᕆᔪᓂᒃ ᐃᓄᐃᑦ ᐱᔪᓐᓇᐅᑎᖏᓐᓂᒃ ᐅᖃᐅᓯᕐᒥᖕᓂᒃ ᐊᑐᕐᓗᑎᒃ ᐃᓕᓴᐃᔪᓐᓇᐅᑎᖏᓐᓂᒃ, ᐊᒻᒪᓗ ᐃᓄᐃᑦ ᐊᐅᓚᑦᓯᓂᖏᓐᓂᒃ ᐃᓕᓐᓂᐊᕐᓂᓕᕆᓂᕐᒧᑦ ᑐᕌᖓᔪᓂᒃ. ᑭᖑᓂᑦᑎᓐᓂᓕ, ᖃᐅᔨᒪᔪᒍᑦ ᑲᓇᑕ ᑮᓇᐅᔭᖃᖅᑎᑦᓯᓚᐅᖅᓯᒪᖕᒪᑦ ᐃᒡᓗᓄᑦ ᐊᒻᒪᓗ ᐃᖅᑲᓇᐃᔭᖅᑎᑦ ᐊᖅᓵᕆᓪᓗᑎᒃ ᐃᓄᐃᑦ ᐃᓕᖅᑯᓯᖏᓐᓂᒃ ᐅᖃᐅᓯᖏᑦ ᐱᖃᓯᐅᑎᓪᓗᒋᑦ, ᐊᖅᑯᑎᒋᓪᓗᒋᑦ ᓱᕈᓯᒃᑯᕕᖕᒥ ᐃᓕᓴᐃᖃᑦᑕᕐᓂᖅ.  ᑲᓇᑕ ᑲᒪᒋᔭᒃᓴᖃᖅᐳᖅ ᑮᓇᐅᔭᖃᖅᑎᑦᓯᓂᕐᒥᒃ ᐃᒡᓗᓂᒃ ᐊᒻᒪ ᐃᖅᑲᓇᐃᔭᖅᑎᖏᓐᓂᒃ ᐱᕈᖅᐸᓪᓕᐊᖁᓪᓗᒋᑦ, ᓴᓐᖓᒃᑎᖁᓪᓗᒋᓪᓗ ᐊᑐᖅᑕᐅᓂᕆᔭᖏᑦ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᑕ.

ᓄᓇᕗᑦ ᑖᓐᓇᑐᐊᑦᑐᑎᐊᖅ ᑲᓇᑕᐅᑉ ᒐᕙᒪᒋᔭᖏᓐᓂ  ᒐᕙᒪᐅᔪᑦ ᐅᖃᖃᐅᓯᕐᒥᖕᓂᒃ ᐊᑐᖅᑐᑦ ᐃᓄᒋᐊᖕᓂᖅᓴᐃᑦ ᐅᖓᑖᓄᑦ ᐃᓕᓐᓂᐊᕐᕕᖕᒥ ᐊᑐᖅᑕᐅᔭᕆᐊᖃᖅᑐᑦ:

• ᐱᔨᑦᓯᖅᑕᐅᓗᑎᒃ ᐃᓄᒃᑐᑦ, ᐃᓘᓐᓇᖏᑦ ᐃᓕᓐᓂᐊᕈᑎᒃᓴᑦ ᐃᓗᐊᒍᑦ
• ᐃᓕᓴᕈᑎᒃᓴᖃᕐᓗᑎᒃ ᐃᓄᖕᓄᑦ ᑐᕌᖓᔪᓂᒃ ᐊᒻᒪᓗ
• ᐃᓘᓐᓇᖏᑦ ᐅᖃᐅᑕᐅᔪᑦ ᐃᓕᓐᓂᐊᕐᕕᖕᒥ ᑭᓐᖒᒪᔭᐅᔪᑦ ᓇᓚᒎᖅᑐᒃᑯᑦ ᓇᓗᓇᐃᖅᓯᔾᔪᑎᖃᕐᓗᑎᒃ ᐃᓅᓂᖏᑕ ᑭᓇᐅᓂᖏᓐᓂᒃ ᓄᓇᕐᔪᐊᕐᒥ ᓄᓇᒋᔭᖏᑕ ᐃᓗᐊᓂ

ᓄᓇᕗᑦ ᐃᓗᐊᓂ, ᐃᓄᒋᐊᖕᓂᖅᓴᐅᔪᑦ ᐃᓄᐃᑦ. ᐅᓄᕐᓂᖅᓴᐅᔪᓪᓗ ᐅᖃᐅᓯᕐᖓᐅᑎᒥᖕᓂᒃ ᐊᑐᖅᑐᑦ ᓄᓇᕗᒥ ᐃᓄᒃᑐᑦ. ᖃᐅᔨᒪᔪᒃᓴᐅᒐᔅᓯ  ᑲᓇᑕᓕᒫᒥᓗ ᐊᑐᖅᑕᐅᓪᓗᑎᒃ , ᑲᓇᑕᒥ ᐃᓕᓴᕆᔭᐅᓯᒪᔪᑦ ᐅᖃᐅᓯᑦ ᖃᓪᓗᓈᑎᑐᑦ ᐊᒻᒪᓗ ᐅᐃᕖᑎᑐᑦ.

ᐅᐃᕖᑦ ᐊᒻᒪᓗ ᖃᓪᓗᓈᑎᑐᑦ

ᒪᓕᒡᓗᒍ ᐊᕐᕌᒍᐊᓂ 2016 ᑭᒡᓕᓯᓂᐊᖅᑕᐅᓂᑯᑦ, ᖃᓂᒋᔭᖓᓂ 80-ᖑᔪᑦ ᐅᐃᕖᑎᑐᑦ ᐅᖃᓪᓚᒍᓐᓇᖅᑐᑦ ᐃᓕᓐᓂᐊᓚᐅᖅᑐᑦ ᓄᓇᕗᒥ. ᓇᖕᒥᓂᕐᓗ ᐃᓕᓐᓂᐊᕐᕕᖃᕐᖢᑎᒃ ᐃᖃᓗᖕᓂ ᑮᓇᐅᔭᖅᑖᖅᑎᑕᐅᕙᒡᖢᑎᒃ ᑲᓇᑕᐅᑉ ᒐᕙᒪᒃᑯᖏᓐᓂᑦ ᐱᔾᔪᑎᒋᓪᓗᒍ ᐅᐃᕖᑦ ᐅᖃᐅᓯᖓ ᐃᓕᓴᕆᔭᐅᓯᒪᖕᒪᑦ ᑲᓇᑕᒥ ᐅᖃᐅᓯᖁᑎᒋᔭᐅᑎᓪᓗᒍ.

ᑐᓴᖅᑎᑦᑎᔪᑦ ᐅᕙᑦᑎᓐᓄᑦ ᐃᒪᓐᓇ ᓲᕐᓗ ᐅᖃᐅᓯᖅᐳᑦ ᐱᒻᒪᕆᐅᖏᓐᓂᖅᓴᐅᒪᑦ ᐅᐃᕖᑎᑐᑦ ᖃᓪᓗᓈᑎᑐᓪᓗ ᐅᖃᓪᓚᒍᓐᓇᖅᑐᓂᑦ ᓄᓇᕗᒥ. ᑕᐃᒃᑯᐊ ᖁᕝᕙᓯᖕᓂᖅᓴᐅᓪᓗᑎᒃ ᑲᓇᑕᒥᐅᑕᖕᒪᑕ.

ᑕᐃᒃᑯᐊ ᑎᑭᒪᐅᖅᓯᒪᔪᑦ ᐅᖃᐅᓯᖏᑦ ᐊᒻᒪᓗ ᐃᓕᖅᑯᓯᖏᑦ ᓴᐳᒻᒥᐅᓯᖅᑕᐅᓯᒪᓪᓗᑎᒃ ᐊᒻᒪ ᑲᔪᖏᖅᓴᐅᑕᐅᓪᓗᑎᒃ ᐊᒻᒪᓗ ᑮᓇᐅᔭᖃᖅᑎᑕᐅᓪᓗᑎᒃ ᐊᒻᒪ ᑮᓇᐅᔭᓂᒃᑕᐅᖃᑦᑕᕐᖢᑎᒃ ᐃᓕᓐᓂᐊᕐᕕᖏᑦ, ᐅᖃᓕᒫᒐᖁᑎᖏᑦ, ᐃᓕᓐᓂᐊᕈᑎᒃᓴᖏᑦ. ᑭᓯᐊᓂᓕ ᐅᖃᐅᓯᖅᐳᑦ ᓴᓂᕐᕙᒃᑕᐅᓯᒪᓪᓗᓂ ᓯᓚᑖᓂ ᑲᓇᑕᐅᑉ ᑐᑭᓯᒪᓂᖓᑦᑕ ᐊᒻᒪᓗ ᐃᒃᓯᓐᓇᖅᑕᐅᓯᒪᓪᓗᓂ ᑐᖁᑦᓯᖅᑕᐅᓪᓗᓂ.

ᐱᓕᕆᔾᔪᑎᒃᓴᓂᒃ ᑐᓂᓯᓚᐅᖅᓯᒪᖏᑦᑐᑦ ᐱᕚᓪᓕᕈᑎᒃᓴᖏᓐᓂᒃ ᐅᓄᕐᓂᖅᓴᐅᓕᖁᓪᓗᒋᑦ ᐃᓄᒃᑐᑦ ᐅᖃᐅᓯᕐᒥᒃ ᐊᑐᖅᐸᒃᑐᑦ ᐃᓕᓴᐃᔨᑦ, ᑮᓇᐅᔭᑦ ᐊᑐᐃᓐᓇᐅᖓᓗᐊᖅᑎᓪᓗᒋᑦ. ᐱᖁᔭᒃᓴᖅ 20 ᐊᓂᒍᖅᑎᑕᐅᓚᐅᖅᑐᖅ ᓴᓐᖐᓕᖅᑎᑦᑎᓪᓗᓂ 2008-ᒥ ᐃᓄᐃᑦ ᐅᖃᐅᓯᖓᓐᓂᒃ ᓴᐳᒻᒥᐅᓯᖅᓯᓯᒪᓂᕐᒧᑦ ᐱᖁᔭᕐᔪᐊᖓᓐᓂᒃ. ᑕᒪᓐᓇᓗ ᑲᖔᕐᓇᖅᑑᓪᓗᓂ 2019 ᐊᕐᕌᒍᖓ ᓇᓗᓇᐃᖅᑕᐅᓚᐅᖅᓯᒪᑎᓪᓗᒍ ᓄᓇᕐᔪᐊᕐᒥ ᐊᕐᕌᒍᒋᔭᐅᓂᖓᓂᒃ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓄᑦ ᐊᒻᒪ ᑲᓇᑕᐅᑉ ᒐᕙᒪᒃᑯᖏᑕ ᒫᓐᓇᕋᑖᖑᓚᐅᖅᑐᖅ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓄᑦ ᐱᖁᔭᒃᓴᖏᑦ.

ᐃᒃᐱᖕᓇᖅᓯᖕᒪᑦ ᓇᖕᒥᓂᖅ ᒐᕙᒪᒋᔭᕗᑦ, ᒐᕙᒪᑦ ᓴᖅᑭᑕᐅᓚᐅᖅᓯᒪᔪᑦ ᐊᑐᖅᑕᐅᓪᓗᓂ ᐃᓚᖓᓂ ᑎᑎᕋᖅᓯᒪᓂᖓ 4 ᓄᓇᕗᒥ ᐊᖏᖃᑎᒌᒍᑎᓂ, ᒐᕙᒪᒃᑯᓪᓗ ᐃᓄᐃᓪᓗ ᐋᔩᖅᑎᐅᓚᐅᖅᓯᒪᔪᑦ ᑕᐅᑐᓐᖑᐊᓚᐅᖅᓯᒪᔭᖓᑦ ᐃᓅᓯᕐᒧᑦ ᐊᑲᐅᓂᖅᓴᐅᓕᕋᔭᕐᓂᖓᓂᒃ ᐃᓄᖕᓄᑦ, ᑭᓯᐊᓂᓕ ᐃᒡᓗᐊᓄᖔᖅᑑᔭᓕᕐᒪᑦ ᓱᒃᑲᐃᑦᑐᒃᑯᑦ ᐃᐱᑎᑕᐅᕙᓪᓕᐊᓪᓗᓂ ᐃᓄᒃᑐᑦ ᐅᖃᐅᓯᖅ ᐃᓅᓯᑦᑎᓐᓂ ᓴᓐᖐᓕᖅᑎᑦᓯᕙᓪᓕᐊᓪᓗᑎᒡᓗ ᐃᓄᐃᑦ ᐅᖃᐅᓯᕐᒧᑦ ᐱᔪᓐᓇᐅᑎᖏᓐᓂᒃ ᕿᑐᕐᖓᖃᖅᑐᑦ ᕿᑐᕐᖓᖏᓐᓂᒃ ᐃᓕᓐᓂᐊᕆᐊᖅᑎᑦᓯᓂᖏᓐᓄᑦ ᐊᒻᒪ ᑭᒡᓕᓕᐅᕆᓪᓗᑎᒃ ᐃᓄᒃᑐᑦ ᐱᓕᕆᔪᓐᓇᕐᓂᖏᓐᓄᑦ ᑎᑭᐅᑎᓗᒍ ᐅᖃᐅᓯᖏᓐᓄᑦ ᐊᒻᒪ ᑭᒡᓕᓕᐅᕆᓪᓗᑎᒃ ᐃᓄᒃᑐᑦ ᐅᖃᓪᓚᒍᓐᓇᖅᑐᓂᒃ ᐃᓕᓴᐃᔨᐅᔪᓐᓇᖅᑐᓂᒃ, ᑕᐃᒪᐃᓕᐅᖅᑐᑦ ᐃᓄᒃᑐᑦ ᐅᖃᐅᓯᖅ ᐃᓕᓴᖅᑕᐅᔭᕆᐊᖃᕐᓗᓂ ᒐᕙᒪᒃᑯᑦ ᐱᓕᕆᕕᖏᓐᓂ ᐃᖅᑲᓇᐃᔭᖅᑎᐅᔪᓄᑦ ᒪᓕᒐᖃᖅᑎᑦᓯᖏᓐᓂᒃᑯᑦ.

ᓯᕗᓂᒃᓴᕐᒧᑦ ᑕᑯᓐᓇᕐᓂᖅ – ᐃᓄᐃᑦ ᓱᓕ ᓴᐱᓕᖏᑦᑐᑦ

 ᓇᓗᓇᐃᖅᑕᒃᑲ ᑕᒪᒃᑯᐊ ᐃᓱᒪᒋᔭᒃᑲ ᒐᕙᒪᒃᑯᓐᓄᑦ ᐱᓕᕆᔭᐅᓐᖏᓗᐊᕋᓱᒋᔭᒃᑲ ᐃᑲᔪᖅᑐᖅᑕᐅᖏᓐᓂᖏᑦ ᐃᓄᒃᑐᑦ ᐅᖃᐅᓯᖅ ᐱᓪᓗᒍ.  ᐊᑯᓂᐊᓗᒃ ᓯᓂᒍᓐᓇᐃᓪᓕᐅᖃᖃᑦᑕᖅᓯᒪᕗᖓ ᐅᓐᓄᒃᑯᑦ ᑭᓇᒧᑦ ᐅᖃᓪᓚᒡᓗᖓ ᓈᒻᒪᖕᒪᖔᑦ ᐃᓱᒪᒃᓴᖅᓯᐅᕐᖢᖓ, ᖃᓄᕐᓗ ᓇᓗᓇᐃᖅᓯᔪᓐᓇᕋᔭᕐᒪᖔᕐᒪ ᓇᓗᓇᐃᑦᑎᐊᕐᓗᒋᑦ ᐅᖁᒪᐃᓐᓂᕆᔭᖓ ᐃᑲᔪᖅᑕᐅᔭᕆᐊᖃᕐᓂᖓ ᐊᒻᒪ ᓴᐳᒻᒥᔭᐅᔭᕆᐊᖃᕐᓂᖓ ᐃᓄᐃᑦ ᐅᖃᐅᓯᖏᓐᓄᑦ ᐱᔪᓐᓇᐅᑎ ᐱᓪᓗᒍ.  ᖃᐅᔨᒪᔪᖓ ᐃᓄᑑᖏᑦᑐᖓ. ᖃᐅᔨᒪᔪᖓ ᐅᓄᖅᑐᑎᒍᑦ ᐱᓕᕆᐊᖃᕋᓱᐊᖅᑐᒍᑦ ᑐᓴᖅᑎᑦᑎᒐᓱᐊᖅᑐᒍᑦ ᐊᒻᒪ ᐃᓕᓯᒐᓱᐊᖅᑐᒍᑦ ᐃᑲᔪᖅᑐᐃᔾᔪᑎᒃᓴᓂᒃ ᐅᒻᒪᕆᒃᑑᖁᓪᓗᒍ ᐃᓄᒃᑐᑦ ᐅᖃᐅᓯᖅ.

ᓇᓗᓇᕈᓐᓃᖅᑐᖅ ᓈᓚᖃᑦᑕᕐᖢᒋᑦ ᐅᖃᐅᑕᐅᔪᑦ ᐅᓪᓘᖕᓄᑦ ᒪᕐᕉᖕᓄᑦ, ᐊᖏᖃᑎᒌᒃᑐᔮᖅᑐᑦ ᐱᒻᒪᕆᐅᓂᖓᓂᒃ ᐅᕙᑦᑎᓐᓄᑦ ᐃᓄᒃᑐᑦ ᐅᖃᐅᓯᖅ ᓴᓐᖏᑎᑕᐅᖁᓪᓗᒍ. ᖃᐅᔨᒪᔪᖓ, ᐊᔾᔨᒋᓪᓗᓂᐅᒃ ᒪᒃᑯᒃᑐᓄᑦ ᐃᓄᐃᑦ ᐊᖏᔪᒥᒃ ᑕᐅᑐᓐᖑᐊᖅᑕᖃᓚᐅᖅᑐᑦ ᑕᐃᔅᓱᒪᓂ ᑖᒃᑯᐊ, ᐱᓕᕆᓂᖏᑎᒍᑦ ᐊᒻᒪ ᐊᒃᓱᕈᕐᓂᖏᑎᒍᑦ, ᐊᓯᔾᔨᖅᑕᐅᓚᐅᖅᓯᒪᔪᖅ ᓄᓇᓐᖑᐊᖁᑎᖓ ᑲᓇᑕᐅᑉ, ᐃᓚᒋᔭᐅᔪᐃᓐᓇᐅᓪᓗᑕᓗ ᑖᔅᓱᒧᖓ ᐱᒻᒪᕆᐅᔪᒧᑦ  ᑕᐅᑐᓐᖑᐊᖅᑕᐅᓚᐅᖅᑐᔪᑦ ᖃᓄᖅ ᑕᑯᔪᒪᓂᖃᕐᒪᖔᑦᑕ ᐃᓄᒃᑐᑦ ᐅᖃᐅᓯᖅ ᐊᑐᖅᑕᐅᓂᒃᓴᖓᓄᑦ ᐊᒻᒪ ᐆᒪᖁᔭᐅᓪᓗᓂ ᐃᓅᓯᑦᑕ ᓇᐅᒃᑯᓕᒫᖅ ᐃᓗᐊᒍᑦ.

ᐅᖃᐅᓯᖃᕆᐊᖃᖅᐱᑖ ᐊᑐᖅᑕᐅᕙᓪᓕᐊᔪᓐᓃᕐᓂᖓᓂᒃ ᐃᓄᒃᑐᑦ ᐅᖃᐅᓯᖅ ᒐᕙᒪᒃᑯᑦ ᐱᔨᑦᓯᕐᕕᖏᓐᓂ ᑕᒪᓐᓇ ᓯᖁᒥᑦᑎᓯᒪᕙ ᐃᓄᖁᑎᒋᔭᐅᔪᓄᑦ ᐱᓂᐊᕐᓂᐅᔭᕆᐊᖃᖅᑐᑎᒍᑦ? ᑐᕌᕋᓱᐊᕆᐊᖃᖅᐱᑕ ᐃᓄᒃᑐᑦ ᐅᖃᐅᓯᖅ ᐃᓕᓴᕆᔭᐅᖁᓪᓗᒍ ᑲᓇᑕᐅᑉ ᑐᓐᖓᕕᒡᔪᐊᖓᒍᑦ ᐊᔾᔨᒋᓗᓂᐅᒃ ᓂᐅ ᐳᕋᔅᕕᒃᒥ ᐃᓕᓴᖅᓯᓯᒪᓂᖃᕐᒪᑕ ᒪᕐᕉᖕᓂᒃ ᐅᖃᐅᓰᖕᓂᒃ ᐊᑐᕐᓗᑎᒃ ᒐᕙᒪᐅᓂᖏᓐᓂᒃ?

ᐃᓘᓐᓇᑕ ᐱᒻᒪᕆᐅᔪᒃᑯᑦ ᐱᓕᕆᖃᑕᐅᔪᓐᓇᖅᑐᒍᑦ ᖃᐅᑕᒫᓐ ᐃᓅᓯᑦᑎᓐᓂ ᐊᒻᒪᓗ ᐃᖅᑲᓇᐃᔭᕐᕕᑦᑎᓐᓂ ᓴᓐᖓᒃᑎᒋᐊᖁᓪᓗᒍ ᐅᖃᐅᓯᖅ ᐃᓄᒃᑐᑦ ᐊᒻᒪ ᓯᕗᒧᐊᒃᑎᑦᓯᖁᓪᓗᑕ ᐊᑐᖅᑕᐅᖏᓐᓇᕐᓂᖓᓂᒃ ᐊᒻᒪᓗ ᐆᒻᒪᕆᒃᑎᑕᐅᓂᖓᓂᒃ. ᐅᓄᖅᑐᐊᓗᖕᓂᒃ ᐃᓱᒪᒃᓴᖅᓯᐅᕈᑎᒃᓴᑦᑎᐊᕙᖕᓂᒃ ᑐᓴᖅᓯᒪᓕᖅᑐᖓ ᐅᓪᓘᖕᓄᑦ ᒪᕐᕉᖕᓄᑦ ᑲᑎᒪᓂᖃᓚᐅᖅᑎᓪᓗᑕ.

• ᐃᓅᓪᓗᑕ, ᐊᑐᕈᓐᓇᖅᑐᒍᑦ ᐃᓄᒃᑐᑦ ᐅᖃᐅᓯᕐᒥᒃ. ᖃᓪᓗᓇᐅᔭᕐᓂᕐᒧᑦ ᐅᑎᖅᑕᑐᐃᓐᓇᖏᓪᓗᑕ. ᐃᓄᒃᑐᑦ ᐅᖃᐅᓯᕐᒥᒃ ᐊᑐᕐᓂᖅᓴᐅᓕᕈᑦᑕ, ᐱᔨᑦᓯᖅᑎᐅᔪᑦ ᑕᐃᒪᓐᓇ ᑭᐅᖃᑦᑕᕆᐊᖃᓕᕐᓂᐊᖅᑐᑦ.
• ᑎᓕᐅᖃᑦᑕᐅᑎᒪᐅᖅᑕ ᐃᓄᒃᑐᑦ ᐅᖃᓪᓚᖃᑦᑕᐅᑎᖁᓪᓗᑕ. ᓴᓇᓚᐅᖅᑕ ᐃᓗᐊᑦᑎᐊᖅᑐᒃᑯᑦ ᐃᓄᐃᑦ ᐃᖢᕐᕆᓗᑎᒃ ᐃᓕᓐᓂᐊᕈᓐᓇᕐᓂᐊᕐᒪᑕ ᐃᓄᒃᑐᑦ ᐃᒃᐱᒍᓱᒡᓗᑎᒃ ᐃᑲᔪᖅᑕᐅᑦᑎᐊᕐᓂᖏᓐᓂᒃ ᑕᒪᓐᓇ ᑲᔪᓯᑎᑦᐊᓚᐅᕐᓇᕗᑦ. ᑎᓕᐅᓚᐅᕐᓚᕗᑦ ᐃᓕᓴᐃᔨᒃᓴᓐᖑᕈᒪᔪᑦ ᑕᐃᒃᑯᐊ.
• ᐊᑐᖃᑦᑕᓚᐅᕐᓚᕗᑦ ᐃᓄᒃᑐᑦ ᐊᑎᖅᐳᑦ ᐊᒻᒪ ᑎᓕᐅᕐᕆᓗᑕ ᐃᓄᒃᑐᑦ ᐊᑎᕐᓂᒃ ᐊᑐᖁᔨᓂᕐᒥᒃ.
• ᐊᑐᓚᐅᕐᓚᕗᑦ ᐱᕕᒃᓴᓕᒫᕆᔭᕗᑦ ᓇᓗᓇᐃᖅᓯᓂᕐᒥᒃ ᓄᓇᕗᑦ ᐊᔾᔨᐅᖏᑦᑑᓂᖓᓂᒃ ᐊᔾᔨᒋᔭᐅᖏᓐᓂᖓᓂᒡᓗ ᑲᓇᑕᐅᑉ ᓄᓇᖁᑎᖏᓐᓂᑦ. ᑖᓐᓇᑐᐊᑦᑐᐊᖅ ᒐᕙᒪᖃᕐᕕᐅᔪᓂ ᐊᖏᕐᕋᖃᖅᑐᑦ, ᐃᓄᐃᑦ ᐃᓄᒋᐊᖕᓂᖅᐹᖑᓪᓗᑎᒃ ᓄᓇᖃᖅᑐᑦ. ᑖᒃᑯᐊᑐᐊᓪᓗ ᐃᓄᒋᐊᖕᓂᖅᓴᐅᔪᑦ ᐃᓄᒃᑐᑦ ᐅᖃᐅᓯᕐᒥᒃ ᐊᑐᖃᑦᑕᖅᑐᑦ ᐊᔾᔨᒋᔭᐅᓇᑎᒃ ᐃᓕᓴᕆᔭᐅᓯᒪᔫᒃ ᒪᕐᕉᒃ ᐅᖃᐅᓰᒃ ᑲᓇᑕᒥ – ᐊᔾᔨᒋᔭᐅᓇᓂ ᐅᐃᕖᑦ ᐅᖃᐅᓯᖏᑕ ᐊᒻᒪᓗ ᖃᓪᓗᓈᑦ ᐅᖃᐅᓯᖏᑕ.  ᐅᖃᐃᓐᓇᕆᐊᖃᓕᖅᑐᒍᑦ  ᓂᕆᐅᖕᓂᑦᑎᓐᓂᒃ ᐃᓄᒃᑐᑦ ᐅᖃᐅᓯᖅ ᐃᓕᓴᕆᔭᐅᔭᕆᐊᖃᕐᓂᖓᓂᒃ ᑖᓐᓇ ᑐᓐᖓᕕᒋᔭᐅᓪᓗᓂ ᓄᓇᕗᑦ ᓴᖅᑭᑕᐅᓚᐅᖅᓯᒪᖕᒪᑦ – ᑕᐃᒪᐃᓐᓂᖓᓄᑦ ᓯᕗᒧᐊᒃᑎᑕᐅᔭᕆᐊᖃᖅᑐᑦ ᐱᔨᑦᓯᕈᑎᐅᔪᑦ ᐊᑐᐃᓐᓇᖃᑦᑕᖁᓪᓗᒋᑦ ᐃᓄᒃᑐᑦ.
• ᑲᓇᑕᐅᑉ ᒐᕙᒪᒃᑯᖏᑦ ᒫᓐᓇᐅᔪᖅ ᐱᓕᕆᕙᓪᓕᐊᓕᖅᑐᑦ ᕿᒥᕐᕈᓂᕐᒥᒃ ᐃᓕᓴᕆᔭᐅᓯᒪᔪᑦ ᐱᖁᔭᕐᔪᐊᖓᓐᓂᒃ. ᐸᕐᓇᒃᓯᒪᔪᑦ ᑎᑭᑦᑐᒪᓪᓗᑎᒃ ᓄᓇᕗᒧᑦ ᒪᐃ 3-ᖑᓕᖅᐸᑦ. ᑎᓕᐅᕆᕗᖓ ᐃᓘᓐᓇᔅᓯᓐᓂᒃ ᑲᑎᒪᖃᑕᐅᓂᐊᖅᑐᓂᒃ ᐅᖃᐅᓯᖃᖁᓪᓗᒋᑦ, ᖃᓄᖅᓄᓇᕗᒥ, ᐃᓄᒃᑐᑦ ᐅᖃᐅᓯᖅ ᑭᓐᖒᒪᒋᔭᐅᓂᖓᓂᒃ ᐃᓕᓴᕆᔭᐅᖁᓪᓗᒍ ᑐᓐᖓᕕᒋᔭᐅᓚᐅᖅᓯᒪᖕᒪᑦ ᓄᓇᕗᑦ ᓴᖅᑭᑕᐅᓂᖓᓄᑦ.  ᑲᓇᑕᐅᑉ ᒐᕙᒪᒃᑯᖏᑦ ᐱᕕᒃᓴᖃᑦᑎᐊᖅᑐᑦ ᐋᖅᑭᒡᓯᓂᕐᒥᒃ ᐱᓕᕆᔭᐅᑦᑎᐊᓚᐅᖏᑦᑐᒥᒃ ᐱᓕᕆᑦᑎᐊᖁᓪᓗᒋᑦ.
• ᑎᓕᐅᕆᕗᖓ ᐃᓘᓐᓇᔅᓯᓐᓂᒃ ᑕᐃᒪᓐᖓᑦ ᑎᑎᕋᖃᑦᑕᖁᓪᓗᓯ ᒪᓕᒐᓕᐅᖅᑎᔅᓯᓐᓄᑦ ᑕᑯᔪᒪᓂᕋᕐᓗᓯ ᐃᓄᒃᑐᑦ ᐅᖃᐅᓯᖅ ᐃᑲᔪᖅᓯᖅᑕᐅᖁᓪᓗᒍ ᐊᒻᒪᓗ ᓴᐳᒻᒥᔭᐅᖁᓪᓗᒍ ᖃᓄᓕᒫᖅ.

ᐊᑏ ᐅᑎᕐᕕᒋᓚᐅᕐᓚᕗᑦ ᑕᐅᑐᓐᖑᐊᖅᑕᐅᓚᐅᖅᓯᒪᔪᖅ ᓄᓇᕗᒧᑦ ᐊᒻᒪ ᐊᖏᔪᐊᓗᒃ ᐱᒻᒪᕆᐅᔪᑦ ᑕᐅᑐᓐᖑᐊᖅᑕᐅᓚᐅᖅᓯᒪᔪᑦ. ᐅᒃᐱᕆᔭᒃᑲ ᑖᒃᑯᐊ ᑕᐅᑐᓐᖑᐊᖅᑕᐅᓚᐅᖅᓯᒪᔪᑦ ᐱᔪᒪᔭᐅᔪᑦ. ᓄᓇᕗᑦ ᐊᖏᕈᑎᖏᑎᒍᑦ, ᐱᖁᔭᕐᔪᐊᖑᓕᕐᒪᑕ, ᐋᔨᕈᑕᐅᔪᓐᓇᖏᑦᑐᑦ. ᐃᓚᖏᓐᓄᑦ ᐃᓗᐊᖏᓕᕈᑕᐅᓂᐊᖅᑐᖔᓗᐊᑦ. ᑭᓯᐊᓂᓕ ᐅᓄᕐᓂᖅᓴᐅᔪᑦ ᐅᐱᒪᓂᐊᖅᑐᑦ. ᐅᐱᒍᓱᒡᓗᑎᒃ ᐃᓅᓂᕆᔭᖏᓐᓂᒃ, ᐊᖏᕐᕋᕆᔭᖓᓐᓂᒃ, ᐃᓕᖅᑯᓯᑦᑎᓐᓂᒃ, ᐅᖃᐅᓯᑦᑎᓐᓂᒡᓗ.

“ᐃᓕᖕᓂ ᐃᓕᖃᑦᑕᖅᓯᒪᓐᓂᑰᕗᖓ ᐃᓕᕋᓱᓐᖏᓐᓂᕐᒥᒃ ᓱᓕᔪᒥ ᐅᖃᕐᓂᕐᒥᒃ ᐃᓄᐃᑦ ᐅᖃᐅᓯᖏᓐᓂᒃ ᐃᓄᐃᑦ ᐱᖅᖁᓯᖏᓐᓂᒃ ᑐᓐᖓᕕᖃᕋᓱᖕᓂᕐᒥᒃ ᓗᐃ ᑕᐹᕐᔪᒃ, ᖁᔭᓐᓇᒦᒃ” – ᐊᓗᑭ ᑰᑦᑎᖅ

Download (PDF, 226KB)

ᐱᓇᓱᐊᕈᓯᐅᔪᒥ ᒪᐃ 6, 2019−ᒥ, ᐃᖃᓗᐃᑦ ᑐᙵᓱᒃᑎᑦᑎᓂᐅᖅᐳᑦ ᐃᓕᓐᓂᐊᖅᑎᓂᑦ ᓄᓇᕗᓕᒫᒥ ᐃᓚᐅᖃᑕᐅᓂᕐᒧᑦ ᒪᕐᕈᖓᓂ ᐊᕐᕌᒍᑕᒫᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᖅᑲᓇᐃᔮᕆᔪᒪᔭᒥᓂᑦ ᑕᖕᒫᕐᕕᖕᒥᑦ. ᐃᓕᓐᓂᐊᖅᑎᓄᑦ ᐃᓱᒪᒋᔭᖃᖅᑐᒥ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐃᖅᑲᓇᐃᔮᕆᔪᒪᓇᔭᖅᑕᒥᓂᑦ ᐅᑭᐅᖃᖅᑐᓂ 15−ᓂ ᐅᖓᑖᓄᑦ ᐊᒻᒪ ᒫᓐᓇᐅᔪᒥ ᖁᑦᑎᒃᑐᒥ ᐃᓕᓐᓂᐊᕐᕕᖕᒥ ᐃᓕᓐᓂᐊᖅᑐᒥ ᓄᓇᕗᒻᒥ, ᐅᓇ ᑕᖕᒫᕐᕕᒃ ᐃᓕᖕᓅᑐᐃᓐᓇᕆᐊᖃᖅᐳᖅ!

ᖃᐃᖁᔨᕗᒍᑦ ᐱᔪᒪᓇᔭᖅᑐᓂ ᐃᑲᔪᖅᓱᐃᔨᐅᓇᔭᖅᑐᓂ ᐊᒻᒪ ᐃᓕᓐᓂᐊᖅᑎᓂᑦ ᐱᔭᕇᖅᓯᓂᖏᓐᓄᑦ ᑐᒃᓯᕋᐅᑎᓂᑦ ᐃᓚᐅᖃᑕᐅᓂᕐᒧᑦ ᐆᒥᖓ ᑕᖕᒫᕐᕕᖕᒥᑦ. ᐃᑲᔪᖅᓱᐃᔨᐅᓇᔭᖅᑐᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐱᓕᕆᔨᒻᒪᕆᐅᔪᓪᓇᖅᐳᑦ, ᐋᓐᓂᐊᖃᕐᓇᙱᑦᑐᓕᕆᓂᕐᒥ ᖁᕝᕙᖅᓴᐃᔨᐅᔪᑦ, ᐃᓕᓴᐃᔨᑦ ᐅᕝᕙᓘᓐᓃᑦ ᐊᓯᖏᑦ ᐊᑭᓕᖅᓱᖅᑕᐅᓇᑎᒃ ᐃᑲᔪᖅᑎᐅᔪᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐅᕝᕙᓘᓐᓃᑦ ᐱᔪᒪᓂᖃᖅᑐᒥ ᐊᐅᓪᓛᖃᑎᖃᕋᔭᖅᑐᓂ ᐃᓕᓐᓂᐊᖅᑎᓂᑦ ᐊᒻᒪ ᐃᑲᔪᖅᓱᐃᓗᓂ ᑐᓂᓯᓂᐅᔪᒥ ᑕᖕᒫᕐᕕᖕᒥ ᖃᓄᐃᓕᐅᕐᓂᐅᔪᓂᑦ ᐊᒻᒪ ᑲᒪᔨᒋᔭᐅᓗᓂ ᐃᓚᐅᖃᑕᐅᔪᓂᑦ. ᐅᐸᒍᒃ ᓄᓇᓕᖕᓂ ᑐᓴᐅᒪᑎᑦᑎᔨ ᑐᕌᖅᑎᑦᑎᔨ, ᐃᓕᓐᓂᐊᖅᑎᓄᑦ ᐃᑲᔪᖅᓱᐃᔨᐅᔪᖅ ᐃᓕᓴᐃᔨ ᐅᕝᕙᓘᓐᓃᑦ ᓄᓇᓕᖕᓂ: ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑭᒡᒐᖅᑐᐃᔨᖓ ᓄᓇᓕᖕᓂᑦ ᑐᒃᓯᕋᐅᑎᓄᑦ ᑕᑎᑎᕆᐊᓕᖕᓂ ᐊᒻᒪᓗ ᖃᐅᔨᒋᐊᒃᑲᓐᓂᕐᓂᕐᒧᑦ.

ᑕᖕᒫᕐᕕᐅᑉ ᑐᙵᕕᒋᓂᐊᖅᑕᖓ ᓄᓇᕗᒻᒥ ᓯᓚᑦᑐᖅᓴᕐᕕᖕᒦᓐᓂᐊᖅᐳᖅ (NAC), ᑕᖕᒫᕐᕕᐅᑉ ᖃᓄᐃᓕᐅᕐᓂᖏᓐᓂ ᐱᓕᕆᐊᖑᓗᑎᒃ ᕿᑭᖅᑕᓂ ᐋᓐᓂᐊᕕᖓᓂ, ᐊᒻᒪᓗ ᓄᓇᕗᒻᒥ ᓯᓚᑦᑐᖅᓴᕐᕕᐅᑉ ᐱᓕᕆᙳᐊᕐᓂᐅᔪᒥ ᖃᐅᔨᓴᕐᕕᖓᓐᓂ ᐊᒻᒪ ᐃᓕᓐᓂᐊᕐᕕᐊᕈᓯᕐᓂᑦ. ᐃᓕᓐᓂᐊᖅᑏᑦ ᐱᕕᒃᓴᖃᕐᓂᐊᖅᐳᑦ ᐃᒪᐃᓐᓂᕐᒧᑦ

• ᐃᓕᑦᑎᓂᕐᒥ ᐊᒥᓱᓂ ᐱᑕᖃᑐᐃᓐᓇᕆᐊᓕᖕᓂ ᐋᓐᓂᐊᖃᕐᓇᙱᑦᑐᓕᕆᓂᕐᓂ ᐃᖅᑲᓇᐃᔮᕆᔪᒪᓇᔭᖅᑕᖏᓐᓂ ᐱᓇᓱᐊᕈᓐᓇᖅᑕᖏᓐᓂ, ᐊᒻᒪ ᑲᑎᖃᑎᖃᕐᓗᑎᒃ ᓄᓇᕗᒻᒥᐅᓂ ᐅᑯᓄᖓ ᐊᑐᕐᓂᖃᐅᑎᖃᖅᑐᓂ

• ᐆᒃᑐᕈᒃ ᐃᓚᖏᓐᓂ ᐃᓅᓕᓴᐃᓂᕐᒥ ᐊᔪᙱᓐᓂᐅᔪᓂᑦ, ᓲᕐᓗ ᕿᑯᖅᓯᓂᕐᒥ, ᐱᓕᕆᓂᕐᒥ ᑐᓵᑦᑎᐊᕐᓂᕐᒧᑦ ᖃᐅᔨᓴᕈᑕᐅᔪᓂᑦ, ᐅᕝᕙᓘᓐᓃᑦ ᒥᖅᓱᖅᑐᐃᓂᕐᒥ

• ᐱᕈᖅᓴᐃᓗᑎᑦ ᐃᖅᑲᓇᐃᔮᕆᔪᒪᔭᒥ ᐸᕐᓇᐃᓂᕐᒧᑦ ᐱᓕᕆᐊᒃᓴᒥᒃ, ᐋᖅᑭᒃᓱᐃᓗᑎᑦ ᐱᔭᕆᐊᓕᖕᓂ ᐃᓕᓐᓂᐊᕐᓂᐅᔪᓂ ᐃᖅᑲᓇᐃᔮᕆᔪᒪᓇᔭᖅᑕᕐᓂ ᐱᔪᒥᒋᔭᕐᓂᑦ, ᑐᑭᓕᐊᖃᑎᖃᖅᑐᒥ ᐊᐅᓚᔮᖅᑑᑦ ᐃᓚᖓᓐᓂ ᐃᓕᓐᓂᐊᕐᕕᐅᑉ ᐃᓕᓐᓂᐊᕈᑎᓕᐅᖅᑕᐅᓯᒪᔪᓄᑦ.

ᐅᓇ ᐱᓕᕆᐊᒃᓴᖅ ᑐᕌᖓᓂᖃᖅᐳᖅ ᖁᕝᕙᖅᓴᐃᓂᕐᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᖅᑲᓇᐃᔮᕆᔭᐅᔪᒪᔪᓄᑦ ᓄᓇᕗᒻᒥᐅᓄᑦ ᐊᒻᒪ ᑐᙵᕕᖃᖅᐳᖅ ᐊᔾᔨᐸᓗᐊᓂ ᑕᖕᒫᕐᕕᖕᒧᑦ ᐆᒃᑑᑎᐅᓲᒥᒃ ᐅᐊᖕᓇᒥ ᐋᓐᑎᐊᕆᐅᒥ ᐃᓕᓐᓂᐊᕐᕕᖓᓂ ᐃᓅᓕᓴᐃᓂᕐᒧᑦ.

Download (PDF, 138KB)

Download (PDF, 247KB)