ᑭᕙᓪᓕᖅ ᕼᐊᓪ ᐃᓕᓴᕆᔭᐅᔪᖅ ᐊᖏᕐᕋᕆᔭᐅᓪᓗᓂ ᐃᓕᓐᓂᐊᕐᕕᐅᓚᐅᕐᓂᖓᓂᒃ

ᐃᕐᖐᓐᓇᖅ ᓴᖅᑭᖅᑕᐅᔭᕆᐊᓕᒃ

ᑭᕙᓪᓕᖅ ᕼᐊᓪ ᐃᓕᓴᕆᔭᐅᔪᖅ ᐊᖏᕐᕋᕆᔭᐅᓪᓗᓂ ᐃᓕᓐᓂᐊᕐᕕᐅᓚᐅᕐᓂᖓᓂᒃ

(ᐄᑉᕈ 15, 2019 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᓐᖓᕕᒃᑯ ᑎᒥᖓᓂ (ᑐᓐᖓᕕᒃ) ᓯᕗᓕᖅᑏᑦ ᑲᑎᒪᔨᕋᓛᖏᒃ ᐊᓗᑭ ᑰᑦᑎᖅ ᐊᒻᒪᓗ ᑕᐃᕕᑦ ᓂᖏᐅᖓᓐ ᖃᐅᔨᒃᑲᐃᓚᐅᖅᑑᒃ ᑭᕙᓪᓕᖅ ᕼᐊᓪ ᑲᖏᕐᖠᓂᕐᒥ, ᓄᓇᕗᑦ ᐃᓕᓴᕆᔭᐅᓯᒪᓕᕆᐊᖓ ᐊᖏᕐᕋᕆᔭᐅᓪᓗᓂ ᐃᓕᓐᓂᐊᕐᕕᐅᓚᐅᖓᓂᒃ ᐊᓪᓚᐃᑦ ᐃᓕᓐᓂᐊᕆᐊᖅᑎᑕᐅᖃᑦᑕᓚᐅᖅᑐᑦ ᑮᓇᐅᔭᓕᑕᐅᓂᕐᒧᑦ ᐊᖏᖃᑎᒌᒍᑎᖏᓐᓂ ᐊᒻᒪᓗ ᐃᓕᓐᓂᐊᕆᐊᖃᑦᑕᓚᐅᖅᑐᓂᒃ ᐊᔾᔨᖃᖅᑐᒥᒃ ᓇᓗᓇᐃᒃᑯᑕᖅᑖᕆᐊᖅᑐᖁᔨᔪᑦ.

ᐃᓕᓐᓂᐊᖃᑦᑕᓚᐅᖅᑐᑦ ᑭᕙᓪᓕᖅ ᕼᐊᓪᒥ ᑲᓇᑕᒥ ᑭᖑᓪᓕᕐᐸᐅᓚᐅᖅᑐᒥ ᐊᖏᕐᕋᕆᔭᐅᓪᓗᓂ ᐃᓕᓐᓂᐊᕐᕕᐅᓚᐅᖅᑐᖅ 1985-ᒥᓂᒃ 1997-ᒧᓄᑦ ᑮᓇᐅᔭᓕᑕᐅᒍᓐᓇᖅᑐᑦ. ᐃᓕᓐᓂᐊᖃᑦᓚᐅᖅᑐᑦ ᑐᒃᓯᕋᕈᓐᓇᓂᐊᖅᑐᑦ ᐃᓕᓐᓂᐊᕆᐊᖅᑎᑕᐅᖃᑦᑕᓚᐅᖅᑐᓄᑦ ᑮᓇᐅᔭᖅᑖᕈᑎᒃᓴᓂᒃ ᐱᒋᐊᕐᓗᓂ ᒪᐃ 1, 2019. ᑐᒃᓯᕋᖅᑐᑦ ᒪᕐᕉᓐᓂᒃ ᓇᓗᓇᐃᒃᑯᑖᓐᓂᒃ ᐃᓚᓕᐅᔾᔨᒋᐊᖃᕐᓂᐊᖅᑐᑦ, ᐊᐃᑉᐹ ᒐᕙᒪᒃᑯᓃᓐᖔᕆᐊᓕᒃ ᐊᔾᔨᓐᖑᐊᓕᒃ ᓇᓗᓇᐃᒃᑯᑕᖅ.

“ᑐᓐᖓᕕᒃᑯᑦ ᐊᒻᒪᓗ KIA ᐃᖅᑲᓇᐃᔭᖃᑎᓖᑦ ᑯᐃᓐ−ᓄᓇᖃᖅᑳᕐᓯᒪᔪᑦ ᐱᓇᓱᐊᖃᑎᒌᑦ ᐊᒻᒪᓗ ᐅᑭᐅᖅᑕᖅᑐᒨᖓᔪᓂᒃ ᑲᓇᑕᒥ ᐋᖅᑭᓱᐃᓪᓗᑎᒃ ᐊᐅᓚᑦᓯᕕᐅᓂᐊᖅᑐᒥᒃ ᑲᓇᑕ ᑐᒃᓯᕋᐅᑎᓂᒃ ᐊᐅᓚᑦᓯᔪᓐᓇᖁᓪᓗᒍ ᑮᓇᐅᔭᓕᑕᐅᒍᑎᒃᓴᓄᑦ ᐃᓕᓐᓂᐊᕆᐊᖃᑦᑕᓚᐅᖅᑐᑦ ᐊᑭᓕᐅᓯᐊᑦᓴᖏᓐᓄᑦ, ᐃᖕᒥᒨᖓᔪᓂᒃ ᖃᐅᔨᓴᖅᑕᐅᒍᑎᒃᓴᓂᒃ ᐊᒻᒪᓗ ᐃᖕᒥᒨᖓᔪᓂᒃ ᐱᕙᓪᓕᐊᒍᑎᒃᓴᓂᒃ.” ᐅᖃᓚᐅᖅᑐᖅ ᓂᖏᐅᖓᓐ.

“ᑭᖑᓪᓕᕐᐹᖅ ᐊᖏᕐᕋᕆᔭᐅᓪᓗᓂ ᐃᓕᓐᓂᐊᕐᕕᐅᓚᐅᖅᑐᖅ ᑲᓇᑕᒥ ᒪᑐᓚᐅᖅᑐᖅ ᐊᕐᕌᒍᓂᒃ 22-ᑐᐃᓐᓇᕐᓂᒃ, ᒪᕐᕉᒃ ᐊᕐᕌᒎᒃ ᐱᓐᖑᐊᖅᑎᑕᐅᓚᐅᖅᑎᓐᓇᒍ ᓄᓇᕗᑦ. ᓴᕆᒪᒋᕙᕋ ᑲᓇᑕ ᐊᓪᓗᕆᐊᒃᑲᓂᕐᓂᖓᓄᑦ ᓴᐃᒻᒪᖃᑎᒌᒋᐊᒃᑲᓐᓂᕈᑎᒃᓴᒧᑦ ᐱᓇᓱᐊᖃᑎᖃᕐᓂᖏᓐᓂᒃ ᐃᓄᓐᓂᒃ.” ᐅᖃᖅᑐᖅ ᑰᑦᑎᖅ.

ᑐᓐᖓᕕᒃᑯᑦ ᓯᕗᓕᖅᑎᖏᑦ ᑖᒃᑯᐊᖑᔪᑦ ᐊᖓᔪᖅᑳᖅ ᐊᒻᒪᓗ ᐊᖓᔪᖅᑳᑉ ᑐᒡᓕᐊ ᑐᓐᖓᕕᒃᑯᓐᓂ ᐊᒻᒪᓗ ᐱᖓᓱᑦ ᐃᓄᐃᑦ ᑲᑐᔾᔨᖃᑎᒌᑦ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ, ᑭᕙᓪᓕᖅ ᐃᓄᐃᑦ ᑲᑐᔾᔨᖃᑎᒌᑦ ᐊᒻᒪᓗ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒋᑦ. ᓂᖏᐅᖓᓐ ᐃᒃᓯᕚᖃᑕᐅᔪᖅ ᓯᕗᓕᖅᑏᑦ ᑲᑎᒪᔨᕋᓛᖏᓐᓄᑦ ᐊᖓᔪᖅᑳᕆᔭᐅᓂᕐᒧᑦ ᑭᕙᓪᓕᖅ ᐃᓄᐃᑦ ᑲᑐᔾᔨᖃᑎᒌᖏᓐᓂ.

-30-

ᑐᑭᓯᒋᐊᒃᑲᓂᕐᕕᒃᓴᖅ:

ᕗᕌᓐᑯ ᐳᓯᒥ
ᑐᑭᒧᐊᒃᑎᑦᑎᔨᐅᓚᐅᐱᓪᓚᑦᑐᖅ ᑐᓴᒪᐅᔾᔪᑎᓕᕆᓂᕐᒧᑦ
ᓄᓇᕗᑦ ᑐᓐᖓᕕᒃ ᑎᒥᖓ

www.tunngavik.com