ᐊᑎᕋ ᒫᓂᑲ ᑭᒍᑦᑕᖅ ᐊᐅᓱᐃᑦᑐᒥᐅᑕᖅ, ᓄᓇᕗᑦ. ᐃᓚᐅᔪᖓ ᓄᓇᕗᒻᒥᒧ ᐃᓕᓴᐃᔨᐅᓂᕐᒧᑦ ᐃᓕᓐᓂᐊᕈ- ᑎᖏᓐᓂᑦ ᐃᖃᓗᒃᑑᑦᑎᐊᕐᒥ, ᓄᓇᕗᑦ ᑕᐃᑲᓂ ᓄᓇᕗᑦ ᐅᑭᐅᖅᑕᖅᑐᒥ ᓯᓚᑦᑐᖅᓴᕐᕕᐊᓂ. ᒫᓐᓇ ᐅᑭᐅᖅ ᓯᑕᒪᒋᓕᖅᑕᖓ, ᐱᐊᓂᓕᖅᑐᖓ ᐃᓕᑕᕆᔭᐅᔾᔪᑎᒃᓴᕋᓂᑦ. ᐱᓕᕆᐊᖃᓛᖅᑐᖓ ᐳᐃᒍᓚᐅᖅᓯᒪᔾᔮᖏᑕᕋᓂᑦ. ᖁᕕᐊᒋᔭᕋ ᐃᓕᓴᐃᓂᕐᒥᑦ ᓱᕈᓯᓂᑦ ᐃᓕᓐᓂᐊᕐᕕᖕᒥ ᐊᒻᒪᓗ ᓱᓕ ᓄᑕᕋᕋ ᐅᑭᐅᓕᒃ ᐱᖓᓱᓂᑦ ᐸᓂ. ᐊᒃᓱᐊᓗᒃ ᐊᒃᓱᕈᖅᓯᒪᔪᖓ ᒫᓐᓇᒧᑦ ᑎᑭᐅᑎᓂᕐᒥᑦ ᐊᒻᒪᓗ ᐅᐱᒋᔪᒪᕙᕋ ᔫᓯ ᐊᒪᐅᔭᖅ ᑯᓱᖅ ᓴᖅᑯᒥᑎᑦᑎᓂᐊᓂᒃ ᐃᓕᓐᓂᐊᕆᐊᒃᑲᓐᓂᕈᑎᒃᓴᓂᑦ ᑐᓂᕐᕈᑎᓂᑦ ᐱᓕᕆᐊᒥᑦ. ᐅᒃᑯᐃᕈᑎᐅᓂᐊᖅᑐᖅ ᐃᓕᓴᖅᑎᓄᑦ ᐱᔪᒪᔪᓄᑦ ᐱᓕᕆᐊᒃᓴᓄᑦ ᐊᒻᒪᓗ ᑐᑭᓯᐊᓕᒃᑲᓐᓂᕐᓗᑎᒃ ᔫᓯᐅᑉ ᐱᐊᓂᒃᓯᒪᔭᖏᓐᓂᑦ.
ᓇᖕᒥᓂᖅ ᐃᓚᖃᖅᑐᖓ ᑕᒫᓃᑦᑐᑦ ᐃᖃᓗᒃᑑᑦᑎᐊᒥ ᐃᑲᔪᖅᑐᐃᔪ ᐅᕙᓐᓂᑦ ᐱᐊᓂᒐᓱᐊᖅᑎᓪᓗᖓ ᐃᓕᓐᓂᐊᖅᑕᒃᑲᓂᑦ. ᐅᑭᐅᑦ ᐱᖓᓱᑦ ᓈᓯᒪᓕᖅᑐᑦ ᑕᒫᓃᓕᕐᓂᕋᓂᑦ ᐊᒻᒪᓗ ᑕᑯᓯᒪᓪᓗᖓ ᐊᒥᓱᓂᑦ ᓄᑕᕋᓂᑦ ᐊᒻᒪᓗ ᒪᒃᑯᒃᑐᓂᑦ ᔭᒐᐃᔪᑦ ᓇᖕᒥᓂ ᐱᖅᑯᓯᖏᓐᓂᑦ ᐊᒻᒪᓗ ᐅᖃᐅᓯᖏᓐᓂᑦ. ᓇᖕᒥᓂᕐᓕ ᐊᖏᕐᓂ ᐊᑐᕋᓱᐊᖏᓐᓇᖅᑕᕋ ᐅᖃᐅᓯᕗᑦ ᐊᒻᒪᓗ ᐱᖅᑯᓯᕗᑦ ᐆᒪᑎᓐᓇᓱᐊᖅᑐᒍ ᐅᕙᑦᑎᓐᓂ. ᐃᓕᓐᓂᐊᕐᕕᖕᒨᕌᖓᒪ ᐊᔪᕈᓐᓃᖅᓴᖅᑎᓪᓗᑕ ᐃᓕᓴᖅᑕᑦᑎᓐᓂᑦ ᐱᐅᒋᓛᕆᕙᒃᑕᕋ ᐃᓕᓴᐃᓂᕐᒥᑦ ᐱᓗᐊᖅᑐᒥᑦ 1-ᒥ ᖁᕐᑎᖕᓂᓕᖕᓂᑦ ᐃᓕᓐᓂᐊᕈᑎᖏᓐᓂᑦ ᐱᓪᓗᒍ ᐱᔪᒪᒐᔪᖕᓂᖏᓐᓄᑦ ᐃᓕᓐᓂᐊᕐᓂᕐᒥᑦ ᓱᓇᑐᐃᓐᓇᓂᑦ ᐊᒻᒪᓗ ᑕᒪᕐᒥᒃ ᐃᓕᓴᕈᑎᓂᑦ. ᐃᒪᓐᓇᐃᓐᓇᓱᒃᐹᒃᑐᖓ ᐃᔾᔪᐊᒃᓴᑦᑎᐊᖑᓂᕐᒥᑦ ᐱᓪᓗᒍ ᐱᒻᒪᕆᐅᖕᒪᑦ ᐅᕙᓐᓄᑦ ᐊᒻᒪᓗ ᐊᓯᓐᓄᑦ ᐱᓯᒪᐃᓐᓇᕐᓗᒋᑦ ᐱᖅᑯᓯᕗᑦ ᐆᒪᑎᑕᐅᓂᖏᓐᓄᑦ.
ᐅᒃᐱᕈᓱᓪᓚᕆᒃᑐᖓ ᐃᓕᓐᓂᐊᕐᓂᖅ ᐸᓚᖓᐃᕈᑕᐅᕙᖕᒪᑦ ᐱᖅᑯᓯᑦᑎᓐᓄᑦ ᐊᒻᒪᓗ ᐃᓕᓪᓗᒋᑦ ᓄᓇᕗᑦ ᐃᓕᓴᕐᕕᖏᓐᓄᑦ ᐊᒻᒪᓗ ᐊᔾᔨᐅᖏᓐᓇᔭᖅᑐᖅ ᖃᓄᖅ ᐱᖅᑯᓯᕗᑦ ᐃᓕᓴᐃᔾᔪᑕᐅᕙᓚᐅᕐᓂᖏᓐᓂᑦ ᓯᕗᓂᑦᑎᓐᓂ ᑭᓯᐊᓂ ᓱᓕ ᐱᓯᒪᔪᓐᓇᖅᑕᕗᑦ ᐱᖅᑯᓯᕗᑦ ᐆᒪᑎᓪᓗᒍ. ᐱᐊᓂᒃᑯᒪ ᓕᑕᕆᔭᐅᔾᔪᑎᖃᓕᕐᓗᖓᓗ ᐊᒻᒪᓗ ᐃᓄᒻᒪᕆᐅᓪᓗᖓᐃᓕᓴᐃᔨᐅᓂᕐᒧᑦ ᖁᕕᐊᓱᒻᒪᕆᖕᓂᐊᖅᑐᖓ ᐃᓕᓴᐃᓂᕐᒥ ᐅᖃᓕᒫᕆᐅᓕᖅᑎᑦᑎᕙᓪᓕᐊᓂᕐᒥᑦ, ᑎᑎᕋᕆᐅᖅᓴᓂᕐᒥᑦ, ᐊᒻᒪᓗ ᐅᖃᓪᓚᒍᓐᓇᕐᓗᑎᒃ ᐅᖃᐅᓯᑦᑎᓐᓂᑦ. ᐊᔪᕐᓇᖏᑦᑐᑯᓘᔾᔮᖏᑦᑐᖅ ᐱᑕᖃᓗᐊᖅᑎᓐᓇᒍᓗ ᐱᔾᔪᑎᒃᓴᓂᑦ ᐊᑐᒐᒃᓴᓂᑦ ᐱᓪᓗᒋᑦ ᐱᖅᑯᓯᕗᑦ ᑭᓯᐊᓂ ᐱᔪᒪᓂᖃᖅᑐᖓ ᑲᑎᖅᓱᐃᓂᕐᒥᑦ ᓇᖕᒥᓂᖅ ᐱᓯᒪᓂᐊᖅᑕᒃᑲᓂᑦ ᐊᒻᒪᓗ ᐊᑲᐅᓂᖅᐹᓂᑦ ᒪᓕᒃᓗᒋᑦ ᐃᓕᓴᕈᑎᒃᓴᑦ.
ᑭᖑᓪᓕᖅᐹᒥ, ᖁᔭᓐᓇᒦᕈᒪᔭᕋ ᔫᓯ ᐊᒪᐅᔭᖅ ᑯᓱᒐᖅ ᑕᒪᐃᓐᓂᒃ ᐱᐊᓂᒃᓯᒪᔭᖏᓐᓂᑦ ᑐᕌᖅᑕᖏᓐᓂᒃᓗ ᐊᒻᒪᓗ ᐱᔾᔪᔾᔨᓯᒪᑎᓪᓗ ᓴᐳᔾᔨᓂᕐᒥᑦ ᐃᓄᐃᑦ ᐱᔪᓐᓇᐅᑎᖏᓐᓂᑦ ᐃᓕᓐᓂᐊᕈᑎᒃᓴᓄᑦ. ᓇᖕᒥᓂᕐᓕ ᐊᒃᓱᕈᕐᓗᖓ ᐱᓕᕆᓂᐊᖅᑐᖓ ᐊᓈᓇᐅᑎᓪᓗᖓ, ᐊᖓᔫᑎᓪᓗᖓ, ᓄᑲᐅᑎᓪᓗᖓ, ᐊᕐᓇᕐᕕᐅᑎᓪᓗᖓ, ᐊᒻᒪᓗ ᐃᓕᓴᐃᔨᐅᑎᓪᓗᖓ ᓯᕗᓪᓕᖅᐹᒥ ᑐᓂᓯᓗᖓ ᐊᖏᔪᓂᑦ ᐊᒻᒪᓗ ᓱᓇᓕᒫᓂᑦ ᖃᐅᔨᒪᔭᒃᑲᓂᑦ ᐃᓄᐃᑦ ᐱᖅᑯᓯᖏᓐᓂᑦ ᐊᒻᒪᓗ ᐅᖃᐅᓯᖏᓐᓂᑦ. ᐱᔪᒪᓂᖃᖅᑐᖓ ᒪᓕᒃᓂᕐᒥᑦ ᔫᓯᐅᑉ ᑐᒥᖏᓐᓂᑦ ᐃᓕᓴᐃᔨᐅᑎᓪᓗᖓ ᐊᒻᒪᓗ ᐱᐅᔪᒧᑦ ᐃᔾᔪᐊᒐᒃᓴᑦᑎᐊᖑᓂᕐᒧᑦ. ᓂᕆᐅᒃᑐᖓ ᐊᓯᖏᑦ ᒪᒃᑯᒃᑐᑦ ᖃᐅᔨᓗᑎᒃ ᐊᒻᒪᓗ ᑐᑭᓯᐊᓗᑎᒃ ᖃᓄᖅ ᔫᓯ ᐱᓕᕆᐊᒥᑦ ᐱᐊᓂᒃᓯᓚᐅᕐᒪᖔᑦ ᓯᕗᓕᖅᑎᐅᓂᕐᒥᑦ ᒪᒃᑯᒃᑐᓄᑦ.
ᓇᑯᕐᒦᒃ
ᒫᓂᑲ ᑭᒍᑦᑕᖅ
