Atira Monica Kiguktak Auyuittumiutauyunga, Nunavunmi. Nunavunmi Ilihaqtunga ilihaqtiuyumaplunga hamani Iqaluktuuttiami, Nunavunmi Nunavunmi Ilihaqpaallivianit. Tajja ukiuq hitamagiliqtaat ilihaqtatka, iniqyuqiliqhunga. Havaaghaqaqniaqtunga ihuariyamnik. Ilihaiyaami nutaqqanik quviagitaktara ilihalihaaqtunik panimniklu pingahunik ukiulik. Aghuuqhunga havakluaqpaktung imaalu nanngariyumayara Jose Amaujaq Kusugak angmaqlugu ikayuutighait ilihaqpaallirumayut. Imaa angmautauniaqtuq iliharumayunut ilittuqhivallialugillu Jose iniqhimaliqtainik.
Ilaqaliqtunga hamani Iqaluktuuttiami ikayuqtigivaktatka ilihaqtamnik. Pingahunik ukiunik hamaniiliqtunga tautukpaghungalu amihunik inulramminik ilitquhiinik uqauhiiniklu atuqpalliahuiqtunik.Uvangattauq aimaplunga uqauhira ilitquhiralu aturahuaqpaktatka. Ilihaqvingnut ilihainahuaqpaktunga taapkua kihimi quviagilluaqpaktatka Grade 1-mi ilihaqtut ilitpalliayumagamik quyaginnaqlu iliharumayukkamik. Inuuhiqattiarahuaqpaktunga aghuuqnaqmat uvamnut ahinullu ilitquhivut aulaquplugu.
Ukpiruhuktunga taimaa ilihaquplugit ilitquhivut aulaniarumi taimaalu ilihaqtittilugit Nunavunmi Ilihaqviinit imaa aallannguqtuugaluaq ilitquhivut kihimi aulapkaiyaqqut huli. Iniqtaaruma ilihaqtamnik ilihaiyiuniaqtunga Inuuplunga quvianaqniaqtuqtauq ilihailiruma taiguaqniqmik, titirauyaqniqmik, uqauhiqaqniqmiklu uqauhiptingnik. Ayuqnaqniaqtuq ilihaitjutiqqukittumik ilitquhiptingnik kihimi katitirumayunga, uvamnik hanalungalu ilihaitjutighanik ilihailiruma.
Taimaaqtiqhunga, quyagiyumayara Jose Amaujaq Kusugak iniqhihimangmat amihunik aghuuqpaghunilu kivgaqtuiyungmat Inuit pilaarutainik ilihaqniqmut. Uvangattauq aghut havagumayunga amaamauplunga, aniqatiuplunga, paniuplunga, arnaqviuplunga, imaalu ilihaqtiuplungalu ayuitamnik Inuit ilitquhiinik uqauhiiniklu. Maligumayara Jose tumiit ilihaqtiutillunga inuuhiqattiarumaplungalu. Imaa inulrammiit ilitturiquyatka ilihimaquplugillu Jose havaanginik Inuit kivgaqtuqhugit pilaarutainut hakugiquplugillu aulatillugit. Jose malikpangniaqtara hivuliqtiutillunga inulramminik.
Nakungmiik
Monica Kiguktak
