(ᐋᒋᓯ 20, 2020 ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓ ᐊᓗᑭ ᑰᑦᑎᖅ ᐅᓪᓗᒥ ᑐᓴᖅᑎᑎᖃᐅᕗᖅ ᔫᓯ ᐊᒪᐅᔭᖅ ᑯᓱᒐᖅ ᐃᖅᑲᐅᒪᔭᐅᓂᖓᓄᑦ ᐃᓕᓐᓂᐊᑐᖅᑐᒧᑦ ᐃᑲᔫᑎᑦ 2020 ᑐᒃᓯᕋᕈᑏᑦ ᒪᑐᐃᕐᒪᑦ.
ᓄᓇᕗᑦ ᑐᙵᕕᒃ ᑎᒥᖓ ᒪᕐᕉᓐᓂᒃ ᐃᓕᓐᓂᐊᕐᑏᓐᓂᒃ ᐱᔾᔪᓯᐊᖅᑖᑎᑦᑎᓲᖑᒻᒪᑕ $5,000-ᓂᒃ ᐊᑐᓂᑦ ᐃᓕᓐᓂᐊᕐᑕᒥᓄᑦ ᐃᓕᓐᓂᐊᖅᑎᓄᑦ ᓯᓚᑦᑐᓴᕐᕕᖕᒥ ᐃᓄᒃᑐᑦ ᐅᖃᐅᓯᕐᓂᒃ ᐊᒻᒪᓗ ᐃᓕᓐᓂᐊᓂᓕᕆᓂᕐᒧᑦ. ᐃᓕᓐᓂᐊᖅᑏᑦ ᐃᓕᓐᓂᐊᕐᑐᑦ ᐊᓯᖏᓐᓂᑦᑕᐅᖅ ᐱᔾᔪᓐᓇᕆᕗᑦ ᖃᐅᔨᑎᑦᑎᑉᐸᑕ ᑖᒃᑯᓄᖓ ᐊᑦᑐᐊᓂᖏᓐᓂᒃ ᐃᓕᓐᓂᐊᕐᑕᒥᑕ ᐊᒻᒪᓗ ᐱᕙᓪᓕᐊᓂᖃᖅᑎᑦᑎᐸᑕ ᐃᓄᐃᑦ ᐱᔪᓐᓇᐅᑎᖏᓐᓂᒃ.
“ᔫᓯ ᑯᓱᒐᖅ ᐃᓄᐃᑦ ᐱᔪᓐᓇᐅᑎᖏᓐᓂᒃ ᐊᒻᒪ ᓴᐳᑎᔭᐅᓯᒪᖁᔨᓪᓗᓂ ᐅᖃᐅᓯᑦᑎᓐᓄᑦ ᐱᔪᓐᓇᐅᑎᓂᒃ ᓂᐱᒋᖃᑦᑕᕐᓯᒪᒻᒪᕆᒃᑲᑦᑎᒍ. ᐊᕐᕌᒍᑕᒫᑦ, ᐃᑲᔪᒃᑲᓐᓂᕈᑎᒃᓴᓂᒃ ᐃᓄᖕᓄᑦ ᐃᓕᓐᓂᐊᕐᑎᓄᑦ ᐊᖅᑯᑎᒋᓪᓗᒍ ᑖᓐᓇ ᐃᓕᓐᓂᐊᕐᑐᓄᑦ ᐃᑲᔪᕈᑕᐅᕙᒃᑐᖅ, ᐃᒃᐱᒍᓱᒍᑕᐅᕙᖕᒪᑦ ᐱᒻᒪᕆᐅᓂᖓᓄᑦ ᐃᓄᐃᑦ ᐅᖃᐅᓯᖓᓄᑦ. ᐅᖃᐅᓯᖅᐳᑦ ᐊᑑᑎᖃᖅᑎᑕᐅᖏᓐᓇᖁᒥᓇᖅᐳᖅ,” ᐅᖃᖅᑐᖅ ᑰᑦᑎᖅ
ᐆᒃᑐᕈᓐᓇᕐᑎᑕᐅᔪᑦ ᐃᓕᓐᓂᐊᕐᑐᑦ ᓯᓚᑦᑐᓴᕐᕕᖕᒥ ᐱᖃᓯᐅᑎᓪᓗᒍ ᓄᓇᕗᖕᒥ ᓯᓚᑦᑐᓴᕐᕕᒃ ᐅᕝᕙᓗ ᓯᓚᑦᑐᓴᕐᕕᓂ ᑲᓇᑕᒥ. ᓄᓇᕗᑦ ᑐᙵᕕᒃ ᑎᒥᖓ ᕿᒥᕐᕈᕙᒃᐳᑦ ᑐᒃᓯᕋᕈᑎᓕᐊᕆᔭᐅᓯᒪᔪᓂᒃ ᐊᒻᒪᓗ ᓂᕈᐊᖅᐸᒃᑐᑎᒃ ᐃᓕᓐᓂᐊᕐᑎᓂᒃ ᒪᓕᒃᑐᒋᑦ ᐃᓕᓐᓂᐊᖅᑕᖏᑦ, ᐅᓂᒃᑳᓂᒃ ᑎᑎᕋᖅᓯᒪᓂᖏᑦ, ᐊᒻᒪᓗ ᖃᐅᔨᒋᐊᕐᕕᐅᔪᓐᓇᕐᑐᑦ.
ᓄᓇᕗᑦ ᑐᙵᕕᒃ ᓴᖅᑮᓚᐅᕐᓯᒪᕗᑦ ᐃᑲᔫᑎᓂᒃ ᐱᓕᕆᖃᑎᒋᔭᐅᓪᓗᑎᒃ ᑯᓱᒐᒃᑯᑦ ᐃᓚᔮᖏᑦ ᐅᔾᔨᕆᔭᐅᑦᑎᐊᓂᐊᕐᒪᑕ ᔫᓯ ᑯᓱᒐᐅᑉ ᕿᒪᐃᓯᒪᓂᖓ ᐅᓇᒻᒥᓱᓕᕈᑕᐅᖁᓪᓗᒍ ᐃᓄᖕᓄᑦ. ᑐᑭᓯᑲᓐᓂᕈᑎᒃᓴᑦ ᐊᒻᒪᓗ ᑐᒃᓯᕋᕈᑎᐅᕈᑎᑦᓴᑦ ᑕᑕᑎᕋᒃᓴᑦ ᐊᑐᐃᓐᓇᐅᕗᑦ ᓄᓇᕗᑦ ᑐᙵᕕᒃ ᑎᒥᖓᑕ ᖃᕆᑕᐅᔭᒃᑯᑦ ᑐᕌᕈᑎᖓᓂᒃ ᐱᔭᒃᓴᐅᕗᑦ. ᐱᓇᓱᐊᕈᑏᑦ ᐃᑲᔫᑎᓂᒃ ᑐᓂᔭᐅᓯᒪᔭᕆᐊᓖᑦ ᓰᑎᐱᕆ 11, 2020.
-30-
ᑐᑭᓯᒋᐊᒃᑲᓂᕐᕕᒃᓴᖅ:
ᓗᐃᔅ ᓱᓗᒃ−ᓛᒃ
ᐱᓕᕆᐊᒃᓴᓂᒃ ᐱᓕᕆᔨ
ᓄᓇᕗᑦ ᑐᙵᕕᒃ ᑎᒥᖓ
ᐅᖄᓚᐅᑖ: 867-645-5400 ᑭᓕᕆᐊᖃᙱᑦᑐᖅ: 1-888-236-5400
www.tunngavik.com
ᒪᓚᐃᔭ ᒥᑭᔾᔪᒃ
ᑐᑭᒧᐊᒃᑎᑦᑎᔨ, ᑐᓴᐅᒪᔾᔪᑎᓕᕆᓂᕐᒧᑦ ᐃᓕᓐᓂᐊᖅᑐᖅ
ᓄᓇᕗᑦ ᑐᙵᕕᒃ ᑎᒥᖓ
ᐅᖄᓚᐅᑖ: 867-975-4900 ᐊᑭᖃᙱᑦᑐᖅ: 1-888-646-0006
www.tunngavik.com
