(ᓅᕙᐃᒻᕙ 15, 2021 – ᑲᖏᕐᖠᓂᖅ, ᓄᓇᕗᑦ) – ᓄᓇᕗᑦ ᑐᙵᕕᒃᑯᑦ ᐊᖓᔪᖅᑳᖓ ᑐᓂᓯᓚᐅᖅᑐᖅ ᖁᔭᒃᑯᓯᐊᖅᑎᑦᓯᓪᓗᓂ ᐱᖓᓱᓂᒃ ᐃᓄᓐᓂᒃ ᐅᔾᔨᓇᖅᑐᒥᒃ ᐃᑲᔫᑎᖃᖅᓯᒪᔪᓂᒃ ᐱᕚᓪᓕᑎᑦᓯᓂᕐᒧᑦ ᑮᓇᐅᔭᓕᐅᕋᓱᐊᕐᓂᕐᒧᑦ, ᐃᓅᓯᕐᒧᑦ, ᐊᒻᒪᓗ ᐱᖅᑯᓯᑐᖃᒃᑯᑦ ᖃᓄᐃᙱᑦᓯᐊᑲᓐᓂᕈᑎᒃᓴᓂᒃ ᐃᓅᖃᑎᖏᓐᓄᑦ. ᐊᑐᓂᑦ ᑐᓂᔭᐅᔪᑦ ᓵᓚᒃᓴᐅᓯᐊᖅᑐᑦ ᐊᒻᒪᓗ ᑮᓇᐅᔭᒃᓴᖅᑖᖅᑎᑕᐅᓪᓗᑎᒃ $500.00.
2021-ᒥ ᑐᙵᕕᒃᑯᑦ ᐊᕐᕌᒎᑕᒫᖅᓯᐅᒻᒥᒃ ᑲᑎᒪᓂᖓᓂ, ᐊᖓᔪᖅᑳᖅ ᐊᓗᑭ ᑰᑦᑎᖅ ᐃᓕᓴᖅᓯᓚᐅᖅᑐᖅ ᐅᑯᓂᖓ ᐃᓄᓐᓂᒃ ᐃᑲᔪᖃᑦᑕᖅᓯᒪᓂᖏᓐᓂᒃ:
ᓘᓯ ᓇᑦᓯᖅ, ᓴᓪᓕᖅ
ᓘᓯ ᓇᑦᓯᖅ ᐃᑲᔫᖃᑦᑕᖅᑐᖅ ᖃᓄᐃᙱᑦᓯᐊᑲᓐᓂᕈᑎᒃᓴᖏᓐᓂᒃ ᓄᓇᒥᓂ. ᐱᓕᕆᖃᑕᐅᖃᑦᑕᖅᑐᖅ ᐃᓄᐃᑦ ᐃᓕᖅᑯᓯᖓ ᐱᖅᑯᓯᖓᓗ ᐆᒪᑎᑕᐅᖏᓐᓇᖁᓪᓗᒍ ᐃᓕᓴᐃᓂᒃᑯᑦ ᒪᒃᑯᓂᖅᓴᓂᒃ ᐃᓄᓐᓂᒃ, ᐃᓕᓴᖅᑕᐅᒍᑎᒋᓚᐅᖅᑕᒥᑐᑦ, ᕿᓯᓕᕆᓂᕐᒥᒃ, ᑲᒻᒥᐅᓂᕐᒥᒃ ᐊᒻᒪᓗ ᐊᓯᖏᓐᓂᒃ ᐱᖅᑯᓯᒃᑯᑦ ᐊᓐᓄᕋᔾᔨᐅᖃᑦᑕᓂᕐᒥᒃ. ᓘᓯ ᐃᓅᓯᓕᕆᔨᒋᔭᐅᕙᒻᒥᔪᖅ ᒪᒃᑯᑦᑐᓄᑦ ᐊᒻᒪᓗ ᐊᓯᖏᓐᓄᑦ ᓄᓇᖅᑲᑎᒥᓄᑦ ᐊᑦᓱᕉᓐᓂᖓᔪᓄᑦ ᐊᒻᒪᓗ ᐊᑦᓱᕈᕐᓇᑐᒃᑰᖅᑐᓄᑦ. ᐱᓕᕆᖃᑕᐅᖃᑦᑕᓂᕐᒥᒍᑦ ᐋᖕᓕᑲᒃᑯᑦ ᑐᒃᓯᐊᕐᕕᖓᒍᑦ, ᓘᓯ ᐱᓇᓱᐊᕈᓯᑕᒫᑦ ᒪᕐᕉᓐᓂᒃ ᐃᑲᕐᕌᓐᓂᒃ ᓄᓇᓖᑦ ᑐᓴᐅᑎᖓᒎᖃᑦᑕᓚᐅᖅᑐᖅ ᐊᕐᕕᐊᓂ ᓄᓇᓖᑦ ᓯᐊᒻᒪᕐᕕᐅᓯᒪᑎᓪᓗᒋᑦ ᓇᓗᓇᐃᖅᑕᐅᓯᒪᔪᓂᒃ ᓄᕙᔾᔪᐊᕐᓇᖅ-19−ᒧᑦ ᐊᒻᒪᓗ ᑭᒡᓕᖃᖅᑎᑕᐅᑦᓯᐊᖅᑐᒥᒃ ᒪᑐᔭᐅᓯᒪᑎᓪᓗᒍ ᓄᓇᖓᑦ. ᑐᓴᐅᑎᒥᒎᖃᑦᑕᕈᑎᖃᓚᐅᖅᑐᖅ ᑐᓴᕈᒥᓇᖅᑐᓂᒃ ᑐᓴᖅᑎᑦᓯᖃᑦᑕᖅᑐᓂ ᒪᑭᒪᒋᐊᒃᑲᓐᓂᕈᑎᒃᓴᖏᓐᓂᒃ ᓄᓇᓖᑦ.
ᒫᑲᕕ ᓇᖅᑐᒃ − ᑰᒑᕐᔪᒃ
ᒫᑲᕕ ᓇᖅᑐᒃ ᐃᓕᓴᕆᔭᐅᒍᑎᓕᒃ ᐃᓕᖅᑯᓯᕐᒥᒍᑦ ᐃᑲᔪᖃᑦᑕᕐᓂᖓᓄᑦ ᓄᓇᒥᓄᑦ ᑰᒑᕐᔪᒃ, ᕿᑎᕐᒥᐅᓄᑦ, ᓄᓇᕗᓕᒫᒧᑦ, ᑲᓇᑕᒧᑦ ᐊᒻᒪᓗ ᓯᓚᑖᓄᑦ ᐅᑭᐅᖅᑕᖅᑐᒥ ᐱᙳᐊᓂᕐᒧᑦ. ᒫᑲᕕ ᐃᓚᒋᔭᐅᖃᑦᑕᖅᓯᒪᔪᖅ ᐊᒻᒪᓗ ᓵᓚᒃᓴᕋᓱᐊᖃᑕᐅᖃᑦᑕᖅᓯᒪᓪᓗᓂ ᐅᑭᐅᖅᑕᖅᑐᒥ ᐱᙳᐊᕈᑎᓄᑦ ᑕᐃᒪᙵᓂᒃ 1970-ᖏᓐᓂ ᐊᒻᒪᓗ ᐃᓚᒋᔭᐅᖏᓐᓇᖅᑐᖅ ᓱᓕ ᐃᓕᓴᐃᔨᒋᔭᐅᓪᓗᓂ ᐊᒻᒪᓗ ᐱᓕᖕᒪᒃᓴᐃᔨᐅᓪᓗᓂ ᐃᓄᓐᓄᑦ ᒪᒃᑯᑦᑐᓄᑦ ᐅᓪᓗᒥᒧᑦ. ᒫᑲᕕ ᑎᒍᒥᐊᖅᑐᖅ ᓄᓇᕐᔪᐊᓕᒫᒥ 1986-ᒥ.
ᔫᓯᐱ ᐃᖅᑯ ᐊᖑᑎᒃᔪᐊᖅ − ᑲᖏᑦᑐᒑᐱᒃ
ᔫᓯᐱ ᐃᖅᑯ ᐊᖑᑎᒃᔪᐊᖅ ᓯᕗᓕᕐᑎᐅᔪᖅ ᐊᒻᒪ ᐊᖏᔪᕐᑎᕐᐹᖑᓕᕐᑐᖅ ᓄᓇᖃᑎᖏᓐᓂᒃ. ᓂᓪᓕᕋᔪᒻᒪᑦ ᐊᒻᒪ ᐊᖑᓇᓱᕐᓂᕐᒥᒃ ᐅᓂᒃᑳᖃᕋᔪᒃᑐᖅ ᐊᒻᒪ ᐃᓄᐃᑦ ᖃᐅᔨᒪᔭᖏᓐᓂᒃ ᓄᓇᒥᓐᓂ ᓈᓚᐅᑎᒃᑯᑦ. ᓂᓪᓕᐊᑦᑐᒑᐱᖕᒥᐅᑦᕙᒃᑐᖅ ᐃᓄᐃᑦ ᒪᓕᒐᖏᑦ ᐊᒻᒪ ᖃᐅᔨᒪᔭᖏᑦ ᖃᐅᔨᒪᔭᐅᓂᐊᕐᒪᑕ ᑭᖑᕚᓄᑦ ᐃᓄᖕᓄᑦ, ᐊᒻᒪ ᖃᐅᔨᒪᑦᑎᐊᖁᓪᓗᓂᒋᑦ ᑲᖏ ᐊᖑᓇᓱᓪᓗᓂ ᓇᖏᐊᕐᓇᓲᓂᐊᑭᔭᐅᓚᐅᖅᓯᒪᙱᑦᑐᒥᒃ ᖃᖓᑕᔫᙳᐊᖑᓂᕐᒥᒃ, ᑎᑭᐅᑎᓚᐅᖅᓯᒪᔪᖅ ᐅᖓᑎᒐᓛᖓᓄᑦ 168 ᐃᑎᒐᑦ ᐅᐊᐃᑦᕼᐅᔅᒥ ᐅᑭᐅᖅᑕᖅᑐᒥ ᐱᙳᐊᕕᔾᔪᐊᑎᓪᓗᒋᑦ ᒃ ᐊᐅᓪᓚᕐᓯᒪᓗᓂ. ᔫᓯᐱ ᖃᐅᔨᒪᓂᕐᒥᓂᒃ ᐅᓂᒃᑳᖃᖃᑦᑕᕐᓯᒪᔪᖅ ᓄᓇᕗᑦ ᒐᕙᒪᒃᑯᖏᓐᓄᑦ ᐅᑭᐅᓂ ᐊᓂᒍᖅᑐᓂ ᐃᑲᔪᕐᑐᓂ ᐃᓕᓐᓂᐊᕈᑎᒃᓴᓕᐅᖅᑐᓂᒃ ᓄᓇᕗᖕ ᐃᓕᓐᓂᐊᕐᕕᓂ ᐃᓕᓴᔭᒃᓴᓂᒃ ᑐᙵᕕᖃᕐᑐᓂᒃ ᐃᓄᐃᑦ ᖃᐅᔨᒪᔭᖏᓐᓂᒃ, ᐃᓕᖅᑯᓯᖏᓐᓂᒃ, ᐊᒻᒪ ᐃᓅᓯᑦᑎᐊᕆᓐᓂᕐᒥᒃ.
-30-
ᑐᑭᓯᒋᐊᒃᑲᓐᓂᕈᓐᓇᕐᐳᑎᑦ ᐅᕗᖓ:
ᒪᓚᐃᔭ ᒥᑭᔾᔪᒃ
ᑐᑭᒧᐊᒃᑎᑦᑎᔨ ᑐᓴᐅᒪᖃᑦᑕᐅᑎᓕᕆᔨᒃᑯᑦ ᐃᓕᓴᔪᖅ
ᓄᓇᕗᑦ ᑐᙵᕕᒃ ᑎᒥᖓ
ᐅᖄᓚᐅᑖ: (867) 975-4900/ᐊᑭᓕᕆᐊᑐᙱᑦᑐᖅ: 1-888-646-0006
www.tunngavik.com
