1999-ᒥᓂᑦ ᐃᓅᔪᕐᓂᕐᓯᒪᒻᒪᑕ 15 ᓄᓇᕗᖕᒥ ᑲᒪᒋᔭᐅᔪᓪᓗᑎᒃ ᐸᓖᓯᒃᑯᓐᓄ/ᐳᕿᖅᑕᓕᓄᑦ, ᐊᒻᒪ ᑐᓴᕐᐸᑲᑦᑕ ᐃᓅᖃᑎᑦᑎᓐᓂᒃ ᑲᑉᐱᐊᒋᔭᖃᓐᓂᕋᖅᑐᓂᒃ ᐸᓖᓯᓂᒃ/ᐳᑭᖅᑕᓕᓂᒃ ᐊᒻᒪ ᓂᑲᒍᓱᙱᓗᐊᕐᑑᐊᓘᓪᓗᑎᒃ ᑲᒪᕙᒻᒪᑕ. ᓄᓇᕗᑦ ᑐᙵᕕᒃᑯᑦ ᐅᖃᐅᔾᔨᒋᐊᖅᐳᑦ ᓄᓇᕗᑦ ᒐᕙᒪᒃᑯᖏᓐᓂᒃ ᐊᒻᒪ ᐸᓖᓯᒃᑯᓐᓂᑦ/ᐳᕿᖅᑕᓕᓂᒃ ᐊᓯᔾᔨᖁᔨᓪᓗᑎᒃ ᓂᑲᒍᓱᒃᔫᒥᖁᔨᖔᓕᕐᑐᑎᒃ ᑲᒪᒍᓯᕐᒥᒍᑦ ᑲᒪᑦᑎᐊᓂᕐᓴᐅᓕᕐᓗᑎᒃ ᓄᓇᓕᖕᓂ ᐃᓅᓯᒋᑦᑎᐊᓂᕐᓴᐅᖁᓪᓗᒋᑦ ᐃᓗᖏᖅᓱᓇᕐᓂᖓᓂᒃ ᑐᑭᓯᓯᒪᓂᕐᓴᐅᓗᑎᒃ ᑲᒪᔾᔪᓯᕆᕙᒃᑕᖏᑦ.
ᐊᐃᒃᐱᐅᓚᐅᕐᑐᒥ ᐅᓪᓛᖓᓂ, ᐃᖅᑯᒻᒪᓚᐅᕋᑦᑕ ᐊᐅᓚᓲᒃᑯᑦ ᐊᔾᔨᓕᐅᕐᑕᐅᓯᒪᔪᒃ ᑕᑯᒃᓴᐅᑎᑕᒥᒃ ᖃᕆᓴᐅᔭᕋᓛᒃᑯᑦ ᐃᓅᖃᑎᒌᒍᑕᐅᕙᒃᑐᒃᑯᑦ ᑕᑯᓐᓇᕐᑐᒥᓂᐅᔪᖅ ᐸᓖᓯᒃᑯᓐᓂᑦ/ᐳᑭᖅᑕᓕᖕᓂᒃ ᓂᑲᒍᓱᙱᑎᐊᕐᑐᑎᒃ ᑎᒍᓯᑎᓪᓗᒋᑦ ᐃᓄᖕᒥ ᑭᙵᕐᓂ, ᓄᓇᕗᖕᒥ. ᑕᑯᕙᒃᑲᑦᑕ ᐊᒻᒪᓗ ᑐᓴᕐᕕᖃᖅᐸᒃᑐᑕ ᐃᓄᖕᓂᒃ, ᓂᖓᕐᓂᐅᕙᒃᑐᖅ ᓈᖕᒪᙱᒻᒪᑦ ᐊᒻᒪ ᑕᐃᒪᐃᑎᓪᓗᒍ ᖃᓄᖅᑑᕆᐊᕈᑕᐅᔭᕆᐊᖃᓕᖅᑐᖅ.
ᐋᖅᑭᒃᓯᒪᓂᖏᑦ ᑎᒥᐅᔫᑉ ᒪᓕᒐᓐᓂᒃ ᒪᓕᓐᓂᒃᑯᑦ ᑲᒪᔾᔪᑕᐅᑎᓪᓗᒍ ᐱᔪᓐᓇᐅᖃᖅᑎᑦᑎᓂᒃᑯᑦ (ᐃᖅᑲᖅᑐᐃᕕᓕᕆᓂᖅ) ᐱᓕᕆᔾᔪᑎᐅᓲᑦ ᐃᓚᐃᓐᓇᖏᓐᓂᒃ ᐋᖅᑭᒍᑕᐅᔪᓐᓇᕐᑐᓂᒃ ᑲᒪᔾᔪᓯᐅᖕᒪᑦ ᓈᖕᒪᖏᓕᕈᑕᐅᕙᒃᑐᓂ ᐊᒻᒪᓗ ᐱᓕᕐᓗᑎᓪᓚᕆᐅᕙᒃᑐᑦ ᐊᒻᒪ ᐊᓯᖏᑦᑎᒍᑦ ᐱᑦᑎᐊᖏᓐᓂᐅᕙᒃᑐᑦ ᑕᐃᒪᐃᓗᐊᕐᐳᑦ ᐱᑕᖃᙱᓗᐊᕐᓂᖓᓄᑦ ᐃᓅᓯᓕᕆᓂᒃᑯᑦ, ᑮᓇᐅᔾᔭᓴᓂᒃᑯ ᐊᒻᒪ ᐃᓕᖅᑯᓯᑐᖃᒃᑯᑦ ᐃᓱᐊᕈᑕᐅᔪᓐᓇᕐᑐᓂᒃ ᓄᓇᕗᖕᒥ ᐃᓄᖏᓐᓄᑦ.
ᓂᖓᐃᓐᓇᑐᖃᖅᐸᓕᕐᑎᓪᓗᒍ ᐊᒻᒪ ᐊᒥᓱᕈᖅᐸᓪᓕᐊᑐᐃᓐᓇᑎᓪᓗᒋᑦ ᓂᑲᒍᓱᙱᓗᐊᖅᑐᐊᓘᓂᕆᕙᒃᑕᖏᑦ ᐸᓖᓯᒃᑯᑦ/ᐳᑭᖅᑕᓕᒃᑯᑦ ᓇᓗᓇᙱᒍᑎᒋᓯᒪᒻᒪᒍᑦ ᐊᑕᐅᓯᐊᑐᐃᓐᓇᕐᓯᒪᔪᖃᙱᒻᒪ, ᐱᐅᓯᕆᔭᐅᓪᓗᓂ ᐱᔾᔪᑕᐅᔪᖅ ᐊᐅᓚᔾᔪᓯᖓᑦᑎᒍᑦ ᐃᖅᑲᖅᑐᐃᕕᓕᕆᓂᐅᑉ. ᓇᓗᓇᙱᑦᑎᐊᓕᖅᑐᖅ ᐊᑲᐃᓪᓕᐅᕈᑎᖃᖅᑐᒍᑦ ᐊᒻᒪ ᖃᐅᔨᒪᑐᐃᓐᓇᕆᐊᖃᕈᓐᓃᖅᑕᕗᑦ ᐊᓯᔾᔨᕆᐊᖅᑕᐅᔪᓐᓇᓂᐊᕐᒪᑦ. ᖃᐅᒪᓇᓱᔾᔫᒥᒋᐊᖃᓕᕐᑐᒍᑦ ᐃᓗᖏᖅᓱᓇᕐᓂᖓ ᑐᑭᓯᓯᒪᔭᐅᓂᒃᑯᑦ ᐊᐅᓚᔾᔪᓯᖃᓐᓂᐊᕐᒪᑕ ᑲᒪᑦᑎᐊᕆᐊᖃᓐᓂᕐᒥᒃ ᓄᓇᕗᖕᒥ, ᐱᖏᓐᓇᖏᑦᑐᒦᓐᓂᐊᕐᒪᑕ ᐃᓄᖏᑦ ᓄᓇᕗᖕᒥ, ᐸᓯᔭᒃᓴᐅᖏᒻᒪᑕ ᐃᒻᒥᒃᑯᑦ, ᐊᒃᓱᕈᖃᑦᑕᖅᑐᑦ ᐃᓅᓇᓱᐊᖅᑐᑎᒃ ᐃᓅᓯᖃᕐᕕᒋᓕᕐᑕᑎᓐᓂ. ᐅᓇ ᓯᕗᓪᓕᖅᐹᖅ ᐊᑐᓕᖁᔭᓕᐊᖑᓚᐅᕐᓯᒪᔪᖅ 2013-14−ᒥ ᖃᓄᐃᓕᖓᓕᕐᓂᖏᑦ ᐃᓄᐃᑦ ᐃᓕᖅᑯᓯᕐᒥᒍ ᐊᒻᒪ ᐃᓅᖃᑎᒌᓐᓂᕐᒥᒍ ᕿᒥᕐᕈᔭᐅᑎᓪᓗᒋᑦ ᐃᖅᑲᖅᑐᐃᕕᓕᕆᔨᒃᑯᑦ ᐊᐅᓚᔾᔪᓯᖏᑦᑎᒍᑦ ᓄᓇᕗᖕᒥ.
ᐊᒻᒪᓗᑦᑕᐅᖅ, ᔭᓐᓄᐊᕆ 1, 2020-ᒥᓂᑦ ᐊᑑᕚᒥ ᐸᓖᓯᒃᑯᑦ/ᐳᕿᖅᑕᓕᒃᑯᑦ ᖃᐅᔨᓴᕆᐊᖁᔭᐅᓯᒪᔪᑦ ᐸᓖᓯᒃᑯᓂᑦ/ᐳᑭᖅᑕᓕᓂᑦ ᖃᓄᐃᓕᐅᕆᔪᖃᖅᓯᒪᓂᖓᓄᑦ ᓄᓇᕗᖕᒥ ᑕᓪᓕᒪᐃᕋᒻᒪᕆᒃᑐᑎᒃ. ᓈᖕᒪᙱᑦᑎᐊᒻᒪᕆᒃᑐᖅ ᐸᓖᓯᒃᑯᑦ/ᐳᑭᖅᑕᓕᒃᑯᑦ ᓇᖕᒥᓂᖅ ᖃᐅᔨᓴᕐᐸᓐᓂᖏᑦ ᐃᖕᒥᓂᒃ. ᓄᓇᕗᑦ ᑐᙵᕕᒃᑯᑦ ᑎᒥᖓ ᐃᑲᔪᕐᓱᐃᕗᑦ ᓴᖅᑮᖁᔨᔾᔪᑕᐅᔪᒥᒃ ᐃᒻᒥᑰᖓᔪᓂᒃ, ᐱᐅᓯᐅᕙᙱᑦᑐᒥᒃ ᐅᔾᔨᑐᖅᑎᑕᖃᕆᐊᖃᓐᓂᖓᓂᒃ.
ᐃᓄᐃᑦ ᐃᓅᓯᖃᕆᐊᖃᕐᒪᑕ ᐱᑦᑎᐊᕐᑕᐅᓗᑎᒃ.
