ᓄᓇᕗᑦ ᑐᙵᕕᒃᑯᑦ 2018-2019−ᒥ ᑮᓇᐅᔭᓕᕆᓂᕐᒧᑦ ᐊᕐᕌᒍᖓᓂ ᐱᒻᒪᕆᐅᓚᐅᕐᒪᑦ ᑮᓇᐅᔭᑦ ᐱᓪᓗᒋᑦ. ᐊᑯᓂᐊᓗᑦ ᐊᑭᓕᒃᓴᕆᔭᐅᖓᔪᑦ ᓄᓇᕗᑦ ᐸᐸᑦᑎᔨᒃᑯᓐᓄᑦ ᐊᑭᓕᕐᑕᐅᔭᕇᓚᐅᕐᒪᑦ ᐊᒻᒪᓗ ᑮᓇᐅᔭᓂᒃ ᐊᑐᙱᓗᐊᕐᓯᒪᔪᓂᒃ ᐊᒥᐊᒃᑯᖃᕐᒪᑕ $27,275,520.
“ᑖᒃᓱᒪ ᐊᑭᓕᖅᑕᐅᔭᕆᕈᓐᓇᕐᓂᖓ ᑲᑐᔾᔭᐅᓯᒪᒻᒪᑦ ᓄᓇᕗᑦ ᐸᐸᑦᑎᔨᒃᑯᓐᓄᑦ, ᓄᓇᕗᑦ ᑐᙵᕕᒃᑯᓐᓄᑦ ᐊᒻᒪᓗ ᐱᖓᓱᐃᓄᑦ ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓄᑦ,” ᐅᖃᖅᑐᖅ ᐊᖓᔪᖅᑳᖓᑦ ᓄᓇᕗᑦ ᑐᙵᕕᒃᑯᑦ ᐊᓗᑭ ᑰᑦᑎᖅ. “ᑲᑎᒪᔨᐅᖃᑕᐅᔪᑦ ᐃᓱᒪᓕᐅᖅᑲᐅᕗᑦ ᐅᓪᓗᒥ ᑖᒃᑯᐊ ᑮᓇᐅᔭᑦ ᓴᓂᕐᕙᕐᑕᐅᕗᑦ ᒪᕐᕈᐃᓕᖓᓂᐊᕐᓗᑎᒃ. ᐃᓄᐃᑦ ᓇᑉᐸᖏᓐᓂᒃ ᑮᓇᐅᔭᑦ ᓄᓇᕗᑦ ᑐᙵᕕᒃᑯᑦ ᐸᕐᓇᒍᑎᒋᓯᒪᔭᖏᓐᓄᑦ ᓯᕗᓪᓕᖅᐹᖑᑎᑕᖏᓐᓄᑦ, ᐊᕝᕙᖏᑦ ᓯᕗᓂᕐᒥ ᐊᑭᓕᒃᓴᓂᑦᑕᐃᓕᔾᔪᑎᒋᔪᓐᓇᕐᓂᐊᓕᕐᑐᑎᒍ ᐋᖅᑭᒃᓯᓗᑎᒃ ᐊᐅᓚᑦᑎᔾᔪᑎᓄᑦ ᑮᓇᐅᔭᖃᕈᑎᓂᒃ.”
ᓄᓇᕗᑦ ᑐᙵᕕᒃᑯᑦ ᓂᕆᐅᑦᑖᕆᔭᑦ ᐸᕐᓇᒍᑎᖏᑦ ᓯᕗᓪᓕᖅᐹᖑᑎᑕ ᐅᑯᐊᖑᕗᑦ ᐃᓄᐃᑦ ᐃᖅᑲᓇᐃᔭᕐᑎᑕᐅᓂᖏᑦ, ᓄᓇᕗᖕᒥ ᐃᓕᓐᓂᐊᕐᓂᓕᕆᔾᔪᓯᖅ ᐊᑑᑎᖃᖅᑎᑦᑎᔪᒥᒃ ᐃᓄᐃᑦ ᐃᓕᖅᑯᓯᖏᓐᓂᒃ, ᐃᓄᒃᑐᑦ ᓯᕗᓪᓕᐅᓗᓂ ᐅᖃᐅᓯ ᐊᑑᑎᖃᖅᑎᑕᐅᖁᓪᓗᒍ ᓄᓇᕗᖕᒥ, ᐊᑭᑐᔪᑦ ᐊᖃᕐᕆᔾᔪᑎᑦ ᐃᓚᑰᓗᐊᕐᓂᖏᓐᓄᑦ ᐊᒻᒪ ᐊᑐᑎᓕᖅᑎᑕᐅᓗᓂ ᐃᓛᒃᑯᖓᔪᖅ 32.
ᓇᓗᓇᖏᑐᓂᒃ ᐊᒻᒪᓗ ᑲᒪᒋᔭᖃᑦᑎᐊᕐᓗᑎᒃ ᓄᓇᕗᖕᒥᐅᑦ ᐃᓄᐃᑦ ᐱᖁᑎᖏᓐᓂᒃ ᐃᓄᐃᑦ ᑲᑐᔾᔨᖏᖃᑎᒌᖏᓐᓄᑦ ᓴᖅᑮᔪᓐᓇᕈᑕᐅᓂᐊᕐᒪᑕ ᐱᓕᕆᔾᔪᑎᓂᒃ ᐊᒻᒪ ᐱᔨᑦᑎᕈᑎᓂᒃ ᓄᓇᕗᖕᒥᐅᓄᑦ ᓄᓇᐃᑦ ᐊᕕᒃᑐᕐᓯᒪᓂᖏᑦᑎᒍᑦ, ᓄᓇᕗᑦ ᑐᙵᕕᒃᑯᓪᓕ ᑲᒪᒋᔭᖃᓐᓂᐊᑎᓪᓗᒋᑦ ᐊᐅᓚᑦᑎᔾᔪᑎᒥᓂᒃ ᐸᕐᓇᓂᕐᒧᑦ, ᓂᐱᖃᖅᑎᒋᔭᐅᓗᑎᒃ ᐊᒻᒪᓗ ᐅᔾᔨᑐᖅᑎᐅᓗᑎᒃ ᓴᖅᑭᒃᑐᓂᒃ.
ᐊᐅᓚᑦᑎᔾᔪᑎᓄᒃ ᑮᓇᐅᔭᖃᕈᑏᑦ ᐃᑲᔪᓐᓂᖃᓐᓂᐊᕐᐳᑦ ᐃᓄᐃᑦ ᑎᒥᖁᑎᖏᓐᓄᑦ ᖃᓂᕐᓂᕐᓴᒧᑦ ᐊᕐᕌᒍᑕᒫᑦ ᑮᓇᐅᔭᕐᑖᕈᑎᒋᕙᒃᑕᖏᓐᓄᑦ, ᑕᐃᒪᓐᓇᓗ ᑮᓇᐅᔭᖃᓐᓂᕐᓴᐅᓂᐊᕐᑐᑎᑦ ᓄᓇᕗᑦ ᐸᐸᑦᑎᔾᔨᒃᑯᑦ ᑮᓇᐅᔭᓕᐅᒃᑲᓐᓂᕐᑎᑕᒥᓄᒃ. ᑰᑦᑎᖅ ᖁᔭᓕᖅᑲᐅᒻᒥᔪᖅ, “ᖁᔭᓐᓇᒦᒃ ᓄᓇᕗᑦ ᐸᐸᑦᑎᔨᒃᑯᑦ, ᐃᓄᐃᓪᓗ ᑲᑐᔾᔨᖃᑎᒌᖏᑦ ᐊᒻᒪᓗ ᑕᒪᐃᑕ ᐃᖅᑲᓇᐃᔭᕐᓯᒪᔾᔪᐊᕐᑐᑦ ᐅᓪᓗᒥᒧᑦ ᑎᑭᐅᑎᔾᔪᑎᒋᔭᕗᑦ.”
ᐊᑯᓂᐅᔪᒧᑦ−ᐊᑐᖅᑐᐊᕈᑎ
ᐱᓕᕆᐊᖑᓯᒪᓂᖓ
ᓄᓇᕗᑦ ᐊᖏᕈᑎᖓ ᐊᑎᓕᐅᖅᑕᐅᒻᒪᑦ, ᐊᕕᑦᑐᕐᓯᒪᓂᖓ 29 ᐋᖅᑭᑦᓯᒪᓂᖃᓚᐅᖅᑐᖅ ᐋᖅᑭᓱᕐᓯᒪᔭᖏᓐᓄᑦ ᑲᓇᑕ ᒐᕙᒪᒃᑯᑦ ᐊᑭᓕᕐᓲᑎᒃᓴᖏᓐᓂᒃ ᓄᓇᕗᑦ ᐸᐸᑦᑎᔨᒃᑯᑦ ᐊᑯᓐᓂᖓᓂ 1993 ᐊᒻᒪᓗ 2007. ᐸᐸᑦᑎᔨᒃᑯᓐᓂᒃ ᑲᒪᒋᔭᒃᓴᖏᑦ ᑮᓇᐅᔭᓕᐅᕋᓱᐊᕐᓂᕐᒧᑦ ᑖᒃᑯᓂᖓ ᑮᓇᐅᔭᓕᑕᐅᒍᑎᒥᓂᒃ, ᑮᓇᐅᔭᖃᖁᓪᓗᒋᑦ ᓄᓇᕗᑦ ᑐᓐᖓᕕᒃ ᑎᒥᖓ (ᑐᓐᖓᕕᒃ) ᐊᒻᒪᓗ ᓴᐳᔾᔭᐅᓯᒪᒍᑎᒃᓴᖏᓐᓂᒃ ᐊᑭᑐᔫᑎᑦ. ᐱᒋᐊᕐᓂᖓᓂ, ᐸᐸᑦᑎᔨᒃᑯᑦ ᑮᓇᐅᔭᓕᐅᓗᐊᓚᐅᓐᖏᑦᑐᑦ ᑮᓇᐅᔭᓖᒍᑎᒃᓴᓂᒃ ᐊᐅᓚᔾᔪᑎᓕᒫᖏᓐᓄᑦ ᑐᓐᖓᕕᒃᑯᑦ, ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᑐᖅᑏᑦ (IHT), ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ (ᕿᑭᖅᑕᓂ), ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᑦ (KIA) ᐊᒻᒪᓗ ᑭᕙᓪᓕᖅ ᐃᓄᐃᑦ ᑲᑐᔾᔨᖃᑎᒌᑦ (KIA).
ᓄᓇᕗᑦ ᐸᐸᑦᑎᔨᒃᑯᑦ, ᑐᓐᖓᕕᒃᑯᑦ ᐊᒻᒪᓗ ᐊᕕᑦᑐᕐᓯᒪᓃᑦ ᐃᓄᐃᑦ ᑲᑐᔾᔨᖃᑎᒌᑦ (RIA) ᐊᖏᖃᑎᒌᓚᐅᖅᑐᑦ ᑐᓐᖓᕕᒃᑯᑦ ᐊᑐᖅᑐᐊᓚᐅᐱᓪᓚᓂᐊᕐᓂᖏᓐᓂᒃ ᐸᐸᑦᑎᔨᒃᑯᓐᓂᒃ ᐊᑭᑐᔫᑎᓄᑦ ᐱᒋᐊᓕᓵᖅᑎᓪᓗᒋᑦ ᐊᕐᕌᒍᓂ. ᑖᓐᓇ ᑕᐃᔭᐅᔪᖅ ᐊᑯᓂᐅᔪᒧᑦ−ᐊᑐᖅᑐᐊᕈᑎ.
ᐃᓚᖏᓐᓂ ᐊᕐᕌᒍᓂ, ᐸᐸᑦᑎᔨᒃᑯᑦ ᑮᓇᐅᔭᓕᐅᖃᑦᑕᖅᑐᑦ ᐅᖓᑖᓄᑦ ᓂᕆᐅᒋᔭᐅᓚᐅᖅᑐᑦ, ᐅᑉᕙᓗᓐᓃᑦ ᐃᓄᐃᑦ ᑲᑐᔾᔨᖃᑎᒌᑦ ᑐᒃᓯᕋᖃᑦᑕᕐᓯᒪᔪᑦ ᒥᑦᓯᑎᓐᓄᑦ ᑐᓂᐅᖅᑲᖅᑕᐅᖃᑦᑕᖅᑐᑦ. ᑕᐃᒃᑯᓇᓂ ᐊᕐᕌᒍᓂ, ᑮᓇᐅᔭᓕᐊᒃᑲᓐᓂᐅᔪᑦ ᐊᑐᖅᑕᐅᖃᑦᑕᖅᑐᑦ ᐊᑭᓕᕐᓲᑕᐅᓪᓗᑎᒃ ᐊᑯᓂᐅᔪᒧᑦ ᐊᑐᖅᑐᐊᖅᑕᐅᓯᒪᔪᒧᑦ. ᐊᓯᖏᓐᓂ ᐊᕐᕌᒍᓂ, ᐸᐸᑦᑎᔨᒃᑯᑦ ᑮᓇᐅᔭᓕᐅᖃᑦᑕᖅᑐᑦ ᒥᑦᓯᑎᓐᓄᑦ ᓂᕆᐅᒋᔭᐅᓚᐅᖅᑐᓂᒃ, ᐅᑉᕙᓘᓐᓃᑦ ᐃᓄᐃᑦ ᑲᑐᔾᔨᖃᑎᒌᑦ ᑐᒃᓯᕋᖃᑦᑕᖅᑐᑦ ᐅᖓᑖᓄᑦ ᑐᓂᐅᖅᑲᖅᑕᐅᖃᑦᑕᖅᑐᑦ ᐊᒻᒪᓗ ᐊᑯᓂᐅᔪᒧᑦ−ᐊᑐᖅᑐᐊᕈᑏᑦ ᐅᓄᕐᓯᒋᐊᖃᑦᑕᕐᓯᒪᔪᑦ. ᐊᒥᓱᒐᓚᓐᓂ ᐊᕐᕌᒍᓂ ᑮᓇᐅᔭᖅᑑᑎᒃᓴᓂᒃ ᑐᒃᓯᕋᐅᑏᑦ ᐅᓄᕐᓂᕐᓴᐅᓚᐅᖅᑐᑦ ᑐᓂᐅᖅᑲᖅᑕᐅᖃᑦᑕᖅᑐᓂᒃ ᐊᒻᒪᓗ ᐊᑯᓂᐅᔪᒧᑦ−ᐊᑐᖅᑐᐊᕈᑏᑦ ᐅᓄᕐᓯᑲᓐᓂᖅᑐᑎᒃ $119,046,268 2005-ᒥ.
ᑕᐃᒪᓐᖓᓂᒃ, ᓄᓇᕗᒻᒥ ᐸᐸᑦᑎᔨᒃᑯᑦ ᐋᖅᑭᒋᐊᕐᓯᓕᓚᐅᖅᑐᑦ ᑮᓇᐅᔭᓕᐅᕋᓱᐊᕈᑎᓄᑦ ᑐᑭᒧᐊᒍᑎᒃᓴᒥᓂᒃ ᐊᐅᓚᓗᐊᓐᖏᔾᔫᒥᔾᔪᑎᒃᓴᖏᓐᓂᒃ ᑮᓇᐅᔭᓕᐊᖏᑦ.
ᑐᓐᖓᕕᒃᑯᑦ ᑲᑎᒪᔨᖏᑦ ᐱᓕᕆᒋᐊᖃᑦᑕᕐᓯᒪᒻᒥᔪᑦ ᐊᐅᓚᑦᓯᑦᓯᐊᕈᑎᒃᓴᒥᓄᑦ ᑮᓇᐅᔭᖁᑎᒥᓂᒃ. ᒫᓐᓇ, ᐃᓄᐃᑦ ᑲᑐᔾᔨᖃᑎᒌᑦ ᑐᓂᔭᐅᖃᑦᑕᖅᑐᑦ ᒫᓐᓇᐃᓇᕐᒧᑦ−ᐋᖅᑭᑦᓯᒪᔪᓂᒃ ᓯᕗᕐᖓᓂ ᑐᓂᔭᐅᔪᓂᒃ ᓄᓇᕗᒻᒥ ᐸᐸᑦᑎᔨᒃᑯᓐᓂᒃ ᐊᕐᕌᒍᑕᒫᕐᓯᐅᑎᓄᑦ ᐊᐅᓚᔾᔪᑎᒃᓴᖏᓐᓂᒃ. ᓈᓴᐅᑖ 2 ᓇᓗᓇᐃᔭᕐᓯᒪᔾᔪᑕᐅᔪᖅ ᑭᒡᓕᓕᐊᖑᓯᒪᔪᒥᒃ. ᓯᕗᕐᖓᓂ ᑐᓂᔭᐅᔪᑦ ᒥᑦᓴᐅᓴᑦᑕᐅᓯᒪᓪᓗᑎᒃ 4% ᑮᓇᐅᔭᖁᑎᒻᒪᕆᖏᓐᓄᑦ ᐸᐸᑦᑎᔨᒃᑯᑦ ᐱᖁᑎᖏᓐᓄᑦ. ᑕᑉᕙᓐᖓᑦ ᐅᓄᕐᓂᖓᓂᒃ, ᑲᑎᒪᔩᑦ ᓴᓂᕐᕙᐃᖃᑦᑕᖅᑐᑦ 5%−ᖏᓐᓅᖓᔪᓂᒃ ᐊᕐᕌᒎᑕᒫᑦ ᐊᑭᓖᕙᓪᓕᐊᒍᑎᒃᓴᒥᓂᒃ ᐊᑯᓂᐅᔪᒧᑦ−ᐊᑐᖅᑐᐊᕐᓯᒪᔭᒥᓂᒃ.
ᑖᒃᑯᓇᓐᖓᑦ ᑲᑎᓯᒪᔪᓂᒃ ᐱᔾᔪᑎᓪᓗᐊᑕᐅᓪᓗᑎᒃ, ᑮᓇᐅᔭᓕᕆᓐᓇᖓᓂ 2018-2019 ᑕᑯᒍᑕᐅᓚᐅᖅᑐᖅ ᐊᑯᓂᐅᔪᒧᑦ−ᐊᑐᖅᑐᐊᕈᑎ ᐊᑭᓕᖅᑕᐅᓯᒪᓕᕐᓂᖓᓂᒃ ᐊᒻᒪᓗ ᐊᒥᐊᒃᑯᖏᑦ ᐊᐅᓚᒍᑕᐅᓕᖅᑐᑎᒃ.
ᑐᑭᓯᒋᐊᒃᑲᓂᕐᕕᒃᓴᖅ
ᒪᓚᐃᔭ ᒥᑭᔾᔪᒃ
ᑐᑭᒧᐊᒃᑎᑦᑎᔨᐅᑉ ᐃᑲᔪᖅᑎᖓ
ᓄᓇᕗᑦ ᑐᓐᖓᕕᒃ ᑎᒥᖓ
ᐅᖄᓚᐅᑖ: 867-975-4907
www.tunngavik.com
