ᓄᓇᕗᑦ ᐃᓄᐃᑦ ᐃᓚᐅᑎᑕᐅᓐᖏᑦᑐᑦ ᑲᓇᑕᒥ ᐊᑯᓐᓂᖓᓃᑦᑐᓄᑦ ᖃᐅᔨᒪᔭᐅᓂᖏᑎᒍᑦ

ᐃᕐᖐᓐᓇᖅ ᓴᖅᑭᖅᑕᐅᔭᕆᐊᓕᒃ

ᓄᓇᕗᑦ ᐃᓄᐃᑦ ᐃᓚᐅᑎᑕᐅᓐᖏᑦᑐᑦ ᑲᓇᑕᒥ ᐊᑯᓐᓂᖓᓃᑦᑐᓄᑦ ᖃᐅᔨᒪᔭᐅᓂᖏᑎᒍᑦ

(ᒫᑦᓯ 20, 2019 ᓴᓪᓖᑦ, ᓄᓇᕗᑦ) ᓄᓇᕗᑦ ᑐᓐᖓᕕᒃ ᑎᒥᖓ (ᑐᓐᖓᕕᒃ) ᓂᕆᐅᒋᔭᖃᕐᒪᑦ ᐃᓚᐅᑎᑕᐅᑦᓯᐊᓂᕐᒥᒃ ᐱᑎᑕᐅᖃᑕᐅᓂᕐᒥᓪᓗ 2019 ᒐᕙᒪᑐᖃᒃᑯᑦ ᑮᓇᐅᔭᖅᑑᑎᒃᓴᓂᒃ ᓇᓗᓇᐃᔭᓚᐅᖅᑕᖏᓐᓂᒃ.

“ᐋᖅᑭᒃᓯᒪᓪᓚᕆᒃᑐᓂᒃ ᑲᓇᑕᒥ ᒪᑭᑉᐸᓪᓕᐊᖃᑕᐅᒍᑎᒃᓴᖏᓐᓂᒃ ᐱᑕᖃᕆᐊᖃᓪᓚᕆᖕᒪᑕ ᓄᓇᕗᒥ ᐱᐅᓯᕚᓪᓕᖁᓪᓗᒋᑦ ᐃᓄᐃᑦ ᐃᓄᓯᖏᑦ ᐊᒻᒪᓗ ᑎᑭᐅᑎᒍᓐᓇᕈᑎᒃᓴᓂᒃ ᓇᓕᒧᒌᑦᑎᑕᐅᒋᐊᖃᕐᓂᖏᓐᓂᒃ ᓄᓇᕗᒻᒥ ᐃᓄᐃᑦ ᐊᓯᖏᓐᓄᑦ ᑲᓇᑕᒥᐅᓄᑦ,”  ᐅᖃᖅᑐᖅ ᓄᓇᕗᑦ ᑐᓐᖓᕕᒃ ᑎᒥᖓᑕ ᐊᖓᔪᖅᑳᖓᑦ ᐊᓗᑭ ᑰᑦᑎᖅ.

ᓇᓗᓇᐃᕐᓯᒪᔪᓂᒃ ᐱᖁᑎᕐᔪᐊᑖᕈᑎᒃᓴᖅᑕᖃᒃᑲᓐᓂᕆᐊᓕᒃ. ᓄᓇᕗᒻᒥ ᐃᓄᐃᑦ ᓯᕗᓕᖅᑎᖏᑦ ᓂᕆᐅᒋᓚᐅᕐᒪᒋᑦ ᐊᑐᕋᑦᓴᑖᖅᑎᑕᐅᓂᐊᕐᓂᕐᒥᓂᒃ ᐱᖁᑎᕐᔪᐊᕆᔭᐅᒋᐊᓕᓐᓄᑦ ᐱᓕᕆᐊᒃᓴᑎᒍᑦ ᓲᕐᓗ ᒍᕇᔅ ᐸᐃ ᑐᓚᑦᑕᕕᒃᓴᓕᐅᕐᓂᕐᒧᑦ ᐊᖅᑯᑎᓕᐅᕐᓂᒧᓪᓗ, ᑖᒃᑯᐊ ᑭᕙᓪᓕᕐᒥ ᐆᒻᒪᖅᑯᑎᓕᕆᔩᑦ ᐆᒃᑳᓕᕆᔨᒃᑯᑦ−ᐊᓕᒎᔭᓂᒃ (Hydro-Fibre Link), ᐱᑕᖃᕆᐊᖃᕐᓚᕆᒃᑐᖅ ᑕᕆᐅᒃᑯᒃ ᐱᖁᑎᕐᔪᐊᖑᒋᐊᓖᑦ ᐊᑕᓂᖃᖅᑐᑦ ᑕᓪᓗᕈᑎᐅᑉ ᐃᒪᖓᓂ ᓴᐳᔾᔭᐅᓯᒪᓂᖓᓄᑦ ᐊᒻᒪᓗ ᓄᓇᕗᒥ ᐃᑦᑕᕐᓂᓴᕐᕕᑖᕐᓂᖅ.

ᑲᓇᑕᓕᒫᒥ ᑮᓇᐅᔭᖅᑐᑎᒃᓴᑦ 2019 ᐊᖏᔪᑲᓪᓚᖕᒥᑦ ᑮᓇᐅᔭᐃᕈᑕᐅᓂᐊᖅᑐᖅ ᐃᒡᓗᓕᕆᓂᕐᒧᑦ, ᑭᓯᐊᓂ ᑕᒪᒃᑯᐊ ᐃᓄᐃᑦ ᐃᒡᓗᑭᓴᕐᓂᕐᒧᑦ ᐊᒃᓱᕈᖅᑐᑦ ᓄᓇᕗᒥ ᓱᓕ ᑕᒪᓐᓇ ᐅᖃᐅᓯᐅᓯᒪᓐᖏᑦᑕᖅ.  ᐃᒡᓗᑭᒃᓴᕐᓂᖅ ᐋᓐᓂᐊᓕᕈᑕᐅᕙᖕᒪᑦ ᐊᒻᒪ ᐊᑕᓂᖃᖅᑐᓂ ᑲᔪᓯᓯᒪᓂᖓᓄᑦ ᐳᕙᒡᓗᖕᓂᖅ, ᐃᓱᒪᒃᑯᑦ ᐋᓐᓂᐊᖃᕐᓂᖅ, ᐃᓕᓐᓂᐊᑦᓯᐊᕈᑕᐅᓐᖏᑦᑐᑦ ᓴᖅᑭᑎᑕᐅᔪᑦ ᐊᒻᒪ ᐋᓐᓂᖅᑎᕆᖃᑦᑕᕐᓂᕐᒧᓪᓗ.

ᑕᒡᕙᓂ ᑮᓇᐅᔭᖅᑑᑎᒃᓴᓂ, ᒐᕙᒪᑐᖃᒃᑯᑦ ᓴᓐᖏᒃᑎᑉᐹᓪᓕᖅᓯᔪᑦ ᑮᓇᐅᔭᖅᑑᑎᒃᓴᖏᓐᓂᒃ, ᐅᓄᓐᖏᓐᓂᖅᓴᑦ ᐅᖃᐅᓯᓕᕆᔾᔪᑎᖏᑦ ᖃᓪᓗᓈᑐᑦ ᐊᒻᒪ ᐅᐃᕖᑎᑐᑦ, ᑭᓯᐊᓂ  ᑮᓇᐅᔭᖃᖅᑎᑦᓯᖏᑦᑐᑦ ᓇᓕᒨᒌᓕᕈᑕᐅᔪᒃᓴᓂᒃ ᓄᓇᖃᖅᑳᖅᓯᒪᔪᑦ ᐅᖃᐅᓯᓕᕆᓂᖏᓐᓄᑦ.  ᓄᓇᕗᑦ ᑐᓐᖓᕕᒃᑯᑦ ᕿᓂᖅᑐᑦ ᐃᓕᑕᕆᔭᐅᔪᒪᓪᓗᑎᒃ ᑕᒪᓐᓇ ᐃᓄᒃᑐᑦ ᐅᓄᓐᖏᓐᓂᖅᓴᓄᑦ ᐅᖃᐅᓯᐅᔪᖅ ᓄᓇᕗᒻᒥ ᐊᒻᒪᓗ ᐅᖃᐅᓯᐅᒋᐊᓕᒃ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᓐᓄᑦ, ᐃᓚᐅᓗᑎᒃ ᐃᓕᓐᓂᐊᕐᓂᖅ, ᒪᓕᒐᓕᕆᓂᖅ ᐊᒻᒪ ᐋᓐᓂᐊᖃᕐᓇᖏᑦᑐᓕᕆᓂᖅ.

ᐊᖏᓂᖅᓴᕈᕐᓗᒍ ᐊᑐᕈᓐᓇᕐᓂᖅ ᓱᑲᔪᓂᒃ ᖃᕆᓴᐅᔭᒃᑰᕈᑎᓂᒃ ᐱᑕᖃᕆᐊᖃᒻᒪᕆᒃᑐᖅ ᓄᓇᕗᒥ ᑖᒃᑯᐊ ᐃᓘᓐᓇᑎᒃ 25 c ᓄᓇᓕᐅᔪᑦ ᑐᖔᓃᑦᑐᑦ 10mbps ᓱᒃᑲᐃᓐᓂᖓ. ᓱᑲᔪᓂᒃ ᖃᕆᓴᐅᔭᒃᑰᕈᑎᖃᕐᓂᖅ ᐊᔪᕈᓐᓃᕈᑕᐅᓇᔭᖅᑐᖅ ᖃᕆᓴᐅᔭᒃᑯᑦ ᐃᓕᓐᓂᐊᓂᕐᒧᑦ, ᖃᕆᓴᐅᔭᒃᑯᑦ ᐅᖃᖃᑎᒌᒍᓐᓇᕐᓂᕐᒧᑦ ᐊᒻᒪᓗ ᐱᕙᓪᓕᐊᒍᑎᒃᓴᓂᒃ ᒪᑭᑉᐸᓪᓕᐊᒍᑎᒃᓴᓂᒃ.

ᑐᓐᖓᕕᒃᑯᑦ ᖁᕕᐊᓱᒃᑐᖅ ᐊᖏᕈᑕᐅᓯᒪᓪᓗᓂ ᐋᖅᑭᒍᑎᒃᓴᓂᒃ ᐅᐃᕆᓇᖅᑐᓄᑦ ᐊᔪᓕᕐᓯᒪᔪᓄᑦ ᐊᒻᒪᓗ ᖁᐊᕐᓵᓇᖅᑐᒃᑰᕐᓯᒪᔪᓪᓗ ᒪᒥᓴᕐᕕᒃᓴᖓᓂᒃ ᓄᓇᕗᒥ ᓴᖅᑭᖅᑕᐅᓗᓂ ᐅᑕᖅᑭᔭᐅᓲᔭᕐᓯᒪᔪᖅ ᒪᒥᓴᕐᕕᒃᓴᒃ.

ᑐᓐᖓᕕᒃᑯᑦ ᐊᔭᐅᖅᑐᐃᔪᑦ ᐊᑐᕋᑦᓴᓕᐅᕈᑕᐅᒋᐊᓐᖓᕐᓚᐅᖅᑐᓂᒃ ᑮᓇᐅᔭᓕᑕᐅᓂᖏᓐᓄᑦ ᐃᓄᖕᓄ−ᓯᕗᒃᑲᑕᖅᑕᐅᓗᑎᒃ ᖁᑦᓯᖕᓂᖅᓴᓂ ᐃᓕᓐᓂᐊᕐᓂᕐᒧᑦ ᐸᕐᓇᐅᑎᓂᒃ.  ᑕᒪᓐᓇ ᑮᓇᐅᔭᐃᕈᑎᖃᕐᓂᖅ ᒪᓕᒃᑐᖅ ᓇᓗᓇᐃᖅᑕᐅᓯᒪᔪᓂᒃ ᐃᓄᐃᑦ ᐃᖅᑲᓇᐃᔭᕈᑎᒃᓴᖏᓐᓂᒃ ᐊᒻᒪ ᓈᒪᔪᓂᒃ ᐊᑐᖅᑎᑕᐅᓂᖓᓄᑦ ᐃᓛᒃᑯᑦ 23 ᓄᓇᕗᑦ ᐊᖏᕈᑎᖏᓐᓂ.

“ᖁᔭᒌᓐᓇᑕᒃᑲ ᐃᓄᓐᓅᖓᔪᓂᒃ ᑮᓇᐅᔭᖃᖅᑎᑦᓯᓂᐅᕙᑦᑐᑦ,” ᐅᖃᖅᑐᖅ ᑰᑦᑎᖅ. “25-ᓂᒃ ᐊᕐᕌᒍᓂᒃ ᓄᓇᕗᑦ ᐊᖏᕈᑎᖏᑦ ᐊᑎᓕᐅᖅᑕᐅᓚᐅᕐᒪᑕᓂᒃ, ᑕᑯᓐᓇᕋᑦᑎᒍ ᐱᕙᓪᓕᐊᑐᐃᓐᓇᕐᓂᖓᓂᒃ ᐊᔾᔨᒌᓐᖏᑎᑕᐅᓂᖏᑦ ᐃᓄᐃᑦ ᐊᒻᒪᓗ ᐃᓄᓐᓃᖔᓐᖏᑦᑐᑦ, ᓱᖅᑯᐃᕐᓯᒍᑕᐅᔪᖅ ᓄᓇᕗᑦ ᒐᕙᒪᒃᑯᖏᑦ ᑲᔪᓯᑎᑦᓯᖏᓐᓂᖏᓐᓂᒃ ᐃᓄᓂᒃ ᐃᖅᑲᓇᐃᔭᖅᑎᑖᖃᑦᑕᖏᓐᓂᖏᓐᓂᒃ ᓇᓗᓇᐃᕈᑕᐅᔪᖅ ᐊᑐᐊᒐᑦ ᐃᑲᔫᑎᖃᒻᒪᕆᑦᑐᑦ ᐃᓄᓐᓃᖓᓐᖏᑦᑐᓂᒃ ᐃᓅᓴᓐᓂᕐᓴᓂᒃ ᐃᓄᖏᓐᓂᒃ ᐃᑲᔫᖃᕐᓂᕐᓴᒻᒪᕆᐅᕙᑦᑐᖅ. ᐃᓄᓐᓅᖓᔪᑦ ᑮᓇᐅᔭᐃᕈᑎᒃᓴᑦ ᐊᐅᓚᑦᓯᒍᑕᐅᒍᓐᓇᕐᓯᖃᑦᑕᖅᑐᑦ ᐱᓕᕆᐊᒃᓴᓂᒃ ᐃᓄᐃᑦ ᑲᑐᔾᔨᖃᑎᒌᖏᑎᒍᑦ ᐊᒻᒪᓗ ᐱᓇᓱᐊᖃᑎᑦᑎᓐᓄᑦ.”

ᑮᓇᐅᔭᖅᑑᑎᒃᓴᓂᒃ ᑐᓴᖅᑎᑦᓯᓂᐅᔪᒦᓚᐅᖅᑐᑦ ᓄᓇᕗᑦ ᑐᙵᕕᒃᑯᑦ ᐊᖓᔪᖅᑳᖓᑦ ᐊᓗᑭ ᑰᑦᑎᖅ, ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᑕ ᐊᖓᔪᖅᑳᖓᑦ ᓯᑖᓐᓂᓕ ᐊᓇᑉᓚᒃ, ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᖏᑕ ᐊᖓᔪᖅᑳᖓᑦ ᑕᐃᕙᑦ ᓂᖏᐅᙵᓐ ᐊᒻᒪ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᐊᖓᔪᖅᑳᖓᑦ ᐱᔭᐃ ᐊᕿᐊᕈᖅ.

Download (PDF, 67KB)

ᑐᑭᓯᒋᐊᒃᑲᓂᕐᕕᒃᓴᖅ:

ᕗᕌᓐᑯ ᐳᓯᒥ

ᑐᑭᒧᐊᒃᑎᑦᑎᔨᐅᓚᐅᐱᓪᓚᑦᑐᖅ ᑐᓴᒪᐅᔾᔪᑎᓕᕆᓂᕐᒧᑦ

ᓄᓇᕗᑦ ᑐᓐᖓᕕᒃ ᑎᒥᖓ

ᐅᖄᓚᐅᑖ: (867) 975-4914

ᐊᑭᖃᓐᖏᑦᑐᖅ: 1-888-646-0006

www.tunngavik.com