ᐃᓅᓯᓕᕆᓂᕐᒧᑦ ᐊᑐᐊᒐᕐᓂᒃ ᕿᒥᕐᕈᔨ
ᐃᓅᓯᓕᕆᔨᒃᑯᑦ ᐃᓕᖅᑯᓯᓕᕆᔨᒃᑯᓪᓗ ᐱᓕᕆᕝᕕᐊ
ᓄᓇᕗᑦ ᑐᙵᕕᒃ ᑎᒥᖓ
ᐃᖃᓗᐃᑦ, ᑲᖏᕐᖠᓂᖅ ᐅᕝᕙᓘᓐᓃᑦ ᐃᖃᓗᑦᑑᑦᑎᐊᖅ, ᓄᓇᕗᑦ
ᓴᖅᑭᖅᑕᐅᑲᓐᓂᖅᑐᖅ
ᐅᓂᒃᑳᖃᑦᑕᕐᓗᓂ ᓄᓇᕗᑦ ᑐᙵᕕᒃ ᑎᒥᖓᓂ (ᑐᙵᕕᒃ) ᐃᓅᓯᓕᕆᔨᒃᑯᑦ ᐃᓕᖅᑯᓯᓕᕆᔨᒃᑯᓪᓗ ᐱᓕᕆᕝᕕᐊᑕ ᑐᑭᒧᐊᒃᑎᑦᑎᔨᖓᓂᒃ, ᐃᓅᓯᓕᕆᓂᕐᒧᑦ ᐊᑐᐊᒐᓕᕆᔨ ᖃᐅᔨᓇᓱᐊᖃᑦᑕᓂᐊᖅᑐᖅ, ᐊᑐᐊᒐᕐᓂᒃ ᕿᒥᕐᕈᖃᑦᑕᕐᓗᓂ ᐊᒻᒪᓗ ᐱᓕᕆᐊᒃᓴᓕᕆᓂᕐᒧᑦ ᐃᓅᓯᓕᕆᓂᕐᒨᖓᔪᓂᒃ, ᑐᕌᖓᔪᓂᒃ ᐃᖅᑲᖅᑐᐃᕕᓕᕆᓂᕐᒧᑦ ᐊᒻᒪᓗ ᐊᒃᑐᐊᔪᓄᑦ ᐃᓅᓯᕐᒨᖓᔪᓂᒃ. ᑲᒪᒋᖃᓯᐅᑎᓗᒋᑦ ᐋᖅᑭᐅᒪᑦᓯᓂᖅ ᐱᓕᕆᐊᖃᕐᓂᕐᓗ ᐅᓂᒃᑳᓂᒃ, ᐋᖅᑭᑦᓯᒪᒍᑎᓂᒃ ᑎᑎᕋᖅᓯᒪᔪᓂᒃ ᐊᒻᒪᓗ ᐊᓯᖏᓐᓂᒃ ᐊᒃᑐᐊᔪᓂᒃ ᑖᒃᑯᓄᖓ. ᐃᓅᓯᓕᕆᓂᕐᒧᑦ ᐊᑐᐊᒐᕐᓂᒃ ᕿᒥᕐᕈᔨ ᐃᑲᔪᖅᑎᐅᖃᑦᑕᕆᐊᓕᒃ ᑐᑭᒧᐊᒃᑎᑦᑎᔨᒧᑦ ᑐᒡᓕᐊᓄᓪᓗ ᐱᓕᕆᕝᕕᒻᒥ ᑲᒪᒋᔭᐅᔪᓂᒃ. ᑕᕝᕙᓂ ᐱᓕᕆᐊᓕᒃ ᐃᓚᒋᔭᐅᖃᑦᑕᕆᐊᓕᒃ ᑲᓇᑕᒥ ᐅᑭᐅᖅᑕᖅᑐᒥᓗ ᑲᑎᒪᔨᕋᓛᓄᑦ/ᐱᔭᕆᐊᑭᓪᓕᑎᕆᔨᓄᑦ ᓯᕗᒧᐊᖁᓪᓗᒋᑦ ᐊᑐᐊᒐᐃᑦ ᐊᒻᒪᓗ ᐊᔭᐅᖅᑑᑏᑦ ᑐᙵᕕᒃᑯᑦ ᓯᕗᓪᓕᐅᔾᔭᐅᔭᕆᐊᓕᖁᑎᖏᓐᓄᑦ ᐊᒻᒪᓗ ᐃᓂᒋᔭᐅᔪᓄᑦ ᐊᒃᑐᐊᔪᓄᑦ ᐃᖅᑲᖅᑐᐃᕕᓕᕆᔨᒃᑯᓐᓄᑦ ᐊᒻᒪᓗ ᐊᓯᖏᓐᓄᑦ ᐃᓅᓯᓕᕆᓂᕐᒨᖓᔪᓄᑦ.
ᐱᓇᓱᐊᖅᑐᑦ ᒥᑭᓂᖅᐹᒥᒃ ᐃᓕᓐᓂᐊᑲᓐᓂᓂᒃᑯᑦ ᓇᓗᓇᐃᒃᑯᑕᖅᑖᖅᓯᒪᒋᐊᓖᑦ, ᐃᓕᓴᕆᔭᐅᔾᔪᒻᒥᒃ, ᐅᕝᕙᓘᓐᓃᑦ ᐃᓕᓴᕆᔭᐅᔾᔪᑎᒻᒪᕆᒻᒥᒃ ᒥᑦᓯᑎᓐᓅᖏᑦᑐᖅ ᒪᕐᕉᓐᓄᑦ (2) ᐊᕐᕌᒎᓐᓂᒃ ᑕᕝᕗᙵᖓᔪᒥᒃ ᐱᓕᕆᐊᖃᖅᓯᒪᓗᓂ ᐃᓅᓯᓕᕆᓂᕐᒧᑦ ᐊᑐᐊᒐᕐᓂ. ᐱᓕᕆᔨᑖᕈᒪᓂᐊᖅᑐᑦ ᓴᙱᓂᖃᑦᓯᐊᕐᓗᓂ ᐊᑐᐊᒐᕐᓂᒃ ᕿᒥᕐᕈᓂᕐᒥᒃ, ᐸᕐᓇᓂᕐᒥᒃ ᐊᒻᒪᓗ ᖃᐅᔨᓴᕐᓂᕐᒧᑦ ᐊᔪᙱᓐᓂᖃᑦᓯᐊᕐᓗᓂ, ᓈᖕᒪᖏᑦᑐᓂᒃ ᐋᖅᑭᑦᓱᐃᒍᓐᓇᓯᐊᕐᓗᓂ. ᑎᑎᕋᕈᓐᓇᑦᓯᐊᕆᐊᖃᖅᑐᑎᑦ ᐅᖃᖃᑎᖃᕈᓐᓇᕐᓗᑎᓪᓗ ᖃᓪᓗᓈᑎᑐᑦ, ᐃᓄᒃᑐᑦ, ᐃᓄᐃᓐᓇᑐᓪᓘᓐᓃᑦ ᐅᕝᕙᓘᓐᓃᑦ ᐃᓕᓐᓂᐊᕈᒪᓂᖃᑦᓯᐊᕐᓗᑎᒃ ᐱᓕᒻᒪᒃᓴᐅᑎᓂᒃ ᐊᔪᕈᓐᓃᕈᑎᒃᓴᓐᓂᒃ ᐅᖃᐅᓯᕐᒥᒃ. ᐱᓕᕆᐊᖅᑖᖅᑐᖅ ᐃᖅᑲᓇᐃᔭᖃᑎᖃᕈᓐᓇᑦᓯᐊᕆᐊᓕᒃ ᖃᓄᐃᑦᑐᑐᐃᓐᓇᕐᓂᒃ ᑭᒃᑯᓕᒫᓂᒃ ᑲᑐᔾᔨᖃᑎᒌᓂᓪᓗ ᐊᒻᒪᓗ ᐋᖅᑭᑦᓯᓯᒪᑦᓯᐊᕈᓐᓇᕐᓗᓂ ᐋᖅᑭᐅᒪᑦᓯᑦᓯᐊᕈᓐᓇᕐᓗᓂᓗ ᐃᖅᑲᓇᐃᔭᖃᑎᖃᑦᓯᐊᓂᕐᒥᒃ ᓴᙱᓂᓕᒻᒥᒃ ᐊᒻᒪᓗ ᐃᖅᑲᓇᐃᔭᕈᓐᓇᕐᓗᓂ ᑲᒪᔪᑑᓗᓂ. ᖃᐅᔨᓴᕈᒪᓂᖃᑦᓯᐊᕐᓗᓂ ᑐᑭᓕᐅᕆᓂᕐᒥᓪᓗ ᐊᑐᐊᒐᕐᓂᒃ, ᒪᓕᒐᑦᓴᓂᒃ ᐊᐅᓚᑦᓯᔾᔪᑎᓂᓪᓗ ᐱᔪᒥᒋᔭᐅᔪᖅ. ᐃᖅᑲᓇᐃᔮᖅᑖᖅᑐᖅ ᖃᐅᔨᒪᓂᖃᑦᓯᐊᕆᐊᖃᕐᒥᔪᖅ ᓄᓇᕗᑦ ᐊᖏᕈᑎᖏᓐᓂᒃ ᐊᒻᒪᓗ ᑐᙵᕕᒃᑯᑦ ᐱᓂᐊᕐᓂᕋᐅᑎᖏᓐᓂᒃ, ᐱᓗᐊᖅᑐᒥ ᐃᓛᒃᑯᑦ 32-ᒥᒃ ᖃᐅᔨᒪᑦᓯᐊᕐᓗᓂ ᑕᒪᒃᑮᓐᓂᒃ ᒐᕙᒪᑐᖃᒃᑯᑦ ᐊᒻᒪᓗ ᓄᓇᕗᑦ ᒐᕙᒪᒃᑯᑦ ᐊᐅᓚᑦᓯᔾᔪᓯᖏᓐᓂᒃ ᐊᒻᒪᓗ ᑐᑭᓯᐅᒪᓂᖃᑦᓯᐊᕐᓗᓂ ᐊᕕᑦᑐᖅᓯᒪᓂᕐᓂᒃ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᐱᓂᐊᕐᓂᕋᐅᑎᖏᓐᓂᓪᓗ. ᐱᔪᒥᒋᔭᐅᓂᖅᓴᐅᓂᐊᖅᑐᑦ ᐃᓄᐃᑦ ᐊᑎᖃᖃᑕᐅᔪᑦ ᓄᓇᕗᑦ ᐊᖏᕈᑎᖏᓐᓂ.
ᓄᓇᕗᑦ ᑐᙵᕕᒃ ᑎᒥᖓ
ᑮᓇᐅᔾᔭᒃᓴᐅᑎᖓ ᐱᒋᐊᕐᕕᖃᕐᓂᐊᖅᑐᖅ $95,805.00 (ᐊᑭᓕᖅᓱᖅᑕᐅᓗᓂ ᐱᓕᕆᓯᒪᓂᖓᒍᑦ) ᐊᒻᒪᓗ ᐅᑭᐅᖅᑕᖅᑐᒥᐅᑕᐅᓂᕐᒧᑦ ᐊᒻᒪᓗ ᐃᓪᓗᒧᑦ ᐃᑲᔫᑏᑦ $24,000.00.
ᐱᔪᒪᒍᕕᑦ ᓇᓗᓇᐃᔭᖅᓯᒪᔪᓂᒃ ᐃᖅᑲᓇᐃᔮᒧᑦ ᖃᐅᔨᒋᐊᕐᕕᒋᒍᓐᓇᖅᑕᐃᑦ:
ᐃᖅᑲᓇᐃᔭᖅᑐᓕᕆᔨᒃᑯᑦ ᐅᖄᓚᐅᑖ: (867) 645-5400
ᓄᓇᕗᑦ ᑐᓐᖓᕕᒃ ᑎᒥᖓ ᓱᒃᑲᔪᒃᑰᕈᑖ: (867) 645-3872
ᑲᖏᕐᖠᓂᖅ, ᓄᓇᕗᑦ
ᒪᑐᕕᒃᓴᓕᒃ: ᕕᕝᕗᐊᓕ 26, 2021
ᐱᓂᐊᕐᓂᕋᐅᑎᕗᑦ: ᐃᓄᓐᓄᑦ ᐱᕚᓪᓕᕈᑎᒃᓴᐅᔪᑦ ᐃᓅᓯᒃᑯᑦ, ᐱᖅᑯᓯᑐᖃᒃᑯᑦ ᐱᕙᓪᓕᐊᔪᓕᕆᓂᒃᑯᑦ ᐊᖏᖃᑎᒌᒍᑦ ᐊᑐᕐᓗᒍ
LOCATION: Iqaluit, Rankin Inlet or Cambridge Bay, NunavutCLOSING DATE: February 26, 2021
