ᑐᙵᕕᒃᑯᑦ ᓴᖅᑮᔪᑦ ᐅᖅᑯᔾᔭᐃᑦ ᐃᓐᓇᕐᓄᑦ − ᐃᓐᓇᕐᓄᑦ ᐃᑲᔫᑏᑦ
(ᐆᑦᑑᑉᐱᕆ 22, 2020, ᐃᖃᓗᑦᑑᑦᑎᐊᖅ) ᓄᓇᕗᑦ ᑐᙵᕕᒃ ᑎᒥᖓ (ᑐᙵᕕᒃ) ᐅᓪᓗᒥ ᓴᖅᑮᖅᑲᐅᔪᑦ ᐅᖅᑯᔾᔭᐃᑦ ᐃᓐᓇᕐᓄᑦ − ᐃᓐᓇᕐᓄᑦ ᐃᑲᔫᑏᑦ ᐊᒻᒪᓗ ᐃᓐᓇᕐᓂᒃ ᐃᓄᓐᓂᒃ ᑐᒃᓯᕋᐅᓯᐅᖁᔨᕗᑦ. ᐱᔪᓐᓇᖅᑎᑕᐅᔪᑦ ᓄᓇᕗᒻᒥ ᐃᓄᐃᑦ ᐃᓐᓇᐃᑦ ᐃᓅᓕᖅᓯᒪᔪᑦ ᑏᓰᒻᕙ 31, 1955 ᓯᕗᓂᖓᓂᓘᓐᓃᑦ ᑐᓂᔭᐅᓂᐊᖅᑐᑦ ᒥᑭᓂᖅᐹᒥᒃ ᑕᖅᑭᑕᒫᖅᓯᐅᑎᖃᕐᓗᑎᒃ ᐃᑲᔫᑎᒥᒃ $120.
“ᑖᑦᓱᒧᖓ ᐱᓕᕆᐊᒧᑦ, ᐃᓕᓴᕆᐅᒪᔭᕗᑦ ᐱᖕᒪᕆᐅᓂᖏᓐᓂᒃ ᐃᓐᓇᐃᑦ ᐃᑲᔫᑎᒋᖃᑦᑕᖅᑕᖏᑦ ᓄᓇᓕᖁᑎᑦᑎᓐᓂ ᐅᓄᖅᑐᓂᒃ ᐱᓇᓱᐊᒐᐅᕙᑦᑐᓂᒃ, ᐃᓚᒋᔭᐅᓪᓗᑎᒃ ᐃᓄᐃᑦ ᐅᖃᐅᓯᖓ ᐃᓕᖅᑯᓯᖓᓗ. ᓱᓕᒃᑲᓐᓂᖅ, ᐃᓕᓴᕆᔭᕗᑦ ᐊᑭᑦᑐᐸᓪᓕᐊᓂᐊᓗᒃ ᐃᓅᓇᓱᐊᕈᑎᓄᑦ,” ᐅᖃᖅᑐᖅ ᑐᙵᕕᒃᑯᑦ ᐊᖓᔪᖅᑳᖓ ᐊᓗᑭ ᑰᑦᑎᖅ.
ᐅᖅᑯᔾᔭᐃᑦ ᐃᓐᓇᕐᓄᑦ−ᐃᓐᓇᕐᓄᑦ ᐃᑲᔫᑎᑦᓴᑦ ᐅᐃᒍᔭᐅᒍᑎᖏᑦ ᓄᓇᕗᒻᒥ ᐃᓐᓇᐃᑦ ᐃᑲᔫᓯᐊᕆᖃᑦᑕᖅᑕᖏᓐᓄᑦ. ᐅᖅᑯᔾᔭᐃᑦ ᐃᓐᓇᕐᓄᑦ−ᐃᓐᓇᕐᓄᑦ ᐃᑲᔫᑎᒃᓴᑦ ᐃᓚᒋᔭᐅᕈᑕᐅᔪᖅ ᐃᑲᔫᑎᓂᒃ ᓄᑖᓄᑦ ᐃᓐᓇᕐᓄᑦ. ᐱᓕᕆᐊᒃᑯᑦ ᑕᖅᑭᑕᒫᖅᓯᐅᒻᒥᒃ ᑮᓇᐅᔭᖅᑖᖅᑎᑕᐅᖃᑦᑕᓂᐊᖅᑐᑦ $120−ᓂᒃ ᓄᓇᕗᑦ ᐃᓄᐃᑦ ᐃᓐᓇᖏᑦ ᐃᓅᓕᖅᓯᒪᔪᑦ ᐊᑯᓐᓂᖓᓂ ᔭᓐᓄᐊᓕ 1, 1949 ᐊᒻᒪᓗ ᑏᓰᒻᐱᕆ 31, 1955.
ᓄᓇᕗᒻᒥ ᐃᓄᐃᑦ ᐃᓐᓇᐃᑦ ᒫᓐᓇ ᑮᓇᐅᔭᓕᑕᐅᖃᑦᑕᖅᑐᑦ $105−ᓂᒃ ᐅᕝᕙᓘᓐᓃᑦ $190−ᓂᒃ ᑕᖅᑭᑕᒫᑦ ᓄᓇᕗᒻᒥ ᐃᑦᑐᖅᓯᐅᑎᑎᒍᑦ ᑐᓂᔭᐅᖃᑦᑕᕈᑎᖏᑦ ᐃᓚᒋᐊᖅᑕᐅᓂᐊᕐᒥᔪᑦ ᑮᓇᐅᔭᓕᑕᐅᒍᑎᒋᖃᑦᑕᖅᑕᖏᑦ $15−ᒥᒃ ᐊᒻᒪᓗ $30-ᒥᒃ ᑕᐃᒪᐃᓕᖓᑎᓪᓗᒋᑦ ᑖᒃᑯᓇᙵᑦ ᐅᖅᑯᔾᔭᐃᑦ ᐃᓐᓇᕐᓄᑦ ᐱᓕᕆᐊᒥᒃ ᑲᑎᓐᓂᖃᓕᕐᓗᑎᒃ ᑕᒪᕐᒥᒃ $120-ᓂᒃ ᑕᖅᑭᑕᒫᑦ.
ᑐᒃᓯᕋᐅᑏᑦ ᑕᑕᑎᕆᐊᓖᑦ ᐊᑐᐃᓐᓇᐅᓂᐊᖅᑐᑦ ᑐᙵᕕᒃᑯᑦ ᐃᑭᐊᖅᑭᕕᖓᓂ, ᓄᓇᑦᓯᓐᓂ ᓄᓇᓕᖕᓄᑦ ᑐᖅᑲᑕᕐᕕᖕᓂᒃ ᐊᒻᒪᓗ ᑎᑎᖅᑲᓂᐊᕐᕕᒃᑯᑦ ᐊᐅᓪᓚᖅᑎᑕᐅᖃᑦᑕᕐᓗᑎᒃ ᐃᓐᓇᕐᓄᑦ ᐱᔪᓐᓇᖅᑎᑕᐅᔪᓄᑦ ᑐᙵᕕᒃᑯᑦ ᐊᑎᖃᖃᑕᐅᔪᖁᑎᖏᓐᓂ.
.
ᓄᓇᕗᑦ ᑐᙵᕕᒃ ᑎᒥᖓᑕ (ᑐᙵᕕᒃ) ᒥᑦᓵᓄᑦ
ᑐᙵᕕᒃᑯᑦ ᐋᖅᑭᐅᒪᑦᓯᖃᑦᑕᖅᑐᑦ ᐊᐅᓚᑦᓯᓪᓗᑎᓪᓗ ᐃᓄᐃᑦ ᐱᓕᕆᐊᒃᓴᖏᓐᓂᒃ ᐊᖏᕈᑕᐅᓯᒪᔪᓂᒃ ᓄᓇᕗᑦ ᐊᖏᕈᑎᖏᓐᓂ ᐊᒻᒪᓗ ᖃᐅᔨᒪᒋᐊᖃᑦᑕᖅᓱᑎᓪᓗ ᒐᕙᒪᑐᖃᒃᑯᑦ ᐊᒻᒪᓗ ᓄᓇᕗᑦ ᒐᕙᒪᖏᑦ ᑲᔪᓯᑎᑦᓯᒐᓗᐊᕐᒪᖔᑕ ᐱᓇᓱᐊᒐᑦᓴᒥᓂᒃ.
ᐅᖅᑯᔾᔭᐃᑦ ᐃᓐᓇᕐᓄᑦ − ᐃᓐᓇᕐᓄᑦ ᐃᑲᔫᑎᒃᓴᑦ
ᐱᖃᑕᐅᔪᓐᓇᖅᑐᑎᑦ ᐅᖅᑯᔾᔭᐃᑦ ᐃᓐᓇᕐᓄᑦ − ᐃᓐᓇᕐᓄᑦ ᐃᑲᔫᑎᓂᒃ;
– ᐃᓅᓗᑎᒃ ᐊᑎᖃᖃᑕᐅᓗᑎᒃ ᓄᓇᕗᑦ ᐊᖏᕈᑎᖏᓐᓂ; ᐊᒻᒪᓗ
– ᐃᓅᓕᖅᓯᒪᒍᕕᑦ ᐊᑯᓐᓂᖓᓂ ᔭᓐᓄᐊᓕ 1, 1949 ᐊᒻᒪᓗ ᑏᓰᒻᕙ 31, 1955.
ᑕᑕᑎᐊᓂᒃᓯᒪᔪᑦ ᕿᒥᕐᕈᔭᐅᓂᐊᖅᑐᑦ ᑐᙵᕕᒃᑯᓐᓂᒃ. ᐊᖏᖅᑕᐅᔪᑦ ᑐᒃᓯᕋᖅᑐᑦ ᑐᓂᔭᐅᖃᑦᑕᓂᐊᖅᑐᑦ ᑕᖅᑭᑕᒫᑦ ᐴᖅᑕᐅᑦᓴᐅᑎᒋᓗᑎᒃ ᑮᓇᐅᔭᒃᑯᕕᖏᓐᓄᑦ ᐅᕝᕙᓗᓐᓃᑦ ᓯᒃᑭᐅᓗᑎᒃ/ᑮᓇᐅᔭᒃᓴᐅᓗᑎᒃ ᓯᕗᓪᓕᖅᐹᖓᓂ ᑕᖅᑭᐅᑉ, ᐱᒋᐊᕐᕕᖃᕐᓂᐊᖅᑐᖅ ᑏᓰᒻᐱᕆ 1, 2020.
ᐱᕕᒃᓴᖃᖅᑎᑕᐅᓂᐊᖅᑐᑦ ᐱᔪᓐᓇᖅᑎᑕᐅᔪᑦ ᐃᓐᓇᐃᑦ ᑐᒃᓯᕋᐅᓯᐅᕐᓂᕐᒥᒃ, ᑐᒃᓯᕋᐅᓯᐅᕐᕕᒃᓴᖅ ᒪᑐᐃᖓᓗᓂ ᐊᑕᐅᓯᕐᒥᒃ ᐊᕐᕌᒍᓪᓗᐊᒥᒃ ᓴᖅᑭᖅᑕᐅᓂᖓᑕ ᐅᓪᓗᖓᓂᒃ ᐱᒋᐊᕐᓗᓂ. ᐱᖕᒪᕆᐅᔪᖅ ᖃᐅᔨᒪᔭᐅᒋᐊᓕᒃ ᑮᓇᐅᔭᓂᒃ ᐱᒻᒪᐃᑦᑐᐃᑦ ᑮᓇᐅᔭᓕᑕᐅᒍᑎᒋᒍᓐᓇᖅᓯᒪᓗᒋᑦ ᑮᓇᐅᔭᓕᑕᐅᒍᑎᒋᔭᐅᔾᔮᖏᑦᑐᑦ ᑭᓯᐊᓂ ᐱᒋᐊᕐᕕᖃᕐᓂᐊᖅᑐᖅ ᑐᒃᓯᕋᐅᑏᑦ ᕿᒥᕐᕈᔭᐅᒌᖅᓯᒪᓕᖅᑲᑦ ᐊᖏᖅᑕᐅᓯᒪᓗᓂ.
ᑕᖅᑭᑕᒫᖅᓯᐅᑏᑦ ᑮᓇᐅᔭᖅᑖᑦᓴᐃᑦ
ᑐᙵᕕᒃ ᑮᓇᐅᔭᓕᐅᕋᓱᐊᕈᑎᖏᑦ
ᑮᓇᐅᔭᓕᑕᐅᒍᑕᐅᓯᒪᔪᑦ ᓄᑖᓄᑦ ᐃᓐᓇᕐᓄᑦ, ᐃᓅᓕᖅᓯᒪᔪᓄᑦ ᐊᑯᓐᓂᖓᓂ ᔭᓐᓄᐊᓕ 1, 1949 ᐊᒻᒪᓗ ᑏᓰᒻᕙ 31, 1955, ᑐᙵᕕᒃᑯᓃᙶᖅᑐᑦ ᐃᓚᙵᐃᒍᑏᑦ ᖄᖏᕐᓂᑯᓕᐅᕈᑎᑖᕆᖃᑦᑕᖅᓯᒪᔭᖏᓐᓂᒃ ᐃᓵᔪᓂᒃ.
ᖄᖏᕐᓂᑯᓂᒃ ᐃᓵᔪᑦ ᐊᑐᐊᒐᖓ, ᐊᖏᖅᑕᐅᓚᐅᖅᑐᖅ ᑐᙵᕕᒃᑯᑦ ᑲᑎᒪᔨᖏᓐᓄᑦ ᓅᕙᐃᒻᕙ 2011, ᓇᓗᓇᐃᖅᓯᒪᔪᖅ ᓇᖕᒥᓂᖁᑎᖃᖃᑕᐅᔪᑦ ᐊᒻᒪᓗ ᒪᑭᒪᔾᔪᑕᐅᒍᓐᓇᖅᑐᑦ ᐊᑐᖅᑕᐅᓂᖏᓐᓄᑦ ᐃᓚᖓᓂᒃ ᒪᑭᒪᔾᔪᑎᒃᓴᓄᑦ ᐃᑲᔫᑎᓂᒃ ᐱᔭᐅᓯᒪᔪᓂᒃ ᐅᔭᕋᓐᓂᐊᕋᑦᓴᓕᕆᓂᕐᒥᒃ ᓄᓇᕗᒻᒥ ᓄᓇᖓᓂᒃ ᓇᓗᓇᐃᖅᑕᐅᓯᒪᔪᒥᒃ. ᐃᓵᔭᐅᔪᑦ ᖄᖏᕐᓂᑯᐃᑦ ᑐᓂᔭᐅᖃᑦᑕᖅᑐᑦ ᐊᕝᕙᖏᑦ ᐊᐅᓚᑦᓯᔾᔪᑕᐅᔪᓄᑦ ᑮᓇᐅᔭᓄᑦ ᐊᒻᒪᓗ ᐊᕝᕙᖏᑦ ᕿᑲᖅᑎᐊᖃᕐᕕᒻᒧᑦ endowment ᑮᓇᐅᔭᓄᑦ. ᐊᐅᓚᑦᓯᔾᔪᑎᒃᓴᓄᑦ ᑮᓇᐅᔭᑦ ᑐᓂᔭᐅᖃᑦᑕᖅᑐᑦ ᐊᕐᕌᒍᑕᒫᑦ ᑖᒃᑯᓄᖓ ᑐᙵᕕᒃᑯᓐᓄᑦ ᐊᒻᒪᓗ ᐊᑐᓂᑦ ᐊᕕᑦᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ.
ᐅᖅᑯᔾᔭᐃᑦ ᐃᓐᓇᕐᓄᑦ
ᐅᖅᑯᔾᔭᐃᑦ ᐃᓐᓇᕐᓄᑦ ᓂᕈᐊᖅᑕᐅᓚᐅᖅᑐᖅ ᐅᖃᐅᓯᖅᑕᖓ ᓇᓗᓇᐃᖅᓯᒻᒪᑦ ᑐᓂᓯᓂᕐᒥᒃ ᐊᓯᒥᓄᑦ ᐅᐱᒍᓱᓐᓂᕐᒧᑦ ᐃᑉᐱᒍᓱᓐᓂᒧᓪᓗ. ᑕᐃᒪᐃᑎᓪᓗᒍ, ᑐᙵᕕᒃᑯᑦ ᐱᕕᒃᓴᖃᖅᑎᑦᓯᒋᐊᒃᑲᓂᖅᑐᑦ ᐃᓐᓇᕐᓂᒃ ᐱᕕᒃᓴᖃᖁᓪᓗᒋᑦ ᑖᑦᓱᒥᖓ ᐃᓚᒋᐊᕈᑎᒥᒃ.
ᑐᑭᓯᒋᐊᒃᑲᓂᕐᕕᒃᓴᖅ, ᖃᐅᔨᒋᐊᕐᕕᒋᓗᒍ:
ᑭᐅᕆᓐ ᕙᓚᐅᕋᑎ
ᑐᑭᒧᐊᒃᑎᑦᑎᔨ ᑐᒡᓕᐊ ᑐᓴᐅᒪᔾᔪᑎᓕᕆᔨᒃᑯᑦ
ᓄᓇᕗᑦ ᑐᙵᕕᒃ ᑎᒥᖓ
ᐅᖄᓚᐅᑖ: 867-975-4900 ᐊᑭᖃᙱᑦᑐᖅ: 1-888-646-0006
https://tunngavik.com
