ᓄᓇᕗᑦ ᑐᙵᕕᒃᑯᑦ ᑐᓴᕐᑕᐅᖁᔭᖏᑦ ᓇᓗᓇᐃᔭᕐᓯᒪᔪᑦ ᐱᓪᓗᒋᑦ ᑭᒃᑯᑐᐃᓐᓇᕐᓂᒃ ᐋᓐᓂᐊᕐᑖᑦᑕᐃᓕᒪᖁᔨᓪᓗᑎᒃ ᑐᐊᕕᓐᓇᕆᔭᐅᔪᑦ
ᓄᓇᕗᑦ ᑐᙵᕕᒃᑯᑦ ᑎᒥᖓ (ᑐᙵᕕᒃᑯᑦ) ᓈᖕᒪᓴᖅᐳᑦ ᐃᓱᒪᓕᐅᕈᑎᖓᓂᒃ ᓄᓇᕗᖕᒥ ᐊᐅᓚᑦᓯᔨᒻᒪᕆᖓᑦᑕ ᑭᓇᒃᑯᑐᐃᓐᓇᐃᑦ ᐋᓐᓂᐊᖃᖅᑕᐃᓕᒪᑎᑕᐅᓂᖏᓐᓄᒃ ᐱᓕᕆᔨᐅᑉ ᓇᓗᓇᐃᕆᓂᖓᓄᑦ ᑭᓇᒃᑯᑐᐃᓐᓇᕐᓂᒃ ᐋᓐᓂᐊᕐᑖᑦᑕᐃᓕᒪᖁᔨᓪᓗᑎᒃ ᑐᐊᕕᓐᓇᕆᔭᖃᓐᓂᖓᓄᑦ ᓄᓇᕗᖕᒥ ᑲᒪᒋᐊᕈᑕᐅᓪᓗᓂ ᓄᕙᒡᔪᐊᕐᓇᖅ−19 ᓯᐊᒻᒪᐸᓪᓕᐊᓂᖓᓄᑦ ᓄᓇᕐᔪᐊᕐᒥ.
ᑲᓇᑕᐅᑉ ᒐᕙᒪᒃᑯᖏᑦ ᖃᐅᔨᒪᓂᕋᕆᐊᖃᕐᒪᑕ ᐊᒻᒪ ᑲᒪᒋᐊᕈᑎᖃᓪᓗᑎᒃ ᓄᓇᕗᖕᒥ ᐊᑦᑐᕐᑕᐅᓴᕋᐃᒍᓐᓇᕐᓂᖓᓄᑦ ᓄᕙᒡᔪᐊᕐᓇᖅ−19-ᒧᑦ ᓄᓇᕐᔪᐊᕐᒥ ᓯᐊᒻᒪᐸᓪᓕᐊᓂᖃᖅᑎᓪᓗᒍ ᑲᒪᒋᔭᐅᒋᐊᑦᑕᐅᑎᒋᓗᑎᒃ ᐊᑦᑕᓐᓇᓗᐊᕐᑐᑦ, ᐊᒻᒪᓗᑦᑕᐅᖅ ᐃᓅᓇᓱᐊᕈᑎᑦ ᐊᒻᒪ ᑮᓇᐅᔾᔭᒃᓴᓂᒃᑯᑦ ᓇᓪᓕᖅᑰᑎᙱᒻᒪᑕ ᓄᓇᕗᖕᒥᐅᑦ ᐃᓄᐃᑦ ᐊᑦᑕᓐᓈᕿᓂᕐᓴᒦᒍᑎᒋᒻᒪᒍ.
ᐊᒥᓱᑦ ᐃᓄᐃᑦ ᐃᖕᒥᓄᑦ ᓴᐳᑎᓯᒪᔾᔪᑎᖃᙱᒻᒪᑕ ᑕᐃᒪᓐᓇ ᐊᑐᓕᖅᑕᐅᖁᓯᒪᔭᖓᑎᒍᑦ ᑲᓇᑕᒥ ᐊᐅᓚᑦᓯᔨᒻᒪᕆᖓᑦᑕ ᑭᓇᒃᑯᑐᐃᓐᓇᐃᑦ ᐋᓐᓂᐊᑖᖅᑕᐃᓕᒪᓂᖏᓐᓄᑦ. ᑭᓇᒃᑯᑐᐃᓐᓇᕐᓄᑦ ᐋᓐᓂᐊᑖᖅᑕᐃᓕᒪᓂᕐᒧᑦ ᑐᑭᓯᐅᒪᒍᑎᒃᓴᑦ ᐃᓄᒃᑑᖓᓗᑎᒃ ᓴᖅᑭᑕᐅᖃᑦᑕᙱᒻᒪᑕ, ᐃᓄᒋᐊᓐᓂᓴᐃᓪᓗ ᓄᓇᕗᖕᒥᐅᑦ ᐃᓄᒃᑐᑦ ᐅᖃᐅᓯᖃᖅᑐᑎᒃ. ᐃᒡᓗᒥᓗ ᐃᓄᒌᐊᓗᐊᕐᑐᑎᒃ, ᐊᒥᓱᑦ ᐃᓄᐃᑦ ᖃᓂᒃᓴᓗᐊᖅᑕᐃᓕᒪᒍᓐᓇᔮᙱᒻᒪᑕᓴ ᐃᓅᖃᑎᒥᓂᒃ ᐊᒻᒪ ᐃᓄᑑᓗᑎᒃ ᐊᓂᑦᑕᐃᓕᒪᒍᓐᓇᔾᔮᒐᑎᒃ ᐅᕝᕙᓗ ᐃᓄᑐᐊᖑᓗᑎᒃ ᐊᓂᑦᑕᐃᓪᓕᒍᓐᓇᔮᓇᑎᒃ. ᑕᐃᒪᑦᑕᐅᖅ, ᐊᒥᓱᑦ ᐃᓄᐃᑦ ᖃᐅᑕᒫᑦ ᐃᒥᕐᑕᕐᑕᐅᖏᓐᓇᐸᙱᒻᒪᑕ ᐅᕝᕙᓗ ᖁᑦᑕᑦ ᒥᓪᓗᐊᖅᑕᐅᔭᕐᑐᐃᓐᓇᕈᓐᓇᕋᑎᒃ ᑕᐃᒪᐃᑎᓪᓗᒍ ᐊᒡᒐᒥᓂᒃ ᐅᐊᓴᕐᓂᖅ/ᐃᕐᒥᓐᓂ ᐱᔭᓐᓂᔮᙱᑦᑐᖅ.
ᐃᓱᐊᕐᓴᐃᔨᑭᒃᓴᐃᓐᓇᕐᑐᑦ ᐃᖅᑲᓇᐃᔭᕐᑎᓂᒃ, ᓈᖕᒪᒐᑎᓪᓗ ᐋᓐᓂᐊᕖᑦ, ᓂᕿᒃᓴᖃᑦᑎᐊᐸᙱᑐᓪᓗ ᐊᒻᒪ ᐃᓅᓇᓱᐊᕈᑎᓂᒃ ᑎᑭᑎᑕᐅᕙᒃᑐᓂᒃ ᑎᑭᕝᕕᐅᖏᓐᓇᕈᓐᓇᐃᓕᒍᓐᓇᕐᑐᑎᒃ ᑕᐃᒪᐃᓐᓂᖓᓄᑦ ᓄᓇᕗᖕᒥ ᓄᕙᒡᔪᐊᕐᓇᖅ−19 ᐱᑕᖃᓗᐊᓕᕐᓂᕐᐸᑦ ᐊᒃᓱᐊᓗᒃ ᓱᑕᐃᕐᓯᓪᓗᐊᕋᔭᕐᑐᖅ.
ᓄᓇᕗᖕᒥᐅᑦ ᐃᓄᖏᑦ ᑎᓕᐅᖅᑕᐅᕗᑦ ᒪᓕᑦᑎᐊᖁᔭᐅᓪᓗᑎᒃ ᒪᓕᒃᑕᐅᖁᔭᖏᓐᓂᒃ ᓄᓇᕗᖕᒥ ᐊᐅᓚᑦᓯᔨᒻᒪᕆᖓᑦᑕ ᑭᓇᒃᑯᑐᐃᓐᓇᕐᓂᒃ ᐋᓐᓂᐊᖃᑦᑕᐃᓕᒪᑎᑦᑎᔨᐅᑉ,
ᐅᑯᓂᖓ ᐱᖃᓯᐅᔾᔨᓗᑎᒃ: ᐊᖏᕐᕋᕐᓯᒪᓗᓯ, ᐊᒡᒐᑎᑦ ᐅᐊᓴᕐᐸᓪᓗᒋᑦ/ᐃᕐᒥᖃᑦᑕᕐᓗᒋᑦ, ᑯᓂᒃᓴᖃᑦᑕᖏᓪᓗᓯ ᓱᕈᓯᓛᓂᒃ, ᐊᒻᒪ ᓂᕿᓂᒃ ᑕᒧᐊᔾᔪᔾᔨᖃᑦᑕᖏᓪᓗᓯ ᓄᑕᖅᑲᓛᑦᓯᓐᓄᑦ, ᖃᐅᔨᒋᐊᕈᓐᓇᖅᐳᑎᑦ www.gov.nu.ca.
-30-
ᑐᑭᓯᒋᐊᒃᑲᓐᓂᕈᒪᒍᕕᑦ, ᐅᓇ ᑐᑭᓯᒋᐊᕐᕕᒋᒃᑲᓐᓂᕈᓐᓇᕐᐸᑦ:
ᒪᓚᐃᔭ ᒥᑭᔾᔪᒃ
ᑐᑭᒧᐊᒃᑎᑦᑎᔨᐅᑲᐃᓐᓇᖅᑐᖅ ᑐᓴᐅᒪᖃᑦᑕᐅᑎᓕᕆᔨᒃᑯᓐᓄᑦ
ᓄᓇᕗᑦ ᑐᙵᕕᒃ ᑎᒥᖓ
ᐅᖄᓚᐅᑖ: (867) 975-4900
https://www.tunngavik.com
ᖃᔮᖅ ᐃᐊᓪᖦᒍᑦ
ᑐᓴᐅᒪᔭᐅᔭᕆᐊᖃᖅᑐᓂᒃ ᖃᐅᔨᒪᔨ
ᑎᑎᕋᕐᕕᖓ ᐊᖓᔪᖅᑳᑉ ᐊᓗᑭ ᑰᑦᑎᖅ
ᐅᖄᓚᐅᑖ: (867) 222.3939
https://www.president.tunngavik.com
