ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᑦ ᓈᓚᐅᑎᒃᑰᖅᑎᑦᑎᓂᐊᖅᑐᑦ ᐊᕐᕋᒍᒥᒃ-ᕿᒥᕐᕈᐊᖅᑕᐅᓂᕐᒥᒃ, ᐱᓪᓚᑦᑕᖅᑐᒥᒃ ᓯᐱᓰᒃᑯᑦ ᓈᓚᐅᑎᖓᒍᑦ ᑎᓯᐱᕆ 3 ᐊᒻᒪᓗ 4, 2009-ᒥ, ᐅᓐᓄᓴᒃᑯᑦ 1:30-ᒥᒃ 3:00-ᒧᑦ, ᑲᓇᖕᓇᕐᒥᐅᓂ.
ᑐᓐᖓᕕᒃᑯᑦ ᐊᖓᔪᖃᖓᑦ ᐹᓪ ᖃᓗᔾᔭᖅ ᐃᓚᐅᓂᐊᖅᑐᖅ ᑎᓯᐱᕆ 3-ᒥ. ᓯᕗᓪᓕᐅᓂᖅᓴᖅ ᐊᖓᔪᖃᕐᒧᑦ ᑐᒡᓕᕆᔭᐅᔪᖅ ᔭᐃᒥᓯ ᐃᑦᑐᓗᒃ ᐊᒻᒪᓗ ᐊᖓᔪᖃᕐᒧᑦ ᑐᒡᓕᕆᔭᐅᔪᑦ ᑮᓇᐅᔭᓕᕆᓂᕐᒧᑦ, ᕋᐃᒪᓐ ᓂᖏᐅᑦᓯᐊᖅ, ᐃᓚᐅᓂᐊᖅᑐᒃ ᑎᓯᐱᕆ 4-ᒥ. ᑕᒪᕐᒥᒃ ᓈᓚᐅᑎᒃᑯᑦ ᑐᓴᖅᑕᐅᔫᒪᖅᑐᑦ ᐱᓚᑦᑕᖅᑐᒥᒃ ᓯᐱᓯᒃᑯᑦ ᓇᓚᐅᑦᑎᒃᑯᕈᑎᖓᓂᒃ, ᑕᐅᔅᓱᓂᒃᑯᑦ, ᖃᐅᔨᒪᔭᐅᑦᑎᐊᖅᑐᖅ ᐃᓚᒋᓗᒍ ᓕᓴ ᐊᐃᐱᓕ.
ᐊᕐᕋᒍᒥᒃ ᕿᒥᕐᕈᐊᖅᑕᐅᔪᒥ, ᓄᓇᑖᖃᑕᐅᓯᒪᔪᑦ ᐅᖄᓚᔪᓐᓇᖃᑦᑕᕐᓂᐊᖅᑐᑦ ᐅᖃᐅᓯᖃᕈᓐᓇᕐᓗᑎᒃ ᐃᓱᒪᓘᑎᒋᔭᒥᓂᒃ ᐊᒻᒪᓗ ᐊᐱᖁᑎᒃᓴᓂᒃ ᐊᐱᖅᓱᕈᓐᓇᖅᓱᑎᒃ ᑐᓐᖓᕕᒃᑯᑦ ᐊᐅᓚᑦᑎᔨᒃᑯᖏᓐᓄᑦ. ᓇᓚᐅᑦᑎᒃᑯᕈᑕᐅᓂᐊᖅᑐᑦ ᑐᓴᖅᑎᑕᐅᓂᐊᕐᒥᔪᑦ ᓄᓇᑖᖃᑕᐅᓯᒪᔪᑦ ᐱᓕᕆᐊᕆᓯᒪᑦᑎᐊᖅᑕᖏᓐᓂᒃ ᑐᓐᖓᕕᒃᑯᑦ 2008-ᒥ.
ᓄᓇᑖᖃᑕᐅᓯᒪᔪᑦ ᐃᓚᐅᖁᔭᐅᑦᑎᐊᖅᐳᑦ ᓇᓚᐅᑦᑎᒃᑰᕈᒪᖅᑐᓂᒃ ᐊᒻᒪᓗ ᐅᖄᓚᖃᑕᐅᓗᑎᒃ ᐊᐱᖁᑎᒃᓴᒥᓂᒃ ᐃᓱᒪᓘᑎᒋᔭᒥᓂᒃ, ᐃᓚᖃᖅᑐᓂᒃ ᓄᓇᕗᒻᒥ ᓄᓇᑖᕈᑎᓂᒃ ᐊᑐᓕᖅᑎᑦᑎᕙᓪᓕᐊᓂᕐᒥᒃ, ᑮᓇᐅᔭᓂᒃ, ᐃᓄᐃᒃ ᐊᒃᑐᖅᑕᐅᓯᒪᓂᖏᓐᓂᒃ ᐃᑲᔫᓯᒃᓴᓂᒃ ᐊᖏᕈᑎᓂᒃ, ᐆᒪᔪᓕᕆᓂᕐᒥᒃ, ᐊᒻᒪᓗ ᐃᖃᖅᑐᐃᕕᒃᑰᖅᑎᑕᐅᓂᖏᓐᓂᒃ ᑲᓇᑕᐅᑉ ᒐᕙᒪᒃᑯᖏᑦ. ᓈᓚᒃᑐᑦ ᐅᖄᓚᔪᓐᓇᖅᑐᑦ ᐅᖓᓯᒃᑐᒥᒃ ᐊᑭᖃᖏᑦᑐᒥᒃ 1-888-896-4135 ᐅᕝᕙᓗᓐᓃᑦ ᓄᓇᓕᖕᒥ 867-979-6151.
ᑕᒪᓐᓇ 7-ᒋᔭᐅᓕᖅᑐᖅ ᐊᕐᕋᒍᑕᒫᖅ ᐊᑐᖅᑕᐅᓕᖅᑐᒥᒃ ᐊᕐᕋᒍᒥᒃ-ᕿᒥᕈᐊᕐᓂᐅᖃᑦᑕᖅᑐᖅ, ᑐᓐᖓᕕᒃᑯᓐᓂ.
ᑐᑭᓯᒋᐊᒃᑲᓐᓂᕈᒪᔪᑦ:
ᑭᐊᕆ ᒪᒃᖤᔅᑭ
ᐊᐅᓚᑎᔨᐅᖃᑕᖅ ᑐᓴᐅᒪᑎᑦᑎᓂᕐᒧᑦ
| ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᑦ |
| ᐅᖄᓚᐅᑦ: (867) 975-4914 |
| ᐅᖓᓯᒃᑐᒥᒃ ᐊᑭᖃᖏᑦᑐᖅ: 1-888-646-0006 |
kmccluskey |
