ᔫᓯ ᐊᒪᐅᔭᖅ ᑯᓱᒐᖅ ᑐᓂᓯᒪᓪᓚᕆᓚᐅᕐᓯᒪᒻᒪᒍ ᐃᓅᓯᓂ ᓄᓇᕗᒧᑦ ᐊᒻᒪᓗ ᐱᕙᓪᓕᐊᑎᑦᑎᓂᕐᒧᑦ ᐃᓄᐃᑦ ᐱᔪᓐᓇᐅᑎᖏᓐᓂᒃ. ᐱᔪᒪᓂᖓ ᑐᓂᓯᒪᓂᖓᓗ
ᐃᓕᓐᓂᐊᕐᓂᓕᕆᓂᕐᒧᑦ ᐊᒻᒪᓗ ᐊᑐᖅᑎᑦᑎᒋᐊᒃᑲᓂᕐᓂᕐᒧᑦ ᓴᐳᔾᔨᓂᕐᒧᓪᓗ ᐃᓄᐃᑦ ᐅᖃᐅᓯᖓᓐᓂᒃ ᐃᓄᓐᓄᑦ ᐊᒥᓱᓄᑦ ᓯᕗᒧᐊᒍᑕᐅᒋᐊᒃᑲᓂᕐᓯᒪᔪᖅ.
ᓄᓇᕗᑦ ᑐᙵᕕᒃ ᑎᒥᖓᑦ (ᑐᙵᕕᒃᑯᑦ) ᖃᐅᔨᒪᔨᒋᔭᐅᕗᑦ ᔫᓯᐅᑉ ᐱᔪᒐᕐᓴᐃᖃᑦᑕᕐᓯᒪᓂᖓ ᐃᓄᓐᓄᑦ ᑲᔪᓯᑎᑕᐅᕙᓪᓕᐊᖏᓐᓇᖁᓪᓗᒍ ᐃᑲᔫᓯᐊᖅᑖᑎᑦᑎᕙᑦᑐᑎᒃ ᒪᕐᕉᒃ $5,000ᓂᑦ ᐃᓕᓐᓂᐊᕈᓯᐊᓐᓂᒃ ᐃᓕᓐᓂᐊᖅᑎᓄᑦ ᓯᓚᑦᑐᓴᕐᕕᒻᒥ ᐃᓕᓐᓂᐊᖅᑕᐅᕙᑦᑐᓂᑦ ᑕᒪᒃᑯᓂᖓ
ᐃᓕᓐᓂᐊᕐᓂᓕᕆᓂᕐᒥᒃ, ᐃᓄᐃᑦ ᐅᖃᐅᓯᓕᕆᓂᕐᒥᒃ, ᐅᕝᕙᓘᓐᓃᑦ ᐱᕙᓪᓕᐊᑎᑦᑎᓂᕐᒥᒃ ᐃᓄᐃᑦ ᐱᔪᓐᓇᐅᑎᖏᓐᓂᒃ.
ᐱᓇᓱᐊᕐᕕᔅᓴᐅᓲᖅ ᐃᐱᕆ 4, 2022ᒥᑦ ᔪᓚᐃ 9ᒧᑦ, 2022.
ᐱᓇᓱᐊᖅᑐᑦ ᑐᑭᓯᓇᖅᓯᑎᑦᓯᑦᓯᐊᕆᐊᓖᑦ ᓴᖅᑭᔮᖅᑎᑦᓯᓗᑎᒃ ᖃᓄᖅ ᐊᑐᕐᓂᐊᕐᒪᖔᕐᒥᒃ ᐊᒻᒪᓗ ᐃᓚᓕᐅᔾᔨᓂᐊᕐᒪᖔᕐᒥᒃ ᔫᓯᐅᑉ ᑲᔪᓯᑎᓯᒪᔭᖏᓐᓂᒃ ᐊᒻᒪᓗ ᓯᕗᒧᐊᒃᑎᓯᒪᔭᖏᓐᓂᒃ ᐃᓄᐃᑦ ᐱᔪᓐᓇᐅᑎᖏᓐᓂᒃ ᐃᓕᓐᓂᐊᖅᑕᒥᒍᑦ ᑐᑭᓯᓇᓱᐊᖅᑕᒥᒍᓪᓗ.
