Jose Amaujaq Kusugak
Inuuvivinikput ovalo ukauhikput angilitiliktuk ovalo akhuugutihimayait Inuit hivunikhainit, ilaa, Jose Kusugak. Jose taimaatut hunmat Nunavut hanahimaliktuk. Ukalakatakhimagami ovalo ihumagihimagami hunmat Kanata hanayukhauyut Ovagut Nunakhapktinik: pigiaganik inuuvivinivut ovalo ukauhivut. Jose ilaa hunmat Inuit inuuviviniit ovalo Inuktitut ukauhiit hakugikhihimayut ovalo aliagiyaga. Akhuukhimayut ukpigigami ilanganut ovalo tunihimayuk Inuit hakugiktumik kinauyaakhait.
Jose nakuutiaktuk malinahuagiaganik Nunavumi ilaa akhuukhimanmat ukpigiyaptinik ovalo aliagigiinami Inuukatiminut ovalo ilaukatigiinagami inuuhitjutainut tamafinut. Puigulimaitaga ilaukatigigaagapkit kinauyunga ovalo hunat ikpinagiyatka. Ovamnik Jose nalutiangitagaluaga, kihimi taiguakatakhimayaga ovalo tuhakatakhimayaga ovalo talvuuna hivunikhihimayakut akhuukatakhimanmat ovaptinut.
Ublumi piliktunga Iniktigutikhainut Munakhiit pilihimayuinik Iqalumi ovalo inikhimaliktunga hivulimik ukiunganut. Pikainaktut Inunik munakhinik Nunavumi ukalaaktunik Inuktitut tamaat. Taimaa, piniaktunga hamna pilaaktamnik atuklugit ukautitka hivunikhaptini havagaagutikhainut ovalo atukulugit Inuit inuuviviniit ilakatimnut Nunavumiut ovalo takupkailugit kanuk nutaanguyut Inuit taimainmata.
Tikinahuaktatka pihimalugit ukauhivut ovalo inuuvivinivut hakugikhimalutik Nunavumi ovalo piyaagamnik iniktigumayamnut, ukakatigiiginaniaktunga Inuktitut tamaat ilihaktamnik ovalo pitkulugit Nunavumiut hakugikhihimalugit. Ilihaktilikpaktatka ilihakatitka Inuktitut ukautainik ovalo titigagutainik naluhuigumayainik ovalo ikayugumayatka ayoigiaganik Inuktitut. Ilaukatigilikpaktatka tuhagutikhainik mikhaanut Inuit inuuviviniit ovalo ilaukatigivlugit aliahugutainut. Jose akhuukhimanmat Inuit inminiigutainik ovalo takupkainiaktunga aliagiyamnik tuhaktikataklugit Inuktitut ovalo Inuit inuuviviniit havaliguma munakhinut.
Tuhalihaakhimayunga Jose hanahimayuk aatjikutiliugutikhainik Inuktitut ukautainut ovalo titigagutainut atugutikhainik. Naluhuihakhimayatka ilaa, aliagigapkit titigagutainik Inuinaqtut titigagutainut ovalo taimaatut titigalaagama. Taigualaaktunga ovalo titigalaaktunga Inuktitut (syllabics), kitut aliahuktunga ilaa nauyakatigigapkit kinauyugut nunakyuamut Inuuyunga. Titigagutait atugutikhainik Inuktitut nakuutiaktuk kinauyugut Inuit.
Ilihaktatka akhuugutigiyatka ovalo pitkuyatka Inuit tamamik iniktinahualugit ilihagutikhait tikitumayainik, ilaa, ikayugutigilaamagit munagitjutainut hunmat ikpinaktut inminut. Jose ukalakhimayuk, ilihagutikhait kitkaniitut Inuit inuuviviniit tamaktitailigiyiinut. Ihumagiyatka atuklugit ilihagutitka mikhaanut Inuit ovalo ilihagiaktukhimayamnik munakhinut autlaaktakhunga tamaat Kanatami ovalo ukautigilugit ovalo ihumagiyamnik Inuit ovalo Nunavut, aatjikutaatut Jose. Ilaukatigiyumayatka ukauhivut, inuuvivinivut ovalo kanuk ikpinaktut Inuit inminiigutait.
Jose inminik takuyaukataktut hakugiktumik akhuugutainut Nunavumik ovalo atuniaktatka hivumut nuutitigutainik pihimayaanganik Inuit inuuviviniit ovalo ukauhiit tamanahuangilugit.
