(ᒪᐃ 5, 2017 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᓐᖓᕕᒃ ᑎᒥᖓ (ᑐᓐᖓᕕᒃ) ᐊᖓᔪᖅᑳᒧᑦ ᑭᖑᑉᕕᐅᑎᓯᒪᔪᖅ ᔭᐃᒥᓯ ᐃᑦᑐᓗᒃ ᐅᓪᓗᒥ ᑐᓐᖓᓴᐃᖅᑲᐅᔪᖅ ᐱᓇᓱᐊᕈᓯᑦᑎᓐᓂ ᐅᓂᒃᑳᓕᐊᕆᓚᐅᖅᑕᖓᓂᒃ ᒥᐊᔨ ᓴᐃᒪᓐ, ᓄᓇᖃᖅᑳᕐᓯᒪᔪᓄᑦ ᐅᑭᐅᖅᑕᖅᑐᒨᖓᔪᓄᓪᓗ (ᐃᓄᓕᕆᔨᑐᖃᒃᑯᑦ) ᒥᓂᔅᑕᒧᑦ ᑭᒡᒐᑐᖅᑎ ᐅᑭᐅᖅᑕᖅᑐᒨᖓᔪᓄᑦ. ᑕᐃᒎᓯᓕᒃ ᓄᑖᖅ ᐅᑭᐅᖅᑕᖅᑐᒥ ᓯᕗᓕᖃᑎᒌᒍᑎᒃᓴᖅ, ᑖᒃᑯᓇᓂ ᐅᓂᒃᑳᓕᐊᕆᓯᒪᔭᖏᓐᓃᑦᑐᑦ ᑕᑯᓯᒪᔭᒥᒍᑦ ᐊᑐᓕᖁᔨᔾᔪᑏᓪᓗ ᑖᒃᑯᓇᓐᖔᕐᓯᒪᔪᑦ ᓴᐃᒪᓐ ᑲᑎᒪᖃᑎᖃᖃᑦᑕᕐᓯᒪᓂᖏᓐᓂᒃ ᐅᑭᐅᖅᑕᖅᑐᒥ ᒐᕙᒪᓂᒃ, ᑭᒡᒐᖅᑐᐃᔪᓂᒃ ᑲᑐᔾᔨᖃᑎᒌᓂᒃ, ᓄᓇᓕᖕᓂᒃ, ᐊᒻᒪᓗ ᑭᒃᑯᑐᐃᓐᓇᕐᓂᒃ.
“ᑐᓐᖓᕕᒃᑯᑦ ᓇᑯᕐᓴᖅᑐᑦ ᒥᐊᔨ ᓴᐃᒪ ᐱᓕᕆᒻᒪᕆᖃᑦᑕᕐᓂᖓᓂᒃ, ᐊᒻᒪᓗ ᓇᑯᕐᓴᖅᑐᑦ ᐃᓄᓕᕆᔨᑐᖃᒃᑯᓐᓄᑦ ᒥᓂᔅᑕ ᑭᐅᕈᓕᓐ ᐱᐊᓂᑦ ᑎᒃᑯᐊᕐᓯᒍᒪᓯᒪᓂᖓᓂᒃ ᑖᑦᓱᒥᖓ ᑕᑉᕗᖓ ᐱᓇᓱᐊᕋᑦᓴᒧᑦ. ᐅᓂᒃᑳᓃᑦᑐᑦ ᐱᓪᓗᐊᑕᐅᔪᑦ ᓴᓐᖏᓂᖃᕆᐊᓖᑦ ᒐᕙᒪᓕᕆᓂᕐᒧᑦ ᐊᑐᐊᒐᕐᓄᓪᓗ ᓯᕗᓕᕐᓂᕐᒥᒃ, ᐃᓚᒋᔭᐅᓗᑎᒃ ᐱᓇᓱᐊᖅᑕᐅᒋᐊᖃᕐᓂᖓ ᐃᓄᐃᑦ ᐱᔪᓐᓇᐅᑎᖏᓐᓂᒃ ᐋᖅᑭᑦᓱᐃᓂᐊᖅᑐᒥᒃ ᐅᑭᐅᖅᑕᖅᑐᒥ ᐊᐅᓚᑦᓯᒍᑎᒃᓴᒥᒃ ᐊᒻᒪᓗ ᐱᓕᕆᐊᒃᓴᓄᑦ ᐱᔨᑦᓯᕈᑎᓄᓪᓗ ᐊᐅᓚᑦᓯᒍᑎᒃᓴᒥᒃ, ᐃᓚᖃᖅᑐᓂ ᑐᑭᒧᐊᒃᑎᑦᑎᔨᐅᓂᐊᖅᑐᒥᒃ ᐱᓕᐊᒃᓴᓕᖕᒥᒃ ᐃᑲᔫᑎᒃᓴᓂᒃ ᐱᕙᓪᓕᐊᑎᑦᓯᔾᔪᑎᓂᒃ, ᓵᓐᖓᑦᓯᒍᑎᖃᖃᑦᑕᓂᕐᒥᒃ ᓈᖕᒪᖏᑦᑐᓂᒃ ᐊᐳᖅᑕᕈᑕᐅᔪᓂᒃ ᐊᑉᕗᑎᑎᑦᓯᒍᑕᐅᓯᒪᔪᓂᒃ ᐃᓄᖕᓂᒃ ᐊᓯᖏᓐᓂᒃ ᑲᓇᑕᒥᐅᑕᕐᓂᒃ ᑕᒪᐃᓐᓂ ᐃᓅᓯᕐᒥ−ᒪᑭᒪᒍᑎᓂ ᓇᓗᓇᐃᕐᓯᓯᒪᒍᑎᓂᒃ, ᐊᒻᒪᓗ ᒐᕙᒪᑐᖃᒃᑯᑦ ᓯᕗᒧᐊᒃᐸᓪᓕᐊᑎᑦᓯᑦᓴᐅᑎᒋᒍᑎᒃᓴᖏᓐᓂᒃ ᓄᓇᕗᒻᒥ ᐱᖁᑎᕐᔪᐊᓕᕆᔾᔪᑎᓕᒫᓂᒃ,” ᐅᖃᓚᐅᖅᑐᖅ ᐃᑦᑐᓗᒃ.
ᐃᑦᑐᓗᒃ ᓇᓗᓇᐃᕐᓯᓚᐅᖅᑐᖅ ᑐᓐᖓᕕᒃᑯᑦ ᐊᑐᕋᔭᕆᐊᖏᑦ ᓴᐃᒪᓐ ᐅᓂᒃᑳᖏᓐᓂᒃ ᐊᔭᐅᖅᑐᐃᒍᑎᒋᓗᒋᑦ ᐋᔩᕋᕈᑎᒋᓗᒋᓗ ᒐᕙᒪᑐᖃᒃᑯᓐᓄᑦ, ᐃᓚᒋᔭᐅᓗᓂ ᐃᓄᐃᑦ−ᑯᐃᓐ ᑲᑐᔾᔨᓂᒃᑯᑦ ᐊᐅᓚᑦᓯᔾᔪᑕᐅᕙᓪᓕᐊᔪᖅ ᒫᓐᓇ, ᐊᒻᒪᓗ ᐊᓯᖏᓐᓂ ᑖᒃᑯᓄᓐᖓᖓᔪᓂᒃ ᐋᔩᕋᕈᑕᐅᔪᓂ.
