ᓄᓇᕗᑦ ᑐᓐᖓᕕᒃ ᑎᒥᖓᑕ (ᑐᓐᖓᕕᒃ) ᐊᖓᔪᖅᑳᖓ ᐊᓗᑭ ᑰᑦᑎᖅ ᐅᓪᓗᒥ ᖁᕕᐊᒋᔭᖃᖅᑲᐅᔪᖅ ᐃᒪᕐᒥᐅᑕᓕᕆᔨᒃᑯᑦ ᒥᓂᔅᑕᖓ ᑖᒥᓂᒃ ᓕᑉᓛᖕᒃ ᐃᓱᒪᓕᐅᕈᑎᖓᓂᒃ ᐅᓄᕐᓯᒋᐊᕆᓂᕐᒧᑦ ᓄᓇᕗᑦ ᖃᓕᕋᓕᓐᓂᐊᓂᕐᒧᑦ ᑰᑕᓂᒃ 100 ᐳᓴᓐᒧᑦ ᐋᑦᓛᓐᑎᒃ ᐅᐊᖕᓈᓂ ᐃᖃᓗᓕᕆᔩᑦ ᑲᑐᔾᔨᖃᑎᒌᓐᓂᒃ (NAFO) 0A ᐃᖃᓗᒐᓱᑉᕕᖕᒥ ᐊᒻᒪᓗ 90 ᐳᓴᓐ 0B−ᒥ. ᐊᒥᐊᒃᑯᖓ 10 ᐳᓴᓐ 0B-ᒥ ᓄᓇᕕᒃ ᐃᓄᖏᓐᓅᓂᐊᖅᑐᖅ ᑯᐸᐃᒥ.
“ᐃᖃᓗᒐᓱᒃᑏᑦ ᐊᓯᖏᓐᓂ ᑲᓇᑕᒥ ᐊᐅᓚᑦᓯᕕᒋᕙᐅᕙᑦᑐᓂ ᐊᑐᐃᓐᓇᖃᕐᒪᑕ ᐅᓄᕐᓂᕐᐹᓂᒃ ᑰᑕᓂᒃ ᐆᒪᔪᕋᓱᓐᓂᐊᖅᑕᒥᓄᑦ ᐊᒃᑐᐊᔪᓂ ᐃᒪᖁᑎᖏᓐᓂ. ᑐᓐᖓᕕᒃᑯᑦ ᐊᔾᔨᐅᑎᑕᐅᖁᔨᓯᒪᔪᑦ ᑐᓂᔾᔪᑕᐅᔪᓂᒃ ᓄᓇᕗᑦ ᐃᓄᖏᓐᓄᑦ, ᒪᓕᓪᓗᒋᑦ ᒪᑭᑉᐸᓪᓕᐊᔾᔪᑎᒃᓴᓄᑦ ᐊᒻᒪᓗ ᐊᖑᓇᓱᓐᓂᕐᒧᑦ ᐱᔪᓐᓇᐅᑎᖏᓐᓂᒃ ᐊᖏᕈᑕᐅᓯᒪᔪᓂ ᓄᓇᕗᑦ ᐊᖏᕈᑎᖏᓐᓂ,” ᐅᖃᓚᐅᖅᑐᖅ ᑰᑦᑎᖅ. “ᓇᑯᕐᓴᖅᑐᖓ ᒥᓂᔅᑕ ᓚᑉᓛᖕᒃ ᐱᓕᕆᐊᒃᓴᒥᓂᒃ ᐋᖅᑭᓯᑦᓯᐊᓚᐅᕐᒪᑦ ᓈᖕᒪᒋᐊᖅᑐᒃᑯᑦ ᐊᖏᕈᑎᖃᖅᑐᓂ ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑕ ᐅᖃᐅᔾᔨᒋᐊᕈᑎᒋᓚᐅᖅᑕᖓᓂᒃ ᑐᓂᔭᐅᖁᓪᓗᒋᑦ ᖃᓕᕋᓕᓐᓄᑦ ᐅᓄᕐᓯᒋᐊᕈᑎᓕᒫᑦ ᓄᓇᕗᒻᒧᑦ, ᐃᑉᐱᒋᔭᐅᓗᑎᒃ ᐊᒃᑐᐊᓂᖏᑦ ᑐᓐᖓᕕᒋᔭᐅᔪᓄᑦ.”
ᓄᓇᕗᒻᒧᑦ ᐊᒃᑐᐊᔪᓂ ᖃᓕᕋᓕᓐᓂᐊᖅᑏᑦ ᑭᖑᒃᐸᓂᐊᖅᑏᓪᓗ ᐊᕐᕌᒍᑕᒫᑦ ᖃᑭᓯᖃᑦᑕᖅᑐᑦ ᐊᑭᓕᓐᓂᒃ $140 ᒥᓕᔭᓂᒃ, ᐊᒻᒪᓗ ᒫᓐᓇᒫᖑᓚᐅᖅᑐᖅ ᖃᓕᕋᓕᓐᓄᑦ ᐅᓄᕐᓯᒋᐊᕈᑏᑦ ᐊᕐᕌᒍᑕᒫᕐᓯᐅᑎᖏᓐᓂ ᖃᑭᓯᓚᐅᖅᑐᑦ ᐊᑭᓕᓐᓂᒃ $8 ᒥᓕᔭᓐ. ᑐᓐᖓᕕᒃᑯᑦ ᐱᓕᕆᐊᒃᓴᖓ ᓱᓕ ᐱᐊᓂᓐᖏᑦᑐᖅ. ᑐᓴᖅᑎᑦᓯᒍᑕᐅᔪᖅ ᓈᖕᒪᑐᒃᑯᑦ ᐱᕙᓪᓕᐊᓂᐅᒐᓗᐊᖅ ᑐᓂᔭᐅᓂᖏᓐᓂᒃ ᓄᓇᕗᑦ ᐃᖃᓗᓕᕆᔨᖏᑦ ᓄᑖᒥᒃ ᐱᔾᔪᑎᒃᓴᓂᒃ, ᑲᓇᑕ ᒐᕙᒪᖓ ᑐᓂᓯᔭᕆᐊᓕᒃ ᓄᓇᕗᒻᒧᑦ ᑮᓇᐅᔭᓕᐅᕈᑎᒃᓴᑲᓐᓂᒻᒪᕆᒻᒥᒃ ᐋᖅᑭᒍᑎᒃᓴᖓᓂᒃ ᐊᑯᓂᐊᓗᒃ ᕿᓄᐊᕆᓯᒪᔭᑦᑎᓐᓂᒃ ᓇᓕᒧᒋᔭᐅᒍᒪᓪᓗᑕ ᑰᑕᑖᖑᖃᑦᑕᖅᑐᓂᒃ ᐱᔾᔪᑎᒃᓴᑎᓐᓂᒃ. ᓄᓇᕗᑦ ᐊᑐᐃᓐᓇᖃᕆᐊᓕᒃ ᒫᓐᓇ ᐊᑐᖅᑕᐅᕙᑦᑐᓂᒃ ᐱᔾᔪᑎᒃᓴᓂᒃ ᑐᓂᔭᐅᓯᒪᓚᐅᖅᑐᓂᒃ ᓄᓇᕗᒻᒦᖏᑦᑐᓄᑦ ᐃᖃᓗᒐᓱᑦᑎᓐᓄᑦ.
ᑐᑭᓯᒋᐊᒃᑲᓂᕐᕕᒃᓴᖅ:
ᑭᐅᕆ ᒪᒃᓕᔅᑭ
ᑐᓴᐅᒪᔾᔪᑎᓕᕆᔨᒃᑯᑦ ᑐᑭᒧᐊᒃᑎᑦᑎᔨᖓ
ᓄᓇᕗᑦ ᑐᓐᖓᕕᒃ ᑎᒥᖓ
ᐅᖄᓚᐅᑖ: (867) 975-4914 ᐊᑭᖃᓐᖏᑦᑐᖅ 1-888-646-0006
ᐃᑉᐱᐊᔪᒻᒥᒐᖅ: (867) 222-2893
www.tunngavik.com
