ᓴᒃᑯᑕᐅᑲᐅᑎᒋᔭᕆᐊᓕᒃ
(ᒪᐃ 7, 2024 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓ ᖁᕕᐊᓱᒍᑎᖃᖅᑐᑦ ᑲᓇᑕᒥ ᓯᕗᓕᖅᑎᕐᔪᐊᖓᓂᒃ ᔭᔅᑎᓐ ᑐᕉᑐᑉ ᑐᓴᖅᑎᑦᑎᒍᑎᒋᖅᑲᐅᔭᖓᓂᒃ, ᐱᓇᓱᐊᒐᖃᕐᓂᐊᕐᓂᖏᑦ ᐋᖅᑮᓗᑎᑦ ᓄᑖᕐᒥᒃ ᑭᒡᒐᖅᑐᐃᔨᒥᒃ ᑲᓇᑕᒥ ᒪᓕᒐᓕᐅᕐᕕᕐᔪᐊᒃᑯᓐᓄᑦ, ᑲᒥᓯᓇᐅᔪᖅ ᐅᓪᓗᒥ ᓄᓇᑖᕐᓂᕐᒧᑦ ᐊᖏᕈᑎᓂᑦ ᐊᑐᓕᖅᑎᑦᑎᔨᖓᓂᒃ ᐱᑕᖃᖅᑎᑕᐅᒐᓱᐊᕐᓂᐊᓕᕐᓂᖓᓂᒃ.
ᐋᖅᑭᒃᑕᐅᓂᖓ ᑲᒥᓯᓇᐅᑦ ᐅᓪᓗᒥ ᓄᓇᑖᕐᓂᕐᒧᑦ ᐊᖏᕈᑎᓂᒃ ᐊᑐᓕᖅᑎᑦᑎᔨ ᑕᑯᒃᓴᐅᑎᑦᑎᕗᖅ ᐱᕚᓪᓕᒻᒪᕆᓕᕐᓂᖏᑦ ᐱᓪᓚᑦᑖᒃᑯᑦ ᐃᖅᑲᓇᐃᔭᖃᑎᖃᖅᑐᑎᑦ ᑲᓇᑕᒥ ᒐᕙᒪᒃᑯᓐᓂ. ᐅᓪᓗᒥᐅᔪᖅ ᓄᓇᑖᕐᓂᕐᒧᑦ ᐊᖏᕈᑏᑦ ᑐᙵᕕᐅᒻᒪᑕ ᐃᓄᐃᑦ−ᒐᕙᒪᑐᖃᒃᑯᑦ ᐱᓕᕆᖃᑎᒌᓐᓂᖏᖕᓄᑦ, ᐊᒻᒪᓗ ᑕᒪᐃᓐᓂ ᐊᑐᓕᖅᑎᑕᐅᒍᑎᑦ ᐱᕚᓪᓕᖅᑎᑦᑎᒐᔭᓪᓚᕆᑦᑐᑦ ᐃᓄᐃᑦ ᓄᓇᓕᖏᑦᑕ ᖃᓄᐃᓐᓂᖏᖕᓂᒃ,” ᐅᖃᖅᑐᓂ ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓ ᐊᓗᑭ ᑰᑦᑎᖅ. “ᓄᓇᕗᑦ ᑐᙵᕕᒃ ᑎᒥᖓ ᑎᑎᕋᖃᑎᖃᕆᐊᙵᕈᒪᒻᒪᕆᓕᖅᑐᑦ ᐱᖁᔭᕐᒥᒃ ᐱᑕᖃᕆᐊᓕᒻᒥᒃ ᐋᖅᑭᒃᑕᐅᖁᓪᓗᒍ ᑲᒥᓯᓇ ᐅᓪᓗᒥᐅᔪᖅ ᓄᓇᑖᕐᓂᕐᒧᑦ ᐊᖏᕈᑎᓂᑦ ᐊᑐᓕᖅᑎᑦᑎᔨᖏᖕᓂᒃ.”
ᓄᓇᕗᑦ ᑐᙵᕕᒃ ᑎᒥᖓ ᐊᔭᐅᕆᓯᒪᕗᑦ ᐃᓛᒃᑰᖅᑐᒥᒃ ᑎᒥᒥᒃ ᕿᒥᕐᕈᓇᒃᑲᔭᖅᑐᑦ ᐊᒻᒪᓗ ᐅᐊᑦᑎᓗᑎᑦ ᑲᓇᑕᒥ ᒐᕙᒪᒃᑯᑦ ᐊᑐᓕᖅᑎᑦᑎᓂᖓᓂᒃ ᓄᓇᕗᑦ ᓄᓇᑖᕐᓂᕐᒧᑦ ᐊᖏᕈᑎᖓᓂᒃ, ᐊᒻᒪᓗ ᐊᓯᖏᖕᓂᒃ ᐅᓪᓗᒥᐅᔪᑦ ᓄᓇᑖᕐᓂᕐᒧᑦ ᐊᖏᕈᑎᓂᑦ, ᐃᓚᐅᖃᑕᐅᓕᓚᐅᖅᓯᒪᒻᒪᑕᓂᑦ ᐅᓪᓗᒥᐅᔪᖅ ᓄᓇᑖᕐᓂᕐᒧᑦ ᐊᖏᕈᑎᖃᖅᑐᓄᑦ ᐋᖅᑭᒃᑐᒥᓂᒥᐅᓪᓗᑎᑦ ᓄᓇᑖᕐᓂᕐᒧᑦ ᐊᖏᕈᑎᓕᐅᖅᓯᒪᔪᑦ ᑭᒡᒐᖅᑐᐃᔨᖏᑦ 2003-ᖑᑎᓪᓗᒍ. ᑲᒥᓯᓇᑕᖃᕐᓂᖓ ᑲᓇᑕᒥ ᒪᓕᒐᓕᐅᕐᕕᕐᔪᐊᒃᑯᓐᓄᑦ ᓵᑕᐅᓯᒪᖃᑦᑕᕋᔭᖅᑐᒥᒃ ᐊᑐᓕᖅᑎᑦᑎᓂᕐᒧᑦ ᐅᓪᓗᒥᐅᔪᖅ ᓄᓇᑖᕐᓂᕐᒧᑦ ᐊᖏᕈᑎᓂᑦ ᐊᑐᓕᖅᑎᑦᑎᔨᐅᒐᔭᖅᑐᒥᒃ ᐊᔾᔨᐅᙱᑦᑐᒻᒪᕆᐅᕗᖅ ᐱᐅᔪᒃᑯᑦ ᐱᕙᓪᓕᐊᓂᖃᖅᑐᑎᑦ ᐃᖅᑲᓇᐃᔭᖃᑎᒌᓐᓂᖏᖕᓂᒃ ᓄᓇᕗᒻᒥᐅᑦ ᐃᓄᐃᑦ ᐊᒻᒪᓗ ᑲᓇᑕᒥ ᒐᕙᒪᒃᑯᑦ.
-30-
ᐱᕙᓪᓕᐊᔪᓕᕆᔨᒃᑯᓐᓄᑦ ᖃᐅᔨᒃᑲᕋᒃᓴᖅ:
ᑭᐊᕙᓐ ᖃᑉᓗᑦᓯᐊᖅ
ᑐᑭᒧᐊᑦᑎᑦᑎᔨ ᑐᓴᐅᒪᔪᓕᕆᔨᒃᑯᓐᓄᑦ
ᓄᓇᕗᑦ ᑐᙵᕕᒃ ᑎᒥᖓ
