ᓄᓇᕗᑦ ᑐᓐᖓᕕᒃᑯᑦ ᑎᒥᖓ (ᑐᓐᖓᕕᒃ) ᐃᑲᔫᓯᐊᒥᒃ ᑐᓐᓂᖅᑯᓯᐊᖅᑎᑦᓯᒋᐊᓐᖓᓚᐅᖅᑐᑦ ᑐᓵᔨᐅᓂᕐᒧᑦ ᐃᓕᓐᓂᐊᖅᑎᒧᑦ ᑐᓐᓂᖅᑯᑎᒃᓴᒥᒃ ᓯᕗᓪᓕᕐᐹᒥ ᐊᒻᒪᓗ ᑐᒡᓕᐊᓂ ᐊᕐᕌᒍᒥ ᐃᓕᓐᓂᐊᖅᑏᓐᓄᑦ ᓄᓇᕗᑦ ᓯᓚᑦᑐᓴᕐᕕᖕᒥ ᑐᓵᔨᓄᑦ ᐃᓕᓐᓂᐊᖅᑐᓂᒃ.

ᑐᓐᓂᖅᑯᑕᐅᔪᖅ ᖁᑦᓯᑦᑐᒦᑦᑐᓄᑦ ᐊᔪᕈᓐᓃᕐᓴᐅᑎᒥᒍᑦ ᐊᒻᒪᓗ ᑐᓂᓯᔪᑦ ᐊᑕᐅᓯᕐᒧᑦ ᓯᕗᓪᓕᕐᐹᒥ ᐊᕐᕌᒍᒥ ᐃᓕᓐᓂᐊᖅᑎᒧᑦ ᐊᒻᒪᓗ ᐊᑕᐅᓯᕐᒧᑦ ᑐᒡᓕᐊᓂ ᐊᕐᕌᒍᐊᓂ ᐃᓕᓐᓂᐊᖅᑎᒧᑦ ᐊᑐᓂᑦ ᑐᓂᔭᐅᓪᓗᑎᒃ $1,000. ᑐᓂᔭᐅᔫᒃ ᓂᕈᐊᖅᑕᐅᓚᐅᖅᑑᒃ ᐃᓕᓐᓂᐊᑎᑦᓯᔨᖏᓐᓄᑦ.

ᐊᕐᕌᒍᑦᑎᓐᓂ ᑐᓂᔭᐅᔫᒃ ᐄᕆ−ᑖᓐ ᐸᒥᐅᓕᒃ (ᓯᕗᓪᓕᖅ ᐊᕐᕌᒍ), ᐊᒻᒪᓗ ᑑᐱ ᐅᑕᒃ (ᑐᒡᓕᐊᓂ ᐊᕐᕌᒍᒥ). ᑕᒪᒃᑮᒃ ᐃᓕᓐᓂᐊᖅᑏᑦ ᐱᐊᓂᓚᐅᖅᑐᑦ ᐃᓕᓐᓂᐊᕌᓂᑦᓱᑎᒃ ᐃᓄᒃᑎᑐᑦ ᑐᓵᔨᐅᓂᕐᒥᒃ ᐃᓕᓐᓂᐊᓂᕐᒥᒃ ᐃᖃᓗᓐᓂ.

“ᑐᓐᖓᕕᒃᑯᑦ ᐅᐱᒍᓱᑉᐳᑦ ᐃᑲᔪᕐᓂᕐᒥᒃ ᑐᓵᔨᐅᓂᕐᒥᒃ ᐃᓕᓐᓂᐊᖅᑐᓂᒃ ᓄᓇᕗᒻᒥ. ᖁᕕᐊᒃᑯᑎᕚᒃᑲ ᑖᒃᑯᐊ ᒪᕐᕉᒃ ᐃᓅᒃ ᐅᖃᐅᓯᑦᑎᓐᓂᒃ ᐆᒪᐃᓐᓇᑎᑦᓯᓂᐊᕐᒪᑎᒃ ᐊᒻᒪᓗ ᐃᓕᓐᓂᐊᕋᓱᐊᕐᓂᖏᓐᓄᑦ. ᑕᑯᓐᓇᒐᑦᓴᓯᐊᕚᒃ ᐃᓕᓐᓂᐊᖅᑏᒃ ᐃᓕᓐᓂᐊᕈᒪᔪᓄᑦ ᐃᖅᑲᓇᐃᔮᖅᑖᐸᓪᓕᐊᓗᑎᒃ ᐃᓄᒃᑎᑐᑦ,” ᑰᑦᑎᖅ ᐅᖃᖅᑐᖅ.

ᑐᓐᖓᕕᒃᑯᑦ ᐃᑲᔪᕈᑎᖃᖃᑦᑕᕐᒥᔪᑦ ᐃᓄᓐᓂᒃ ᐃᓕᓐᓂᐊᖅᑐᓂᒃ ᐃᓚᒋᔭᐅᑎᑦᓯᓪᓗᑎᒃ ᐱᖓᓱᓂᒃ−ᐱᓇᓱᐊᕈᓯᕐᓂᒃ ᐃᖅᑲᓇᐃᔭᕆᐅᕐᓴᑎᓪᓗᒋᑦ ᐃᓕᓐᓂᐊᖅᑕᒥᒍᑦ.

ᑐᑭᓯᒋᐊᒃᑲᓂᕐᕕᒃᓴᖅ:

ᑭᐅᕆ ᒪᒃᓕᔅᑭ
ᑐᓴᐅᒪᔾᔪᑎᓕᕆᔨᒃᑯᑦ ᑐᑭᒧᐊᒃᑎᑦᑎᔨᖓ
ᐅᖄᓚᐅᑖ: (867) 975-4914 ᐊᑭᖃᓐᖏᑦᑐᖅ: 1-888-646-0006 ᐃᑉᐱᐊᔪᒻᒥᒐᖅ: 867-222-2893

www.tunngavik.com