ᓴᖅᑭᑕᐅᑦᓴᐅᑎᒋᔭᕆᐊᓕᒃ
ᒪᑭᒋᐊᖅᑕ ᐊᒻᒪᓗ NCC ᐱᕙᓪᓕᐊᑎᑦᑎᓂᕐᒧᑦ ᑎᒥᖓ ᑐᓴᖅᑎᑦᓯᔪᑦ $4.9−ᒥᓕᔭᓐ ᑲᑐᔾᔨᓗᑎᒃ ᐱᓕᖕᒪᒃᓴᐅᑎᑦᓴᓂᒃ ᓄᓇᕗᒻᒥ ᐃᓄᐃᑦ ᐃᓪᓗᓕᐅᕆᐅᖅᓴᑎᑦᓯᓂᕐᒧᑦ ᐊᔪᕈᓐᓃᖅᓴᐅᑎᑦᓴᓂᒃ
(ᐄᑉᕈ 9, 2024 – ᐃᖃᓗᐃᑦ, ᓄᓇᕗᑦ) ᐅᓪᓗᒥ, ᒪᑭᒋᐊᖅᑕ ᐃᓄᐃᑦ ᐱᓕᒻᒪᓴᕐᓂᕐᒧᑦ ᑯᐊᐳᕇᓴᓐ (ᒪᑭᒋᐊᖅᑕ ᐊᒻᒪᓗ NCC ᐱᕙᓪᓕᐊᑎᑦᓯᔩᑦ (NCCD) ᑐᓴᖅᑎᑦᓯᓚᐅᖅᑐᑦ ᑲᑐᔾᔨᓗᑎᒃ ᐊᐅᓚᑦᓯᓂᐊᓂᕐᒥᒃ ᐊᔪᕈᓐᓃᖅᓴᐅᑎᑦᓴᓂᒃ ᐱᓕᖕᒪᒃᓴᐅᑎᑎᒍᑦ ᐊᒻᒪᓗ ᐃᖅᑲᓇᐃᔮᓄᑦ ᐸᕐᓇᓯᒪᒍᑎᑦᓴᖏᓐᓂᒃ ᓄᓇᕗᒻᒥ ᐃᓄᐃᑦ. ᐊᖏᕈᑎ ᐱᓕᖕᒪᑦᓴᐅᑎᑦᓴᓄᑦ ᑮᓇᐅᔭᓖᒍᑎ ᒪᑭᒋᐊᖅᑕᑯᓐᓂᒃ ᐊᕐᕌᒍᓄᑦ 6-ᓄᑦ ᐊᒻᒪᓗ ᑕᑯᒍᑕᐅᓂᐊᖅᑐᖅ NCC−ᑯᑦ ᐱᓕᖕᒪᑦᓴᑎᑦᓯᓂᖓᓂᒃ 90−ᓅᖓᔪᓂᒃ ᐃᓄᓐᓂᒃ ᓴᓇᔭᕆᐅᖅᓴᖅᑐᓂᒃ ᐃᓪᓗᓕᐅᕐᓂᕐᒧᑦ. ᐃᓚᐅᔪᑦ ᑕᕝᕗᖓ ᑎᒍᓚᓗᑎᒃ ᐱᓕᖕᒪᓴᖅᑎᑕᐅᓂᐊᖅᑐᑦ, ᐊᒻᒪᓗ ᐃᖅᑲᓇᐃᔭᖃᑎᖃᕐᓗᑎᒃ ᓇᓗᓇᐃᒃᑯᑕᓕᖕᓂᒃ ᓴᓇᔨᒻᒪᕆᐅᓂᕐᒧᑦ.
ᐃᓪᓗᓕᐅᕐᓂᖅ ᐅᔾᔨᓇᖅᑐᒻᒪᕆᒃ ᐃᓚᒋᔭᐅᓂᖓ ᓄᓇᕗᒻᒥ ᒪᑭᒪᔾᔪᑎᓄᑦ. ᐊᑭᓖᓯᒪᓂᖅ ᐱᓕᖕᒪᑦᓴᐅᑎᓄᑦ ᐊᒻᒪᓗ ᐃᖅᑲᓇᐃᔮᓄᑦ ᐸᕐᓇᓯᒪᒍᑎᑦᓴᖏᓐᓂᒃ ᓄᓇᕗᒻᒥ ᐃᓄᐃᑦ ᐃᑯᓪᓚᕈᑕᐅᓂᐊᖅᑐᖅ ᖃᓪᓗᓈᓃᙶᖅᑐᓂᒃ ᑎᑭᑎᑦᓯᖃᑦᑕᕆᐊᖃᕐᓂᕐᒥᒃ ᐊᒻᒪᓗ ᐃᑲᔪᕐᓗᓂ ᐊᐅᓚᑦᓯᓂᕐᒥᒃ ᐊᑭᖏᓐᓂᒃ ᐃᓪᓗᓕᐅᕐᓂᕐᒧᑦ ᐊᒻᒪᓗ ᐃᓪᓗᓂᒃ ᐋᖅᑭᐅᒪᑎᑦᓯᓂᕐᒧᑦ. ᑖᒃᑯᐊ ᑮᓇᐅᔭᑦ ᐱᓕᖕᒪᑦᓴᐅᑎᑦᓴᐅᓂᐊᖅᑐᑦ ᑕᒪᐃᓐᓂ ᓄᓇᕗᑦ ᓄᓇᓕᖏᓐᓂ 6-ᓂ ᐊᕐᕌᒍᓂ. 2024-25 ᐊᕐᕌᒍᐊᓂ ᐅᑯᐊ ᓯᑕᒪᐅᔪᖅᑐᑦ ᓄᓇᓖᑦ ᐱᓕᖕᒪᓴᕐᓂᕐᒧᑦ ᐊᑐᐃᓐᓇᐅᑎᑦᓯᕕᐅᓂᐊᖅᑐᑦ ᐊᑐᐃᓐᓇᐅᔪᓂᒃ: ᐃᑉᐱᐊᕐᔪᒃ, ᐊᕐᕕᐊᑦ, ᖃᒪᓂ’ᑐᐊᖅ, ᐃᖃᓗᑦᑑᑦᑎᐊᖅ, ᐅᖅᓱᖅᑑᖅ, ᐃᖃᓗᐃᑦ, ᑲᖏᕐᖠᓂᖅ ᐊᒻᒪᓗ ᑕᓗᕐᔪᐊᖅ.
ᐱᓕᖕᒪᑦᓴᐅᑎ ᒪᓂᒪᑎᑕᐅᓂᐊᖅᑐᖅ ᐃᓄᒃᑐᑦ ᖃᓪᓗᓈᑐᓪᓗ.
ᐅᖃᐅᓯᐅᓯᒪᔪᑦ
“ᐃᓪᓗᓕᐅᕆᐅᖅᓴᓂᕐᒧᑦ ᐃᓕᓐᓂᐊᖅᑕᐅᔪᖅ ᑎᒍᓯᓇᓱᐊᒃᑲᓐᓂᕈᑎᑦᓴᐅᓗᓂ ᓄᓇᕗᒻᒥ ᐃᓄᐃᑦ ᐃᖅᑲᓇᐃᔮᓂᒃ ᐃᑲᔫᑎᒍᓐᓇᖅᑐᓂᒃ ᐊᖏᕐᕋᑦᓴᓕᐅᕐᓂᕐᒥᒃ ᐊᒻᒪᓗ ᐱᖁᑎᕐᔪᐊᓂᒃ ᑐᐊᕕᕐᓇᑐᒃᑯᑦ ᐱᔭᕆᐊᓕᑦᑎᓐᓂᒃ. ᐱᓗᐊᖅᑐᒥ ᓄᓇᕗᒻᒥ ᐃᓄᓐᓄᑦ ᐃᓚᒋᔭᐅᔾᔪᑕᐅᒍᓐᓇᓂᐊᖅᑐᑦ ᐊᑐᓕᖅᑕᐅᓂᖏᓐᓄᑦ ᐊᖏᕐᕋᑦᓴᓕᐅᓚᐅᖅᑕ ᐱᓇᓱᐊᒐᐅᔪᒧᑦ, ᓄᓇᕗᒻᒥ ᐃᓄᐃᑦ ᐃᓪᓗᖏᓐᓄᑦ ᐊᐅᓚᔾᔭᐃᒍᑎᑦᓴᑦ ᐸᕐᓇᐅᑎᓄᑦ (NIHAP) ᐊᒻᒪᓗ ᑲᓱᕈᑕᐅᓗᓂ ᐱᖁᑎᕐᔪᐊᑎᒍᑦ ᐊᐳᖅᓯᒪᒍᑕᐅᕙᑦᑐᓂ.”
— ᐊᓗᑭ ᑰᑦᑎᖅ, ᐊᖓᔪᖅᑳᖅ ᓄᓇᕗᑦ ᑐᙵᕕᒃ ᑎᒥᖓᓄᑦ ᐊᒻᒪᓗ ᐃᒃᓯᕙᐅᑕᖅ ᒪᑭᒋᐊᖅᑕᒃᑯᓐᓄᑦ
“NCC ᐱᕙᓪᓕᐊᑎᑦᑎᓂᕐᒧᑦ ᑎᒥᖓ “(NCCD)” ᖁᔭᓕᔪᑦ ᑲᑐᔾᔨᖃᑎᖃᕐᓂᐊᓂᕐᒥᓂᒃ ᒪᑭᒋᐊᖅᑕᑯᓐᓂᒃ ᐊᐅᓚᑦᓯᓂᕐᒥᒃ ᐃᓕᓐᓂᐊᕈᑎᑦᓴᖏᓐᓂᒃ ᐃᓄᐃᑦ ᓄᓇᕗᒻᒥ. ᑖᓐᓇ ᐱᓕᕆᐊᖅ ᐃᑲᔫᑎᔪᖅ ᐊᐅᓚᑦᓯᓂᕐᒥᒃ ᐃᓚᖓᓂᒃ ᑐᕌᒐᓪᓗᐊᑕᕐᓂᒃ ᓄᓇᕗᒻᒥ 3000 ᐊᖏᕈᑎᓂ ᐊᒻᒪᓗ ᓄᓇᕗᒻᒥ ᐃᓄᐃᑦ ᐃᓪᓗᖏᓐᓄᑦ ᐊᐅᓚᔾᔭᐃᓂᕐᒧᑦ ᐸᕐᓇᐅᑎᓂ ᐱᕙᓪᓕᐊᑎᑦᓯᒍᑎᑦᓴᓂᒃ ᐃᓄᓐᓂᒃ ᐃᖅᑲᓇᐃᔭᖅᑎᑖᒃᑲᓂᕐᓂᕐᒥᒃ ᐊᒻᒪᓗ ᐃᓄᐃᑦ ᐱᕕᑦᓴᖃᖅᑎᑕᐅᓗᑎᒃ ᐃᑲᔫᑎᖃᑦᓯᐊᓂᐊᖅᑐᒥᒃ ᐃᖅᑲᓇᐃᔮᖃᕐᓂᕐᒥᒃ ᐃᖅᑲᓇᐃᔮᓂᓪᓗ ᐊᖏᕐᕋᑦᓴᐅᔪᓂᒃ ᐃᓪᓗᓕᐅᕐᓂᕐᒥᒍᑦ ᐊᒻᒪᓗ ᐃᓪᓗᓕᕆᔨᐅᔪᓂ. ᐊᖏᕈᑎᒋᓯᒪᐃᓐᓇᖅᑕᕗᑦ ᑖᓐᓇ ᑐᕌᒐᖅ ᐱᓕᖕᒪᑦᓴᖅᑎᑦᓯᖃᑦᑕᕐᓂᖅ ᑲᔪᓯᖁᓪᓗᒍ ᐸᕐᓇᓯᒪᑦᓯᐊᑲᓐᓂᕈᑎᑦᓴᖏᓐᓂᒃ ᐱᕈᖅᐸᓪᓕᐊᑲᓐᓂᕈᑎᑦᓴᖏᓐᓂᓪᓗ ᓄᓇᕗᒻᒥ ᐃᓄᐃᑦ ᐃᖅᑲᓇᐃᔮᓄᑦ ᑭᖑᕚᕇᕋᓴᐅᓂᐊᖅᑐᓄᑦ.”
— ᕼᐊᐅᕆ ᕙᓚᐅᕋᑎ, ᐃᑦᓯᕙᐅᑕᖓ ᑲᑎᒪᔩᑦ NCCD−ᑯᓐᓂ
-30-
ᑐᓴᖅᑎᑦᓯᒍᑕᐅᔪᓂᒃ ᖃᐅᔨᒋᐊᕐᕕᑦᓵᒃ:
ᑭᐊᕕᓐ ᑲᑉᓗᑦᓯᐊᖅ
ᑐᑭᒧᐊᒃᑎᑦᑎᔨ ᑐᓴᐅᒪᔾᔪᑎᓕᕆᔨᒃᑯᓐᓂ
ᓄᓇᕗᑦ ᑐᙵᕕᒃ ᑎᒥᖓ
ᕉᐃᓇ ᕼᐊᐅᔅ
ᑐᑭᒧᐊᒃᑎᑦᑎᔨ ᑯᐊᐳᕇᓴᒃᑯᑦ ᐱᔨᑦᓯᖅᑎᖏᓐᓂᒃ
NCC ᑮᓇᐅᔭᓕᐅᕋᓱᐊᖅᑏᑦ ᑲᑐᔾᔨᖃᑎᒌᑦ ᑎᒥᖓ
