ᐃᓄᐃᑦ ᕿᒪᒃᑕᐅᓯᒪᔪᑦ ᐃᓄᐊᖅᑕᐅᓪᓗᑎᒃ ᐃᓅᔪᓐᓃᕐᓯᒪᔪᓄᑦ ᓇᓗᓇᐃᖁᔭᐅᕗᑦ ᑲᓇᑕᓕᒫᕐᒥ ᑭᓪᓕᓯᓂᐊᖅᑎᑯᓐᓄᑦ
(ᔫᓂ 12, 2017 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓ ᐊᓗᑭ ᑰᑦᑎᖅ ᐅᓪᓗᒥ ᐅᖃᖅᑲᐅᕗᖅ ᑕᐃᒃᑯᐊ ᐃᓄᐃᑦ ᐅᓂᒃᑳᕈᒪᔪᑦ ᐅᑎᙲᓇᕐᓯᒪᔪᑦ ᐊᒻᒪᓗ ᐃᓄᐊᖅᑕᐅᓯᒪᔪᑦ ᓄᓇᖃᖅᑳᓯᒪᔪᑦ ᐊᕐᓇᐃᑦ ᐊᒻᒪᓗ ᓂᕕᐊᕐᓯᐊᑦ ᐱᓪᓗᒋᑦ ᑲᓇᑕᓕᒫᕐᒥ ᑭᓪᓕᓯᓂᐊᖅᑎᓄᑦ ᓇᓗᓇᐃᕆᐊᖃᖅᐳᑦ ᑎᑎᕋᕐᕕᖓᓐᓄᑦ ᑭᓪᓕᓯᓂᐊᖅᑏᑦ.
ᐅᕝᕙᓗ ᐊᑭᓕᕆᐊᖃᙱᑦᑐᒧᑦ ᐅᖄᓚᓗᑎᒃ ᐅᕗᖓ 1-844-348-4119-ᒧᑦ. ᐃᓄᐃᑦ ᐊᐱᕆᔭᐅᒐᔭᕐᐳᑦ ᑭᓇᐅᒪᖔᖅ ᐊᑎᖓ, ᖃᓄᕐᓗ ᖃᐅᔨᒃᑲᑦᑕᐅᔪᓐᓇᕐᒪᖔᑦ ᐊᒻᒪᓗ ᓇᓂᒥᐅᑕᐅᖕᒪᖔᑦ. ᑎᑎᕋᕐᕕᖓᑦ ᐃᓄᖕᓂᒃ ᐃᖅᑲᐅᒪᔭᕐᒥᓂᒃ ᐅᕝᕙᓗ ᐅᓂᒃᑳᖁᔭᐅᒐᔭᕐᑐᑦ ᐃᓚᒥᑕ ᒥᒃᓵᓄᑦ ᓇᓗᓇᐃᕈᑎᓕᐅᓕᕐᐸᑦ. ᐃᓄᐃᑦ ᐅᖃᓪᓚᒍᓐᓇᕐᕕᖃᖅᑎᑕᐅᓂᐊᕐᐳᑦ ᐃᓄᒃᑐᑦ ᐅᕝᕙᓗ ᖃᓪᓗᓈᑐᑦ ᓇᓗᓇᐃᖅᓯᕙᓪᓕᐊᑎᓪᓗᒋᑦ. ᓇᓗᓇᐃᖅᓯᒍᑎᓂᒃ ᐱᔭᕇᖅᑎᓪᓗᒋᑦ, ᑎᑎᕋᕐᕕᖓᓐᓂ ᐱᓕᕆᔨᐅᔪᒧᑦ ᐅᖄᓚᕕᐅᒐᔭᕋᕕᑦ ᓇᓗᓇᐃᖅᓯᒍᑏᑦ ᐱᔭᕇᖅᑕᐅᓂᐊᕐᒪᑕ.
“ᐊᒃᓱᒻᒪᕆᐊᓗᒃ ᐱᒻᒪᕆᐅᕗᖅ ᐃᓄᐃᑦ ᐱᖃᑕᐅᔭᕆᐊᖃᓐᓂᖏᑦ ᑭᓪᓕᓯᓂᐊᖅᑐᓄᑦ ᑐᑭᓯᓯᒪᑦᑎᐊᓂᕐᓴᐅᖁᓪᓗᑕ ᓂᖓᕐᓂᐅᕙᒃᑑᑉ ᐱᓪᓗᒍ ᐃᓅᔪᓐᓃᕈᑕᐅᕙᒻᒪᑦ ᐊᒥᓱᓄᑦ ᐊᒻᒪᓗ ᐃᓚᔮᕆᓂᒃ ᓱᕋᑦᑎᕆᕙᓐᓂᖓᓄᑦ. ᑎᓕᐅᕈᒪᕙᒃᑲ ᐃᓄᐃᑦ ᐃᓚᐃᖅᓯᒪᔪᑦ ᐃᓄᐊᖅᑕᐅᔪᒥᒃ ᖃᐅᔨᒃᑲᐃᖁᓪᓗᒋᑦ ᑎᑎᕋᕐᕕᖓᓂᒃ ᐊᒻᒪᓗ ᐅᓂᒃᑳᖃᖁᓪᓗᒋᑦ ᐃᓚᐃᕐᓯᒪᓂᕐᒥᓂᒃ ᐊᓈᓇᑦᑎᐊᒋᔭᕐᒥᓂᒃ, ᐊᖓᔪᒥᓂᒃ, ᓄᑲᕐᒥᓂᒃ, ᓄᐊᕐᒥᓂᒃ, ᐊᙵᕐᒥᓂᒃ ᐊᒻᒪᓗ ᐊᑦᑕᒥᓂᒃ ᐊᔭᒥᓂᓪᓗ ᐃᓅᒍᓐᓃᖅᑎᑕᐅᓯᒪᒻᒪᑕ ᑕᒪᐅᓇᑐᐃᓐᓇᖅ,” ᐅᖃᖅᑐᖅ ᑰᑦᑎᖅ.
ᑲᓇᑕᓕᒫᕐᒥ ᑭᓪᓕᓯᓂᐊᖅᑏᑦ ᐅᑎᙲᓇᕐᓯᒪᔪᓂᒃ ᐊᒻᒪᓗ ᐃᓄᐊᖅᑕᐅᓯᒪᔪᓂᒃ ᓄᓇᖃᖅᓯᒪᔪᓂᒃ ᐊᕐᓇᓂᒃ ᐊᒻᒪᓗ ᓂᕕᐊᕐᓯᐊᓂᒃ ᐱᓕᕆᐊᒃᓴᖃᖅᑎᑕᐅᓯᒪᒻᒪᑕ ᖃᐅᔨᓴᓐᓂᐊᕐᓗᑎᒃ ᐊᒻᒪᓗ ᐅᓂᒃᑳᓕᐅᕆᐊᖃᖅᑐᑎᒃ ᐱᔾᔪᑕᐅᔪᓂᒃ ᐊᔾᔨᒌᙱᑦᑐᒃᑯᑦ ᓂᖓᕐᓂᐅᔪᒥᒃ ᓄᓇᖃᖅᑳᖅᓯᒪᔪᓂᒃ ᐊᕐᓇᓂᒃ ᐊᒻᒪᓗ ᓂᕕᐊᕐᓯᐊᓂᒃ ᑲᓇᑕᒥ ᑐᑭᓯᓇᓱᒃᑐᑎᓪᓗ ᐊᔾᔨᒌᐸᓗᒍᑎᖏᓐᓂᒃ ᐊᒻᒪᓗ ᐱᔾᔪᑕᐅᓗᐊᖅᑐᓂᒃ.
ᑐᑭᓯᒋᐊᒃᑲᓐᓂᕈᒪᒍᕕᑦ ᓱᓕ:
ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᑦ
ᐅᖄᓚᐅᑦ:
ᐅᖓᓯᒃᑐᒥᒃ ᐊᑭᖃᖏᑦᑐᖅ:
