ᓄᓇᕗᑦ ᑐᓐᖓᕕᒃᑯᓐᓂ ᐊᖓᔪᖅᑳᒧᑦ ᑭᖑᕝᕕᐅᑎᓯᒪᔪᖅ ᔭᐃᒥᓯ ᐃᑦᑐᓗᒃ ᐅᓪᓗᒥ ᑐᓴᖅᑎᑦᓯᔪᖅ ᑐᓐᖓᕕᒃᑯᑦ ᐊᒻᒪᓗ ᐊᕕᑦᑐᕐᓯᒪᓂᕐᓂ ᐃᓄᐃᑦ ᑲᑐᔾᔨᖃᑎᒌᑦ ᐊᔪᐃᓐᓇᕆᐊᖅᑲᐅᔪᑦ ᐃᓄᐃᑦ ᐱᔪᓐᓇᐅᑎᖏᑎᒍᑦ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᓂ ᐋᖅᑭᒋᐊᒃᑲᐃᔨᒃᑰᖁᔨᓕᖅᑐᑎᒃ ᐋᖅᑭᒍᑎᒃᓴᖓᓂᒃ 16-ᓂᒃ ᐅᑭᐅᓂᒃ ᑭᖑᕙᕐᓯᒪᔪᒧᑦ ᐋᖅᑭᑦᓯᒪᐅᑎᒋᓂᐊᖅᑕᖓᓂᒃ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐃᑲᔫᓯᐊᖅᑖᕈᑎᓄᓪᓗ ᐊᖏᕈᑏᑦ ᑲᓇᑕᒥ ᑰᑐᖃᕐᓄᑦ ᓄᓇᕗᒻᒥ. ᐃᓛᒃᑰᖓᓂᖓᒍᑦ 9 ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᓂ, ᑲᓇᑕ ᒐᕙᒪᖓ ᑲᒪᔭᕆᐊᖃᖅᑎᑕᐅᒻᒪᑦ ᐊᖏᖃᑎᖃᕈᓱᐊᕐᓂᕐᒥᒃ ᐃᓄᖕᓂᒃ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐃᑲᔫᓯᐊᖅᑖᕈᑎᓄᓪᓗ ᐊᖏᕈᑎᓂᒃ ᑰᑐᖃᕐᓄᑦ ᓄᓇᕗᒻᒥ. ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᑎᒍᑦ ᐊᑐᖅᑕᐅᔭᕆᐊᓕᒃ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐃᑲᔫᓯᐊᖅᑖᕈᑎᓄᓪᓗ ᐊᖏᕈᑏᑦ ᑲᓇᑕᓕᒫᒥ ᑰᑐᖃᕐᓄᑦ ᐋᖅᑭᑦᑕᐅᓯᒪᒋᐊᖃᓚᐅᖅᑐᑦ 1998-ᒥ.
ᐃᑦᑐᓗᒃ ᑐᓴᖅᑎᓯᒍᑎᖓ ᐅᖃᓚᐅᖅᑎᓪᓗᒍ ᐱᓇᓱᐊᕈᓯᐅᓚᐅᖅᑐᒥᒃ ᓄᓇᕗᑦ ᒪᓕᒐᓕᐅᕐᕕᖓᓂ ᐊᕙᑎᓕᕆᔨᒃᑯᑦ ᒥᓂᔅᑕᖓ ᔮᓂ ᒪᐃᒃ, ᐅᖃᓚᐅᕐᒪᑦ ᑐᓐᖓᕕᒃᑯᑦ ᐱᔾᔪᑕᐅᓂᖏᓐᓂᒃ ᑭᖑᕙᕐᓯᒪᓂᖏᓐᓂᒃ ᐋᖅᑭᑦᓯᒪᔭᕆᐊᖃᓕᖅᑲᒻᒥᖏᑦᑐᓂᒃ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐃᑲᔫᓯᐊᖅᑖᕈᑎᒃᓴᓄᓪᓗ ᐊᖏᕈᑏᑦ. “ᐊᐃᕙᔨᕗᑦ ᐱᓇᓱᐊᓪᓚᕆᖃᑦᑕᕐᓯᒪᔪᑦ ᐅᑭᐅᕋᓴᕐᔪᐊᕌᓗᖕᓂᒃ ᐊᖏᖃᑎᒌᒍᑎᓂᒃ ᑲᔪᓯᑎᑦᓯᖁᔨᓪᓗᑎᒃ ᒐᕙᒪᑐᖃᒃᑯᓐᓂᒃ ᐊᒻᒪᓗ ᐅᑭᐅᖅᑕᖅᑐᒥ ᒐᕙᒪᖏᓐᓂᒃ ᒪᓂᒪᑎᑦᓯᒍᑎᒃᓴᓂᒃ ᐳᓚᕋᖅᑐᓕᕆᓂᕐᒧᑦ, ᐃᒥᕐᒥᒃ ᖃᐅᔨᓴᕐᓂᕐᒧᑦ ᐊᒻᒪᓗ ᐊᓯᖏᓐᓂᒃ ᑰᖕᓄᑦ ᐊᒃᑐᐊᓂᓕᓐᓂᒃ ᐃᑲᔪᖅᑕᐅᔾᔪᑎᒃᓴᓂᒃ ᐃᓄᖕᓄᑦ. ᐊᐃᕙᔨᕗᑦ ᐊᔭᐅᑐᐃᖃᑦᑕᕐᓯᒪᔪᑦ ᐃᑲᔫᓯᐊᖅᑖᖁᓪᓗᒋᑦ ᐃᓄᐃᑦ ᐊᖏᕈᑕᐅᓯᒪᔪᑦ ᒪᓕᓪᓗᒋᑦ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᓂ. ᒐᕙᒪᑐᖃᒃᑯᑦ ᒪᓂᔭᖓ ᓴᖅᑭᖅᑕᐅᓚᐅᖅᑐᖅ ᐃᓄᖕᓄᑦ ᐊᐃᕙᔾᔪᑎᒃᓴᐅᖏᓐᓂᕋᖅᑕᐅᓪᓗᓂ, ᑐᓴᖅᑎᑦᓯᓚᐅᓐᖏᑦᓯᐊᕌᐱᑦᑐᑎᒃ ᑮᓇᐅᔭᖅᑑᑎᒃᓴᓄᑦ ᑐᒃᓯᕋᐅᑏᑦ ᑖᒃᑯᓇᓐᖔᓐᖏᒻᒪᕆᑦᑐᑦ ᑎᑎᕋᕐᓯᒪᔪᓂᒃ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᓂ,” ᐅᖃᓚᐅᖅᑐᖅ ᐃᑦᑐᓗᒃ.
ᑲᓇᑕ ᒐᕙᒪᖓ ᒫᓐᓇ ᓴᖅᑮᔭᕆᐊᖃᓕᖅᑐᖅ ᓈᖕᒪᑦᑐᓂᒃ ᑮᓇᐅᔭᑎᒍᑦ ᐊᓐᖑᑎᑎᑦᓯᒋᐊᕈᑎᓂᒃ ᐱᓂᐊᕐᓂᕋᐅᑎᒋᓯᒪᔭᒥᓄᑦ ᔫᓂ 30 ᑎᑭᓚᐅᓐᖏᓐᓂᖓᓂ, ᐅᕝᕙᓘᓐᓃᑦ ᐊᖏᕈᑎᖃᕐᓗᑎᒃ ᐋᖅᑭᒋᐊᒃᑲᐃᔨᑖᕐᓂᕐᒥᒃ. ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐃᑲᔫᓯᐊᖅᑖᕈᑎᓄᓪᓗ ᐊᖏᕈᑏᑦ ᐊᐃᕙᔾᔪᑕᐅᔪᑦ ᓄᓇᕗᒻᒥ ᐱᕙᓪᓕᐊᔪᒻᒪᕆᐊᓘᑎᓪᓗᒍ, ᐊᖏᔪᒻᒪᕆᐊᓗᒃ ᓄᓇ ᐊᑐᖅᑕᐅᓪᓗᓂ ᐱᓕᕆᕕᒋᔭᐅᓕᖅᑐᖅ, ᐅᕝᕙᓗᓐᓃᑦ ᒥᕐᖑᐃᓯᕐᕖᑦ ᐊᒻᒪᓗ ᓴᐳᔾᔭᐅᓯᒪᔪᑦ ᓄᓇᑦ ᓴᖅᑭᖅᑕᐅᕙᓪᓕᐊᔪᑦ ᐱᔾᔪᑕᐅᓪᓗᓂ ᑕᒪᒃᑯᐊ ᐊᐅᓚᑕᐅᔪᑦ ᐊᒃᑐᐃᓂᖃᖃᑦᑕᓕᕐᒪᑕ ᐃᓄᐃᑦ ᐱᔪᓐᓇᐅᑎᖏᓐᓂᒃ ᐊᒻᒪᓗ ᐊᑭᓕᖅᓱᖅᑕᐅᒋᐊᖃᕐᒪᑕ ᐊᑐᐃᓐᓇᐅᑎᑦᓯᕕᐅᓗᑎᒃ ᐃᓄᐃᑦ.
