ᓄᓇᕗᑦ ᑐᓐᖓᕕᒃ ᑎᒥᖓ ᑐᓴᖅᑎᑦᓯᖅᑲᐅᔪᑦ ᐃᓚᓐᖓᖅᑐᓄᑦ ᖁᓚᕐᓇᖅᑐᒦᔨᐊᓕᖕᓄᑦ ᖃᖓᑦᑕᐅᑎᓄᑦ ᐃᑲᔫᑎᒃᓴᑦ ᐊᐅᓚᑕᐅᖃᑦᑕᕐᓯᒪᔪᑦ ᑐᓐᖓᕕᒃᑯᓐᓂᒃ ᒫᓐᓇ ᑲᒪᒋᖔᓕᖅᑕᖏᑦ ᐊᕕᑦᑐᕐᓯᒪᔪᑦ ᐃᓄᐃᑦ ᑲᑐᔾᔨᖃᑎᒌᑦ, ᐅᓪᓗᒥ ᐱᒋᐊᕐᓗᓂ. ᐊᓯᔾᔨᕐᓂᐅᔪᖅ ᑖᒃᑯᓇᓐᖔᕐᓯᒪᔪᖅ ᖃᒡᓕᒋᐊᖕᓂᖅ ᐃᓄᖕᓄᑦ ᐱᕙᓪᓕᐊᑲᓐᓂᕈᑎᒃᓴᓄᑦ ᐱᓇᓱᐊᕋᑦᓴᑦ ᓴᖅᑭᑕᐅᓚᐅᖅᑐᑦ ᓯᑉᑎᒻᕙ 2009-ᒥ, ᓄᓇᕗᒻᒥ ᐃᓄᐃᑦ ᑲᑐᔾᔨᖃᑎᒌᑦ ᐃᑲᔫᑎᒃᓴᑲᓐᓂᖏᓐᓂᒃ.
ᐊᕕᑦᑐᕐᓯᒪᔪᑦ ᐃᓄᐃᑦ ᑲᑐᔾᔨᖃᑎᒌᑦ ᒪᓂᒪᑎᑦᓯᖃᑦᑕᖔᕐᓂᐊᓕᖅᑐᑦ ᐃᓚᓐᖓᖅᑐᓄᑦ ᖁᓚᕐᓇᖅᑐᒦᔨᐊᓕᓐᓄᓪᓗ ᖃᖓᑦᑕᐅᑎᒃᑯᑦ ᐃᑲᔫᑎᒃᓴᓕᕆᓂᕐᒥᒃ ᐃᓄᖕᓄᑦ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᓂ ᐊᑎᖃᖃᑕᐅᔪᓄᑦ ᐊᕕᑦᑐᕐᓯᒪᓂᕐᒥ ᓄᓇᖃᕐᕕᒋᔭᒥᓂ, ᐊᑐᕐᓗᑎᒃ ᑖᒃᑯᓂᖓᑦᓴᐃᓐᓇᖅ ᑮᓇᐅᔭᓕᑕᐅᓯᒪᒍᑎᓂᒃ ᐊᑐᖅᑐᒃᓴᓂᒃ ᑲᒪᒋᔭᐅᖃᑦᑕᓚᐅᖅᑐᓂᒃ ᑐᓐᖓᕕᒃᑯᓐᓄᑦ. ᐅᓪᓗᒥ ᑐᓴᖅᑎᑦᓯᒍᑎ ᐊᓯᔾᔩᖏᑦᑐᖅ ᐊᑐᐃᓐᓇᐅᖃᑦᑕᕐᓂᖏᓐᓂᒃ ᐃᑲᔪᖅᑕᐅᔭᕆᐊᓕᖕᓄᑦ ᐊᑐᐃᓐᓇᖃᕐᕕᐅᔪᓄᑦ. ᐊᓯᔾᔨᖅᑐᑐᐊᖅ ᐊᕕᑦᑐᕐᓯᒪᓂᕐᓂ ᐃᓄᐃᑦ ᑲᑐᔾᔨᖃᑎᒌᓄᑦ ᑲᒪᒋᔭᐅᖔᓕᕐᓂᖏᑦ ᐃᑲᔫᑎᒃᓴᑦ ᖃᖓᑦᑕᐅᑎᒃᓴᖏᓐᓄᑦ ᐃᓄᐃᑦ.
ᐃᓄᐃᑦ ᖃᐅᔨᒋᐊᖃᑦᑕᐃᓐᓇᕈᓐᓇᓂᐊᖅᑐᑦ ᓄᓇᓕᖕᓂ ᑐᖅᑲᑕᕐᕕᖕᒥᓄᑦ ᑐᓐᖓᕕᒋᔭᐅᔪᓄᑦ ᖃᐅᔨᒋᐊᕐᕕᒃᓴᐅᑎᑕᐅᓪᓗᑎᒃ ᑐᒃᓯᕋᕈᑎᓂᒃ ᑕᑕᑎᕆᓂᕐᒥᒃ ᐊᒻᒪᓗ ᐃᓚᓕᐅᑎᓯᒪᔭᕆᐊᓕᖕᓂᒃ ᑎᑎᖅᑲᓂᒃ ᐊᐅᓚᓂᖃᑦᓯᐊᕈᓐᓇᖁᓪᓗᖏᑦ ᑐᒃᓯᕋᐅᑎᖏᑦ ᑲᒪᒋᔭᐅᒋᐊᖃᕐᓂᖏᑎᒍᑦ.
