(ᔪᓂ 1, 2020 – ᐃᖃᓗᐃᑦ, ᓄᓇᕗᑦ) ᐃᓄᐃᑦ ᓯᕗᓕᖅᑎᖏᑦ ᑐᓂᓯᔪᑦ $2.5−ᒥᓕᔭᓂᒃ ᓄᓇᖃᖅᑳᖅᓯᒪᔪᑦ ᓄᓇᓕᖏᓐᓄᑦ ᐃᑲᔫᑎᓂᒃ ᑮᓇᐅᔭᓂᒃ ᓄᓇᕗᒻᒥᐅᓄᑦ ᐃᓄᓐᓄᑦ ᓄᓇᖃᖅᑐᓄᑦ ᓯᓚᑖᓂ ᓄᓇᕗᑦ ᓄᓇᖓᑕ ᓇᓗᓇᐃᖅᑕᐅᓯᒪᓂᖓᓂ ᑐᕌᖓᔪᓂᒃ ᓂᕆᔭᒃᓴᖃᑦᓯᐊᓂᕐᒧᑦ ᐊᒻᒪᓗ ᓇᔪᒐᑦᓴᓂᒃ ᑭᒡᒍᑎᒥᒃ ᓄᕙᔾᔪᐊᓇᕐᓂᖓᓄᑦ ᓄᓇᕐᔪᐊᒥ.
“ᓄᕙᔾᔪᐊᕐᓇᖅ ᐊᐃᑦᑐᕐᓗᐃᑐᐃᓐᓇᕆᐊᖃᕐᓂᖅᓴᖅ ᑕᐃᒃᑯᓄᖓ ᓴᙱᓕᓯᒪᔪᓄᑦ ᑎᒥᖏᑕ ᓴᐴᓗᑕᖏᓐᓂᒃ ᖃᓂᒻᒪᑦᑕᐃᓕᓂᕐᒧᑦ. ᐃᑲᔪᕈᒪᕙᕗᑦ ᑕᐃᒃᑯᐊ ᐊᐃᑦᑐᕐᓗᑦᑕᐅᑐᐃᓐᓇᕆᐊᖃᕐᓂᖅᓴᑦ ᓄᓇᕗᒻᒥ ᐃᓄᐃᑦ, ᓄᓇᖃᖅᑐᑦ ᓯᓚᑖᓂ ᓄᓇᕗᑦ, ᐃᑲᔫᑎᒋᔪᓐᓇᑕᑦᑎᒍᑦ ᐊᑐᕆᐊᖃᓗᐊᙳᐊᖅᑕᖏᓐᓂᒃ,” ᐅᖃᖅᑐᖅ ᐊᓗᑭ ᑰᑦᑎᖅ, ᓄᓇᕗᑦ ᑐᙵᕕᒃ ᑎᒥᖓᑕ (ᑐᙵᕕᒃ) ᐊᖓᔪᖅᑳᖓ.
ᐃᓄᓕᖅᑕᓂᒃ ᓂᕆᔭᑦᓴᓂᒃ ᐆᒪᔪᕋᓱᖃᑦᑕᓂᐊᖅᑐᑦ ᓄᓇᕗᒻᒥ, ᑐᓂᓯᒍᑎᒃᓴᒥᒃ ᐱᖕᒪᕆᐅᔪᒥᒃ ᒪᑭᒪᔾᔪᑎᒃᓴᑎᒍᑦ ᐊᐅᓚᑕᐅᓗᓂ ᓄᓇᑦᑎᓐᓂ. ᑐᓂᐅᖅᑲᖅᑕᐅᓗᑎᒃ ᐆᒪᔪᖅᑕᐅᔪᑦ ᐋᑐᕚᒥ, ᔭᓗᓇᐃᕝ, ᐅᐃᓂᐱᒡ, ᐃᐊᑦᒥᓐᑕᓐ ᐊᒻᒪᓗ ᒪᓐᑐᕆᐊ ᐸᕐᓇᑕᐅᓯᒪᔪᖅ ᑲᑐᔾᔨᖃᑎᒌᑎᒍᑦ ᐱᔨᑦᓯᖅᑐᓂᒃ ᑖᒃᑯᓂᖓ ᓄᓇᕗᒻᒥᐅᓂᒃ ᐃᓄᓐᓂᒃ. ᑮᓇᐅᔭᑦ $505,000 ᑐᓂᔭᐅᓯᒪᔪᑦ ᐊᖑᓇᓱᓐᓂᕐᒧᑦ, ᖃᖓᑦᑕᐅᑎᓄᑦ ᐊᒻᒪᓗ ᐸᔪᑦᑎᕆᒍᑎᒃᓴᓄᑦ.
“ᐃᓄᓕᖅᑕᑦ ᓂᖀᑦ ᑎᒥᒧᑦ ᐊᑐᕐᓂᖃᕐᓂᖏᑦ ᖁᑦᓯᑐᒻᒪᕆᐅᔪᑦ ᐊᒻᒪᓗ ᓂᕆᔭᐅᔪᒪᓂᖅᓴᐅᔫᑦ ᐃᓄᓐᓄᑦ. ᐊᑦᓱᕉᓐᓂᖓᓇᕐᓂᖓᓄᑦ ᓄᕙᔾᔪᐊᕐᓇᖅ, ᐃᓄᐃᑦ ᓯᓚᑖᓃᑦᑐᑦ ᓄᓇᕗᑦ ᓄᓇᖓᑕ ᓇᓗᓇᐃᖅᑕᐅᓯᒪᓂᖓᓂ ᒥᓇᖅᑕᐅᖃᑕᐅᔪᑦ ᐃᓄᓕᖅᑕᓂᒃ ᓂᕿᓂᒃ ᐱᖕᒪᕆᐅᒻᒪᑦ ᐃᓱᒪᒧᑦ,” ᐅᖃᖅᑐᖅ ᔭᐃᒥᓯ ᐃᑦᑐᓗᒃ, ᐊᖓᔪᖅᑳᑉ−ᑐᒡᓕᐊ ᑐᓐᖓᕕᒃᑯᓐᓂ.
ᖄᖓᒍᑦ $1-ᒥᓕᔭᒃᑲᓂᕐᓂᒃ ᑐᓂᔭᐅᓯᒪᔪᑦ ᓂᕆᔭᑦᓴᖃᑦᓯᐊᖁᓪᓗᒋᑦ ᐸᔪᒍᑕᐅᖃᑦᑕᓂᐊᖅᑐᓂᒃ ᖃᓪᓗᓈᓂ ᓄᓇᓕᓐᓄᑦ ᑲᑐᔾᔨᖃᑎᒌᓄᑦ ᐱᔨᑦᓯᖅᑐᓄᑦ ᓄᓇᕗᒻᒥ ᐃᓄᓐᓂᒃ ᓂᐅᕕᕈᑎᒃᓴᓂᒃ ᓂᕿᓂᒃ ᐸᔪᑦᑎᕈᑎᒃᓴᓂᒃ ᐅᕝᕙᓘᓐᓃᑦ ᐋᓐᓂᔭᐃᒃᑯᑎᓂᒃ ᐊᐃᑦᑐᓗᑦᑕᐅᔭᐃᒃᑯᓂᒃ ᐊᑐᕋᑦᓴᓂᒃ ᐃᖅᑲᓇᐃᔭᖅᑎᓄᑦ. ᑖᒃᑯᓇᙵᑦ, $576,000 ᑐᓂᔭᐅᓯᒪᔪᑦ ᑲᑐᔾᔨᖃᑎᒌᓄᑦ ᐋᑐᕚᒥ, ᔭᓗᓇᐃᕝ, ᐅᐃᓂᐱᒡ ᐊᒻᒪᓗ ᐃᐊᑦᒥᓐᑕᓐ ᐊᒻᒪᓗ ᑮᓇᐅᔭᓕᑕᐅᒍᑎᑦ ᐊᐅᓚᑦᓯᒍᑕᐅᓕᖅᑐᑎᒃ. ᑐᒃᓯᕋᐅᑏᑦ ᑲᑎᓐᓂᕐᓂᒃ $424,000 ᐱᔭᐅᖃᑦᑕᕈᓐᓇᓂᐊᖅᑐᑦ ᔫᓂ 12, 2020-ᒧᓄᑦ.
ᑕᐃᒫᑦᓴᐃᓐᓇᐸᓗᒃ, ᑮᓇᐅᔭᑦ ᒥᓕᔭᓐ ᑐᓂᔭᐅᓯᒪᒻᒥᔪᑦ ᓇᔪᒐᑦᓴᖃᕈᑎᒃᓴᑦ ᖃᓪᓗᓈᓂ ᑐᑦᑕᕐᕕᐅᕙᑦᑐᓄᑦ ᑎᑭᐅᑎᓯᒪᒍᓐᓇᖁᓪᓗᒋᑦ ᖃᓄᐃᙱᓯᐊᕐᓂᕐᒧᑦ ᒪᓕᑦᑕᐅᒋᐊᓕᓐᓂᒃ, ᐃᑲᔫᑎᒃᓴᓂᒃ ᖃᓂᒌᓗᐊᑦᑕᐃᓕᒋᐊᖃᕐᓂᕐᒧᑦ ᐊᒻᒪᓗ ᓂᐅᕕᕈᑎᒃᓴᑦ ᓴᐳᔾᔭᐅᓯᒪᒍᑎᒃᓴᓂᒃ ᐊᑐᕋᑦᓴᓂᒃ ᐊᐃᑦᑐᓗᑦᑕᐅᔭᐃᒃᑯᑎᓂᒃ ᐃᖅᑲᓇᐃᔭᖅᑎᓄᑦ ᐅᕝᕙᓘᓐᓃᑦ ᐃᑲᔪᖅᑕᐅᔪᓄᑦ. ᑕᕝᕙᙵᑦ, $576,000 ᑐᓂᔭᐅᓯᒪᔪᑦ ᖃᓪᓗᓈᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᐋᑐᕚᒥ, ᔭᓗᓇᐃᕝ, ᐅᐃᓂᐱᒡ ᐊᒻᒪᓗ ᐃᐊᑦᒥᓐᑕᓐ. ᑐᒃᓯᕋᐅᑎ% ᑲᑎᓐᓂᓕᓐᓄᑦ $424,000 ᐱᔭᐅᖃᑦᑕᕈᓐᓇᓂᐊᖅᑐᑦ ᔫᓂ 12, 2020-ᒧᑦ.
ᒪᓕᓪᓗᒋᑦ ᑐᙵᕕᒃᑯᓐᓂ ᐊᑎᖃᖃᑕᐅᔪᑦ ᐊᑎᖏᑦ, 5,014-ᖑᒻᒪᑕ ᐃᓄᐃᑦ ᓄᓇᖃᖅᑐᑦ ᓄᓇᕗᑦ ᓯᓚᑖᓂ, ᖁᑦᓯᓂᖅᐸᐅᓪᓗᑎᒃ ᐋᑐᕚᒥᐅᑦ, ᔭᓗᓇᐃᕝ, ᐅᐃᓂᐱᒡ, ᐃᐊᑦᒥᓐᑕᓐ ᐊᒻᒪᓗ ᒫᓐᑐᕆᐊ, ᑭᖑᓕᕇᑎᓪᓗᒋᑦ ᑕᐃᒫᒃ.
-30-
ᑐᑭᓯᒋᐊᒃᑲᓂᕐᕕᒃᓴᖅ:
ᒪᓚᐃᔭ ᒥᑭᔾᔪᑎᒃ
ᑐᑭᒧᐊᒃᑎᑦᑎᔨᕈᖅᓴᖅᑐᖅ ᑐᓴᐅᒪᔾᔪᑎᓕᕆᔨᒃᑯᓐᓂ
ᓄᓇᕗᑦ ᑐᙵᕕᒃ ᑎᒥᖓ
ᓄᕙᔾᔪᐊᕐᓇᖅ-19 ᑐᒃᓯᕋᐅᑏᑦ, ᐃᑲᔫᑎᒃᓴᑦ ᐋᖅᑭᐅᒪᒍᑎᒃᓴᓪᓗ ᑐᓴᐅᒪᔾᔪᑎᒃᓴᓪᓗ
ᓄᓇᕗᑦ ᑐᙵᕕᒃ ᑎᒥᖓ
covid-19@tunngavik.com
ᐱᓕᕆᐊᖑᓯᒪᓂᖓ
ᒫᑦᓯ 25-ᒥ, ᑲᓇᑕᐅᑉ ᒐᕙᒪᖓ $82−ᐱᓕᔭᓂᒃ ᑐᐊᕕᕐᓇᑐᕐᓯᐅᑎᓂᒃ ᓄᕙᕐᔪᐊᓇᕐᓂᖓᓄᑦ ᐃᑲᔫᑎᓂᒃ ᑐᓂᔭᐅᓚᐅᖅᑐᑦ ᕈᐃᔪᓪ ᐋᓴᓐᑦᑯᓐᓂᒃ. ᑕᕝᕙᓃᖃᑕᐅᓪᓗᑎᒃ $305 ᒥᓕᔭᓐ ᓄᓇᖃᖅᑳᖅᓯᒪᔪᑦ ᓄᓇᖏᓐᓄᑦ ᐃᑲᔫᑎᒃᓴᑦ ᑮᓇᐅᔭᑦ (ICSF) ᓄᓇᖃᖅᑳᖅᓯᒪᔪᓅᖅᑲᑐᑦᓴᑦ ᐋᖅᑭᒍᑎᒃᓴᒫᑦ ᑐᐊᕕᕐᓇᖅᑐᓄᑦ ᓄᓇᓖᑦ ᐊᑐᕆᐊᓕᖏᓐᓄᑦ.
ᑲᓇᑕᓕᒫᒥ, ᐃᓄᐃᑦ ᑐᓂᔭᐅᓚᐅᖅᑐᑦ ICSF-ᓂᒃ $45−ᒥᓕᔭᓂᒃ.
ᒫᑦᓯ 25-ᒥ, ᐃᓄᐃᑦ ᑕᐱᕇᑦ ᑲᓇᑕᒥ (ITK) ᑲᑎᒪᔨᖏᑦ ᐊᖏᓚᐅᖅᑐᑦ $45-ᒥᓕᔭᓐ ᐊᒡᒍᖅᑕᐅᖁᓪᓗᒋᑦ ᓯᑕᒪᓄᑦ ᑲᓇᑕᒥ ᐃᓄᐃᑦ ᓄᓇᖏᑎᒍᑦ; ᓄᓇᕗᑦ, ᓄᓇᕕᒃ, ᓄᓇᑦᓯᐊᕗᑦ ᐊᒻᒪᓗ ᐃᓄᕕᐊᓗᐃᑦ ᐊᕕᑦᑐᖅᓯᒪᓂᖏᓐᓄᑦ, ᒪᓕᓪᓗᒋᑦ ᐊᖏᕈᑕᐅᓯᒪᔪᑦ ITK ᑮᓇᐅᔭᓖᒍᑎᖏᓐᓄᑦ ᐋᖅᑭᑦᑕᐅᓯᒪᔪᑦ. ᓄᓇᕗᑦ ᑐᓂᔭᐅᔪᖅ 52% ᐅᕝᕙᓘᓐᓃᑦ $22.5 ᒥᓕᔭᓂᒃ.
ᒫᑦᓯ 25-ᒥ, ᑐᙵᕕᒃᑯᑦ ᑲᑎᒪᔨᖏᑦ ᐊᒡᒍᓚᐅᖅᑕᖏᑦ ᓄᓇᕗᒻᒨᖅᑐᑦ ᓄᓇᖃᖅᑳᖅᓯᒪᔪᑦ ᓄᓇᓕᓐᓄᑦ ᐃᑲᔫᑎᒃᓴᑦ ᑮᓇᐅᔭᑦ (ICSF), ᐃᒪᐃᓕᖓᓪᓗᑎᒃ:
ᖃᓪᓗᓈᓂᒥᐅᑦ ᐃᓄᐃᑦ $2,505,000
ᓄᓇᕗᑦ ᑐᙵᕕᒃ ᑎᒥᖓ $6,012,000
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ $6,132,544
ᑭᕙᓪᓕᖅ ᐃᓄᐃᑦ ᑲᑐᔾᔨᖃᑎᒌᑦ $4,341,223
ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᑦ $3,554,233
ᓄᓇᕗᒻᒥᐅᑦ ᐃᓄᐃᑦ ᐃᑲᔪᖅᑕᐅᔾᔪᑎᒃᓴᓯᐅᖅᑐᑦ ᓂᕆᔭᒃᓴᖃᑦᓯᐊᓂᕐᒧᑦ ᐅᕝᕙᓘᓐᓃᑦ ᐃᓄᓕᖅᑕᓄᑦ ᓂᕿᓄᑦ ᖃᐅᔨᒋᐊᕈᓐᓇᖅᑐᑦ ᐅᑯᓄᖓ:
ᑐᙵᓱᕝᕕᖓ ᐃᓄᐃᑦ ᐅᕝᕙᓘᓐᓃᑦ ᐃᓅᖃᑎᒌᑦ ᐋᑐᕚᒥ ᓯᓚᑖᓂᓗ;
ᒫᓂᑑᕙᒥ ᐃᓄᐃᑦ ᑲᑐᔾᔨᖃᑎᒌᑦ ᐅᕝᕙᓘᓐᓃᑦ ᑐᙵᓱᒋᑦ ᐅᐃᓂᐱᒡᒧᑦ ᒫᓂᑑᕙᒥ;
ᔭᓗᓇᐃᕝᒥᐅᑦ ᐃᓄᐃᑦ ᔭᓗᓇᐃᕝᒥ;
ᖃᓪᓗᓈᓂ ᑯᐸᐃᒃ ᐃᓄᐃᑦ ᑲᑐᔾᔨᖃᑎᒌᑦ ᒪᓐᑐᕆᐊᒥ; ᐊᒻᒪᓗ
ᐃᐊᑦᒥᓐᑕᓐᒥᐅᑦ ᐃᓄᐃᑦ ᑲᑐᔾᔨᖃᑎᒌᑦᑐᑦ ᐃᐊᑦᒥᓐᑕᒻᒥ.
