ᑐᓴᕋᑦᓴᓕᕆᔩᑦ

ᑲᓇᑕ ᒐᕙᒪᖓ, ᓄᓇᕗᑦ ᑐᓐᖓᕕᒃ ᑎᒥᖓ ᐊᒻᒪᓗ ᓄᓇᕗᑦ ᒐᕙᒪᖓ ᓄᑖᓐᖑᕆᐊᖅᑎᑦᓯᓚᐅᖅᑐᑦ ᐊᖏᕈᑎᒋᓯᒪᔭᒥᓂᒃ ᐃᖅᑲᓇᐃᔭᖃᑎᒌᓐᓂᐊᓂᕐᒧᑦ ᓯᕗᓂᒃᓴᖃᑦᓯᐊᑲᓐᓂᕈᑎᒃᓴᖓᓄᑦ ᓄᓇᕗᑦ.

ᔭᓐᓄᐊᓕ 31, 2018 ᐋᑐᕚ, ᐋᓐᑎᕆᐅ ᐃᓄᓕᕆᔨᑐᖃᒃᑯᑦ

ᐅᓪᓗᒥ, ᐱᓇᓱᐊᕈᑕᐅᓂᖓᓄᑦ ᓴᐃᒻᒪᖃᑎᒌᓐᓂᕐᒥᒃ ᐊᒻᒪᓗ ᐱᕙᓪᓕᐊᑎᑦᓯᓂᖅ ᓄᑖᓐᖑᕆᐊᕐᓯᒪᔪᒥᒃ ᐃᓄᐃᑦ−ᑯᐃᓐ ᐱᓇᓱᐊᖃᑎᒌᓐᓂᖏᓐᓂᒃ, ᐊᖓᔪᖅᑳᖅ ᑭᐅᕈᓕᓐ ᐱᐊᓂᑦ, ᒥᓂᔅᑕ ᑯᐃᓐ−ᓄᓇᖃᖅᑳᕐᓯᒪᔪᑦ ᐱᓇᓱᐊᖅᑕᐅᔪᓂᒃ ᐊᒻᒪᓗ ᐅᑭᐅᖅᑕᖅᑐᒨᖓᔪᓂᒃ, ᐊᓗᑭ ᑰᑦᑎᖅ, ᐊᖓᔪᖅᑳᖅ ᓄᓇᕗᑦ ᑐᓐᖓᕕᒃ ᑎᒥᖓᓄᑦ (ᑐᓐᖓᕕᒃ) ᐊᒻᒪᓗ ᐊᖓᔪᖅᑳᖅ ᐹ ᖁᐊᓴ, ᓯᕗᓕᖅᑎᖓ ᓄᓇᕗᑦ, ᐅᖃᕆᐊᒃᑲᓐᓂᖅᑲᐅᔫᒃ ᐊᖏᕈᑎᒋᓯᒪᔭᒥᓂᒃ ᐃᖅᑲᓇᐃᔭᖃᑎᒌᓐᓂᐊᓂᕐᒧᑦ ᑲᑐᔾᔨᓗᑎᒃ ᑲᔪᓯᑎᑦᓯᒍᑎᒃᓴᒥᒃ ᐃᓛᒃᑯᑦ 23−ᖓᓄᑦ ᓄᓇᕗᒻᒥ ᐊᖏᕈᑎᖏᓐᓂ. ᐱᖓᓱᑦ ᓯᕗᓕᖅᑏᑦ ᑲᑎᒋᐊᓐᖓᖅᑐᑦ ᐊᑎᓕᐅᖅᑕᐅᓚᐅᕐᓯᒪᒻᒪᓂᒃ 2015 ᐊᑭᓖᒍᑎᒃᓴᖅ ᓯᕗᒧᐊᒃᑎᑕᐅᒍᑎᒃᓴᖓᓄᑦ ᑲᔪᓯᑎᑕᐅᓗᓂ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑏᑦ.

ᐃᓛᒃᑯᑦ 23 ᑕᒪᒃᑮᓐᓄᑦ ᑲᓇᑕ ᐊᒻᒪᓗ ᓄᓇᕗᑦ ᒐᕙᒪᒃᑯᖏᓐᓄᑦ ᐃᖅᑲᓇᐃᔭᖃᑎᒌᒋᐊᖃᖅᑎᑦᓯᔪᖅ ᐃᓄᐃᑦ ᐃᓚᐅᑎᑕᐅᒋᐊᒃᑲᓐᓂᖁᓪᓗᒋᑦ ᓄᓇᕗᑦ ᒪᑭᒪᔾᔪᑎᓄᑦ ᒐᕙᒪᒃᑯᓐᓂ ᑭᒡᒐᑐᖅᑕᐅᔪᓂᒃ ᓈᖕᒪᒋᐊᖅᑕᐅᓯᒪᓗᓂ ᐊᑕᖏᖅᑐᓄᑦ. ᐃᓄᐃᑦ ᐃᖅᑲᓇᐃᔭᕐᓂᖏᑦ ᒐᕙᒪᒃᑯᓐᓂ ᓄᓇᕗᒻᒥ ᑐᓐᖓᕕᐅᔪᖅ ᒪᑭᑉᐸᓪᓕᐊᒍᑎᒃᓴᖏᓐᓄᑦ ᐃᓄᐃᑦ ᐊᒻᒪᓗ ᐆᒻᒪᑎᖓᑕ ᐃᓚᒋᔮ ᑲᓇᑕ ᐱᓇᓱᐊᕋᑦᓴᖏᓐᓂᒃ ᓄᓇᕗᑦ ᐊᖏᕈᑎᖏᑎᒍᑦ ᐊᒻᒪᓗ ᐊᖏᕈᑕᐅᓯᒪᔪᓂᒃ ᓄᑖᓐᖑᕆᐊᖅᑕᐅᓂᖏᓐᓄᑦ ᐃᓄᐃ−ᑯᐃᓐ ᐱᓇᓱᐊᖃᑎᒌᓐᓂᖏᓐᓄᑦ.

ᐃᓚᒋᓪᓗᓂᐅᒃ ᑖᑦᓱᒪ ᐊᖏᕈᑕᐅᓯᒪᔫᑉ, ᑲᓇᑕ ᒐᕙᒪᖓ ᐊᒻᒪᓗ ᑐᓐᖓᕕᒃᑯᑦ ᐊᖏᕈᑎᖃᓚᐅᕐᒥᔫᒃ ᓴᖅᑮᓂᐊᕐᓂᕐᒥᒃ ᐱᔭᕆᐊᑭᓪᓕᑎᕆᔨᓂᒃ ᐃᖅᑲᓇᐃᔭᕐᓂᐊᖅᑐᓂᒃ ᖃᐅᔨᓴᖃᑎᒌᓪᓗᑎᒃ ᖃᐅᔨᓇᓱᐊᕈᑕᐅᓂᐊᖅᑐᒥᒃ ᐅᖃᐅᓯᕐᒧᑦ ᐊᐳᖅᑕᕐᕕᐅᔪᓂᒃ ᐊᒻᒪᓗ ᐊᑐᕋᑦᓴᖏᓐᓂᒃ ᒐᕙᒪᑐᖃᒃᑯᑦ ᓄᓇᕗᒻᒥ ᐊᒻᒪᓗ ᐋᖅᑭᑦᓱᐃᓂᕐᒥᒃ ᓇᓖᕌᕈᑎᒃᓴᓂᒃ ᐃᑲᔫᑎᓂᐊᖅᑐᒥᒃ ᓂᕆᐅᓇᖅᑐᒥᒃ, ᓴᐳᔾᔨᓯᒪᓂᕐᒥᒃ, ᐊᒻᒪᓗ ᐊᑐᖅᑕᐅᑲᓐᓂᕈᑎᒃᓴᖏᓐᓂᒃ ᐃᓄᒃᑐᑦ ᓄᓇᕗᒻᒥ.

ᐅᖃᐅᓯᐅᓯᒪᔪᑦ

“ᑎᑭᐅᑎᕙᓪᓕᐊᓕᖅᑎᓪᓗᑕ 25-ᖃᓕᕐᓂᖓᓄᑦ ᓇᓪᓕᐅᓂᕐᓯᐅᓂᕐᒧᑦ ᑲᔪᓯᑎᑕᐅᓚᐅᕐᓂᖓᓂᒃ ᓄᓇᕗᒻᒥ ᐊᖏᕈᑦ ᐊᒻᒪᓗ ᓄᓇᕗᑦ ᐱᖁᔭᖓ, ᐊᖏᕈᑎᒋᓯᒪᔭᕗᑦ ᒪᑭᒋᐊᒃᑲᓂᖅᑎᑦᓯᓂᕐᒥᒃ ᑲᔪᓯᑎᑕᐅᓯᒪᔪᓂᒃ ᐱᓯᒪᔪᓂᒃ 25-ᓂᒃ ᐊᕐᕌᒍᓂ ᐊᓂᒍᖅᑐᓂ ᐊᒻᒪᓗ ᐃᖅᑲᓇᐃᔭᖃᑎᖃᑦᓯᐊᕐᓂᐊᕈᒪᕗᑦ ᓄᓇᕗᑦ ᑐᓐᖓᕕᒃ ᑎᒥᖓᓂᒃ ᐊᒻᒪᓗ ᓄᓇᕗᑦ ᒐᕙᒪᖓᓂᒃ ᐋᖅᑭᒋᐊᕈᑎᒃᓴᓂᒃ ᐃᓅᓯᖏᓐᓄᑦ ᐊᒻᒪᓗ ᖃᓄᐃᓐᖏᑦᓯᐊᕈᑎᒃᓴᓂᒃ ᓄᓇᕗᒻᒥᐅᓄᑦ. ᐱᓕᕆᖃᑎᒌᓐᓂᖏᑦ ᐊᒻᒪᓗ ᐊᖏᖃᑎᒌᓯᒪᓂᖏᑦ ᑖᒃᑯᐊᓕᒫᑦ ᐱᖓᓱᑦ ᐱᓇᓱᐊᖃᑎᒌᑦᑐᑦ ᑐᓐᖓᕕᒋᔭᐅᖃᑦᑕᕐᓯᒪᕗᑦ ᑐᓐᖓᕕᒋᔭᐅᖏᓐᓇᓂᐊᕐᐳᓪᓗ ᑲᔪᓯᑎᑦᓯᓂᕐᒧᑦ.”

ᐊᖓᔪᖅᑳᖅ ᑭᐅᕈᓕᓐ ᐱᐊᓂᑦ, P.C., M.P.
ᒥᓂᔅᓴ ᑯᐃᓐ−ᓄᓇᖃᖅᑳᖅᑐᒥᓃᑦ ᐱᓕᕆᖃᑎᒌᓐᓂᖏᓐᓂᒃ ᐊᒻᒪᓗ ᐅᑭᐅᖅᑕᖅᑐᒨᖓᔪᓂᒃ

“ᑐᓐᖓᕕᒃᑯᑦ ᑲᑦᓱᖓᐃᑉᐳᑦ ᐃᖅᑲᓇᐃᔭᖃᑎᖃᕐᓂᐊᓂᕐᒥᒃ ᓄᓇᕗᑦ ᒐᕙᒪᖓᓂᒃ ᐊᒻᒪᓗ ᒐᕙᒪᑐᖃᒃᑯᓐᓂᒃ ᓇᓗᓇᓐᖏᑦᑐᒥᒃ ᓯᕗᒧᐊᒃᐸᓪᓕᐊᒍᑎᒃᓴᓄᑦ ᐊᒻᒪᓗ ᐊᐅᓚᔾᔭᐃᓯᒪᓂᕐᒥᒃ ᑎᒍᓯᓯᒪᓂᕐᒥᒃ ᐱᕚᓪᓕᕈᑎᒃᓴᓄᑦ ᐋᓐᓂᐊᖅᑐᓕᕆᓂᕐᒧᑦ, ᐃᓕᓐᓂᐊᖅᑐᓕᕆᓂᕐᒧᑦ ᐊᒻᒪᓗ ᐱᕙᓪᓕᐊᔪᓕᕆᓂᒃᑯᑦ ᒪᑭᒪᔾᔪᑎᒃᓴᖏᓐᓂᒃ ᐃᓄᐃᑦ ᐊᒻᒪᓗ ᕿᑐᕐᖓᕗᑦ. ᑐᓐᖓᓱᑦᑎᑦᓯᕗᒍᑦ ᑖᑦᓱᒥᖓ ᐱᓇᓱᐊᖃᑎᒌᒍᑕᐅᔪᒥᒃ ᐊᒻᒪᓗ ᓂᕆᐅᒋᔭᖃᕐᐳᒍᑦ ᐊᐅᓚᑦᓯᓂᐊᕐᓂᕐᒥᒃ ᓴᖅᑭᓚᑦᑖᓂᐊᖅᑐᓂᒃ ᐊᒻᒪᓗ ᖃᐅᒪᓂᕐᓴᒥᒃ ᓯᕗᓂᒃᓴᖃᑦᓯᐊᕈᑎᒃᓴᖏᓐᓂᒃ ᓄᓇᓕᑦᑎᓐᓄᑦ”

ᐊᓗᑭ ᑰᑦᑎᖅ
ᐊᖓᔪᖅᑳᖅ ᓄᓇᕗᑦ ᑐᓐᖓᕕᒃ ᑎᒥᖓ

“ᓄᓇᕗᑦ ᒐᕙᒪᒃᑯᖏᑦ ᐊᑐᓕᖅᑎᑦᑎᓂᐊᕐᐳᑦ ᓄᓇᕗᑦ ᐊᖏᕈᑎᖏᓐᓂᒃ, ᓯᕗᓪᓕᖅᐹᖑᑎᑕᐅᓗᓂ ᐃᓛᒃᑯᑦ ᑎᑎᕋᖅᓯᒪᔪᖅ 23 ᐊᖏᕈᑎᓂ. ᐱᓕᕆᖃᑎᒌᓐᓇᓂᐊᕐᐸᕗᑦ ᒐᕙᒪᑐᖃᒃᑯᑦ ᐊᒻᒪᓗ ᓄᓇᕗᑦ ᑐᙵᕕᒃᑯᑦ ᓴᖅᑭᖁᓪᓗᒋᑦ ᑲᒪᒋᔭᕆᐊᖃᖅᑕᕗᑦ ᓄᓇᕗᑦ ᐊᖏᕈᑎᖏᓐᓃᒃᑐᑦ. ”

ᐊᖓᔪᖅᑳᖅ ᐹ ᖁᐊᓴ
ᓯᕗᓕᖅᑎᖓ ᓄᓇᕗᑦ

ᑐᑭᓯᑎᑦᓯᑲᐅᑎᒋᒍᑏᑦ ᐊᑐᕐᓯᒪᔪᓂᒃ

. ᔪᓚᐃ 9, 1993−ᒥ, ᑲᓇᑕᒥ ᐱᖁᔭᓕᐅᕐᕕᔾᔪᐊᖅ ᑲᔪᓯᑎᑦᓯᓚᐅᖅᑐᖅ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᓂᒃ ᐊᒻᒪᓗ ᓄᓇᕗᑦ ᐱᖁᔭᖓᓂᒃ, ᓴᖅᑮᒍᑕᐅᓪᓗᓂ ᓄᑖᒥᒃ ᐊᕕᑦᑐᕐᓯᒪᓂᕐᒥᒃ ᓄᓇᕗᑦ.
. ᓄᓇᕗᑦ ᑐᓐᖓᕕᒃ ᑎᒥᖓ ᐋᖅᑭᑦᓱᐃᓯᒪᖃᑦᑕᖅᑐᑦ ᐊᐅᓚᑦᓯᖃᑦᑕᖅᑐᑎᓪᓗ ᐃᓄᐃᑦ ᐱᓕᕆᐊᒃᓴᖏᓐᓂᒃ ᐊᖏᕈᑕᐅᓯᒪᔪᓂᒃ ᓄᓇᕗᒻᒥ ᐊᖏᕈᑎᓂ ᐊᒻᒪᓗ ᓱᖅᑯᐃᕐᓯᓯᒪᒍᑎᒃᓴᓂᒃ ᒐᕙᒪᑐᖃᒃᑯᑦ ᐊᒻᒪᓗ ᐅᑭᐅᖅᑕᖅᑐᒥ ᐊᕕᑦᑐᕐᓯᒪᓂᖏᓐᓄᑦ ᒐᕙᒪᖏᑦ ᑲᔪᓯᑎᖁᓪᓗᒋᑦ ᐱᓇᓱᐊᒐᑦᓴᕆᔭᒥᓂᒃ.
. ᓱᖅᑯᐃᖅᑕᐅᓯᒪᒍᑎᒃᓴᒥᒃ ᒐᕙᒪᓕᒫᑦ ᐱᓇᓱᐊᖅᑕᖏᑦ, ᑲᓇᑕ ᓴᖅᑮᓚᐅᕐᒪᑦ ᐱᓕᒻᒪᒃᓴᐃᕕᒃᒥᒃ (ᒐᕙᒪᑐᖃᒃᑯᑦ ᐃᓕᓐᓂᐊᑎᑦᓯᒍᑎᖓ ᐃᓄᖕᓂᒃ ᐃᖅᑲᓇᐃᔮᒃᓴᓄᑦ ᓄᓇᕗᒻᒥ), ᑐᓐᖓᕕᒋᔭᐅᔪᖅ ᐋᖅᑭᐅᒪᒍᑎᒃᓴᓄᑦ ᐊᓪᓚᑉᕕᖓ ᐱᓕᕆᐊᒃᓴᓕᒃ ᑲᔪᓯᑎᑦᓯᓂᕐᒥᒃ ᐃᓛᒃᑯᑦ 23.

ᐊᒃᑐᐊᔪᑦ ᑲᓲᒪᔪᑦ ᑖᑦᓱᒧᖓ

ᓄᓇᕗᑦ ᑐᓐᖓᕕᒃ ᑎᒥᖓ

ᐃᓛᒃᑯᑦ 23 – ᓄᓇᕗᑦ ᐊᖏᕈᑎᖓ

ᑐᑭᓯᒋᐊᒃᑲᓐᓂᕈᒪᒍᕕᑦ ᓱᓕ:
ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᑦ
ᐅᖄᓚᐅᑦ:
ᐅᖓᓯᒃᑐᒥᒃ ᐊᑭᖃᖏᑦᑐᖅ: