ᑕᐃᒪ ᐳᕙᓪᓗᓐᓇᖅ ᓄᑖᖑᔪᖅ ᐋᓐᓂᐊᖅᑐᓕᕆᓂᕐᒧᑦ ᓴᖅᑭᔮᖅᑎᑕᐅᓂᐊᑐᖅ ᐱᒋᐊᕐᓗᓂ ᐄᐳᕈᒥ ᓴᖅᑭᔮᕈᑕᐅᑲᓐᓂᕐᓂᐊᕐᓗᓂ ᓴᐳᒻᒥᔾᔪᑎᒃᓴᓄᑦ ᐳᕙᓪᓗᓐᓇᖅᑐᒥ(TB) ᓄᓇᕗᒻᒥ. ᑖᓐᓇ ᐱᓕᕆᐊᖑᔪᖅ ᒪᕐᕈᐃᓕᖅᑲᖓᔪᖅ.
ᓯᕗᓪᓕᖅ 1 ᐱᓕᕆᐊᖑᔪᒥ ᐅᔾᔨᕈᓱᓕᖅᑎᑦᓯᒃᑲᓐᓂᕋᓱᐊᕐᓂᖅ ᐳᕙᓪᓗᓐᓇᕐᒥᒃ ᐊᒻᒪ ᖃᐅᔨᒪᔭᐅᓂᖓᓂᒃ ᐃᖃᓗᓐᓂ ᑲᑎᑎᑦᓯᖃᑦᑕᕐᓂᒃᑯᑦ, ᑕᐅᑐᒃᑕᑐᐊᖑᑲᐃᓐᓇᖅᑐᑦ, ᑐᓴᒐᒃᓴᓕᐅᕈᑎᑎᒍᑦ (ᐃᑭᐊᕐᕆᕝᕖᑦ, ᐊᐅᓚᔫᑎᒍᑦ, ᖃᕆᓴᐅᔭᑎᒍᑦ). ᓄᓇᓕᖕᓂ ᑲᑎᒪᑎᑦᓯᓛᖅᑐᑦ ᐃᐳᕈ 5, 2011-ᒥ, ᐃᖃᓗᖕᓂ, ᑭᓇᑐᐃᓐᓇᖅ ᐃᓚᐅᔪᒪᔪᖅ ᖃᐅᔨᒃᑲᐃᔪᓐᓇᑐᖅ ᑕᐃᒪ ᐳᕙᓪᓗᓐᓇᖅ ᐊᒡᓚᕕᐊᓂᒃ ᐅᕗᖓ 975-4813.
ᑭᖑᓪᓕᖅ 2 ᐳᓚᕋᓪᓗᑎᒃ ᐳᕙᓪᓗᓇᕐᒥᒃ ᐅᔾᔨᕈᓱᓕᖅᑎᑦᓯᕙᓪᓕᐊᓇᓱᐊᕐᓂᖅ ᓄᓇᓕᖕᒥ ᐊᒻᒪ ᐊᖏᕐᕋᒥ ᑐᑭᓯᒋᐊᖅᑎᑦᓯᖃᑦᑕᕐᓂᖅ, ᖃᐅᔨᓴᕐᓂᖅ ᐊᒻᒪ ᐃᓅᓕᓴᐅᑎᓄᑦ ᓯᓂᑦᑐᖅ/ᓄᖅᑲᖓᔪᖅ ᐳᕙᓪᓗᓐᓇᑐᖅ (LTBI). ᑭᓇᑐᐃᓐᓇᖅ ᐃᖅᑲᓇᐃᔭᕈᒪᔪᖅ ᐳᕙᓪᓗᓐᓇᖅᑐᓕᕆᓂᕐᒧᑦ ᖃᐅᔨᒋᐊᕈᓐᓇᕐᑐᖅ ᑐᙵᕕᒃᑯᑦ ᐃᑭᐊᕐᕆᕕᐊᓄᑦ (www.tunngavik.com) ᐅᕝᕙᓘᓐᓃᑦ ᐅᖄᓚᓗᑎᑦ ᑕᐃᒪ ᐳᕙᓪᓗᓐᓇᖅ ᐊᒡᓚᕕᖓᓄᑦ 975-4813.
ᑕᐃᒪ ᐳᕙᓪᓗᓐᓇᖅ ᐱᓕᕆᐊᖑᓂᖓ ᐱᒋᐊᕐᓂᐊᖅᑐᖅ ᐃᐳᕈ 28, 2011 ᓄᓇᓕᖕᒥ ᓂᕆᕕᒡᔪᐊᑎᑦᓯᓗᑎᒃ, ᓴᖅᑮᓗᑎᒡᓗ ᑕᐃᒪ ᐳᕙᓪᓗᓐᓇᕐᒧᑦ ᐱᓕᕆᐊᖑᓂᐊᖅᑐᓂᒃ ᓄᓇᓕᖕᒥ, ᐊᒻᒪ ᓄᓇᖃᖅᑐᑦ ᐅᓂᒃᑳᕈᓐᓇᓂᐊᖅᑐᑎᒃ ᐳᕙᓪᓗᓐᓇᐅᑉ ᒥᒃᓵᓄᑦ.
ᑕᐃᒪ ᐳᕙᓪᓗᓐᓇᖅ ᑮᓇᐅᔭᖃᖅᑎᑕᐅᔪᖅ ᐋᓐᓂᐊᖅᑐᓕᕆᔨᒃᑯᓐᓂ ᑲᓇᑕᒥ. ᑲᑐᔾᔨᖃᑎᖃᖅᖢᑎᒃ ᓄᓇᕗᑦ ᒐᕙᒪᒃᑯᓐᓂ, ᓄᓇᕗᑦ ᑐᙵᕕᒃ ᑎᒥᖓ, ᐋᑐᕚᒥ ᖃᐅᔨᓴᕐᓂᕐᒧᑦ ᐋᓐᓂᐊᕐᕕᒡᔪᐊᖅ ᓯᓚᑦᑐᓴᕐᕕᒡᔪᐊᖓᓂ ᐋᑐᕚ; ᐃᓄᐃᑦ ᑕᐱᕇᑦ ᑲᓇᑕᒥ, ᑲᓇᑕᒥ ᓄᓇᖃᖅᑳᖅᓯᒪᔪᑦ ᐋᓐᓂᐊᖅᑐᓕᕆᓂᕐᒧᑦ ᑲᑐᔾᔨᖃᑎᒌᖏᑦ; ᐊᒻᒪ ᓅ ᐳᕋᓐᓱᕕᒃ ᐳᕙᓐᓄᑦ ᑲᑐᔾᔨᖃᑎᒌᑯᑦ.
