ᑐᓴᕋᑦᓴᓕᕆᔩᑦ

ᓄᑖᓐᖑᖅᑎᑦᓯᒋᐊᖃᕐᓂᖅ ᖃᓄᐃᓕᐅᕈᑎᒃᓴᓂᒃ ᓯᕗᓪᓕᖅᐹᒥ ᓇᓗᓇᐃᖅᓯᔪᖃᖅᑎᓪᓗᒍ ᓄᕙᒡᔪᐊᕐᓇᖅᑐᖃᖅᑐᒥᒃ COVID-19

(ᒪᐃ 1, 2020, ᐃᖃᓗᐃᑦ ᓄᓇᕗᑦ) ᓯᕗᓪᓕᖅᐹᒥ ᓇᓗᓇᐃᖅᓯᔪᖃᖅᑎᓪᓗᒍ ᓄᕙᒡᔪᐊᕐᓇᖅᑐᖃᖅᑐᒥᒃ COVID-19 ᓄᓇᕗᒻᒥ, ᓄᓇᕗᑦ ᑐᙵᕕᒃ ᑎᒥᖓᑦ ᐱᒋᐊᑲᐅᑎᒋᖁᔨᕗᑦ ᖃᐅᔨᓴᖅᑕᐅᔾᔪᑎᒃᓴᓂᒃ, ᓄᖅᑲᖅᑎᓪᓗᒋᑦ ᓄᓇᓕᐅᖃᑎᒌᓄᑦ ᐃᖏᕐᕋᔭᕋᓐᓂᖅ ᐊᒻᒪ ᐃᒪᖃᑦᓯᐊᖅᑎᓪᓗᒋᑦ ᐊᒻᒪ ᑭᓈᓗᓕᕆᔭᐅᓂᕐᒧᑦ ᐱᔨᑦᓯᖅᑕᐅᑦᓯᐊᕐᓗᑎᒃ.

“ᖃᐅᔨᒪᔪᐃᓐᓇᐅᓚᐅᖅᑐᒍᑦ ᑕᒪᓐᓇ ᓄᕙᒡᔪᐊᕐᓇᖅ COVID-19 ᑎᑭᔾᔫᒥᓛᕐᓂᖓᓂᒃ ᓄᓇᕗᑦᒧ. ᓱᓕ ᐱᕕᒃᓴᖅᑕᖃᖅᑐᖅ ᓯᐊᒻᒪᒃᑎᑦᓯᑦᑕᐃᓕᔾᔪᑎᒃᓴᓂᒃ ᐊᒻᒪ ᐊᐅᓚᑦᓯᐊᕐᓗᒋᑦ ᐊᒃᑐᐃᒍᑕᐅᔪᑦ. ᑐᐊᕕᕐᓇᖅᑐᖅᑕᖃᓕᕐᒪᑦ, ᑐᖔᒍᓪᓘᓐᓃᑦ ᑕᒪᑐᒪ ᓄᕙᒡᔪᐊᕐᓇᐅᑉ, ᐊᒻᒪ ᐅᖓᑕᓃᒻᒪᑦ ᑮᓇᐅᔭᖃᕈᑕᐅᒋᐊᓖᑦ ᐊᒻᒪ ᐃᖅᑲᓇᐃᔭᖅᑎᖃᕈᑕᐅᒋᐊᓖᑦ ᐊᕕᒃᑐᖅᓯᒪᓂᑦᑎᓐᓂ ᐅᖃᐅᓯᐅᒋᐊᓖᑦ. ᐱᑕᖃᕆᐊᖃᕐᓂᐊᖅᑐᒍᑦ ᐋᖅᑭᒃᓱᖅᓯᒪᒻᒪᕆᒃᑐᓂᒃ, ᐃᑲᔪᖅᑎᒌᒡᓗᓂ ᐱᓕᕆᐊᖃᕐᓂᖅ,” ᐅᖃᖅᑐᖅ ᐊᓗᑭ ᑰᑦᑎᖅ, ᐊᖓᔪᖅᑳᖓᑦ, ᓄᓇᕗᑦ ᑐᙵᕕᒃ ᑎᒥᖓᑦ (NTI).

ᓯᐊᒻᒪᒃᑎᒻᒪᕆᒡᓗᒋᑦ ᖃᐅᔨᓴᕈᑕᐅᒋᐊᓖᑦ ᐊᒻᒪ ᑐᑦᑕᕐᕕᐅᓂᐊᑦᑐᒥᒃ ᖃᐅᔨᓴᕐᓂᕐᒧᑦ ᐋᖅᑭᒃᓯᔪᖃᕆᐊᓕᒃ ᒫᓐᓇᑲᐅᑎᒋ ᐊᕕᒃᑐᖅᓯᒪᓂᐅᔪᒥ, ᑐᐊᕕᕐᓇᕐᓗᒍ ᒥᑦᑎᒪᑕᓕᒃ ᐃᓄᑑᑎᑦᓯᓂᖃᕆᐊᓖᑦ ᐊᒻᒪ ᐊᐅᓚᓵᖅᑎᑦᓯᒋᐊᓖᑦ ᐊᐃᑦᑐᖅᑕᐅᓯᒪᔪᒥᒃ ᐊᑐᓃᖅᑐᒥᒃ ᐊᒻᒪ ᓯᐊᒻᒪᒃᑎᑦᓯᑦᑕᐃᓕᒪᓗᓂ ᑕᒪᑐᒥᖓ ᓄᕙᒡᔪᐊᕐᓇᒥᒃ. ᓄᓇᕗᒥ ᐱᑕᖃᓐᖏᓗᐊᕐᓂᖓ ᐅᖁᒪᐃᓐᓂᕐᓂᐊᕐᕕᒃᑯᑎᒍᑦ ᖃᐅᔨᓴᕈᑎᓂᒃ, ᐃᓚᐅᓪᓗᓂ ᐅᖓᓯᒃᑐᒦᓐᓂᖅ, ᐅᓄᕈᓐᓃᖅᐹᓪᓕᖅᑎᑕᐅᓂᖏᑦ ᖃᖓᑕᓂᐅᕙᒃᑐᑦ ᐊᒻᒪ ᑭᖑᕙᕆᐊᕈᑕᐅᔪᑦ ᐊᓄᕆ ᐱᓪᓗᒍ, ᓴᖅᑭᑎᑦᓯᒍᑕᐅᓯᒪᔪᖅ ᑕᒫᓃᒐᔪᖕᓂᖏᓐᓂᒃ 7 ᐅᓪᓗᐃᑦ ᐱᒐᓱᐊᕐᓗᓂ ᓄᕙᒡᔪᐊᕐᓇᖅ COVID-19 ᖃᐅᔨᓴᕈᑎᓄᑦ ᓴᖅᑭᑎᑕᐅᔪᓂᒃ.

ᓄᓇᕗᑦ ᑐᙵᕕᒃ ᑎᒥᖓᑦ ᐱᒋᐊᑲᐅᑎᒋᖁᔨᔪᑦ ᓄᖅᑲᖅᑎᓪᓗᒋᑦ ᖃᖓᑕᔭᕋᒋᐊᖃᓐᖏᑦᑐᑦ ᐅᖓᒻᒧᑦ, ᐅᑎᒧᓪᓗ ᓄᓇᕗᒥᑦ ᐊᒻᒪ ᓄᓇᓕᐅᖃᑎᒌᓂᒃ, ᐃᓚᐅᓗᑎᒃ ᑕᒪᒃᑯᐊ ᖃᖓᑕᔫᒥᒃ ᐊᑭᓖᓪᓗᓂ ᐊᑐᖅᑐᐊᖃᑦᑕᕐᓃᑦ ᐊᒻᒪ ᐃᓱᒪᒋᓗᒋᑦ ᑲᒪᒋᓗᒋᑦ ᖃᖓᑕᔫᓕᕆᔩᑦ ᓄᓇᕗᒥ ᐱᑕᖃᕆᐊᖃᕐᓂᖏᓐᓂᒃ ᐱᔨᑦᓯᖅᑎᐅᑎᓪᓗᒋᑦ.

ᓄᓇᕗᒻᒥ ᐃᓄᐃᑦ ᐊᑐᐃᓐᓇᖃᐃᓐᓇᕆᐊᖃᕐᒪᑕ ᖃᐅᑕᒫᑦ ᐃᒪᕐᒥᑦ ᐊᒻᒪ ᑭᓈᓗᐃᑦ ᒥᓗᑲᖅᑕᐅᖃᑦᑕᕆᐊᖃᕐᒪᑕ, ᑐᐊᕕᕐᓇᖅᑐᒥᒃ ᓯᕗᓪᓕᐅᑎᓯᒪᓗᒍ ᒥᑦᑎᒪᑕᓕᒃ. ᐃᓘᓐᓇᑎᒃ ᓄᓇᕗᒥ ᐃᒡᓗᒥᐅᖃᑎᒌᑦ ᐃᒥᖅᑕᖅᑕᐅᖃᑦᑕᕆᐊᓖᑦ ᐊᒻᒪ ᑭᓈᓗᓕᕆᔭᐅᓗᑎᒃ ᖃᐅᑕᒫᑦ ᐊᑐᕐᓂᖓᓂ ᓄᕙᒡᔪᐊᕐᓇᖅ COVID-19 ᓯᐊᒻᒪᒃᑎᕐᓂᕐᒧᑦ ᐊᒻᒪ ᐸᕐᓇᐅᑎᓂᒃ ᐋᖅᑭᒃᓱᐃᔪᖃᕆᐊᖃᕐᓂᐊᖅᑐᖅ ᓇᓗᓇᐃᖅᓯᒪᖁᓪᓗᒋᑦ ᖃᐅᑕᒫᑦ ᐱᔨᑦᓯᖅᑕᐅᖃᑦᑕᕆᐊᖃᕐᓂᖏᓐᓄᑦ.

“ᖁᔭᓐᓇᒦᕈᒪᔭᕋ ᑖᓐᓇ ᐊᖓᔪᖅᑳᖓᑦ ᐋᓐᓂᐊᖅᑐᓕᕆᔨᒻᒪᕇᑦ ᓄᓇᕗᒻᒧᑦ ᑕᒪᑐᒥᖓ ᓄᕙᒡᔪᐊᕐᓇᒥᒃ COVID-19 ᐊᑯᓂ ᓯᐊᒻᒪᒃᑎᑦᓯᑦᑕᐃᓕᒪᓚᐅᕐᒪᑦ ᓄᓇᕗᒻᒥ. ᖁᔭᓐᓇᒦᕈᒪᒋᕙᒃᖃ ᓄᓇᕗᒥ ᐃᓄᐃᑦ ᐃᑲᔪᖅᓱᖃᑦᑕᐅᑎᓂᖏᓐᓄᑦ ᐅᖓᓯᒌᒃᑎᑦᑐᑎᒃ, ᐊᒡᒐᒥᓂᒃ ᐅᐊᓴᖃᑦᑕᖅᑐᑎᒃ ᐊᒻᒪ ᒪᓕᑦᓯᐊᖅᑐᑎᒃ ᐊᑐᖅᑕᐅᖁᔭᖏᓐᓂᒃ ᓘᒃᑖ ᐸᑐᓴᓐ. ᖃᐅᔨᒪᔪᖓ ᐃᓄᑦᓯᐊᕙᐃᑦ ᒥᑦᑎᒪᑕᓕᖕᒥᑦ ᐊᔪᓐᖏᓂᓕᒫᒥᓄᑦ ᐱᓕᕆᓂᐊᖅᑐᑦ. ᐃᓕᑦᓯᓐᓄᑦ ᐱᖃᑕᐅᕗᒍᑦ,” ᐅᖃᖅᑐᖅ ᑐᒡᓕᐊ−ᐊᖓᔪᖅᑳᑉ ᔭᐃᒻᔅ ᐃᑦᑐᓗᒃ.

ᑭᓇᑐᐃᓐᓇᖅ ᐅᒃᐱᕈᓱᒃᑯᓂ ᓴᖅᑭᕝᕕᐅᓯᒪᓂᕐᒥᓂᒃ ᑕᒪᑐᒧᖓ ᓄᕙᒡᔪᐊᕐᓇᒧᑦ COVID-19 ᐅᖃᐅᔾᔨᖁᔭᐅᕗᑦ ᓄᓇᕗᑦ ᒐᕙᒪᖏᑦᑕ ᓄᕙᒡᔪᐊᕐᓇᒧᑦ COVID-ᐊᑭᖃᓐᖏᑦᑐᖅ ᐅᖄᓚᕕᒃᓴᖅ 1-888-975-8601 ᐊᑯᓐᖓᓐᓂ 10 ᐅᓪᓛᒃᑯᑦ ᐊᒻᒪ 6 ᐅᓐᓄᒃᑯ, ᐅᕝᕙᓘᓐᓃᑦ ᑐᓴᖅᑎᑦᓯᓗᑎᒃ ᓄᓇᓕᖕᓂ ᐋᓐᓂᐊᕐᕕᖕᒥᑦ, ᐊᒻᒪ ᖃᓂᒃᓴᖅᑕᐃᓕᒋᐊᖃᓕᑦᓴᐅᑎᒋᓗᓂ ᐊᖏᕐᕋᒥᓃᓪᓗ ᐅᓪᓗᓄᑦ 14. ᐃᒡᕕᑦ ᓇᖕᒥᓂᖅ ᐋᓐᓂᐊᕐᕕᓕᐊᖅᑕᐃᓕᓗᑎᑦ.

ᐃᒃᐱᖕᓇᕐᓂᖏᑦ ᑕᒪᑐᒪ ᓄᕙᒡᔪᐊᕐᓇᐅᑉ COVID-19 ᐃᓚᖃᖅᑐᖅ ᐆᓇᖅᓯᖃᑦᑕᕐᓂᖅ, ᖁᐃᖅᑐᕐᓂᖅ ᐅᕝᕙᓘᓐᓃᑦ ᐊᓂᖅᓵᖅᑐᑦᓯᐊᖏᓐᓂᖅ. ᓴᐳᑎᓯᒪᔾᔪᑎᒋᓂᖅᐹᕆᔪᓐᓇᖅᑕᑦ ᐅᕝᕙᓘᓐᓃᑦ ᐊᐃᑦᑐᖅᑕᐅᑕᐃᓕᓂᖅ ᖃᓂᒃᓴᓗᐊᖅᑕᐃᓕᒪᓗᓂ, ᐊᒡᒐᓂᒃ ᐅᐊᓴᖃᑦᑕᕐᓂᖅ ᐊᑯᓂᐅᓂᒋᑎᖃᖅᑐᒥᒃ 20 ᓴᑲᓐᔅ, ᖁᐃᖅᑐᖃᑦᑕᕐᓗᑎᑦ ᐊᒻᒪ ᑕᒋᐅᖃᑦᑕᕐᓗᑎᑦ ᑕᓕᕐᐱᑦ ᐃᑯᓯᐊᓄᑦ ᐊᒻᒪ ᐊᖏᕐᕋᖅᓯᒪᐃᓐᓇᕐᓗᑎᑦ ᐊᔪᕐᓇᖏᓐᓂᓕᒪᖓᓄᑦ.

-30-

ᑐᑭᓯᒋᐊᒃᑲᓐᓂᕈᒪᒍᕕᑦ, ᐅᖃᕐᕕᒋᓗᒍ:

ᒪᓚᐃᔭ ᒥᑭᔾᔪᒃ
ᑐᑭᒧᐊᒃᑎᑦᑎᔨᐅᑲᐃᓐᓇᖅᑐᖅ ᑐᓴᖃᑦᑕᐅᑎᓕᕆᔨᓄᑦ
ᓄᓇᕗᑦ ᑐᙵᕕᒃ ᑎᒥᖓᑦ
ᐅᖃᓘᑖ: (867) 975-4907 ᐊᑭᖃᓐᖏᑦᑐᖅ ᐅᖄᓚᕕᒃᓴᖅ: 1-888-646-0006

www.tunngavik.com

Download (PDF, 134KB)