ᑐᓴᕋᑦᓴᓕᕆᔩᑦ

ᐃᖅᑲᐅᒪᔭᐅᓂᖓ ᕋᐃᒪᓐ ᓂᖏᐅᑦᓯᐊᖅ

(ᓯᑉᑎᒻᐱᕆ 28, 2022 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓᓄᑦ (ᑐᙵᕕᒃ) ᐊᖓᔪᖅᑳᖅ ᐊᓗᑭ ᑰᑦᑎᖅ ᐊᒻᒪᓗ ᐊᖓᔪᖅᑳᑉ−ᑐᒡᓕᐊ ᔭᐃᒥᓯ ᐃᑦᑐᓗᒃ ᕿᑦᓵᕈᑎᖃᒻᒪᕆᑉᐴᒃ ᐃᓅᒍᓐᓃᓐᓂᕆᓚᐅᖅᑕᖓᓄᑦ ᐊᖓᔪᖅᑳᑉ− ᑐᒡᓕᕆᓚᐅᖅᑕᖓ ᐊᒻᒪᓗ ᑲᑎᒪᔨᐅᖃᑦᑕᓚᐅᖅᑐᖅ ᕋᐃᒪᓐ ᓂᖏᐅᑦᓯᐊᖅ.

“ᑭᒡᒐᑐᖅᓱᒋᑦ ᓄᓇᕗᒻᒥᐅᑦ ᐃᓄᐃᑦ, ᐃᖅᑲᐅᒪᕙᒃᑲ ᓇᒡᓕᓂᒃᑯᑦ ᕋᐃᒪᓐ ᐃᓚᖏᑦ. ᐳᐃᒍᖅᑕᐅᓚᐅᖅᓯᒪᔾᔮᖏᑦᑐᖅ ᓱᓕᔪᒥᒃ ᐊᒻᒪᓗ ᐃᖕᒥᓂᒃ ᑐᓂᓯᒪᓪᓗᓂ ᓯᕗᓕᖅᑎᐅᓚᐅᕐᓂᖓ,” ᐅᖃᖅᑐᖅ ᐊᖓᔪᖅᑳᖅ ᐊᓗᑭ ᑰᑦᑎᖅ.

“ᖃᓂᒋᔮᓂ 40 ᐊᕐᕌᒍᑦ, ᕋᐃᒪᓐ ᓯᕗᓪᓕᐅᑎᓐᓇᓚᐅᖅᑕᖏᑦ ᐃᓄᐃᑦ ᐊᓯᓕᒫᖏᓐᓂᒃ, ᑐᓂᓯᒪᑦᓯᐊᕐᓂᕆᓚᐅᖅᑕᖓ ᐃᓅᓯᕐᒥᒍᑦ ᑎᑭᐅᑎᒍᑕᐅᓚᐅᖅᑐᖅ ᐱᐊᓂᒃᑕᐅᓂᖓᓄᑦ ᓄᓇᕗᑦ ᐊᖏᕈᑦ. ᕋᐃᒪᓐ ᐊᑎᓕᐅᖃᑕᐅᓚᐅᖅᑐᖅ ᐊᖏᕈᑎᓂᒃ ᑐᒡᓕᕆᔭᐅᒃᑲᓂᖅᑐᓂ−ᐊᖓᔪᖅᑳᒧᑦ ᑐᙵᕕᒃ ᐃᓚᒌᑦᓴᑦ ᓄᓇᕗᒻᒥ. ᓄᓇᕗᑦ ᖁᔭᓕᒻᒪᕆᒋᐊᓕᒃ ᑕᖃᓂᕋᓚᐅᖅᓯᒪᒐᓂ ᐃᖅᑲᓇᐃᔭᖃᑦᑕᓚᐅᕐᓂᖓᓄᑦ, ᐊᒻᒪᓗ ᐅᐱᒍᓱᑉᐳᖓ ᐃᖅᑲᓇᐃᔭᖃᑎᒋᔪᓐᓇᓚᐅᕋᒃᑯ ᐊᕐᕌᒍᕋᓴᓐᓂᒃ,” ᐅᖃᖅᑐᖅ ᐊᖓᔪᖅᑳᑉ−ᑐᒡᓕᐊ ᔭᐃᒥᓯ ᐃᑦᑐᓗᒃ.

ᐊᖓᔪᖅᑳᒧᑦ−ᑐᒡᓕᕆᔭᐅᓪᓗᓂ, ᕋᐃᒪᓐ ᐊᒻᒪᓗ ᓗᐃ ᐱᓚᑲᑉᓯᐅᓚᐅᖅᑐᖅ, ᓴᙱᓂᕆᔭᐅᓚᐅᖅᑐᑦ ᐃᑲᔪᖅᓯᓂᖏᑦ ᓯᒥᐅᓂ ᖃᐅᓐᓇᐅᓚᐅᖅᑐᖅ ᐊᕐᕙᓂᐊᕐᓂᕆᓚᐅᖅᑕᖓᓂᒃ ᑕᐃᑦᓱᒪᓂ ᐊᕐᕙᓐᓂᐊᕆᐊᖃᙱᑎᑕᐅᑎᓪᓗᒋᑦ. ᕋᐃᒪᓐ ᐃᑲᔪᖅᓯᒪᓚᐅᖅᑐᖅ ᓴᐳᔾᔨᓯᒪᓂᕐᒥᒃ ᐃᓄᐃᑦ ᐊᖑᓇᓱᓐᓂᕐᒧᑦ ᐱᔪᓐᓇᐅᑎᖏᓐᓂᒃ ᑐᙵᕕᖃᖅᓱᓂ ᐆᒪᔪᓕᕆᓂᖅ ᒪᑭᒪᐃᓐᓇᕈᓐᓇᕐᓂᖓᓂᒃ. ᕋᐃᒪᓐ ᓈᖕᒪᑦᓴᓚᐅᙱᑦᑐᖅ ᓯᕗᓪᓕᖅᐹᒥᒃ ᐃᖅᑲᑐᖅᑕᐅᒍᑎᒥᒃ, ᐊᖏᕈᑕᐅᕋᑕᓚᐅᖅᑐᒥᒃ ᒪᓕᒐᖅᑎᒍᑦ ᐊᕐᕙᑦᑐᖃᖃᑦᑕᕈᓐᓇᕐᓂᐊᓕᕐᓂᖓᓂᒃ ᐊᑕᐅᓯᕐᒥᒃ. ᐅᓪᓗᒥ, ᓄᓇᕗᒻᒥ ᐊᕐᕙᒍᓐᓇᖅᓯᑎᑕᐅᓯᒪᓕᖅᑐᑦ ᑕᓪᓕᒪᓂᒃ ᒪᑭᒪᐃᓐᓇᖅᓱᓂ.

ᕋᐃᒪᓐ ᓯᕗᓕᖅᑎᐅᓚᐅᖅᑐᖅ ᐃᓄᐃᑦ ᓇᖕᒥᓂᖅ−ᐱᓇᓱᐊᕈᓐᓇᕐᓂᖏᓐᓄᑦ ᓇᓄᓕᕆᓂᕐᒧᑦ, ᑲᑎᒪᔭᖅᑐᑎᑦᓯᓚᐅᖅᑐᖅ ᖃᓈᒧᑦ, ᐊᑯᑭᑦᑐᓂ ᐊᒻᒪᓗ ᓄᓇᕕᒻᒧᑦ ᐃᓄᐃᑦ ᐊᖑᓇᓱᑦᑏᑦ ᐃᖅᑲᓇᐃᔭᖃᑎᒌᖁᓪᓗᒋᑦ ᒪᑭᒪᒍᑎᒃᓴᓄᑦ ᐊᐅᓚᑦᓯᓂᕐᒥᒃ, ᐃᓕᖅᑯᓯᖅ ᓴᐳᔾᔭᐅᓯᒪᓂᖓᓂᒃ ᐊᒻᒪᓗ ᓂᕆᔭᑦᓴᖃᑦᓯᐊᖃᑦᑕᓂᕐᒥᒃ. ᑕᒪᓐᓇ ᐃᖅᑲᓇᐃᔭᖃᑎᒌᓐᓂᖓ ᐃᓄᐃᑦ ᒐᕙᒪᒃᑯᓐᓄᑦ ᐃᓚᓕᐅᔾᔨᒍᑕᐅᒍᓐᓇᖅᓯᓚᐅᖅᑐᖅ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐃᓄᒋᐊᒃᑎᒋᓂᖏᑎᒍᑦ ᒥᑦᓴᐅᓴᑦᑕᐅᓯᒪᔪᓂᒃ ᐊᒻᒪᓗ ᐊᖑᓇᓱᓐᓂᕐᒧᑦ ᑰᑕᓂᒃ.

ᑐᙵᕕᒃᑯᑦ ᐆᒪᔪᒥᓃᑦ ᓂᕿᑦ ᖁᐱᕐᕈᖃᙱᒃᑲᓗᐊᕐᒪᖔᑕ ᖃᐅᔨᓴᕐᓂᖅ ᐃᖅᑲᐅᒪᓇᕈᑎᒋᒻᒥᔭᖓ ᕋᐃᒪᓐ ᐱᓕᕆᐊᕆᓚᐅᖅᑕᖓᓂᒃ. ᐱᒋᐊᖅᑐᓂ ᐃᖃᓗᓐᓂ 2017-ᒥ ᐆᑦᑐᕋᐅᑎ ᖃᐅᔨᓴᕐᓂᕐᒧᑦ ᕿᓚᒥᐅᓂᖅᓴᐅᔪᒃᑯᑦ ᐊᑐᐃᓐᓇᕈᖅᑕᐅᖃᑦᑕᖁᓪᓗᒋᑦ ᖃᐅᔨᓴᕈᑎᒥᓃᑦ ᐃᓄᓕᖅᑕᓂᒃ ᓂᕿᓂᒃ ᖃᓄᐃᓐᓇᖏᓐᓂᖏᑦ, ᐱᓕᕆᐊᖅ ᖃᐅᔨᓴᖃᑦᑕᖅᑐᖅ ᐅᖓᑖᓃᑦᑐᓂᒃ 100 ᐊᐃᕕᒥᓂᕐᓂᒃ ᐊᕐᕌᒍᑕᒫᑦ. ᖁᐱᕐᕈᖃᙱᒃᑲᓗᐊᕐᒪᖔᑕ ᓂᖀᑦ ᖃᐅᔨᓴᕐᓂᖅ ᐃᑲᔪᑎᔪᖅ ᐃᓘᓐᓈᒍᑦ ᖃᓄᐃᙱᑦᓯᐊᑲᓐᓂᕈᑎᒃᓴᖏᓐᓄᑦ ᓄᓇᕗᒻᒥ ᐃᓄᐃᑦ, ᐃᓕᖅᑯᓯᒃᑯᑦ ᐊᒻᒪᓗ ᑎᒥᒧᑦ ᐃᑲᔫᑎᖃᕐᓂᖓᓂᒃ ᑕᑯᓐᓇᒐᐅᓂᖓᒍᑦ, ᐊᒻᒪᓗ ᐱᖕᒪᕆᐅᒻᒥᔪᖅ ᐃᑲᔫᑎᓯᒪᓂᖓ ᐅᓇᑕᕐᓂᕐᒥᒃ ᓂᕆᔭᒃᓴᖃᑦᓯᐊᓂᕐᒧᑦ ᓄᓇᕗᒻᒥ.

ᓴᐃᒻᒪᑏᑦ/ᐊᐅᓚᖁᑏᑦ ᐊᕝᕙᓃᓐᓂᐊᖅᑐᑦ ᓯᓚᑖᓂ ᑐᙵᕕᒃᑯᑦ ᐊᒻᒪᓗ ᐊᕕᑦᑐᖅᓯᒪᓃᑦ ᐃᓄᐃᑦ ᑲᑐᔾᔨᖃᑎᒌᑦ ᐊᓪᓚᕝᕕᖏᓐᓂ ᓯᕿᓂᖅ ᓂᐱᓐᓂᖓᓄᑦ ᐅᓪᓗᖓᓂ ᕋᐃᒪᓐ ᓄᓇᒧᑦ ᐃᓕᔭᐅᓂᖓᑕ ᐅᓪᓗᖓᓂ.

ᖃᓄᐃᓕᐅᕐᓂᐅᖃᑦᑕᖅᓯᒪᔪᑦ

1972-ᒥ, ᕋᐃᒪᓐ ᓂᖏᐅᑦᓯᐊᖅ ᐱᒋᐊᓚᐅᖅᑐᖅ ᐊᑯᓂᐊᓗᒃ ᐱᓕᕆᐊᕆᓂᐊᓕᖅᑕᒥᓂᒃ ᓴᙱᓂᖃᒻᒪᕆᑦᑐᒥᒃ ᐊᔭᐅᖅᑎᐅᓂᕐᒥᒃ ᐃᓄᐃᑦ ᓇᖕᒥᓂᖅ−ᒐᕙᒪᑖᕐᓂᖓᓂᒃ ᑲᑎᒪᔨᐅᖃᑕᐅᓂᕐᒥᒍᑦ ᓄᓇᓕᓐᓂ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᓐᓄᑦ, ᐃᓚᒌᑦᓴᑯᓐᓄᑦ, ᐊᒻᒪᓗ ᐃᓄᒻᒪᕆᓕᕆᔨᒃᑯᓐᓄᑦ.

ᕋᐃᒪᓐ ᑲᑎᒪᔨᐅᓚᐅᖅᑐᖅ ᐃᓄᐃᑦ ᑕᐱᕇᑦ ᑲᓇᑕᒥ ᑲᑎᒪᔨᖏᓐᓂ ᐊᒻᒪᓗ ᓴᖅᑮᓪᓗᓂ ᑭᕗᐃᑕᓐ ᑲᑎᒪᔨᓂᒃ, ᑭᖑᕝᕕᐅᑎᓚᐅᖅᑎᓐᓇᒋᑦ ᐃᓄᐃᑦ ᑕᐱᕇᑦ ᑲᓇᑕᒥ ᐊᒻᒪᓗ ᑭᕙᓪᓕᖅ ᐃᓄᐃᑦ ᑲᑐᔾᔨᖃᑎᒌᑦ, ᑕᐃᒪᐃᓕᖓᑎᓪᓗᒋᑦ.

ᑲᑎᒪᔨᐅᓚᐅᕐᒥᔪᖅ ᑐᙵᕕᒃ ᐃᓚᒌᑦᓴᑦ ᓄᓇᕗᒻᒥ, ᑭᖑᕝᕕᐅᑎᓚᐅᖅᑎᓐᓇᒋᑦ ᑐᙵᕕᒃᑯᑦ. ᕋᐃᒪᓐ ᖃᐅᔨᒪᔨᑕᐅᖃᑦᑕᓚᐅᖅᑐᖅ ᐋᔩᕋᕈᑕᐅᓂᖓᓂ ᒫᓐᓇ ᐊᖏᓂᖅᐹᖑᓕᖅᑐᒥᒃ ᓄᓇᑖᕐᓂᕐᒧᑦ ᐊᖏᕈᑎᓂᒃ ᑲᓇᑕᐅᑉ ᐊᑐᖅᓯᒪᔭᖏᓐᓂ. ᕋᐃᒪᓐ ᐊᑎᓕᐅᖃᑕᐅᓯᒪᔪᖅ ᓄᓇᕗᑦ ᐊᖏᕈᑎᖏᓐᓂ.

ᓄᓇᕗᑦ ᐊᖏᕈᑎᖏᑦ ᐱᐊᓂᒃᑕᐅᒻᒪᑕ 1993-ᒥ, ᕋᐃᒪᓐ ᓂᕈᐊᖅᑕᐅᓚᐅᖅᑐᖅ ᓄᓇᕗᑦ ᑐᙵᕕᒃ ᑎᒥᖓᑕ ᑲᑎᒪᔨᖏᓐᓄᑦ ᑐᒡᓕᑲᓐᓂᖓᓄᑦ−ᐊᖓᔪᖅᑳᑉ ᐊᒻᒪᓗ ᐱᓕᕆᐊᕇᓐᓇᓕᖅᓱᒍ 2011-ᒧᓄᑦ.

ᐃᖅᑲᓇᖅᑐᑦ ᐅᓪᓗᑦ:

ᐃᓄᐃᑦ ᑕᐱᕇᑦᓴᑦ ᑲᓇᑕᒥ ᑲᑎᒪᔨᐅᓚᐅᖅᑐᖅ 1976- 1984

ᐃᓄᐃᑦ ᑕᐱᕇᑦᓴᑦ ᑲᓇᑕᒥ ᐊᖓᔪᖅᑳᑉ−ᑐᒡᓕᕆᓚᐅᖅᑕᖓ 1985-1988

ᑐᙵᕕᒃ ᐃᓚᒌᑦᓴᑦ ᓄᓇᕗᒻᒥ ᑲᑎᒪᔨᐅᖃᑕᐅᓚᐅᖅᑐᖅ 1983-1992

ᑭᕗᐃᑎᓐ ᑲᑎᒪᔨᖏᓐᓄᑦ ᑲᑎᒪᔨᐅᖃᑕᐅᓚᐅᖅᑐᖅ 1990-1992

ᑐᙵᕕᒃᑯᓐᓂ ᐊᖓᔪᖅᑳᑉ−ᑐᒡᓕᕆᓚᐅᖅᑕᖓ 1993-2011

ᑭᕙᓪᓕᖅ ᐃᓄᐃᑦ ᑲᑐᔾᔨᖃᑎᒌᑦ ᐊᖓᔪᖅᑳᑉ−ᑐᒡᓕᕆᓚᐅᖅᑕᖓ 2012- 2019

– 30 –

 

ᑐᑭᓯᒋᐊᒃᑲᓂᕐᕕᒃᓴᖅ:

ᓵᓐ ᕗᐊᑦᓯᕼᐅᐊᓐ

ᑭ/ᑐᑭᒧᐊᒃᑎᑦᑎᔨ ᑐᓴᐅᒪᔾᔪᑎᓕᕆᔨᒃᑯᓐᓂ

ᓄᓇᕗᑦ ᑐᙵᕕᒃ ᑎᒥᖓ

ᐅᖄᓚᐅᑖ:(867) 975-4900/ᐊᑭᖃᙱᑦᑐᖅ: 1-888-646-0006

Download (PDF, 77KB)