ᑐᓴᕋᑦᓴᓕᕆᔩᑦ

ᐊᖓᔪᖅᑳᖓᑦ ᓄᓇᕗᑦ ᑐᓐᖓᕕᒃᑯᑦ ᑎᒥᖓᑦᑕ ᑲᑎᒪᖃᑎᖃᖅᐳᖅ ᓯᕗᓕᖅᑎᒥᒃ ᐳᕋᐃᒻ ᒥᓂᔅᑕᖓᓐᓂᒃ ᑲᓇᑕᐅᑉ

(ᐊᐅᒡᒍᓯ 20, 2009 — ᐃᖃᓗᐃᑦ, ᓄᓇᕗᑦ) ᐹᓪ ᖃᓗᔾᔭᒃ, ᐊᖓᔪᖅᑳᖓᑦ ᓄᓇᕗᑦ ᑐᓐᖓᕕᒃᑯᑦ ᑎᒥᖓᑦᑕ, ᐅᖃᖅᓯᒪᔪᖅ ᖁᕕᐊᑦᑐᒥᓂᐅᓂᕋᖅᓱᓂ ᑲᑎᒪᖃᑎᖃᕆᐊᑦᓴᖅ ᐳᕋᐃᒻ ᒥᓂᔅᑕ ᕼᐋᐸ-ᒥᒃ ᐃᖃᓗᓐᓂ ᐅᓐᓅᓚᐅᖅᑐᖅ.

ᐊᖓᔪᖅᑳᖅ ᐹᓪ ᖃᓗᔾᔭᒃ ᐊᒻᒪᓗ ᒥᐅᕆ ᓴᐃᒪᓐ, ᐊᖓᔪᖅᑳᖓᑦ ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᑲᑎᒪᖃᑎᖃᓚᐅᖅᑑᖅ ᐸᕋᐃᒻ ᒥᓂᔅᑕ-ᒥᒃ ᐊᒻᒪᓗ ᒥᓂᔅᑕ ᐊᒡᓘᑲᖅ ᐊᒻᒪᓗ ᓯᑐᕌᓪ ᐳᕋᐃᒻ ᒥᓂᔅᑕ ᐅᑭᐅᖅᑕᖅᑐᒥ ᐳᓚᕋᑦᑎᓪᓗᒍ.

ᖃᓗᔾᔭᒃ ᐅᖃᕆᐊᒃᑲᓐᓂᓚᐅᖅᑐᖅ ᐊᖏᖃᑎᒌᓐᓂᖅᑕᖃᕐᓂᕆᐊᖓ ᑕᕝᕙᓂ ᑲᑎᒪᓂᕐᒥᒃ ᐊᐅᓚᔾᔭᒋᐊᕐᓂᖅᑕᖃᒃᑲᓐᓂᕆᐊᖃᕆᐊᖓ ᐱᕚᓪᓕᖅᑎᑕᐅᓂᐊᖅᐸᑕ ᐃᓄᐃᑦ ᖃᑭᒪᓇᓱᐊᕈᑎᑦᓴᖏᑦ ᐃᓅᓯᖏᓪᓗ. ᖃᓗᔾᔭᐅᑉ ᑕᑯᓐᓇᖅᑕᖓᒍᑦ, ᑕᒪᓐᓇ ᐱᔭᕆᐊᖃᖅᑎᑦᓯᒻᒪᑦ ᒐᕙᒪᑐᖃᒃᑯᓐᓂᒃ ᑎᑭᐅᒋᐊᖃᕐᓂᖏᓐᓂᒃ ᑲᒪᒋᒋᐊᖃᖅᓯᒪᔭᒥᓐᓄᑦ ᐊᑕᓂ ᓄᓇᕗᒻᒥ ᓄᓇᑖᓂᕐᒧᑦ ᐊᖏᖃᑎᒌᒍᑎᒻᒪᕆᐅᑉ. “ᐊᑎᓕᐅᖃᑎᖃᖅᓯᒪᒐᑦᑕ ᐊᖏᖃᑎᒌᒍᑎᑦᑎᓐᓂᒃ ᑯᐃᓐ-ᓗ ᑭᒡᒍᖅᑐᔨᖏᑦ 1993-ᒥ, ᒪᓕᒐᕆᔭᐅᔪᖅ ᓄᓇᒧᑦ, ᑐᓐᖓᕕᐅᒍᒫᕐᓂᐊᖅᓱᓂᓗ ᐊᑯᓃᖅᑐᒧᑦ, ᑲᓲᒪᓂᖃᑦᓯᐊᖃᑦᑕᕐᓗᑎᒃ ᐃᓄᐃᑦ ᒐᕙᒪᒃᑯᓪᓗ,” ᐅᖃᖅᑐᖅ. “ᑭᓯᐊᓂ ᐊᕐᕌᒍᕋᓵᓗᓐᓂᒃ ᑭᖑᕙᕆᐊᕈᔾᔭᐅᓯᒪᔪᒍᑦ ᐊᑐᓕᖅᑎᑕᐅᓂᖓᓄᑦ. 16-ᓂᒃ ᐊᕐᕌᖑᓂᒃ ᐃᖏᕐᕋᓕᖅᑐᒍᑦ, ᓱᓕ ᑲᔪᓯᑎᑕᐅᓯᒪᓐᖏᑦᑐᑦ ᑎᑎᕋᖅᑕᐅᓯᒪᔪᑦ ᐋᑎᑯᐃᑦ. ᐊᑐᓕᖅᑎᑦᓯᓂᖅ ᑕᐃᒪᐃᓕᖓᑐᐃᓐᓇᖅᑎᑕᐅᒋᐊᖃᓐᖏᒻᒪᑦ ᓇᐅᑐᐃᓐᓇᕐᓄᑦ ᒐᕙᒪᓄᑦ.”

ᖃᓗᔾᔭᒃ ᐅᖃᕆᐊᒃᑲᓐᓂᖅᑐᖅ ᐊᑕᖏᖅᑐᓂᒃ ᐊᑐᓕᖅᑎᑦᓯᓂᖅ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᖃᑎᒌᒍᑎᒻᒪᕆᒻᒥᒃ ᑐᓐᖓᕕᖃᑦᓯᐊᕋᔭᖅᑐᖅ ᐳᕋᐃᒻ ᒥᓂᔅᑕ ᐊᑦᓱᕉᑎᖓᓂᒃ ᐅᑭᐅᖅᑕᖅᑐᒥ ᓴᓐᖏᓂᖃᖅᑎᑦᓯᓂᕐᒥᒃ. ᑎᑎᕋᖅᓯᒪᔪᑦ ᓇᓗᓇᐃᔭᐃᔪᑦ ᓄᓇᕗᒻᒥ ᓄᓇᑖᓂᕐᒧᑦ ᐊᖏᖃᑎᒌᒍᑎᒻᒪᕆᒻᒥᒃ ᐃᓕᑕᖅᓯᒻᒪᑕ “ᐃᑲᔪᖅᓯᒍᑕᐅᔪᓂᒃ ᐃᓄᓐᓄᑦ ᑲᓇᑕᐅᑉ ᐊᑑᑎᓯᒪᔭᖏᓐᓄᑦ, ᖃᓄᐃᑦᑑᓃᖓᓄᑦ, ᐊᒻᒪᓗ ᓴᓐᖏᓂᖃᕐᓂᖓᓄᑦ ᐅᑭᐅᖅᑕᖅᑐᒥ.” ᐅᖃᖅᓱᓂᓗ ᑲᓇᑕᐅᑉ ᓇᔫᑎᓂᖓ ᐅᑭᐅᖅᑕᖅᑐᒥ ᐱᓯᒪᔪᖅ ᐃᓄᐃᑦ ᓇᔫᑎᓂᖓᓐᓂᒃ. “ᐸᓖᓯᒃᑯᑦ, ᐃᓕᓐᓂᐊᑎᑦᓯᔩᑦ, ᓂᐅᕕᖅᑏᑦ, ᒐᕙᒪᒃᑯᓐᓂᓗ ᐃᖅᑲᓇᐃᔭᖅᑐᑦ ᐅᑭᐅᖅᑕᖅᑐᓕᐊᖅᓯᒪᔪᑦ ᐃᓄᐃᑦ ᑕᒫᓂ ᓄᓇᖃᕐᓂᑯᖏᓐᓄᑦ,” ᐅᖃᖅᓱᓂ. ᐅᖃᒃᑲᓐᓂᖅᓱᓂᓗ ᓄᓇᓕᖏᑦ ᖃᐅᓱᐃᑦᑑᑉ ᐊᐅᓱᐃᑦᑑᓪᓗ ᑕᕝᕙᓐᖑᖅᑎᑕᐅᓯᒪᓚᕿᒻᒪᕆᒋᐊᖏᒃ, ᐃᓚᖓᒍᑦ, ᑲᓇᑕᒥ ᐃᓄᓐᓂᒃ ᓇᔫᑎᔪᖃᕆᐊᖃᖅᓯᒪᓂᖓᓄᑦ.

ᖃᓗᔾᔭᒃ ᐅᖃᕐᒥᔪᖅ ᑲᓇᑕ ᐊᑐᕐᓂᐊᕈᓂ ᓄᓇᓕᖏᓐᓂᒃ ᐅᑭᐅᖅᑕᖅᑑᑉ, ᐱᕈᖅᐸᓪᓕᐊᑎᑦᓯᖁᓪᓗᒋᑦ ᖃᓄᐃᓐᖏᑦᓯᐊᖅᑐᓂᒃ, ᐊᔪᖅᓴᖏᑦᑐᓂᒃ ᓄᓇᓕᓐᓂᒃ ᐊᑯᓃᖅᑐᒨᖓᓂᐊᕐᒪᑕ ᑲᓇᑕᐅᑉ ᓯᕗᓂᑦᓴᖓᓄᑦ. “ᐃᓄᓐᓂᒃ ᐊᑐᕐᓂᖅ ᓄᓇᓕᑦᑎᓐᓂᒃ ᐊᑯᓃᖅᑐᒨᖓᔪᖅ, ᐅᑭᐅᖅᑕᖅᒦᑯᑖᑦᓯᒪᓂᖅᓴᐅᒐᑦᑕ ᑭᓇᒃᑯᓕᒫᓂᒃ ᑕᒪᓐᓇᓗ ᐊᖏᕐᕋᕇᓐᓇᕐᓂᐊᖅᓱᑎᒍ ᓄᓇᖃᖅᑳᖅᓯᒪᔪᑦ ᓄᓇᖓᑦ,” ᐅᖃᓚᐅᖅᑐᖅ.

ᑐᑭᓯᒋᐊᒃᑲᓐᓂᕈᒪᒍᕕᑦ ᓱᓕ:
ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᑦ
ᐅᖄᓚᐅᑦ:
ᐅᖓᓯᒃᑐᒥᒃ ᐊᑭᖃᖏᑦᑐᖅ: