ᑐᓴᕋᑦᓴᓕᕆᔩᑦ

ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᓴᖅᑭᒍᒫᕐᓂᐊᖅᑐᑦ ᐃᓅᔾᔪᑎᒃᓴᓂᒃ ᐆᒪᔪᖃᑦᑕᕐᓂᕐᒥᒃ ᕿᓚᓗᒐᕐᓄᑦ, ᐊᓪᓚᓐᖑᐊᓄᑦ ᐊᒻᒪᓗ ᐊᐃᕕᕐᓄᑦ

ᓄᓇᕗᑦ ᑐᓐᖓᕕᒃ ᑎᒥᖓ ᐃᓄᓐᓂᒃ ᐅᖃᕆᐊᖃᑦᑕᖁᔨᔪᑦ ᓄᓇᓕᓐᓂ ᐊᖑᓇᓱᑦᑐᓕᕆᔨᖏᓐᓄᑦ ᐊᒻᒪᓗ ᐊᕕᑦᑐᕐᓯᒪᓂᐅᔪᓂ ᐆᒪᔪᓕᕆᔨᒃᑯᑦ ᑲᑎᒪᔨᖏᓐᓄᑦ ᐊᑐᖃᑦᑕᓂᕐᒥᓂᒃ ᕿᓚᓗᒐᕐᓂᒃ, ᐊᓪᓚᓐᖑᐊᓂᒃ ᐊᒻᒪᓗ ᐊᐃᕕᕐᓂᒃ ᐃᓄᐃᑦ ᑐᓴᕆᐊᕐᕕᒋᔭᐅᓚᐅᓐᖏᓐᓂᖏᓐᓂ ᓈᓚᓐᓂᒃᑯᑦ ᐊᐅᓚᑕᐅᓂᐊᖅᑐᒥᒃ ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᑕᖅᑭᐅᓛᖅᑐᒥ. ᓈᓚᓐᓂᖃᕐᓂᐊᖅᑐᑦ ᐃᖃᓗᓐᓂ ᓯᑉᑎᒻᕙ 11-12, 2012, ᐊᒻᒪᓗ ᑕᒪᓐᓇ ᐊᑐᖅᑕᐅᔭᕆᐊᖃᓲᖅ ᓴᖅᑭᖅᑕᐅᕙᓪᓕᐊᑎᓪᓗᒋᑦ ᐃᓅᔾᔪᑎᒃᓴᓂᒃ ᐆᒪᔪᖃᑦᑕᕐᓂᖏᑦ ᐃᓄᐃᑦ ᕿᓚᓗᒐᕐᓂᒃ, ᐊᓪᓚᓐᖑᐊᓂᒃ ᐊᒻᒪᓗ ᐊᐃᕕᕐᓂᒃ ᐃᓛᒃᑯᑦ 5.6.25 ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᑦ ᒪᓕᓪᓗᒋᑦ.

 

ᑐᓐᖓᕕᒃᑯᑦ ᐊᖏᔪᖅᑳᑉ-ᑐᒡᓕᐊ ᔭᐃᒥᓯ ᐃᑦᑐᓗᒃ ᓇᓗᓇᐃᕐᓯᓪᓗᓂ ᐊᑐᓕᖅᑎᑕᐅᒋᐊᖃᕐᓯᒪᓂᖓ ᑭᖑᕙᕐᓯᒪᓂᖓᓂ.

“ᓄᓇᑖᕐᓂᕐᒧᑦ ᐊᖏᕈᑎᑦ ᐋᔩᕋᕈᑕᐅᑎᓪᓗᒋᑦ, ᐃᓄᐃᑦ ᐊᒻᒪᓗ ᒐᕙᒪᑦ ᖃᓄᐃᓕᖓᓂᐊᕐᓂᖓᓂᒃ ᓇᓗᓇᐃᕐᓯᒍᓐᓇᓚᐅᓐᖏᑦᑐᑦ ᐃᓅᔾᔪᑎᒃᓴᓂᒃ ᕿᓚᓗᒐᕐᓄᑦ, ᐊᓪᓚᓐᖑᐊᓄᑦ ᐊᒻᒪᓗ ᐊᐃᕕᕐᓄᑦ. ᐊᖏᕈᑕᐅᓚᐅᖅᑐᖅ ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᓇᓗᓇᐃᕐᓯᒐᔭᕐᓂᖏᓐᓂᒃ ᑭᖑᓂᐊᒍᑦ. ᐃᓄᐃᑦ ᐅᑕᖅᑭᑦᑐᐊᑦᓯᐊᕐᓯᒪᔪᑦ, ᑭᓯᐊᓂ ᒫᓐᓇ ᑲᒪᒋᒋᐊᕆᐊᖃᓕᖅᑕᖓ ᐊᑐᓕᖅᑎᓪᓗᒍ ᑖᓐᓇ ᐃᓛᒃᑰᖓᓂᖓ. ᑐᓐᖓᕕᒃᑯᑦ ᐅᑉᐱᕈᓱᑦᑐᑦ ᐃᓄᐃᑦ ᐋᖅᑭᐅᒪᑦᓯᔭᕆᐊᖃᕐᓂᖏᓐᓂᒃ ᐱᔪᓐᓇᐅᑎᒥᓂᒃ ᐃᓘᓐᓈᓂᒃ ᑲᑎᓕᒫᕐᓗᒋᑦ ᐆᒪᔪᖅᑕᐅᔪᓐᓇᖅᑐᓂᒃ ᕿᓚᓗᒐᕐᓂᒃ, ᐊᓪᓚᓐᖑᐊᓂᒃ ᐊᒻᒪᓗ ᐊᐃᕕᕐᓂᒃ,” ᐅᖃᖅᑐᖅ ᐃᑦᑐᓗᒃ.

 

ᓄᓇᑖᕐᓂᕐᒧᑦ ᐊᖏᕈᑎᓅᖅᑕᐅᓚᐅᖅᑐᖅ ᐃᓄᐃᑦ ᐱᔪᓐᓇᐅᑎᖓ ᓯᕗᓪᓕᖅᐹᒥ ᐊᖑᓇᓱᒍᓐᓇᓂᕐᒧᑦ ᐆᒪᔪᓂᒃ ᑲᑎᓪᓗᒋᑦ ᐊᖑᓇᓱᑦᑕᐅᔪᓐᓇᖅᑐᑦ ᐋᖅᑭᑦᑕᐅᓯᒪᑉᐸᑕ ᑖᒃᑯᓄᖓ ᓂᕐᔪᑎᓄᑦ. ᓯᕗᓪᓕᖅᐹᒥ ᐊᖑᓇᓱᒍᓐᓇᕐᓂᖅ ᐅᖃᐅᓯᐅᔪᓄᑦ ᐆᒪᔪᓄᑦ ᓇᓗᓇᐃᖅᑕᐅᓂᐊᖅᐳᖅ ᐅᑯᑎᒎᓇ ᓇᓕᐊᒍᑐᐃᓐᓇᖅ: 1) ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐋᖅᑮᓗᑎᒃ ᑲᑎᓪᓗᒋᑦ ᐊᖑᓇᓱᑦᑕᐅᔪᓐᓇᖅᑐᓂᒃ ᐆᒪᔪᖏᓐᓂᒃ ᐊᒻᒪᓗ ᐋᖅᑭᑦᓯᓗᑎᒃ ᐃᓅᔾᔪᑕᐅᔭᕆᐊᓕᓐᓂᒃ ᐆᒪᔪᕈᓐᓇᓂᕐᒧᑦ ᓈᓴᖅᑕᐅᓯᒪᓂᖏᓐᓂᒃ ᐊᖑᓇᓱᑦᑕᐅᔪᓐᓇᖅᑐᓂᒃ ᓄᓇᕗᒻᒥ ᐆᒪᔪᖅᑕᐅᖃᑦᑕᖅᑐᓂᒃ ᖃᐅᔨᓴᕈᑎᒥᓂᕐᓂᒃ; 2) ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐅᑉᐱᕈᓱᑉᐸᑕ ᐃᓄᐃᑦ ᐱᔭᕆᐊᖃᕐᓂᖏᓐᓂᒃ ᐃᓘᓐᓇᖏᓐᓂᒃ ᑲᑎᓪᓗᒋᑦ ᐊᖑᓇᓱᑦᑕᐅᒍᓐᓇᖅᑐᓕᒫᓂᒃ ᐋᖅᑭᑦᑕᐅᓯᒪᔪᓂᒃ ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓄᑦ ᑖᒃᑯᓄᖓ ᐆᒪᔪᓄᑦ.

 

ᐃᓄᖕᓂᒃ ᓈᓚᓐᓂᖅᑕᖃᓚᐅᖅᑎᓪᓗᒍ, ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᓇᓗᓇᐃᕐᓯᓂᐊᖅᑐᑦ ᖃᓄᖅ ᐋᖅᑭᑦᓯᓂᐊᕐᒪᖔᕐᒥᒃ ᐱᔪᓐᓇᐅᑎᖏᓐᓂᒃ ᓯᕗᓪᓕᖅᐹᒥ ᐊᖑᓇᓱᒍᓐᓇᕐᓂᕐᒧᑦ ᐊᒻᒪᓗ ᐃᓅᔾᔪᑎᒃᓴᖏᓐᓄᑦ ᐃᓄᐃᑦ ᕿᓚᓗᒐᕐᓄᑦ, ᐊᓪᓚᓐᖑᐊᓄᑦ ᐊᒻᒪᓗ ᐊᐃᕕᕐᓄᑦ. ᑐᓐᖓᕕᒃᑯᑦ ᐃᓄᖕᓂᒃ ᑎᓕᐅᕆᕗᑦ ᓄᓇᓕᖕᓂ ᐊᖑᓇᓱᑦᑐᓕᕆᔩᑦ, ᐊᕕᑦᑐᕐᓯᒪᓂᐅᔪᓂ ᐆᒪᔪᓕᕆᔨᒃᑯᑦ ᑲᑎᒪᔨᖏᑦ ᐊᒻᒪᓗ ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓂᒃ ᐃᓘᓐᓈᒍᑦ ᖃᐅᔨᓴᑎᑦᓯᒋᐊᖁᓪᓗᒋᑦ ᐃᓅᓯᕐᒧᑦ, ᐃᓕᖅᑯᓯᕐᒧᑦ ᐱᕙᓪᓕᐊᔪᓕᕆᓂᒃᑯᑦ ᒪᑭᒪᔾᔪᑎᓄᑦ ᐱᖕᒪᕆᐅᓂᖏᓐᓂᒃ ᕿᓚᓗᒐᑦ, ᐊᓪᓚᓐᖑᐊᑦ ᐊᒻᒪᓗ ᐊᐃᕖᑦ ᐃᓄᖕᓄᑦ.