(ᔫᓐ 7, 2011 – ᑲᖏᖅᖠᓂᖅ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓᑦᑕ ᐊᖏᔪᖅᑳᖓ ᑳᑎ ᑕᐅᑐᙱ ᐅᖃᑐᖅ ᓴᖅᑭᑕᐅᓚᐅᖅᑎᓪᓗᒋᑦ ᐃᒃᐸᒃᓴᖅ ᒐᕙᒪᑐᖃᒃᑯᑦ ᑮᓇᐅᔭᖅᑐᕈᑎᒃᓴᖏᑦ. ᑕᐅᑐᙱ ᖁᓅᕐᒥᖃᐅᔪᖅ ᐱᑕᖃᖏᓐᓂᖓᓄᑦ ᓅᑖᓂᒃ ᐊᖏᔪᓄᑦ ᑮᓇᐅᔭᖅᑐᕈᑎᒃᓴᓄᑦ ᓄᓇᕗᒻᒥ, ᐱᓗᐊᖅᑐᒥᒃ, ᐃᓅᓯᓕᕆᓂᕐᒧᑦ ᐃᒡᓗᓕᕆᓂᕐᒧᓪᓗ ᑐᐊᕕᕐᓇᖅᑑᒋᔭᐅᕙᒃᑐᑦ ᐃᓄᖕᓄᑦ, ᒫᓐᓇᑲᐅᑎᒋ ᐱᓕᕆᐊᖑᔪᒃᓴᐅᓪᓗᑎᒃ.
ᑕᐅᑐᙱ ᐅᖃᖃᐅᔪᖅ ᖁᓅᕐᒥᓇᖅᑲᐅᓂᖓᓂᒃ ᓄᑖᓂᒃ ᑮᓇᐅᔭᓂᒃ ᓴᖅᑮᔪᖃᖏᓐᓂᖓ ᐃᑲᔪᖅᑐᐃᔾᔪᑎᒃᓴᓂᒃ ᐃᓄᐃᑦ ᐅᖃᐅᓯᖓᓄᑦ, ᐃᑲᔫᑎᒃᓴᑲᓐᓂᕐᓄᑦ ᖃᓄᐃᑦᑕᐃᓕᕐᓂᕐᒧᑦ ᐊᒻᒪ ᓱᕈᓰᑦ ᐃᓕᓐᓂᐊᕈᑎᒃᓴᖏᓐᓄᑦ. “ᐃᓄᐃᑦ ᓇᓕᒧᒋᔭᐅᓕᖁᓪᓗᒋᑦ ᑲᓇᑕᒥᐅᑕᐅᖃᑎᑦᑎᓐᓄᑦ ᖃᓪᓗᓈᓃᑦᑐᓄᑦ, ᑮᓇᐅᔭᖃᖅᑎᑕᐅᓃᑦ ᐃᒡᓗᓕᕆᓂᕐᒧᑦ, ᐃᓕᓐᓂᐊᕐᓂᕐᒧ ᐊᒻᒪ ᐃᓅᓯᓕᕆᓂᕐᒧᑦ ᐊᑐᐃᓐᓇᐅᑎᑕᐅᔭᕆᐊᖃᕐᒪᑕ.”
ᑕᐅᑐᙱ ᓇᓗᓇᐃᖅᓯᑲᓐᓂᖃᐅᔪᖅ ᑐᙵᕕᒃᑯᑦ ᑐᙵᓱᑦᑎᑦᓯᒐᔭᓚᐅᕐᒪᑕ ᐃᑲᔫᑎᒃᓴᓂᒃ ᑭᖑᕝᕕᖅᑕᐅᔾᔪᑎᒋᓂᐊᖅᑕᖏᓐᓄᑦ ᓄᓇᖃᖅᑳᓯᒪᔪᑦ ᒪᒥᓴᕐᓂᕐᒧᑦ ᐃᑲᔫᑎᒋᕙᓚᐅᖅᑕᖏᓐᓄᑦ. ᑖᒃᑯᐊ AHF-ᑯᑦ, ᐊᒥᓲᒐᓗᐊᖅᑎᓪᓗᒋᑦ ᐃᑲᔫᑕᐅᔪᑦ, ᐃᑲᔪᖃᑦᑕᓚᐅᕐᒪᑕ ᐃᓄᖕᓂᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓄᑦ ᐊᒥᓱᖕᒪᕆᓐᓂᒃ ᐊᒃᑐᐃᓂᖃᑲᒻᒪᒃᓯᒪᑎᓪᓗᒋᑦ.
ᑮᓇᐅᔭᖅᑐᕈᑎᒃᓴᐃᑦ ᓴᖅᑭᑕᖏᑦ ᑮᓇᐅᔭᓕᕆᓂᕐᒧᑦ ᒥᓂᔅᑕᐅᑉ, ᔨᒻ ᕙᓚᐅᕋᑎ ᐊᓯᔾᔨᖅᓯᒪᓗᐊᖏᒻᒪᑕ. ᑐᙵᕕᒃᑯᑦ ᐃᓕᑕᖅᓯᔪᑦ ᐊᒻᒪ ᑐᙵᓱᑦᑎᑦᓯᓪᓗᑎᒃ 9 ᒥᓕᐊᓐᓂᒃ ᐊᕐᕌᒎᓐᓄᑦ ᒪᕐᕉᓐᓄᑦ, ᐃᓐᓇᐃᑦ ᐃᓕᓐᓂᐊᕈᑎᒃᓴᖏᓐᓄᑦ. “ᑕᒪᓐᓇ ᖁᔭᒋᒻᒪᕆᒃᑲᕗᑦ. ᑭᓯᐊᓂ, ᐃᑲᔫᑎᒃᓴᑲᓐᓂᕐᓂᒃ ᑐᓂᔭᐅᔭᕆᐊᖃᕋᑦᑕ. “ᐅᖃᖅᑐᖅ ᑕᐅᑐᙱ.
ᑮᓇᐅᔭᖅᑐᕈᑎᒃᓴᐃᑦ ᐃᓚᖃᕐᒥᔪᑦ 8 ᒥᓕᐊᓐᓂᒃ ᐊᕕᑕᐅᓂᐊᖅᑐᑦ ᐊᕕᒃᑐᖅᓯᒪᓂᐅᔪᓄᑦ, ᐊᑐᕈᒫᕐᓂᐊᖅᑐᑦ ᓴᓗᒪᔪᓄᑦ ᐆᒻᒪᖅᑯᑎᓄᑦ. ᐊᒻᒪᓗ 4 ᒥᓕᐊᓐ ᐊᕐᕌᒎᓐᓄᑦ ᒪᕐᕉᓐᓄᑦ ᓴᓐᖓᑎᖅᐹᓪᓕᖁᓪᓗᒍ ᐃᖅᑲᖅᑐᐃᕕᓕᕆᓂᖅ ᓄᓇᕗᒻᒥ, ᐃᑲᔫᑎᖃᑐᐃᓐᓇᕆᐊᓖᑦ ᐃᑲᔫᑎᖃᖏᓪᓗᑎᒡᓘᓐᓃᑦ ᓄᓇᕗᒻᒥ. ᓂᕆᐅᒃᐳᒍᑦ ᑕᒪᓐᓇ ᐅᖃᐅᓯᕆᔭᐅᒃᑲᓐᓂᓛᕐᓂᖓᓂᒃ ᐱᒻᒪᕆᐅᒋᔭᕗᑦ.
ᖁᓅᒻᒥᕋᓗᐊᖅᑎᓪᓗᑕ, ᑕᐅᑐᙱ ᐅᖃᒃᑲᓂᖅᑐᖅ ᑐᙵᕕᒃᑯᑦ ᐃᓄᐃᑦ ᐱᕕᒃᓴᖃᖅᑎᑕᐅᔭᕆᐊᖃᕐᒪᑕ ᐃᓗᐃᑦᑐᒥᒃ ᐃᓚᐅᔪᓐᓇᕐᓗᑎᒃ, ᐊᒻᒪᓗ ᓂᕆᐅᒃᑯᐳᑦ ᐱᓕᕆᖃᑎᖃᕐᓂᐊᓂᕐᒥᒃ ᒐᕙᒪᒋᔭᑦᑎᓐᓂ ᐱᒋᐊᖅᑎᑦᓯᕙᓪᓕᐊᓂᐊᕐᓗᑕ ᐱᒻᒪᕆᐅᒋᔭᖏᓐᓂᒃ ᐃᓄᐃᑦ.
