(ᒫᑦᓯ 5, 2010 — ᑲᖏᕐᖠᓂᖅ, ᓄᓇᕗᑦ) ᓄᓇᕗᑦ ᑐᓐᖓᕕᒃ ᑎᒥᖓᑕ ᑮᓇᐅᔭᓕᕆᓂᕐᒧᑦ ᐊᖏᔪᖅᑳᑉ ᑐᒡᓕᐊ ᕋᐃᒪᓐ ᓂᖏᐅᑦᓯᐊᖅ ᓂᓪᓕᕈᑎᖃᓚᐅᖅᑐᖅ ᓴᖅᑭᖅᑕᐅᓚᐅᖅᑎᓪᓗᒋᑦ ᐃᒃᐸᑦᓴᖅ ᒐᕙᒪᑐᖃᒃᑯᑦ ᑮᓇᐅᔭᖅᑑᑎᒃᓴᖏᑦ. ᓂᖏᐅᑦᓯᐊᖅ ᐅᖃᓚᐅᖅᑐᖅ ᖁᕕᐊᒋᔭᖃᓚᐅᓐᖏᒋᐊᖅ ᐱᑕᖃᓚᐅᓐᖏᓐᓂᖓᓄᑦ ᓄᑖᓂᒃ ᑮᓇᐅᔭᖅᑑᑎᒃᓴᐅᓇᔭᖅᑐᓂᒃ ᑲᒪᒍᑎᒃᓴᐅᓇᔭᖅᑐᓂᒃ ᐊᑲᐅᓐᖏᓪᓕᐅᕈᑎᕐᔪᐊᒻᒪᕆᐊᓘᒻᒧᑦ ᐃᓅᓯᖏᓐᓄᑦ ᓄᓇᕗᒻᒥ.
“ᑐᓐᖓᕕᒃᑯᑦ ᐃᓕᓴᖅᓯᐅᒪᒻᒪᑕ ᐊᒻᒪᓗ ᑐᓐᖓᓱᑦᑎᑦᓯᓪᓗᑎᒃ ᓄᑖᓐᖑᕆᐊᖅᑕᐅᔪᓂᒃ ᐅᓄᖅᑐᓂᒃ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐊᐅᓚᑕᐅᔪᓂᒃ ᐃᓱᓕᕝᕕᑦᓴᖃᓕᓚᐅᖅᑐᓂᒃ, ᐃᓚᒋᔭᐅᓪᓗᑎᒃ ᐊᐅᓚᑕᐅᔪᑦ ᐃᑉᐱᒋᔭᐅᔭᕆᐊᓕᓐᓄᑦ ᖃᓄᐃᓐᖏᑲᓐᓂᕈᑎᒃᓴᑦ ᐊᒻᒪᓗ ᐊᐅᒃᑯᑦ ᓱᑲᖃᓗᐊᖅᑐᓄᑦ, ᑭᓯᐊᓂᓕ ᖁᐊᖅᓵᖓᓇᖅᑐᖅ ᐊᒻᒪᓗ ᖁᕕᐊᓇᕋᓂ ᓄᑖᓂᒃ ᑮᓇᐅᔭᓂᒃ ᓴᖅᑭᖅᑐᖃᓐᖏᒻᒪᑦ ᐋᖅᑭᒋᐊᕈᑎᒃᓴᐅᓇᔭᖅᑐᓂᒃ ᐃᓪᓗᓕᕆᓂᕐᒨᖓᔪᓂᒃ ᓄᓇᕗᒻᒥ ᖁᐊᖅᓵᓇᖅᑐᒃᑰᕈᑕᐅᑎᓪᓗᒍ, ᐅᕝᕙᓘᓐᓃᑦ ᐃᑲᔪᕆᐊᕈᑎᒃᓴᑲᓐᓂᕐᓂᒃ ᐋᓐᓂᐊᖃᕐᓇᖏᑦᑐᓕᕆᓂᕐᒨᖓᔪᓄᑦ ᐊᒻᒪᓗ ᐃᓕᓐᓂᐊᕐᓂᓕᕆᓂᕐᒧᑦ,” ᐅᖃᓚᐅᖅᑐᖅ ᓂᖏᐅᑦᓯᐊᖅ. “ᑐᓐᖓᕕᒃᑯᑦ ᖁᕕᐊᒋᓐᖏᑕᖓᑕ ᐃᓚᖓ ᓄᑖᓂᒃ ᑮᓇᐅᔭᖅᑕᖃᓐᖏᒻᒪᑦ ᐃᓄᐃᑦ ᐅᖃᐅᓯᖓᓅᖓᔪᓂᒃ ᐊᐅᓚᑦᓯᔾᔪᑎᒃᓴᓂᒃ ᐊᒻᒪᓗ ᐱᔨᑦᓯᕋᐅᑎᒃᓴᓂᒃ, ᐊᒻᒪᓗ ᐋᖅᑭᒋᐊᕈᑎᒃᓴᖏᓐᓂᒃ ᑐᓚᑦᑕᕐᕖᑦ ᒥᑭᔫᑕᐅᓂᖅᓴᑦ ᓄᓇᓕᕋᓴᐅᓂᖅᓴᓂ ᓄᓇᕗᒻᒥ.”
ᓂᖏᐅᑦᓯᐊᖅ ᐅᖃᓚᐅᖅᑐᖅ ᑐᓐᖓᕕᒃᑯᑦ ᖁᕕᐊᓱᓚᐅᕐᓂᖏᓐᓂᒃ ᑮᓇᐅᔭᖅᑑᑎᒃᓴᓂᒃ ᐱᑕᖃᓚᐅᕐᓂᖓᓂᒃ ᑐᕌᖓᔪᓂᒃ ᐃᓕᓐᓂᐊᕆᐊᖅᑎᑕᐅᖃᑦᑕᓚᐅᖅᑐᓄᑦ ᒪᑭᒪᓕᖅᑐᓄᑦ, ᑭᓯᐊᓂᓕ ᑕᒪᓐᓇ ᓴᖅᑭᕈᑕᐅᔫᔮᖅᑐᖅ ᐊᐅᓚᓂᐅᓚᐅᖅᑐᒧᑦ ᐱᓗᐊᖅᑐᒥᒃ ᑐᒃᓯᕋᐅᑎᒃᑯᑦ ᑮᓇᐅᔭᖅᑖᑲᓐᓂᕈᑕᐅᓇᓱᐊᖅᑐᓂᒃ ᓴᖅᑭᓚᐅᖅᑐᓂᒃ ᐊᑭᓕᖅᑕᐅᔾᔪᑕᐅᓇᓱᐊᖅᑐᑦ ᐃᖅᑲᖅᑐᐃᕕᒃᑯᑦ ᑕᕝᕗᓐᖓᖓᔪᑦ. “ᒪᑐᕙᓪᓕᐊᓂᖓ ᓄᓇᖃᖅᑳᖅᓯᒪᔪᑦ ᒪᒥᓴᖅᑐᓕᕆᓂᕐᒧᑦ ᐊᐅᓚᑦᓯᕕᖓ ᐊᑲᐅᓐᖏᑦᑐᒻᒪᕆᐊᓘᔪᖅ. ᐃᓕᓐᓂᐊᕆᐊᖅᑎᑕᐅᖃᑦᑕᓚᐅᖅᓯᒪᔪᑦ ᐊᓂᐊᑦᓯᕕᒃᓴᒥᓂᒃ ᒪᒥᓴᖅᐸᓪᓕᐊᕕᑦᓴᒥᓂᒃ ᐱᔨᑦᓯᕋᐅᑎᓂᒃ ᐊᑐᕆᐊᖃᕐᒪᑕ,” ᐅᖃᓚᐅᖅᑐᖅ.
ᓂᖏᐅᑦᓯᐊᖅ ᖁᕕᐊᒋᓚᐅᖅᑕᖓ ᑐᒃᓯᕋᐅᑕᐅᔪᖅ ᐋᖅᑭᒋᐊᕈᑎᒃᓴᖅ ᐊᒻᒪᓗ $45 ᒥᓕᔭᓐ ᐊᖏᕈᑕᐅᔪᑦ ᓂᕿᓂᒃ ᑎᑭᓴᐅᖃᑦᑕᓂᕐᒧᑦ ᐊᑐᒐᑦᓴᐅᔪᑦ. “ᑖᓐᓇ ᐱᖕᒪᕆᐅᖕᒪᑦ ᐅᑭᐅᖅᑕᖅᑐᒧᑦ ᐃᓕᖓᑎᑕᐅᓯᒪᓪᓗᓂ ᐊᑐᐃᓐᓇᖃᖃᑦᑕᓂᖅᓴᐅᖁᓪᓗᒋᑦ ᐅᓇᒻᒥᓇᕐᓂᖅᓴᐅᓗᑎᒃ ᐱᓇᓱᐊᕆᐊᖏᑦ ᓂᖀᑦ ᑎᒥᒧᑦ ᐊᑐᕐᓂᓖᑦ. ᑕᒪᒃᑯᐊ ᐋᖅᑭᒋᐊᕈᑕᐅᕙᓪᓕᐊᓇᓱᐊᖅᑐᓄᑦ ᐊᓯᔾᔨᕐᓂᐅᔪᑦ ᐃᓄᖕᓄᑦ ᑐᓴᖅᑕᐅᑎᑕᐅᓚᐅᓐᖏᒃᑲᓗᐊᖅᑎᓪᓗᒋᑦ, ᑐᓐᖓᕕᒃᑯᑦ ᐱᕚᓪᓕᕈᑎᖃᕐᓂᐊᖁᔨᔪᑦ ᓴᖅᑭᐅᒪᑦᓯᐊᑲᓐᓂᓂᕐᒥᒃ ᐊᒻᒪᓗ ᓱᖏᖅᓲᑎᒃᓴᐅᓂᖅᓴᐅᔪᓂᒃ ᑕᑎᒃᓴᐅᓗᑎᒃ ᐃᓘᓐᓇᖏᓐᓄᑦ ᐊᑐᖃᑦᑕᖅᑐᓄᑦ ᑖᑦᓱᒥᖓ ᐊᐅᓚᓂᐅᔪᒥᒃ ᓴᖅᑭᐅᒪᓂᖓ. ᐊᑭᑭᓪᓕᒋᐊᕈᓐᓇᐅᑎᒃᑯᑦ ᐃᑲᔫᑎᒃᓴᓕᐊᖑᓯᒪᔪᖅ ᑎᒥᒧᑦ ᐊᑐᕐᓂᓕᓐᓂᒃ ᐊᑐᐃᓐᓇᖃᕐᓂᖅᓴᐅᖁᓪᓗᒋᑦ ᓂᐅᕕᖃᑦᑕᖅᑐᑦ.”
ᓂᖏᐅᑦᓯᐊᖅ ᐅᖃᒃᑲᓐᓂᓚᐅᖅᑐᖅ $8 ᒥᓕᔭᓐ ᑐᓂᔭᐅᕙᓪᓕᐊᖃᑦᑕᓂᐊᖅᑐᖅ ᐅᑭᐅᓐᓂᒃ ᒪᕐᕉᓐᓂᒃ ᓄᓇᕗᒻᒥ ᖃᐅᔨᓴᖅᑐᓕᕆᓂᕐᒧᑦ ᑐᔾᔫᒥᓇᓚᐅᖅᑐᖅ ᑐᓴᕆᐊᖓ. “ᑐᓐᖓᕕᒃᑯᑦ ᐃᑲᔪᖅᓯᒪᓂᕐᒥᓂᒃ ᓴᖅᑭᖅᑕᐅᓂᖓᓄᑦ ᒪᕐᕉᓕᖅᑲᖓᓐᖏᓯᐊᖅᑐᑦ ᓇᓗᓇᐃᖅᓯᒋᐊᒃᓴᖅ, ᐱᑕᖃᖃᑦᑕᓚᐅᓐᖏᒻᒪᑦ ᐊᐅᓚᓂᕆᔭᐅᔭᕆᐊᓕᒃ ᓯᖁᒥᑦᓯᒍᑕᐅᓯᒪᐃᓐᓇᖅᑐᓂ ᓄᓇᑖᕈᑎᓄᑦ ᐊᖏᕈᑎᑦᑎᓐᓂᒃ ᐊᒻᒪᓗ ᑕᒪᓐᓇ ᐅᖃᐅᓯᕆᖃᓯᐅᑎᓯᒪᔭᕗᑦ ᓇᓗᓇᐃᖅᓯᒪᖃᓯᐅᑎᓪᓗᒍ ᐊᖏᔪᒻᒪᕆᐅᔪᒥ ᐊᑐᓕᖅᑎᑦᑕᐅᕙᓪᓕᐊᖏᓐᓂᖏᓐᓄᑦ ᐃᖅᑲᖅᑐᐃᕕᖕᒦᑎᑦᓯᒍᑎᑦᑎᓐᓂ.”
