ᓄᓇᕗᑦ ᑐᓐᖓᕕᒃᑯᑦ ᐊᖓᔪᖅᑳᖓ ᓂᕈᐊᖅᓯᕗᖅ ᐊᓪᓚᑦᑎᒻᒪᕆᒋᓂᐊᖅᑕᖓᓂ
ᓄᓇᕗᑦ ᑐᓐᖓᕕᒃᑯᑦ ᐊᖓᔪᖅᑳᖓᑦ ᑳᑎ ᑕᐅᑐᓐᖏ ᐅᓪᓗᒥ ᑐᓴᖅᑎᑦᑎᖅᑲᐅᕗᖅ ᐃᖅᑲᓇᐃᔭᓕᖅᑎᑦᑎᓂᖓᓂ ᐋᓐ ᑯᕌᕗᑦᒻ ᐊᓪᓚᑦᑐᒻᒪᕆᐅᓂᐊᖅᑐᒥᑦ ᓄᓇᕗᑦ ᑐᓐᖓᕕᒃᑯᓐᓄᑦ, ᐱᓕᕆᐊᖃᕐᓗᓂ ᐊᖓᔪᖅᑳᑉ ᐊᓪᓚᕝᕕᖓᓂ ᐊᒻᒪᓗ ᑲᑎᒪᔨᐅᔪᓕᕆᖃᑦᑕᕐᓂᐊᕐᓗᓂ ᐊᓯᖏᓐᓄᑦ ᓱᕝᕕᐅᔪᓄᑦ. ᑯᕌᕗᑦ ᐊᓪᓚᕝᕕᖃᕐᓂᐊᖅᑐᖅ ᐃᖃᓗᓐᓂ.
“ᖃᐅᔨᒪᓯᒪᕙᕋ ᐋᓐ ᐊᕐᕌᒍᒐᓴᕐᓂᑦ ᓇᒻᒥᓂᖅ ᐊᒻᒪᓗ ᐃᖅᑲᓇᐃᔮᒃᑯᑦ, ᖃᐅᔨᒪᕗᖓᓗ ᐱᔪᓐᓇᕐᓂᖃᑦᑎᐊᕐᒪᑦ ᐃᑲᔪᕈᓐᓇᕐᓂᐊᕐᓗᓂ ᐅᖃᐅᔾᔨᒋᐊᖃᑦᑕᕐᓂᒃᑯᑦ ᐱᓕᕆᐊᖏᓐᓄᑦ ᓄᓇᕗᑦ ᑐᓐᖓᕕᒃᑯᑦ ᐱᓕᒻᒪᔅᓴᐃᑎᓪᓗᑕ ᓄᓇᕗᑖᕐᓂᕐᒧᑦ ᐊᖏᕈᒻᒥᑦ,” ᐅᖃᓚᐅᖅᐳᖅ ᑕᐅᑐᓐᖏ.
ᑯᕌᕗᑦ ᓄᓇᕗᒻᒥᐅᑕᐅᓯᒪᓕᖅᐳᖅ 30-ᐅᓗᐊᖅᑐᓂᒃ ᐊᕐᕌᒍᓂᑦ ᐊᒻᒪᓗ ᐃᖅᑲᓇᐃᔮᖃᖅᓯᒪᓪᓗᓂ ᐱᒻᒪᕆᐅᔪᓂᑦ ᐃᓚᓕᐅᑎᓪᓗᒍ ᓄᓇᑦᓯᐊᕐᒥ ᐱᓂᕐᓗᑦᑐᖃᖅᑎᓪᓗᒍ ᑲᒥᓴᓇᐅᓪᓗᓂ, ᒪᓕᒐᓕᐅᕐᕕᒻᒥ ᒥᓂᔅᑕᐃᑦ ᐊᓪᓚᑦᑎᒻᒪᕆᒋᓪᓗᓂᐅᒃ ᓄᓇᕗᒻᒥ ᒐᕙᒪᒃᑯᓐᓄᑦ, ᐊᖓᔪᖅᑳᖑᓪᓗᓂ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ ᐊᒻᒪᓗ ᐅᑭᐅᖅᑕᖅᑐᒥ ᑐᑭᒧᐊᖅᑎᐅᓪᓗᓂ ᐊᑭᑦᓯᕌᖅ ᐃᓕᓐᓂᐊᖅᑎᓄᑦ ᐃᖅᑲᖅᑐᐃᕕᓕᕆᒋᐅᐃᖅᓴᓂᕐᒧᑦ. ᓄᓇᕗᑦ ᑐᓐᖓᕕᒃᑯᓐᓄᑦ ᐃᖅᑲᓇᐃᔭᕆᐊᓯᓚᐅᖅᐳᖅ ᑕᒪᑐᒪᓂ ᐱᓇᓱᐊᕈᓯᕐᒥᑦ ᓄᓇᕗᑦ ᑐᓐᖓᕕᒃᑯᓐᓂ.
ᑐᑭᓯᒋᐊᒃᑲᓐᓂᕈᒪᒍᕕᑦ ᓱᓕ:
ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᑦ
ᐅᖄᓚᐅᑦ:
ᐅᖓᓯᒃᑐᒥᒃ ᐊᑭᖃᖏᑦᑐᖅ:
