(ᒪᐃ 26, 2010 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃᑯᑦ ᐊᖏᔪᖅᑳᖓ ᐹᓪ ᖃᓗᔾᔭᖅ ᐅᖃᖅᑲᐅᔪᖅ ᖁᕕᐊᒋᒐᒥᐅᒃ ᐱᐅᓯᕚᓪᓕᖅᑕᐅᓇᓱᐊᕐᓂᖓ ᓂᕿᓂᒃ ᑎᑭᓴᐃᓂᕐᒧᑦ ᐃᑲᔫᑎᐅᕙᒃᑐᖅ ᑭᓯᐊᓂ ᖃᐅᔨᒪᒋᐊᕈᒪᔪᖅ ᐃᑲᔫᑎᐅᑉ ᐊᐅᓪᓛᖅᑕᐅᓂᖓ ᓂᕿᑦᓯᐊᕙᓕᕆᓂᖅ ᑲᓇᑕᐅᑉ ᐅᑭᐅᖅᑕᖅᑐᖓᓄᑦ ᐃᑲᔫᑎ.
“ᐊᕐᕌᒍᒐᓴᓐᓄᑦ ᑐᓴᖃᑦᑕᖅᓯᒪᒐᒪ ᓄᓇᑖᖃᑕᐅᓯᒪᔪᓂᒃ ᐊᑭᑭᓪᓕᒋᐊᕈᑏᑦ ᓂᕿᓂᒃ ᑎᑎᖅᑲᓂᐊᕐᕕᒃᑯᑦ ᐃᑲᔫᑎᖏᑦ ᑕᑯᔭᐅᕙᙱᓐᓂᖏᑦ ᓂᐅᕕᖅᐸᒃᑐᓄᑦ.” ᐅᖃᖅᑐᖅ ᖃᓗᔾᔭᖅ. “ᖁᕕᐊᓱᒃᑐᖓ ᐱᕕᒃᓴᖃᕐᓂᐊᕋᒃᑕ ᑭᒃᑯᓐᓄᑦ ᑕᒪᓐᓇ ᑲᒪᒋᔭᐅᔭᕆᐊᖃᕐᒪᖔᖅ. ᐋᖅᑮᓯᒪᔭᕆᐊᖃᕐᓂᐊᕋᒃᑕ ᐊᑭᑭᓪᓕᒋᐊᕈᑏᑦ ᓂᐅᕕᖅᐸᒃᑐᓅᖃᑦᑕᖁᓪᓗᒋᑦ.”
ᐃᓚᖓ ᐱᐅᒻᒪᕆᒃᑐᖅ ᐋᖅᑭᒋᐊᕈᑎᐅᔪᓄᑦ ᐃᓄᐃᑦ ᓂᕿᖏᓐᓂᒃ ᐊᐅᓪᓚᑎᑦᓯᔪᓐᓇᕐᓂᖅ ᐊᑭᑐᓗᐊᖏᑐᒃᑯᑦ.
“ᐃᓄᐃᑦ ᓂᕿᖏᑦ ᓂᕿᑦᓯᐊᕙᐅᓂᖅᐹᖑᒻᒪᑕ ᓂᕆᕙᒃᑕᑎᓐᓂ ᐊᒻᒪ ᐱᒻᒪᕆᐅᓪᓗᓂ ᐃᓕᖅᑯᓯᒃᑎᓐᓄᑦ. ᖁᕕᐊᒋᔭᕋ ᓂᐅᕕᐊᒃᓴᐅᔪᓐᓇᓂᐊᕐᓂᖏᑦ ᐃᓄᐃᑦ ᓂᕿᖏᑦ ᑕᕝᕘᓇ ᓄᑖᖅ ᐃᑲᔫᑎᒧᑦ ᑭᓯᐊᓂ ᐊᓪᓗᕆᐊᒃᑲᓐᓂᕆᐊᓕᒃ ᐃᓄᐃᑦ ᐱᕕᖃᖅᑎᑕᐅᓗᑎᒃ ᐊᐅᓪᓚᑎᑦᓯᔪᓐᓇᓂᕐᒥᒃ ᐃᓄᐃᑦ ᓂᕿᖏᓐᓂᒃ ᐃᓚᖏᓐᓄᑦ ᐊᒻᒪ ᐱᖃᓐᓇᕆᔭᖏᓐᓄᑦ ᑕᕝᕘᓇ ᐃᑲᔫᑎᒃᑯᑦ”
ᐊᓯᔾᔨᕐᓂᖓᓄᑦ ᐱᐅᒻᒥᔪᖅ ᓴᖅᑮᓂᐊᕐᓂᖏᑦ ᑲᑎᒪᔨᕋᓛᓂᒃ ᐅᖃᐅᔾᔨᒋᐊᖅᑎᐅᓂᐊᖅᑐᓂᒃ ᐃᓄᓕᕆᔨᑐᖃᒃᑯᑦ ᒥᓂᔅᑕᖓᓐᓄᑦ.
“ᐅᓪᓗᒥᒧᑦ ᑐᓴᕆᐊᕐᕕᐅᓚᐅᖅᓯᒪᙱᑦᑐᒍᑦ ᐊᓯᔾᔨᖅᑕᐅᓂᐊᕐᓂᖏᓐᓄᑦ ᐃᑲᔫᑎᐅᑉ, ᑭᓯᐊᓂᓕ ᐃᓗᐊᓂ ᐃᓛᒃᑰᖓ 32 ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᖃᑎᒌᒍᑎᐅᑉ ᐃᑲᔫᑎᓕᒫᑦ ᐊᐅᓚᑕᐅᔪᑦ ᓄᓇᕗᒻᒥ ᒐᕙᒪᒃᑯᓐᓄᑦ ᐃᓚᓕᐅᔾᔨᓯᒪᖃᑦᑕᕆᐊᖃᕐᓂᖏᑦ ᐃᓄᓐᓂᒃ ᐋᖅᑭᒃᓯᒪᓂᖏᑎᒍᑦ ᐊᒻᒪ ᓴᖅᑭᑕᐅᓂᖏᑎᒍᑦ ᐃᑲᔫᑏᑦ.” ᐅᖃᖅᑐᖅ ᖃᓗᔾᔭᖅ. “ᐅᖃᐅᔾᔨᒋᐊᖅᑏᑦ ᑲᑎᒪᔨᕋᓛᖏᑦ ᐊᓪᓗᕆᐊᕐᓂᒃᑎᐊᕙᐅᔫᒐᓗᐊᖅ ᑭᓯᐊᓂ ᐃᖅᑲᐅᒪᒋᐊᖃᖅᑐᒍᑦ ᐊᑐᕈᓐᓃᑎᑦᓯᔾᔮᖏᒻᒪᑦ ᐃᓛᒃᑯᑦ 32-ᒥᒃ. ᐃᓗᐊᖃᑦᑕᕆᐊᖃᖅᑐᒍᑦ ᖃᐅᔨᒋᐊᕐᕕᐅᓗᑕᓗ ᐋᖅᑭᒃᓯᒪᓂᐊᕐᓂᖓᓄᑦ ᐃᑲᔫᑎᐅᑉ.”
