ᑐᓴᕋᑦᓴᓕᕆᔩᑦ

ᓄᓇᕗᑦ ᑐᓐᖓᕕᒃᑯᑦ ᐊᒻᒪ ᓄᓇᕗᑦ ᒐᕙᒪᖏᑦ ᐊᖏᖃᑎᒌᒃᐳᑦ, ᓇᓄᐃᑦ ᐊᒥᓲᓂᖏᑦ ᓄᓇᕗᒻᒥ ᐊᑦᑕᕐᓇᖅᑐᒦᓐᖏᑦᑐᑦ

(ᔪᓐ 02, 2010 — ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᓐᖓᕕᒃᑯᑦ ᐊᖓᔪᖅᑳᖓᑕ ᑐᖏᓕᖓ ᑮᓇᐅᔭᓕᕆᔨ ᕋᐃᒪᓐ ᓂᖏᐅᑦᓯᐊᖅ ᓇᓗᓇᐃᖅᓯᖅᑲᐅᕗᖅ ᐅᓪᓗᒥ ᐃᑲᔪᖅᓱᕐᓂᖓᓂᒃ ᓄᓇᕗᑦ ᐊᕙᑎᓕᕆᔨᒃᑯᑦ ᒥᓂᔅᑕᖓᓐᓂᒃ ᑖᓂᐅᓪ ᓲᓴᒃᒥᒃ ᐊᑐᓕᖅᑎᑕᐅᖁᔨᓚᐅᖅᑎᓪᓗᒍ ᓇᓄᐃᑦ ᐲᖅᑕᐅᖁᓪᓗᒋᑦ ᐆᒪᔪᑦ ᓄᖑᓂᐅᓴᓱᒋᔭᐅᔪᓂᒃ ᓇᓗᓇᐃᖅᑕᐅᓯᒪᓂᖏᓐᓂᒃ ᐆᒪᔪᑦ ᓄᖑᓐᓂᐊᓴᓱᒋᔭᐅᔪᑦ ᒪᓕᒐᖏᓐᓂ.

ᐊᑐᓕᖅᑎᑕᐅᖁᔭᐅᓚᐅᖅᑐᖅ 2008-ᒥ ᓇᓄᐃᑦ ᐃᓚᓕᐅᔾᔭᐅᖁᔭᐅᓪᓗᑎᒃ ᐆᒪᔪᓂᒃ ᓄᖑᓐᓂᐅᓴᓱᒋᔭᐅᔪᓂᒃ ᒫᓐᓇ ᐱᓕᕆᐊᖑᓕᕐᒥᖕᒪᑦ ᒐᕙᒪᑐᖃᒃᑯᑦ ᒥᓂᔅᑕᖓᓐᓄᑦ ᔨᒻ ᐳᕆᓐᑕᔅᒧᑦ. ᑕᒪᓐᓇ ᐊᑐᓕᖅᑎᑕᐅᓂᐊᕐᓂᖅᐸᑦ ᒐᕙᒪᑐᖃᒃᑯᓐᓄᑦ ᑖᒃᑯᐊ ᐊᐅᓚᔾᔪᑎᒃᓴᖏᓐᓂᒃ ᐋᖅᑭᒃᓱᐃᒋᐊᖃᕋᔭᖅᐳᑦ 2014-ᖑᓚᐅᖏᓐᓂᖓᓂ.

“ᓇᓄᓕᕆᓂᕐᒧᓪᓕ ᐊᐅᓚᔾᔪᑎᖃᑦᑎᐊᓕᕇᕋᑦᑕ ᐊᒻᒪᓗ ᑕᒪᓐᓇ ᐊᑐᖅᓯᒪᓕᕋᑦᑎᒍᑦ 1970-ᖏᓐᓂᑦ ᑕᐃᒪᓐᖓᑦ ᓇᓄᐃᑦ ᐊᒥᓲᓂᖏᑦ ᒪᕐᕈᐃᖅᓱᕐᓗᐊᕐᓗᒋᑦ. ᓱᕋᒃᓯᒪᓐᖏᑉᐸᑦ ᓱᖁᓯᓐᖏᓪᓗᒍ.” ᓂᖏᐅᑦᓯᐊᖅ ᐅᖃᓚᐅᖅᐳᖅ.

2008-ᒥ ᑭᕙᓪᓕᐅᑉ ᑕᓯᐅᔭᕐᔪᐊᖓᓂ ᓇᓄᒃᑕᐅᔪᓐᓇᖅᑐᑦ ᖃᑦᓰᓐᓇᕈᕆᐊᓚᐅᖅᓯᒪᕗᑦ 58-8. ᐊᒻᒪᑦᑕᐅᖅ ᒫᔾᔨ 2010-ᒥ ᓇᓄᒃᑕᐅᔪᓐᓇᖅᑐᑦ ᕿᑭᖅᑖᓘᑉ ᓴᓐᓂᕈᑎᐊᓂ ᖃᑦᓰᓐᓇᕈᕆᐊᓚᐅᕆᕗᑦ 105-ᓂᑦ 65-ᓄᑦ, ᑕᒪᓐᓇ ᓇᑲᑕᐃᓂᖅ ᐱᓂᐊᕐᓗᓂ ᐊᕐᕌᒍᓂᒃ ᑎᓴᒪᓂᒃ. ᓇᓄᓕᕆᔾᔪᑎᒋᔭᕗᑦ ᑕᒪᒃᑯᓂᖓ ᑐᐊᕕᕐᓇᖅᑐᖃᖅᑎᓪᓗᒍ ᐋᕿᒋᐊᑦᑕᐅᑎᒋᔪᓐᓇᓲᖑᕗᖅ.

“ᑕᕝᕙᓕ ᐃᓱᒫᓘᑎᒋᓛᕆᕙᕋ ᖃᐅᔨᒪᓂᖏᑦ ᐃᓄᐃᑦ ᐊᒻᒪ ᒐᕙᒪᒃᑯᑦ ᐆᒪᔪᓕᕆᔨᒃᑯᖏᑕ ᐃᑭᖃᕐᓂᖓᓂᒃ ᓱᓕ. ᒫᓐᓇ ᑕᒪᓐᓇ ᐃᑭᖅᑐᔪᐊᓘᖕᒪᑦ ᓱᓕ ᖃᓪᓗᓈᑦ ᖃᐅᔨᓴᕐᓂᖏᑦ ᐊᒻᒪ ᐃᓄᐃᑦ ᖃᐅᔨᒪᔭᖏᑦ. ᑕᕝᕙᓕ ᐃᓇᑦᓯᒐᔭᕈᒪ ᒐᕙᒪᑐᖃᒃᑯᑦ ᐊᕙᑎᓕᕆᔨᒃᑯᖏᓐᓂᒃ ᐅᑯᓄᖓᐅᒐᔭᖅᐳᖅ ᐱᓕᕆᔾᔪᑎᒃᓴᑦᑎᓐᓂᒃ ᐊᑐᐃᓐᓇᐅᑎᑦᑎᑎᐊᕐᓗᑎᒃ ᑕᒪᓐᓇ ᐃᓄᐃᑦ ᖃᐅᔨᒪᓂᖓ ᐊᒻᒪ ᖃᓪᓗᓈᑦ ᖃᐅᔨᓴᕐᓂᖓ ᐃᑭᑭᓪᓕᒋᐊᖅᑕᐅᖁᓪᓗᒋᑦ ᓇᓄᐃᑦ ᒥᒃᓵᓄᑦ.” ᓂᖏᐅᑦᓯᐊᖅ ᐅᖃᓚᐅᖅᐳᖅ.

-30-

ᑐᑭᓯᒋᐊᒃᑲᓐᓂᕐᕕᒃᓴᖅ:

ᕗᕋᐃᖕᑯ ᕘᓯᒥ
ᑐᓴᐅᒪᖃᑦᑕᐅᑎᓂᕐᒥᒃ ᐊᐅᓚᑦᑎᔨ
ᓄᓇᕗᑦ ᑐᓐᖓᕕᒃ ᑎᒥᖁᑎᖓ
ᐅᖄᓚᐅᑖᑉ: (867) 975-4939 ᐊᑭᖃᓐᖏᑦᑐᒃᑯᑦ: 1-888-646-0006