ᑐᓴᕋᑦᓴᓕᕆᔩᑦ

ᓄᓇᕗᑦ ᑐᙵᕕᒃ ᐃᑲᔫᑎᒃᓴᓕᕆᔨᒃᑯᑦ ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑎᒃᓴᑦ ᐊᑐᐃᓐᓇᐃᑦ

(ᕕᕝᕗᐊᓕ 2 – ᑲᖏᖅᖠᓂᖅ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓ (ᑐᙵᕕᒃ) ᖁᕕᐊᓱᑦᑐᖅ ᑐᓴᖅᑎᑦᓯᒋᐊᑦᓴᖅ ᑐᒡᓕᐊᓂ ᓴᖅᑮᓂᕐᒥᒃ ᓄᓇᕗᑦ ᑐᙵᕕᒃ ᐃᑲᔫᑎᒃᓴᓕᕆᔨᒃᑯᑦ (NTF) ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑎᒃᓴᓄᑦ ᑐᑦᓯᕋᐅᑎᓂᒃ. ᑐᑦᓯᕋᐅᓯᐅᕈᑎᒃᓴᑦ ᑕᑕᑎᕆᐊᓖᑦ ᐊᔪᕈᓐᓃᓴᕐᓂᕐᒧᑦ ᐃᖅᑲᓇᐃᔮᒧᓪᓗ ᐱᕙᓪᓕᐊᔾᔪᑎᒃᓴᓄᑦ ᐊᒻᒪᓗ ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑎᒃᓴᓂᒃ ᑐᑦᓯᕋᐅᓯᐅᕐᕕᑦᓴᐅᓂᐊᖅᑐᖅ ᕕᕝᕗᐊᓕ 1, 2021-ᒥᓂᒃ ᕕᕝᕗᐊᓕ 12, 2021-ᒧᓄᑦ ᖃᐅᔨᓴᐅᑦ 5-ᒧᓄᑦ ᐅᓐᓄᓴᒃᑯᑦ ᑭᕙᓪᓕᐅᑉ ᖃᐅᔨᓴᐅᑖᒍᑦ.

“ᐃᑲᔫᑎᒃᓴᓕᕆᔨᒃᑯᑦ ᑐᓂᓯᓚᐅᖅᑐᑦ 191-ᓄᑦ ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑎᓂᒃ ᐊᒻᒪᓗ 57−ᓂᒃ ᐱᓕᖕᒪᒃᓴᕐᓂᕐᒧᑦ ᐃᖅᑲᓇᐃᔮᒧᓪᓗ ᐱᕙᓪᓕᐊᔾᔪᑎᒃᓴᓄᑦ ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑎᓂᒃ 2020-ᒥ. ᐃᑲᔪᕈᓐᓇᓕᖅᑐᒍᑦ ᐊᒥᓲᓂᖅᓴᓂᒃ ᐃᓕᓐᓂᐊᖅᑎᓂᒃ ᐊᒻᒪᓗ ᑖᓐᓇ ᑐᒡᓕᐊᓂ ᓴᖅᑭᖅᑕᐅᔪᖅ ᐃᑲᔫᑎᖃᕐᓂᐊᖅᑐᖅ ᐃᓕᓐᓂᐊᖅᑎᓂᒃ ᑮᓇᐅᔭᑎᒍᑦ ᐃᑲᔫᑎᓂᒃ ᑲᔪᓯᒍᓐᓇᖁᓪᓗᒋᑦ” ᐅᖃᖅᑐᖅ ᔭᐃᒥᓯ ᐃᑦᑐᓗᒃ, ᐊᖓᔪᖅᑳᒧᑦ ᑭᖑᕝᕕᐅᑎᓯᒪᔪᖅ ᑐᙵᕕᒃᑯᓐᓂ.

ᑖᓐᓇ ᑐᑦᓯᕋᐅᓯᐅᖁᔨᔾᔪᑎ ᐊᑐᐃᓐᓇᐅᓂᐊᖅᑐᖅ ᐃᓕᓐᓂᐊᖅᑎᓄᑦ ᑐᓂᔭᐅᓯᒪᙱᑦᑐᓄᑦ NTF ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑎᓂᒃ 2020 ᑐᒃᓯᕋᐅᓯᐅᕐᕕᒃᓴᐅᑎᓪᓗᒍ.

NTF ᒪᕐᕉᓐᓂᒃ ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑎᒃᓴᓖᑦ:

  1. ᐊᔪᕈᓐᓃᐸᓪᓕᐊᓂᕐᒧᑦ ᐃᖅᑲᓇᐃᔮᒧᓪᓗ ᐱᕙᓪᓕᐊᔾᔪᑎᒃᓴᓂᒃ: $1,500 ᐊᑕᐅᓯᖅ ᑐᓂᔭᐅᓗᓂ, ᐃᓕᓴᕆᔭᐅᓯᒪᔪᒥᒃ ᐃᓕᓐᓂᐊᖅᑐᖅ ᐊᑦᑐᐊᔪᒥᒃ ᓴᓇᔭᕆᐅᖅᓴᓂᕐᒧᑦ/ᐃᖅᑲᓇᐃᔮᒧᑦ ᐊᔪᕈᓐᓃᖅᓴᐅᑎᒥᒃ ᓯᑕᒪᓂᒃ ᐱᓇᓱᐊᕈᓯᕐᓂᒃ ᓯᕕᑐᑎᒋᔪᒥᒃ ᐊᑯᓂᐅᓂᖅᓴᓘᓐᓃᑦ (ᐃᓚᒋᔭᐅᓪᓗᑎᒃ ᖃᐅᔨᓴᖅᑕᐅᒍᑎ ᓴᓇᔭᕆᐅᖅᓴᓂᕐᒧᑦ ᐃᓯᖅᐸᓪᓕᐊᓂᕐᒥᒃ, G.R.E.A.T.) ᐊᒻᒪᓗ ᖁᕝᕙᕆᐊᖅᑎᑦᓯᔪᓂᒃ ᐃᓕᓐᓂᐊᖅᓯᒪᔭᒥᓂᒃ (A.B.E., P.A.S.S., G.E.D., ᐱᒋᐊᕐᕕᖓ ᐊᕐᕌᒍ, ᐊᓯᖏᓪᓗ).
  2. ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑏᑦ: $2,500 ᐊᑕᐅᓯᖅ ᑐᓂᔭᐅᓗᓂ, ᐃᓕᓴᕆᔭᐅᓯᒪᔪᒥ ᐃᓕᓐᓂᐊᖅᑐᖅ ᓯᓚᑦᑐᓴᕐᕕᒻᒥ ᐅᕝᕙᓘᓐᓃᑦ ᐃᓕᓐᓂᐊᕕᔾᔪᐊᒥ ᐃᓕᓐᓂᐊᒐᑦᓴᒥᒃ ᒪᕐᕉᓐᓂᒃ ᐊᕐᕌᒎᓐᓂᒃ ᓯᕕᑐᑎᒋᔪᒥᒃ ᐊᑯᓂᐅᓂᖅᓴᓘᓐᓃᑦ ᐃᓕᓴᕆᔭᐅᔾᔪᑎᒻᒪᕆᑦᑖᕋᓱᐊᕐᓗᓂ ᐅᕝᕙᓘᓐᓃᑦ ᐸᕐᓇᓂᕐᒧᑦ ᐃᓕᓐᓂᐊᕈᑕᐅᔪᒥᒃ ᑎᑭᐅᑎᒍᑎᒃᓴᐅᓗᓂ ᐃᓕᓴᕆᔭᐅᔾᔪᑎᒻᒪᕆᑦᑖᕈᑎᒃᓴᒥᒃ ᐃᓕᓐᓂᐊᖅᑐᖅ.

ᑐᒃᓯᕋᐅᑏᑦ ᑐᓂᔭᐅᒍᓐᓇᖅᑐᑦ ᐊᐅᓪᓚᖅᑎᑕᐅᓗᑎᒃ ᑎᑎᖅᑲᓂᐊᕐᕕᒃᑯᑦ, ᐃᕐᖐᓐᓈᕈᑎᒃᑯᑦ, ᓱᒃᑲᔪᒃᑯᑦ, ᐅᕝᕙᓘᓐᓃᑦ ᓄᓇᑦᓯᓐᓂ ᑐᑦᑕᕐᕕᖓᒍᑦ.

ᑐᑭᓯᒋᐊᒃᑲᓂᕐᕕᒃᓴᖅ, ᖃᐅᔨᒋᐊᕐᕕᒋᓗᒍ:

ᓘᓯ ᒪᐃᓈᑦ

ᐱᓕᕆᐊᒃᓴᓕᕆᔨ

ᓄᓇᕗᑦ ᑐᙵᕕᒃ ᐃᑲᔫᑎᒃᓴᓕᕆᔨᒃᑯᑦ

ᑎᑎᖅᑲᖃᐅᑖ 280 ᑲᖏᕐᖠᓂᖅ, ᓄᓇᕗᑦ X0C 0G0

ᐅᖄᓚᐅᑖ. (867) 645-5400 ᐊᑭᖃᙱᑦᑐᖅ: 1-888-236-5400

ᓱᒃᑲᔪᒃᑰᕈᑖ: (867)645-5414

Download (PDF, 83KB)

Download (PDF, 108KB)

Download (PDF, 143KB)